Read Bafia MƐ̀KÌKÌÌ MƐ ƁƐKƐ̀NÌ-FÌTOM 1 Bible Online

MƐ̀KÌKÌÌ MƐ ƁƐKƐ̀NÌ-FÌTOM 1 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 1

¹Tyoofil, ɓi kaàtà wɛ̀m à ǹtonto, ǹkalìghà ɓìɓan ɓìcèm ɓi Yeesus à Kìghà, rì ɓi à rèsàkà, à tumɛ̀n a rìtumɛ̀n

²à kpaŋ ŋwos anɛ à ɓaa lɛ, à mɛ reɓsag ɓiɓan ɓii rì ìtèɗ wu Kitɛntɛ̀ɛ̀n ki Nghay rì ɓɛ̀kɛ̀nì-fìtom ɓɛ̀ à ɓɔ̀ngà, à ɓɔg min aɗyoo.

³Ajɛ̀m ì rìwu ɗii, à rèsɛ̀ngà ɓɔ, à ki rèsi ɓɔ ɓìrèmzɛnà lɛɛ̀gwey ɓi lɛ ɓɛɛ yi lɛ à rì cem; à rèsɛ̀ngà a lɔ̀ŋkaa, mɛ̀ru mɛ̀tin mɛɓɛɛ̀, à kakàlì ɓɔ ɓìɓan ɓi ɓi seesee kìlɔ̀ŋ ki Bɛ̀ll.

⁴Ŋwos adɛŋ ànɛ Yeesus à ɗiɗìghà ǹɗaŋ ɗi ɓɛ̀yilàg ɓii, nni à siŋdɛ̀ngà ɓɔ lɛ: Kɛ̀ ɓi Pɛ̀sɛn a Yorisalɛm, ɓoŋina lɔŋ ǹkàg wu Tààta à kàkà mìni, wɛɛ̀wu ǹwogsìghà mìni;

⁵lɛ Zyaŋ à ɓàɓtìghà ɓum ɗì mɛ̀nig, kìɓan kifog mìnii ri ɓiì ɓàɓtɛɛ ri Kìtɛntɛ̀ɛ̀n ki Nghay di ɓɔɔ mɛru ɓɛ ghaghii.

⁶Ɓɛ̀yilàg ɓɛ ɓaghà nyi ɓɛ̀taŋzɛn a nyòò, nni ɓɛ tɔkà nyi lɛ: Kan! Cààmɛ̀n ki kɛɛ̀ki ù rì nya ɓiì pɛ̀ɛ̀zii ki rɛsii kilamì ki Isirayɛl miì?

⁷Nni Yeesus à ɓàkà ɓɔ lɛ: Ki seesee ɓi mini lɛ ɓi yi gòn nsoò lɛ cààmɛ̀n ki Tààta nyimiɗ yɛɛ rengà rì ìtèɗ wii wu rilàmì.

⁸Kìɓan kifog ɓì ɓiì terì ìtèɗ wudɛŋ di Kìtɛntɛ̀ɛ̀n ki Nghay ki yuuyì ɓi mìni, fɔɔnnɛ ɓì rì ɓiì ɓaà ɓɛ̀wusìnɛ̀ɗ ɓɛm à tumɛ̀n a Yorisalɛm, à kpaŋ ɓi ziì Zyude bimiɗ, rì a Samari, à kɛ̀n kì kpaŋì a ɓɛ̀yɔ̀ŋyɔ̀ŋ ɓɛ zi.

⁹Lɔŋ yɛ̀ɛ à kpaaghà fɔlɔɔ, nni à tumɛ̀ngà rìɓɔg aɗyoo, ɓɛ̀roɓɛ̀n ɓɛ seesèè yɛ̀ɛ à ɓɔɓɔ̀kà à ràm à ɗim ɓɔ ɓi mis, di kìkwìɗ ki mɛ lɔg nyi.

¹⁰Nni yɛ̀ɛ ɓɛ cɛɛnɛ̀ngà fɔlɔɔ mis aɗyoo, cààmɛ̀n ki Yeesus à ɓɔkà, fɔɔnnɛ ɓɛ sigmɛ̀ngà di ɓum ɓɛ ti ɓɔ asu ɓɛɓɛɛ̀, rì ɓìlàà ɓi puɓ,

¹¹ɓɛ kpaa ɓɔ lɛ: Mini ɓumɓɛ a Galile ɓɛ! Ɓi cɛ nnɛ ɓi cɛɛnɛɛ foo mis aɗyoo? Yeesus ànɛ à pɛ̀sɛɛ ànɛn ɓi nyìinyìm wìn, à ɓɔg aɗyoo, à ri sugtiigɛy lɔŋ yɛ̀ɛ ɗi ɓì ghɛɛ nyi ɗìn di a ɓɔɓɔg aɗyoo.

¹²Fɔɔnnɛ ɓɛ̀yilàg ɓɛ sugtìghà min a Yorisalɛm, lɛ ɓɛ ɓaghà ɓi dòn ìnɛ ì ɓaghà ɗii lɛ, dòn ì ɓɛ̀òlìvyee, yɛ̀ɛ raɓsɛ̀ngà rì Yorisalɛm com ki kpaŋɛn bimiɗ à kilòmɛɛ̀tìrɛ̀.

¹³Yɛ̀ɛ ɓɛ kpagà a Yorisalɛm, ɓɛ ɓɔg ɓi mɛɛ mɛ aɗyoo, ɓi kìden ki naa ki ɓɛ nkɔ̀ràg miì; ɓɛ ɓaghà lɛ: Rì Pyɛɛri, rì Zyaŋ, rì Zyag, rì Andire, rì Filiɓ, rì Tomas, rì Batelemi, rì Matyoo, rì Zyag à man à Alfe, rì Simɔn ànɛ à ɓaghà ɓi nɗaŋ wu ɓɛ̀zelot ri Zyuudɛ à man à Zyag.

¹⁴Ɓɛ ǹti ɓɛ taŋzàg ɓɔɔ̀cèm lɔŋ nɗem wùfog lɛ ɓɛɛ ɓɔŋzag Bɛ̀ll, ǹɗaŋ ri ɓɛ̀yiɓ, rì Marii à jɛɛ Yeesus, rì ɓɛ̀geni ɓɛ Yeesus.

¹⁵Ŋwos adɛŋ, ɓi mɛ̀ru mɛ̀n, ɓɛ̀gherɛ̀n ɓɛ ɓaghà ɓɛ̀ taŋzɛn nunùg ɓum mɛ̀tin taàfog; nni Pyɛɛri à pɛ̀sɛ̀ngà aɗyoo ɓi nyìinyìm wàà, à kpaa lɛ:

¹⁶Ɓɔɔsoŋ̀! kìɓan ki Kìtɛntɛ̀ɛ̀n ki Nghay ki lokà kì rèsii ɓi kaàtà à Bɛ̀ll, ɓi ŋwɔm wu Davit, ki rarɛ̀n ɗì Zyudas ànɛ à syògày ɓumɓɛ ɓɛ ɓangà Yeesus bee, ki ghɛɛ̀sɛ̀ngà lɛ kɛɛ kilɛ̀n.

¹⁷Zyudas àa nɗì kìbog ki ɓi ǹɗaŋ wis, àa nki rì rì gàɓ ɓi kìsay ki tì rì rì kɔ.

¹⁸Ŋwaànɛ̀n à làkà dɛm ri mɛ̀lèɓ mɛ à fɔ̀ngà ɓi kìɓe kii, à ki kpì ǹto duŋzi kìbuutug ki lanì, ɓyom ɓii ɓi ɗùm ɓi tyaŋzɛ̀n.

¹⁹Ɓum ɓɛ̀cèm ɓɛ a Yorisalɛm ɓɛ yighà kìɓan kiǹ, kɛɛ kighà lɛ ɓɛɛ reŋi dɛm inɛ̀n ɓi kìtòkì kaa lɛ Akɛldama, yɛɛ lɔɔ lɛ, dɛm i bwaɓ.

²⁰Wɔ̀lɛ ki ri kì kànɛn ɓi kaàtà à Ɓɛ̀sam lɛ: Ɓɛ ghɛɛ̀sɛɛ kì rinii mɛɛ mii, mum kɛ̀ɛ kɔ̀ri miì, ri tì lɛ: Ŋwaàdɛŋ à ghɛ̀ɛ̀sɛɛ kì terì ìkɔ̀ɔ̀ wii wu kisày.

²¹Ki ghɛɛ̀sɛɛ lɛ, yɛ̀ɛ ɓum ɓɛdɛŋ ɓɛ kɛɛ̀kɛ̀ɛ̀ghà rì ɓìsi cààmɛ̀n kìcèm ki Kan Yeesus à rerènìghà kìlɔ̀ŋ nɗaŋ ri ɓìsi,

²²à tumɛ̀n lɔŋ yɛ̀ɛ Zyaŋ à ɓàɓtìghà nyi à kpaŋ yɛ̀ɛ àa m̀pɛsɛɛ ɓi nyìinyìm wìs a ɓɔg aɗyoo, kìbog ki ɓi ɓɔ kɛɛ ɓasɛn ɗì ɓìsi lɛ kɛɛ ɓa wusìnɛ̀ɗ ɓi rìghèmɓɛ̀n ɗii.

²³Fɔɔnnɛ ɓɛ rɛsìghà min ɓum ɓɛɓɛɛ̀ lɛ rì Yoosɛɓ ànɛ à ɓaghà ɗii lɛ Ɓarisaɓas, nyinnɛ ɓɛ nkpɔgì tì lɛ Yustus, rì Matyas.

²⁴Nni ɓɛ ɓɔŋzìghà Bɛ̀ll ɓɛ kpaa lɛ: Kan, wɔ̀ yɛɛ yii mɛ̀rem mɛ ɓum ɓɛ̀cèm, rèsi ɓìsi ghɛn innɛ ù ɓɔ̀ni ɓi ɓum ɓɛ kiɓɛ̀ɛ̀ ɓɛ

²⁵lɛ a teɗ ìkɔ̀ɔ̀ wu nkɛ̀nì-fìtom wu Zyudas àa ncàri, à kɛ̀n kì terì wu wu nghɛ̀ɛ̀sɛɛ rì nyi.

²⁶Fɔɔnnɛ ɓɛ pikà ǹtɔ̀ŋ rì mii maa, ǹtɔ̀ŋ à kpì ɓi ɗii ɗi Matyas, ɓɛ ɓas min nyi rì kìntɛ̀ɗ ɗì bog ki ɓɛ̀kɛ̀nì-fìtom kimbog.