Read Bafia MƐ̀KÌKÌÌ MƐ ƁƐKƐ̀NÌ-FÌTOM 10 Bible Online

MƐ̀KÌKÌÌ MƐ ƁƐKƐ̀NÌ-FÌTOM 10 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 10

¹Ŋwaàdɛŋ à ɓaghà a Sezare ɗii lɛ Kɔrinɛy, à kɔ̀mɛ̀ngà ɓɛ̀sujàà mɛ̀tin mɛtaǹ ɓi ǹɗaŋ wu ɓɛsujàà wu a Italii.

²Ŋwaànɛ̀n à falɛ̀ngà ɓi ɓìɓan ɓi righerɛ̀n, àa nki risàg Bɛ̀ll lɛ rì nyi ɗì rìmɛɛ ɗii ɗicèm, à ki fafa Ɓɛ̀yudɛ̀n ɓɛ ɓɛ ɓaghà nyìighnyìg ɓyom lɛɛ̀gwey, à ɓɔ̀ɔ̀ɓɔ̀ŋzàg Bɛ̀ll ɓyààmɛ̀n ɓìcèm.

³Ŋwos adɛŋ, di mɛ̀kɛ̀ɛ̀ mɛraa à ŋwos ǹkɛ̀nɛn à tiì, Kɔrinɛy à ghɛngà lɔŋ yɛ̀ɛ ɓìdɛ̀ndɛm di ŋwaà-fìtom a Bɛ̀ll à ɗiŋii yì a lɔ̀ŋkii, à kpaa nyi lɛ: Kɔrinɛy wɔ̀!

⁴Nni à fiɓìghà ŋwaà-fìtom lɛ fyɛɛɛyi, à risì, à tɔg nyi lɛ: La yɛɛ ri Kan? Ŋwaàfìtom a ɓàg nyi lɛ: Bɛ̀ll àa ǹghàɓi lɛ, rì bɔ̀ŋzɛ̀n yɔɔ, rì gɛ ɓyom ànɛ ù ti ù fafà ɓum ɓɛ nyìighnyìg, fɔɔnnɛ à ɗimzɛɛ ɓi wɔ.

⁵Rom ɓum a Zyope ɓigomìnɛ, lɛ ɓɛɛ kɛǹ kì terìì ŋwaàdɛŋ wɔɔ, ɗii lɛ Simɔn ànɛ ɓɛɛ kpɔgi tì lɛ Pyɛɛri.

⁶À kɔ̀kɔrii yɛ̀ɛ ŋwaàdɛŋ lɛ Simɔn ǹkìì-gòò ànɛ à toŋi ɓi nwɔŋì wu rìɓày à kìkòn.

⁷Lɔŋ yɛ̀ɛ ŋwaà-fìtom ànɛ à tòtòkà ɗì nyi à ghaghìghà, Kɔrinɛy à ghàs kì reŋii ɓɛ̀kìì-ɓìsay ɓii ɓɛɓɛɛ̀ rì kìbog ki ɓi ɓɛ̀sujàà ɓɛ à làmìghà, sujàà ànɛ̀n à ɓaghà ǹfalɛn ɓi rìgherɛ̀n;

⁸fɔɔnnɛ à kpaaghà ɓɔ kìɓan kicèm ki ki ghaghìghà à ki rom min ɓɔ a Zyope.

⁹Ɓi duri tana, yɛ̀ɛ ɓumɓɛ̀n ɓɛ kɛnkɛ̀ngà, di ɓɛ mɛ wuɓsɛn bànì Zyope, Pyɛɛri à ɓɔkà kì kìi bɔ̀ŋzɛ̀n ɓi mɛɛ aɗyoo di toroɓ à ti jàŋbog.

¹⁰Nni zày ì kɔ̀ngà Pyɛɛri, à kɔ̀n lɛ a ɗi com; ɓi cààmɛ̀n ki ɓɛ kikìghà nyi ɓìɗilàg, nnɛ à sìgmɛ̀ngà di à mɛ cɛɛnɛn mis ɓìkpaŋ.

¹¹À ghɛngà ɗyoo ɗì nɛmɓɛn à ki ghɛn di com ki riì wɔɔ fɛlɛ yɛ̀ɛ coo sànjà ànɛ à rì mɛ̀keɓ mɛsugakɛn, ki sɛnsɛ̀n yì ɓi zi.

¹²Ɓyom ɓi ɓaghà ɓi sànjà ànɛn lɛ: Nyàm yi kɛ̀ɛ̀kɛɛyɛn mɛkòò mɛnin mɛ̀kuu mɛ̀cèm, rì yi wɔwɔghɛn ɗì ɗùm, rì tììlì ti aɗyoo mɛ̀kuu mɛ̀cèm.

¹³Pyɛɛri à wog di jɛ̀ɛ̀ ìdɛŋ yɛ̀ɛ kpaakpaa nyi lɛ: Pyɛɛri! Pɛ̀sɛn aɗyoo, ù wey nyam foo bog di u ɗi.

¹⁴Nni Pyɛɛri à ɓàkà lɛ: Àg, Kan! Mɛ̀ ǹka ɗighà ɓi com ki ki ri ɓaa, nsoò ki ki ri kìsyeg ŋwos adɛŋ.

¹⁵Fɔɔnnɛ jɛ̀ɛ̀ ìnɛn ì kpaatìghà nyi ɓi gɛ̀n i kìɓɛ̀ɛ̀ lɛ: Kɔ̀ɔ kì lɛ: Com ki Bɛ̀ll à kpaa lɛ ki ri kɛ̀ɛ̀ kìsyeg, wɔ̀ɔ̀ kpaa lɛ, ki ri rì kìsyeg.

¹⁶Kìɓan kiǹ ki ɓiìtɛ̀ngà fɔlɔɔ gɛ̀n yiraa, ajɛ̀m ìnɛn nnɛ sànjà ànɛn à sugtìghà kì ɓɔɔ̀gh aɗyòò.

¹⁷Cààmɛ̀n ki Pyɛɛri à kaakaa lɛ, a yi azi anɛ ɓi kìɓan ki à ghɛngà kiǹ, kɛɛ̀ki ɓumɓɛ Kɔrinɛy à romgày ɓɛ tɔtɔghiì mɛɛ mɛ Simɔn, ɓɛ yu, ɓɛ rɛlì asuunaa,

¹⁸ɓɛ regì ɓum, ɓɛ tɔg ɓɔ lɛ: A mɛɛ mɛ innɛ Simɔn ànɛ ɓɛ ti ɓɛ kpɔgì lɛ Pyɛɛri à kɔ̀kɔrii wa?

¹⁹Yɛ̀ɛ Pyɛɛri à ɓaghà lɔŋ ɓiì fèfeegh kìɓan ki à ghɛngà, nni Nghay à Bɛ̀ll à kpaaghà nyi lɛ: Wɛɛ̀ nnɛ ɓum ɓɛɛ tɔtɔg lɛ ɓɛ̀sɛ̀ɛ̀ ɓɛraa.

²⁰Pɛ̀sɛn, u sɛn ɓi zi, ù kɛǹ rì ɓɔ, kɔ̀ɔ risi, ɓisuulɛ mɛ̀ yɛɛ nɗomiì ɓɔ.

²¹Fɔɔnnɛ Pyɛɛri à sɛngà min, à tanɛ̀n ɓumɓɛ̀n, à kpaa ɓɔ lɛ: Ɓɔɔsoŋ̀! Mɛ̀ɛ nɛ lɛ, mɛ̀ yɛɛ rì ŋwaànɛ ɓi kaakàà, nni ɓì yùu yì fɛ ɓi ǹto wu kiɓan aɗi?

²²Nni ɓɛ ɓakà nyi lɛ: Tì yùu yì fɛ lɛ ǹkɔ̀mɛ̀n ɓɛ̀sujàà ànɛ lɛ Kɔrinɛy yɛɛ romiì ɓìsi a lɔ̀ŋkɔɔ, àncèm à rì saaɗ à mum ànɛ à ti à risàg Bɛ̀ll, à ki rì tì ŋwaànɛ Ɓɛ̀yudɛ̀n ɓɛ̀cèm ɓɛɛ̀ Sɛsɛ̀g; ŋwaà-fìtom a Bɛ̀ll àa ǹkpaa nyi lɛ a regiì wɔ̀ a mɛɛ mii, a wog jɛ̀ɛ̀ ìnɛ ù rì lɛ ù kpaa nyi.

²³Nni Pyɛɛri à kpaaghà ɓɔ lɛ ɓɛɛ ɗiŋi ɓi naa, à reɓ ɓɔ jàŋ inɛ ɓɛɛ lày; ɓi duri tana nnɛ ɓɛ pɛsɛ̀ngà ǹɗaŋ rì ɓumɓɛ̀n, ɓɛ kɛǹ. Ɓɛ̀gèni ɓii ɓɛ righerɛ̀n ɓɛdɛŋ ɓɛ a Zyope ɓɛ kɛǹgà nyi kì foŋì.

²⁴Nni ŋwos anɛ à ɓɔ̀ɓkà ànɛn nnɛ ɓɛ kpagà a Sezare, Kɔrinɛy à ɓoŋɓòŋgà ɓɔ lɛ rì naa yìì ì ɓum, rì mɛ̀ghan mii mɛ à reŋɗɛ̀ngà.

²⁵Yɛ̀ɛ Pyɛɛri à kpagà wɔɔ, Kɔrinɛy à kɛ̀n nyi ki ghàɓi, à kpi nyi à mɛ̀kòò lɛ a fa nyi bɔgsɛ̀n.

²⁶Nni Pyɛɛri à ɓangà nyi lɛ a pɛsi nyi aɗyoo di a kpaakpaa lɛ: Pɛ̀sɛn yì aɗyòò lɛ mɛ̀ ǹɗì girig romum yɛ̀ɛ wɔ̀.

²⁷Fɔɔnnɛ à ɗiŋìghà ɓi naa di ɓɛɛ̀ tòtog lɔŋ lɛ rì nyi rì Kɔrinɛy, à tanɛ̀n ɓum lɛ kùnag kùnag,

²⁸à kpaa ɓɔ lɛ: Ɓì yii lɛ Ɓɛ̀yudɛ̀n ɓɛ ri ɗì coo ǹsiŋdɛn wudɛŋ lɛ, mum waà kɛ̀ɛ ràrɛn ɗi muu cee-rìkuu, kɛ̀ɛ̀ ki ɗiŋi naa ì roànɛ̀n, nni ɓi ɓɛg ànɛ a lɔ̀ŋkɛm̀, Bɛ̀ll àa ǹɗèsii mɛ̀ lɛ, ǹghɛ̀ɛ̀sɛɛ tì ɓi ki ghɛɛ̀ ŋwaàdɛŋ lɛ à rì rì ɓìsyeg, kɛ̀ɛ nki cèli ti mum lɛ, à yin ntɛnɛn ɓi mis mɛ Bɛ̀ll.

²⁹Fɔɔnnɛ ǹ-yùu yì miì kɛ̀ɛ̀ tìkàna ɓì ǹɗeèghreŋi wu wàa regii mɛ̀; nkɔ̀nkɔn lɛ, di màa yii ǹto wu kiɓan wu wàa regii mɛ̀ miì.

³⁰Nni Kɔrinɛy à ɓàkà lɛ: Gɛɛ̀nɛ mɛ̀ru mɛraa nnɛ mɛ nkìkii bɔ̀ŋzɛ̀n ɓi kìden kɛ̀m ki naa cààmɛ̀n à mɛ̀kɛ̀ɛ̀ mɛraa à ŋwos. Nni mɛ̀ɛ ǹsìgmɛ̀ɛ di mum à mɛ rɛli mɛ asu, ɓìlàà ɓii ɓi lònlòm lɛ syaŋ̀syaŋ̀ à kpaa mɛ̀ lɛ:

³¹Kɔrinɛy Bɛ̀ll àa nwoogh bɔ̀ŋzɛ̀n yɔ̀ɔ̀, à ki yiti gɛ ɓyom ànɛ ù ti ù fafà ɓum ɓɛ nyìighnyìg.

³²Nni rom ɓum a Zyope ɓɛɛ regiì Simɔn ànɛ ɓɛ ti ɓɛ kpɔgì lɛ Pyɛɛri a yuiy; à kɔ̀kɔrii yɛ̀ɛ Simɔn à m̀pègsɛ̀n-gòò ɓi bèn ì rìɓày à kìkòn.

³³Fɔɔnnɛ mɛ̀ɛ nghàsi kì romìì ɓum lɛ ɓɛɛ yu wɔ̀ kì reŋii. Ù konaagh yɛ̀ɛ ù yùu yì. Nni ɓigomìnɛ tì rì yɛɛ lɛ ɓi mis mɛ Bɛ̀ll, lɛ ti wog com kìcèm ki Kan àa kpaa lɛ wɔ̀ɔ kali ɓìsi.

³⁴Pyɛɛri à pɛ̀sìghà min ɓitòkì, à kpaa lɛ: Ɓi saaɗ ǹkonaagh kì ghɛɛ̀ gɛɛ̀nɛ lɛ, Bɛ̀ll à yin ɗi ǹɗèè wu ǹɗem

³⁵ǹki ghɛɛ̀di lɛ, mum bimiɗ ànɛ à risii Bɛ̀ll à ki kìki ɓiɓan ɓi saaɗ, Bɛ̀ll à rì nyi ɓiì keesii àa soo rì ŋwaànɛ ɓi kìlɔ̀ŋ ki be.

³⁶Fɔɔnnɛ Bɛ̀ll à romgày jɛ̀ɛ̀ a ɓɔn ɓɛ Isirayɛl lɛ ɓɛɛ yi lɛ, fyòoog à rì ɓiì ɓaà ɓi nyìinyìm ànɛ lɛ rì nyi rì ɓum, ɓi jɛ̀m ì Yeesus Kiris ànɛ à rì rìfòm ɗi ɓum ɓɛ̀cèm;

³⁷ɓì yii kìɓan ki ki nkìlɛɛ ɓi ziì Zyude bimiɗ, à tumɛ̀n yì a Galile ajɛ̀m ì bàɓtis ìnɛ Zyaŋ à lààlàmɓɛ̀ngà.

³⁸Ɓì yii lɔŋ yɛ̀ɛ Bɛ̀ll à ɓɔ̀ngà Yeesus ànɛ a Nazarɛt à rom yì nyi Kitɛntɛ̀ɛ̀n ki Nghay kii, à ki fa nyi ìtèɗ wucèm, fɔɔnnɛ Yeesus ànɛ̀n à kɛ̀ɛ̀kɛ̀ɛ̀ghà jàŋ bimiɗ à kìkì ɓum kìrɔɔ, di a wɔ̀ɔwɔɔ̀zì ɓum ɓɛ̀cèm ɓɛ ɓɛ ɓaghà ɓi rìkpàn ɗi Satàn ɓisuulɛ Bɛ̀ll à ɓaghà ɗì nyi.

³⁹Ɓìsii ri ɓɛ̀wusìnɛ̀ɗ ɓi ɓìɓan ɓi à kìghà ɓi zi ì Ɓɛ̀yudɛ̀n rì a Yorisalɛm, nni Yeesus ànɛ̀n innɛ ɓɛ ǹwoli di ɓɛ kpani ɓi kɔrɔs.

⁴⁰Kìɓan kifog, Bɛ̀ll, à ghèmzì nyi ɓi ŋwos a kìraa, à ki fa nyi ìtèɗ wulɛ, a resɛn a ɓum.

⁴¹Wɔ̀lɛ àa ɓum a ɓɛ̀cèm nnɛ à rèsɛ̀ngà, lɔŋ a ɓɛ̀wusìnɛ̀ɗ ɓɛ Bɛ̀ll à lokà kì ɓɔ̀ni. A ɓìsi ɓumɓɛ ti kìghà lɛ, tì ɗi, tì ki nɔ nɗaŋ ɗì nyi di à mɛ ghemɓɛn yi a ɓìloŋ.

⁴²Nni Yeesus à reɓsìghà ɓìsi lɛ ti ghaàghàgsì ɓum Ɓɔlɛ wìì, tì ki sììrag ɓɔ kìresii lɛ, nnyɛɛ rì roànɛ Bɛ̀ll à rɛsìghà lɛ, à ri yù ki renì ɓìɓan ɓi ɓumɓɛ ɓɛ kaka cencem, rì ɓi ɓɛ ɓɛ mɛ wù.

⁴³Yeesus ànɛ̀n nnɛ ɓɛ̀kpaŋzì-ɓìɓan ɓɛ̀cèm ɓɛ ɓugà yɛ̀ɛ ɓɛ kpaakpààghà lɛ: Ɓì ɗii ɗii nnɛ Bɛ̀ll à rì ɓiì cenɛɛ mum ǹcèm ànɛ à gherɛɛ nyi ɓìɓe.

⁴⁴Yɛ̀ɛ Pyɛɛri à ɓaghà di a ka tòtog a ŋwɔm fɔlɔɔ, nni Kìtɛntɛ̀ɛ̀n ki Nghay ki sɛngày ki ɗiŋì ɓi ɓum ɓɛ̀cèm ɓɛ ɓɛ wowòkà ɓìtòkì ɓii ɓiǹ.

⁴⁵Fɔɔnnɛ ɓɛ̀gherɛ̀n ɓɛ ɓɛ ɓaghà Ɓɛ̀yudɛ̀n, ɓɛ ɓɛ ɓaghày ǹɗaŋ ɗi Pyɛɛri, ɓɛ kuuràkà lɛɛ̀gwey, yɛ̀ɛ ɓɛ ghɛngà lɛ Bɛ̀ll à faa ɓumɓɛ ɓɛ yin Ɓɛ̀yudɛ̀n Kìtɛntɛ̀ɛ̀n ki Nghay.

⁴⁶Ɓɛ wowòkà di ɓumɓɛ̀n ɓɛɛ̀ tòtog ɓìkènekènè ɓi ɓitòkì, ɓɛ kpaàkpàgsɛ̀n ɗìkem ɗi Bɛ̀ll. Nni Pyɛɛri à kpaaghà min lɛ:

⁴⁷Yɛ̀ɛ ɓumɓɛ ɓɛ mɛ teɗ Kitɛntɛ̀ɛ̀n ki Nghay lɔŋ yɛ̀ɛ ɓìsii tekà, nni cɛ kɛɛ ri ɓiì règtii lɛ, ɓɛ̀ kɛɛ̀ ɓàɓti ɓɔ rì mɛ̀nig?

⁴⁸Fɔɔnnɛ à kalìghà min lɛ, ɓɛɛ ɓaɓti ɓɛǹ ɓi ɗii ɗi Kan Yeesus Kiris. Ɓumɓɛ̀n ɓɛ ki tɔg nyi lɛ, a kɔri tì a lɔ̀ŋkaa, gàɓ ì mɛ̀ru.