Read Bafia ZYAŊ 9 Bible Online

ZYAŊ 9 - Bafia bible

ZYAŊ 9

¹Yɛ̀ɛ Yeesus à ghaghàghìyà, nni à ghɛngà ŋwaàdɛŋ ànɛ à yalɛ̀ngà rì tìɗyaŋ.

²Ɓɛ̀yilàg ɓii ɓɛ tɔg nyi lɛ: Raɓì, ŋwaànɛ à yalɛ̀ngà fɛlɛ rì tìɗyaŋ lɛ nyimiɗ yɛɛ kighà kìɓe gìn ɓɛ̀yalì ɓii?

³Yeesus à ɓàg lɛ: Ki yin lɛ nyimiɗ, nsoò lɛ ɓɛ̀yalì ɓii ɓɛɛ kighà kìɓe, wɔ̀lɛ ki ri lɔŋ fɔlɔɔ lɛ, di mɛ̀kìkìì mɛ Bɛ̀ll mɛɛ ghɛnɛn a lɔ̀ŋkii.

⁴Ki ghɛɛ̀sɛɛ lɛ ti ki ɓìsay ɓi roànɛ à romgày mɛ̀, di ŋwos a kaka, lɛ ìru wɛɛ̀ yùyuiy, wɛɛ̀wu mum àa ɓa ti ɓi ri bee inɛ à kì kìsay miì.

⁵Cààmɛ̀n ki ǹkaka ɓi ziinɛ, ǹɗì kìtɛɛtɛn ki ɓi ziinɛ.

⁶Yɛ̀ɛ à kpaaghà fɔlɔɔ, nni à tuughà tìtyɛɛ̀ ɓi zi, à kì kìtɔ̀tɔ̀ɓ rì tìtyɛɛ̀ tii, à siŋì ŋwaànɛ̀n ɓi mis,

⁷à kpaa nyi lɛ: Kɛ̀na kìsòo ìsu ɓi kìɗig ki a Silowe; ɗii ɗìn ɗi ri azi lɛ: Ǹɗomɛn. Nni ɗyaŋɗyàŋ à kɛ̀ngà, à sòò ìsu, à sugtìì di à mɛ ghɛnɛ̀n.

⁸Ɓumɓɛ ɓɛ woŋzɛ̀ngà mɛɛ ri ɓɔ, rì ɓɛ̀roɓɛ ɓɛ nghɛngì nyi abɛ̀y di a lɔnlɔn ɓyom ɓi bee, ɓɛ kpaakpàà lɛ: Àa ŋwaànɛ yɛɛ nti à kɔ̀ràg fɛ à lɔnlɔ̀n ɓum ɓyom?

⁹Ɓɛ̀ro ɓɛdɛŋ ɓɛ kpaaghà lɛ nnyɛɛ ri, ɓɛ̀ro ɓɛmbog lɛ àg! Àa nyi yɛɛ ri, lɔŋ kìpisɛn kii kɛɛ ri. Wɔ̀lɛ nyimiɗ a ki kpaakpaa lɛ: Lɔŋ mɛ̀ yɛɛ ri.

¹⁰Nni ɓɛ tɔkà min nyi lɛ: Mis mɔɔ maa ghɛnɛɛ di ki ɓaa là?

¹¹Nni à ɓakà ɓɔ lɛ: Ŋwaànɛ ɓɛɛ̀ regi lɛ Yeesus yaa tɔɓi zi, à siŋì mɛ̀ ɓi mis, à kpaa mɛ̀ lɛ: Kɛ̀na kì sòo ìsu ɓi Silowe. Fɔɔnnɛ màa kɛ̀ɛ, ǹsòò ìsu, ǹghɛnɛ̀n.

¹²Nni ɓɛ tɔkà nyi lɛ: Ŋwaà ǹcèm à rì fe? Nyii pɛɛ̀zì lɛ: Mɛ̀ ǹ-yii ɓi.

¹³Fɔɔnnɛ ɓɛ kɛǹgà rì ŋwaànɛ à ka ɓaghà rì tìɗyaŋ ànɛ̀n a Ɓɛ̀fàrìzyɛŋ.

¹⁴Kɔɔ ki ɓaghà foo lɛ, ŋwosi Saɓàt nnɛ Yeesus à tɔɓkà zi, à kì lɛ, mis mɛ ŋwaànɛ̀n mɛɛ ghɛnɛn.

¹⁵Fɔlɔɔ nnɛ Ɓɛ̀fàrìzyɛŋ ɓɛ tɔkà girig ŋwaànɛ̀n lɛ, a kali ɓɔ lannɛ kaa kìlɛɛ lɛ a ghɛnɛn. Nni à kpaaghà ɓɔ lɛ: Àa siŋii mɛ̀ kìtɔ̀tɔ̀ɓ ɓi mis, ǹsòò ìsu, nnɛ nghɛɛghɛnɛ̀n lɛ.

¹⁶Fɔɔnnɛ Ɓɛ̀fàrìzyɛŋ ɓɛdɛŋ ɓɛ kpaaghà lɛ: Ŋwaànɛ à pɛ̀sɛɛ yì ɓi yɛ̀ɛ Bɛ̀ll ɓisuulɛ à cèlii ɓi Saɓàt. Ɓɛ̀ro ɓɛmbog ɓɛ tɔg lɛ: Lannɛ ǹkìì-kìɓe a rì lɛ à kì mɛ̀kuu mɛ dàm yɛ̀ɛ mɛ?

¹⁷Fɔɔnnɛ ɓɛ ghasɛ̀ngà gàɓ yiɓɛɛ̀; ɓɛ tɔgtì ɗyaŋɗyàŋ ànɛ̀n lɛ: Ɓi ɓɛg wɔ̀ɔ̀, wɔ̀ɔ̀ kpaa la ɓi kìɓan ki ŋwaànɛ àa kìi lɛ mis mɔɔ mɛɛ ghɛnɛn? Nni ŋwaànɛ̀n à pɛ̀ɛ̀zìghà ɓɔ lɛ: Mɛ̀ ǹghɛɛ lɛ à rì ǹkpaŋzì-ɓìɓan.

¹⁸Ɓɛ̀yudɛ̀n ɓɛ gherɛ̀ngà ɓi lɛ ŋwaànɛ̀n à ka ɓaghà rì tìɗyaŋ nni à mɛ ghɛnɛ̀n, cààmɛ̀n ki ɓɛ ɓaghà di ɓɛ ka reŋii ɓi ɓɛyalì ɓii.

¹⁹Fɔɔnnɛ ɓɛ tɔkà ɓɛ̀yalì ɓii lɛ: Man wiǹ ànɛ ɓi kpaaghi lɛ à yalɛ̀ngà rì tìɗyaŋ yɛɛ ri lɛ? Nni lannɛ à ti ɓiì ghɛnɛɛghɛnɛ̀n ɓigomìnɛ?

²⁰Ɓɛ̀yalì ɓii ɓɛ ɓaàg lɛ: Ɓìsii yii lɛ man wìs yɛɛ ri lɛ, à ki yalɛ̀ngà rì tìɗyaŋ.

²¹Kìɓan kifog, tì yii ɓi com ki ki kiì lɛ a ghɛnɛn, tyɛ̀ ki ki yi nsoò ŋwaànɛ àa ŋwàri nyi mis. Tɔɔghna nyi, à ti ǹsɛ̀ɛ̀mɛn ɓi lèg ànɛ lɛ à ɓàg kìɓan ki ki seesee nyi.

²²Ɓɛ̀yalì ɓii ɓɛ kpaaghà fɔlɔɔ ɓisuulɛ, ɓɛ rirìsìghà Ɓɛ̀yudɛ̀n; rì tì lɛ Ɓɛ̀yudɛ̀n ɓɛ ɓaghà di ɓɛ mɛ wooghrɛn jɛ̀ɛ̀ lɛ, ŋwaànɛ à gherɛɛ lɛ Yeesus à rì Kiris, ɓɛ ren nyi ɗii ɓi naà-bɔ̀ŋzɛ̀n.

²³Kìɓan kiǹ kɛɛ kighà lɛ ɓɛ̀yalì ɓii ɓɛɛ kpaa lɛ: À ti ǹsɛ̀ɛ̀mɛn, tɔɔghna nyi.

²⁴Fɔɔnnɛ Ɓɛ̀fàrìzyɛŋ ɓɛ reŋìghày tì ŋwaànɛ à ka ɓaghà ànɛ̀n rì tìɗyaŋ, ɓɛ kpaa nyi lɛ: Kali saaɗ ɓi mis mɛ Bɛ̀ll ɓìsii yii lɛ ŋwaànɛ̀n à rì ǹkìì-kìɓe.

²⁵Nni ŋwaànɛ̀n à ɓàkà lɛ: Mɛ̀ ǹ-yii ɓi nkòo à rì ǹkìì-kìɓe; com ki mɛ̀ ǹ-yii ki ri lɛ, m̀ɓalag ri tìɗyaŋ, nni m̀mɛ ghɛnɛn ɓigomìnɛ.

²⁶Ɓɛ tɔkà nyi lɛ: Cɛ kɛɛ̀ ki àa kìi wɔ̀? Lannɛ àa kìi lɛ mis mɔɔ mɛɛ ghɛnɛ̀n?

²⁷À ɓàg ɓɔ lɛ: Màa kpaa mìni kìɓan ki, kɛ̀ ɓi kɔ̀n lɛ ɓi wog. Ɓisuucɛ nnɛ ɓi kɔ̀nkɔn lɛ ɓi wogti kɔ? Ɓi kɔ̀nkɔn girig lɛ ɓi ɓa ɓɛ̀yilàg ɓii?

²⁸Fɔɔnnɛ ɓɛ sɛmgàkà ŋwaànɛ̀n, ɓɛ kpaa nyi lɛ: Wɔ̀ yɛɛ ri ǹ-yilàg wìì, ɓìsii ri ɓɛ̀yilàg ɓɛ Moyis.

²⁹Tì yii lɛ, Bɛ̀ll à tòòghrɛ̀ngà rì Moyis; wɔ̀lɛ roànɛ, tì yii ɓi fennɛ à pɛ̀sɛɛ yì.

³⁰Ŋwaànɛ̀n à ɓàg ɓɔ lɛ: Kìɓan ki ki yeesɛɛ rìwog ki ri lɛ, mìnii yii ɓi fennɛ à pɛ̀sɛɛ yì, wɔ̀lɛ nyaa ki ŋwàri mɛ̀ mis!

³¹Tì yii lɛ Bɛ̀ll à ti kɛ̀ɛ wog bɔ̀ŋzɛ̀n yi ɓɛ̀kìì-kìɓe, kìɓan kifog, à ti à wokì bɔ̀ŋzɛ̀n yi ŋwaànɛ à kuuraagh nyi, à ki kìlag rikɔ̀n ɗii.

³²Tì ka wokà ɓi di ɓɛɛ̀ kpaakpaa lɛ, ŋwaàdɛŋ à mɛ kìghà lɛ mis mɛ ŋwaànɛ à yalɛɛ rì tìɗyaŋ mɛɛ ghɛnɛ̀n.

³³I ŋwaànɛ kɛ̀ɛ ɓay yɛ̀ɛ Bɛ̀ll, di à yin lɛ à kì com.

³⁴Nni ɓɛ ɓakà nyi lɛ: Wàànɛ ù yalɛ̀ngà ɓi kìɓe wɛ̀ɛmiɗ bimiɗ, wɔ̀ yɛɛ̀ kɔ̀nkɔn lɛ u resag ɓìsi? Fɔɔnnɛ ɓɛ naɓkà nyi.

³⁵Yɛ̀ɛ Yeesus à wokà lɛ, ɓɛ nnàɓi ŋwaànɛ̀n, nni à tuusɛ̀ngà rì nyi, à kpaa nyi lɛ: Ù gherɛɛ nya Man à mum?

³⁶Ŋwaànɛ̀n à pɛ̀ɛ̀zì nyi lɛ: Nnyɛɛ ri ghɛn Kan, yɛ̀ɛ ǹɗì lɛ ǹgherɛ̀n nyi?

³⁷Yeesus à kpaa nyi lɛ: Ù mɛ ghɛn ancèm, nyimiɗ yɛɛ̀ ki tòtog lɛ rì wɔ̀.

³⁸Fɔɔnnɛ ŋwaànɛ̀n à kpaaghà lɛ: Kan ǹgherɛɛ; à ɓag mɛ̀ɗu ɓi zi, à ɓɔgsì nyi.

³⁹Yeesus à kalì min nyi lɛ: Ǹ-yùghà ɓi ziinɛ lɛ rìren ɗi ɓìɓan ɗyɛɛ ghɛnɛn lèg ànɛ lɛ, ɓumɓɛ ɓɛ ri rì tìɗyaŋ ɓɛɛ ghɛnɛn, ɓɛ̀roɓɛ ɓɛɛ̀ ghɛɛghɛnɛ̀n ɓɛ ɗiŋì tìɗyaŋ.

⁴⁰Yɛ̀ɛ Ɓɛ̀fàrìzyɛŋ ɓɛdɛŋ ɓɛ Yeesus à ɓaghà rì ɓɔ ɓɛ wokà ɓìtòkì ɓiǹ, ɓɛ tɔg nyi lɛ: Ɓìsii ri nya girig rì tìɗyaŋ?

⁴¹Yeesus à ɓàg ɓɔ lɛ: I ɓyàa rì rì tìɗyaŋ, di ɓì yiǹ lɛ ɓì ɓa rì kìɓe; nni yɛ̀ɛ ɓi kpaakpaa lɛ ɓi ghɛɛghɛnɛ̀n, fɔlɔɔ nnɛ kìɓe kin ki kaka.