Read Bafia MƐ̀KÌKÌÌ MƐ ƁƐKƐ̀NÌ-FÌTOM 11 Bible Online

MƐ̀KÌKÌÌ MƐ ƁƐKƐ̀NÌ-FÌTOM 11 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 11

¹Ɓɛ̀kɛ̀nì-fìtom rì ɓɛ̀geni ɓaa ɓɛ righerɛ̀n ɓɛ ɓɛ kɔkɔ̀rìghà a Zyude ɓɛ wokà lɛ, ɓumɓɛ ɓi mɛ̀kuu mɛm̀bog ɓɛ ǹghàɓi girig jɛ̀ɛ̀ ì Bɛ̀ll.

²Yɛ̀ɛ Pyɛɛri à sugtìghà kì ɓɔɔ̀gh a Yorisalɛm, ɓɛ̀gherɛ̀n ɓɛ ɓɛ ɓaghà Ɓɛ̀yudɛ̀n ɓɛ tumɛ̀n nyi rìɓɛ̀ɓɛ̀y.

³Ɓɛ kpaakpàà lɛ: Wɔ̀ɔ nɗiŋii ɓi naa yi ɓumɓɛ ɓɛ yin Ɓɛ̀yudɛ̀n, ù ki ɗi ǹɗaŋ ri ɓɔ?

⁴Fɔɔnnɛ Pyɛɛri à tumɛ̀ngà ɓɔ rìtɛɛ̀zì ɗi kiɓan ki à ghɛngà kìcèm, à kpaa ɓɔ lɛ:

⁵Yɛ̀ɛ mɛ̀ɛ ǹɗì ɓi bàn ì Zyope di nkìki bɔ̀ŋzɛ̀n, nni ki nkìi mɛ̀ yɛ̀ɛ ɓìdɛ̀ndɛm lɛ: ǹghɛɛ rìkuu ɗi coo sànjà kì sugakɛn ɓi mɛ̀keɓ mɛ kinìn aɗyoo, ki yuyùy mɛ̀ a nyòò.

⁶Nni yɛ̀ɛ ǹkonaagh kì sìŋii sànjà àncèm, ǹghɛn miì ɓi ɗùm lɛ: Rì nyàm yi ɓi ziinɛ yi yi ri mɛ̀kòò mɛnin, rì nyàm yi ɓi cog, rì yi wɔwɔghɛn ɗì ɗùm, rì tììlì ti aɗyòò.

⁷Nni nwokì, di jɛ̀ɛ̀ ìdɛŋ yɛ̀ɛ kpaakpaa mɛ lɛ: Pyɛɛri wɔ̀! Pɛ̀sɛn aɗyoo, u wey nyàm bogtɛ̀n ɓi nyàm yi, u ɗi.

⁸Fɔɔnnɛ m̀pɛ̀ɛ̀zìghà lɛ, àg! Kan, ɓi cɛɓ kɛ̀m kìcèm, ǹka fogà ɓi com ki ki ri kìcèlì, nsoò lɛ ki ki ri kìsyeg ɓi ŋwɔm wɛ̀m.

⁹Nni jɛ̀ɛ̀ ìnɛn i kpaatìghà ɓi gɛ̀n i kìɓɛ̀ɛ̀ lɛ, com kìcèm ki Bɛ̀ll à kpaa lɛ ki rì kìtɛnɛn, wɔ̀ kɔ̀ɔ kpaa lɛ, ki ri rì kìsyeg.

¹⁰Yɛ̀ɛ ki ɓiìtɛɛ fɔlɔɔ gɛ̀n yiraa, nni sànjà à sugtìghà kìɓɔɔ̀gh aɗyoo rì ɓyom ɓìn.

¹¹Ajɛ̀m ìnɛn nnɛ ɓumɓɛ a Sezare ɓɛ̀sɛ̀ɛ̀ ɓɛraa ɓɛ peetɛ̀ngày a mɛɛ mɛ m̀ɓaghà wɔɔ, lɛ ɓɛ romiì ɓɔ a lɔ̀ŋkɛm̀.

¹²Nni Nghay à Bɛ̀ll à kpaaghà mɛ̀ lɛ: Sugtɛn ɗì ɓɔ, kɔɔ̀ foŋ tikàna. Ɓɛ̀geni ɓɛ̀m ɓɛ ɓɛ ri ɓɛ, ɓɛ kɛǹ mɛ̀ kìfoŋì a Sezare, tì ɗiŋì ɓi naa ì Kɔrinɛy.

¹³Kɔrinɛy à tumɛ̀n ɓìsi rìkpaa yɛ̀ɛ à ghɛngà di ŋwaà-fìtom a Bɛ̀ll à yùu a mɛɛ mii, à kpaa nyi lɛ: Rom ɓum a Zyope, lɛ ɓɛɛ reŋiì Simɔn ànɛ ɓɛ ti ɓɛ kpɔgì lɛ Pyɛɛri

¹⁴nyɛɛ ri wɔ̀ ɓiì kpaa ɓìɓan ɓi ɓi ri ɓiì ghɛɓsii lɛ, rì wɔ̀, rì naa yɔ̀ɔ̀ ì ɓum bimiɗ

¹⁵Lɔŋ yɛ̀ɛ m̀mɛɛ̀ pinìghà ŋwɔm lɛ ǹtoòghrɛn, Kìtɛntɛ̀ɛ̀n ki Nghay ki sɛn yì ɓi ɓɔ, lɔŋ yɛ̀ɛ ki sɛngày girig ɓi ɓìsi a rìtumɛ̀n.

¹⁶Fɔɔnnɛ mɛ̀ɛ ǹ-yitii min jɛ̀ɛ̀ ìnɛ Kan à kàlìghà lɛ: Zyaŋ à ɓàtìghà rì mɛ̀nig, wɔ̀lɛ ɓi ɓɛg ànɛ a lɔ̀ŋkin, ɓì rì ɓiì ɓàɓtɛɛ ri Kìtɛntɛ̀ɛ̀n ki Nghay.

¹⁷Yɛ̀ɛ Bɛ̀ll à mɛ fa ɓɔ com ki à faghà ɓìsi ɓɛ tì gherɛ̀ngà Yeesus Kiris, nni mɛ̀ɛnɛ ghɛn anɛ ǹɗì lɛ, ǹkì rìkì ɗidɛŋ?

¹⁸Yɛ̀ɛ ɓɛ wokà ɓitòkì ɓiǹ, nnɛ ɓɛ kɔrìghà lɛ fyòoog, ɓɛ tumɛ̀n ɗìkemzì ɗi Bɛ̀ll di ɓɛɛ̀ kpaakpaa lɛ: Bɛ̀ll à mɛ nɛm girig ɓumɓɛ ɓi mɛ̀kuu mɛm̀bog bee inɛ lɛ, ɓɛɛ lɔɔ̀ghrɛn mɛ̀rem, di ɓɛɛ ɓa rì cɛɓ.

¹⁹Ǹtɔɓ wu ɓɛ tɔtɔ̀ɓkà ɓɛ̀gherɛ̀n ɓi cààmɛ̀n ki ɓɛ wolà Ityɛn, wu kìghà lɛ ɓɛ̀gherɛ̀n ɓɛɛ saàtɛn. Fɔɔnnɛ gàɓ ìdɛŋ ì kɛ̀ngà a Fenisii, rì ɓi kìrìŋ ki riɓày ki lɛ Siipirɛ, rì a Aŋtyos, kìɓan kifog, lɔŋ Ɓɛ̀yudɛ̀n ɓɔ rì ɓɔ ɓɛɛ̀ɓɛ ɓɛ kpaakpààghà jɛ̀ɛ̀ ì Bɛ̀ll.

²⁰Nni gàɓ ì ɓɛ̀gherɛ̀n ìdɛŋ ìnɛ ì ɓaghà lɛ, rì ɓumɓɛ a Siipirɛ, rì ɓumɓɛ a Sirɛn, ɓɛ kɛngà a Aŋtyos, ɓɔɔ totòkà girig rì ɓumɓɛ ɓɛ ɓaghà Gìrɛg, ɓɛ kpaakpaa ɓɔ Syeesyee à Ɓɔlɛ à Kan Yeesus.

²¹Ìtèɗ wu Kan wu ɓaghà rì ɓɔ, kɛɛ kighà ɓum lɛɛ̀gwey lɛ ɓɛɛ lɔɔ̀ghrɛn mɛ̀rem, ɓɛɛ gherɛn Kan.

²²Yɛ̀ɛ ɓumɓɛ ɓi kìseŋi ki a Yorisalɛm ɓɛ wokà gom ì kìɓan kiǹ, fɔɔnnɛ ɓɛ romgà Ɓarinaɓas a Aŋtyos.

²³Nni yɛ̀ɛ à kpagà wɔɔ, à ghɛn yɛ̀ɛ geesɛ̀n ì Bɛ̀ll ì rèsɛ̀ngà a ɓɛ̀gherɛ̀n ɓɛǹ, à nyààrɛ̀n, à ki toni ɓɔ lɛ: Sììrɛɛna lɔŋ ɓi Kan Yeesus, rì mɛ̀rem min mɛcèm.

²⁴Ɓi saaɗ, Ɓarinaɓas à ɓaghà syeesyee à mum, ǹɗonɛn ɗi Kìtɛntɛ̀ɛ̀n ki Nghay, à ki gherɛn Bɛ̀ll lɛɛ̀gwey, fɔɔnnɛ ɓàlì ì ɓum lɛɛ̀gwey ì nɔ̀ɔ̀tìghà Kan.

²⁵Nni Ɓarinaɓas à kɛ̀ngà min a Tarisi, à teɗ yì Sol.

²⁶Yɛ̀ɛ à tanɛ̀ngà nyi wɔɔ, ɓɛ kɛǹ a Aŋtyos ɓɔɔ̀cèm ɓɛ kɔrì wɔɔ bimiɗ à bèg, ɓɛ sasày bas rì kìseŋi ki wɔɔ, ɓɛ ki rèrèsàkà coo bàlì ì ɓum ɓìɓan ɓi Bɛ̀ll. Nni wɔɔ a Aŋtyos nnɛ ɓɛ tɔmgà kì ròo ɓɛ̀yilàg ɗii ɗi lɛ ɓɛ̀kìristɛ̀n.

²⁷Ɓi cààmɛ̀n kiǹ, ɓɛ̀kpaŋzì-ɓìɓan ɓɛ pɛsɛ̀ngày a Yorisalɛm, ɓɛ sɛn a Aŋtyos.

²⁸Fɔɔnnɛ, kìbog ki ɓi ɓɔ, ɗii lɛ Agaɓus, ki pɛsɛ̀ngà aɗyoo, ki kalì ɓum rì ìteɗ wu Kitɛntɛ̀ɛ̀n ki Nghay lɛ, coo zày ì rì ɓiì kìi ɓi zi bimiɗ wɔ̀lɛ ì ki kìghà, ɓi cààmɛ̀n ki Kiloodɛ à ɓaa rìfòm.

²⁹Nni ɓɛ̀gherɛ̀n ɓɛ rengà lɛ, mum bimiɗ ànɛ ɓi ɓɔ, a syɔɔ̀ gàɓ ì com ìnɛ à rì lɛ à ghɛn, lɛ ɓɛɛ ghɛɓsi ɓɛ̀geni ɓaa ɓɛ ɓɛ ɓaghà a Zyude miì.

³⁰Yɛ̀ɛ ɓɛ kighà fɔlɔɔ, nni ɓɛ romgà min Sol ɓɛɛ̀ Ɓarinaɓas rì ɓyom ɓìn lɛ, ɓɛɛ kɛǹ ɓyɔ kì faà rì ɓɛ̀sɛ̀ɛ̀mɛn ɓɛ a Zyude.