Read Bafia MƐ̀KÌKÌÌ MƐ ƁƐKƐ̀NÌ-FÌTOM 12 Bible Online

MƐ̀KÌKÌÌ MƐ ƁƐKƐ̀NÌ-FÌTOM 12 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 12

¹Ɓi mɛ̀ru mɛ̀n, rìfòm ɗi lɛ Eroodɛ ɗi tumɛ̀ngà rìtɔtɔ̀ɓ ɗi ɓum ɓɛdɛŋ ɓɛ ɓi kìseŋi ki ɓɛgherɛ̀n.

²Fɔɔnnɛ à kìghà lɛ ɓɛɛ wey Zyag à geni Zyaŋ rì gàfàg.

³Yɛ̀ɛ à ghɛngà lɛ rìkì ɗiǹ ɗi rɔɔghà Ɓɛ̀yudɛ̀n, fɔɔnnɛ à reɓsìghà tì lɛ ɓɛɛ ɓaǹ Pyɛɛri; kìɓan kiǹ ki ɓaghà ɓi mɛ̀ru mɛ Ɓɛ̀yudɛ̀n ɓɛ ǹkìlàg bìrɛs kɛ̀ɛ̀ nwìɗ.

⁴Nni yɛ̀ɛ Eroodɛ à ɓangà Pyɛɛri, à lɔg nyi, à foŋ ɓɛ̀sujàà ɓɛnin ɓɛnin gwìy yinin lɛ, ɓɛɛ ɓeŋ̀ɓeŋ nyi rì fèg ànɛ lɛ, i tìcàɓ ti Paskà ti ghaghii, ɓɛ yɔ̀m kìɓan kii di kìlɔ̀ŋ kìcèm ki kɔkɔ̀rìì.

⁵Ɓɛ ɓeŋɓèŋgà Pyɛɛri ɓi naà-zày, nsoò fɔlɔɔ ǹɗaŋ wu ɓɛgherɛ̀n wu ɓɔɔɓɔ̀ŋzàg Bɛ̀ll ɓisu wii ri ìtèɗ.

⁶Di ɓɛ̀yɔ̀m ɓɛ Pyɛɛri ɓaa rɔ̀ɓ lɛ rìduri, à lalàlà ɓi nyìinyìm à ɓɛ̀sujàà ɓɛɓɛɛ̀, ǹkàŋɛn ɗi mɛ̀sɛ̀ŋi mɛɓɛɛ̀, ɓɛ̀sujàà ɓɛm̀bog ɓɛ ɓeŋ̀ɓèŋ mɛ̀suunaa mɛ naà-zày.

⁷Fɔɔnnɛ ŋwaà-fìtom a Kan à kpagày lɛ vwàs kìtɛɛtɛn ki kpeŋzì kìden ki naa ki Pyɛɛri à ɓaghà miì. Nni ŋwaà-fìtom anɛ̀n à ghèmzìghà Pyɛɛri di à nyɛ̀ŋi nyi ɓi tum, à kpaa nyi lɛ: Pɛ̀sɛn aɗyoo lɛ fyɛ̀ɗ, fɔɔnnɛ mɛ̀sɛ̀ŋi mɛ à ɓaghà rì mɔ ɓi ɓyàg, mɛ fumɓɛ̀ngà.

⁸Ŋwaàfìtom à kpaa nyi lɛ: Sìnɛn kànɗa, ù ki waatɛn ɓɛsiripàs ɓɔɔ, Pyɛɛri à kì lɔŋ fɔlɔɔ; nni à kpaatìghà nyi lɛ, waatɛn kìlàà u nɔɔ̀ti mɛ̀.

⁹Fɔɔnnɛ Pyɛɛri à kpagày, à nɔ̀ɔ̀tì nyi kɛ̀ɛ yi lɛ com ki ŋwaà-fìtom a yùghà kì kìi kiǹ ki ɓaghà saaɗ à kìɓan, nyii fekì lɔŋ lɛ ɓìdɛ̀ndɛm ɓyɛɛ̀ kìki nyi.

¹⁰Yɛ̀ɛ ɓɛ ceeghà kìtuu ki ɓɛsujàà ki ǹtonto, ɓɛ ceetì ki kiɓɛ̀ɛ̀, nni ɓɛ kpagà asuunaa wu wu ɓaghà wù kìyɛn ɗi bɔŋ, wu ki seesee ɓi ɓɛg ànɛ ɓi bàn. Ìsuunaa wìn wu nɛmɓɛ̀ngà wɔmiɗ di ɓɔɔ ti wɔɔ jàŋbog. Fɔɔnnɛ ɓɛ kpagà ɓi dan ɓɛ fyee ɓi kìɓàà kìdɛŋ, nni ŋwaà-fìtom à ghàskà kì rinii Pyɛɛri, à ghaàgh.

¹¹Yɛ̀ɛ Pyɛɛri à sugtìghà min ɓi nyimiɗ, à kpaa lɛ, ǹkonaagh min ki ghɛɛ̀ ɓigomìnɛ lɛ, Kan àa romiì mum wiì à fìtom, à sɔrì mɛ̀ ɓi ɓyàg ɓi Eroodɛ, à ki lɛgsi mɛ mɛ̀tɔɓ mɛ̀cèm mɛ Ɓɛ̀yudɛ̀n ɓɛ ǹfèfeegh lɛ ǹghɛn.

¹²Yɛ̀ɛ Pyɛɛri à kɔ̀rìghà lɛ fyòoog, à fèg, fɔɔnnɛ à rɔ̀ŋìghà bee inɛ a mɛɛ mɛ Marii ànɛ à ɓaghà jɛɛ Zyaŋ ànɛ ɓɛ nkpɔgì lɛ Marikus, ɓum ɓɛdɛŋ ɓɛ taŋzɛ̀ngà wɔɔ lɛ ɓɛɛ ɓɔŋzag.

¹³Yɛ̀ɛ Pyɛɛri à ɓokà ìsuunaa, nni giɓ adɛŋ ànɛ à ɓaghà ǹkìì-kìsay ɗii lɛ Roodɛ à yughày lɛ a woòghrag.

¹⁴Nni à rèmìghà Pyɛɛri ɓi jɛ̀ɛ̀, à wog kìrɔɔ: Kɛ̀ɛ ka ŋwàɗ nyi naa, kìɓan kifog à sugtì rì mɛ̀ree lɛ a kali ɓum lɛ; Pyɛɛri yɛɛ ri asuunaa.

¹⁵Ɓɛ̀roɓɛ̀n ɓɛ kpaa nyi lɛ: Ù rì ǹduŋɛn? Wɔ̀lɛ nyii siìrɛ̀n lɔŋ lɛ, kìɓan ki nyaa kpaa ki ri saaɗ.

¹⁶Fɔɔnnɛ ɓɛ kpaaghà min lɛ: ǹghay wu Pyɛɛri wɛɛ rì nya lɛ wu ɓa, nsoò fɔlɔɔ Pyɛɛri à kɛ̀nkɛ̀ngà lɔŋ asu rì rìɓoɓòg ɗi naa. Nni yɛ̀ɛ ɓɛ ŋwaɗkà naa, ɓɛ ghɛn nyi, ɓɛ kuuràg lɛɛ̀gwey.

¹⁷Pyɛɛri à maasì ɓɔ rì càg, à ki kali ɓɔ yɛ̀ɛ Kan à kpaŋzi yì nyi ɓi naà-zày, à kpaa tì ɓɔ lɛ, kaliina Zyag rì ɓɛ̀geni ɓis ɓɛmbog kìɓan ki, fɔɔnnɛ à kpagà, à kɛ̀n jàŋ idɛŋ.

¹⁸Yɛ̀ɛ duri ì tangà, kìɓan ki yeesì ɓɛ̀sujàà, ɓɛ rɔɓ kɛ̀ɛ̀ mɛ̀kanikɔ̀ɔ̀, ɓɛ tɔtɔ̀g lɛ: Nni Pyɛɛri ànɛ à ɓaa là?

¹⁹Eroodɛ à tɔkà lɛ ɓɛɛ kaà Pyɛɛri, nni yɛ̀ɛ ɓɛ rɔɓkà kɛ̀ ɓɛɛ̀ ghɛn nyi, ɓɛ yɔmzìghà ɓɛ̀sujàà ɓɛ̀ncèm, Eroodɛ à ki reɓsi lɛ ɓɛɛ cuùsi bɔ. Ajɛ̀m ìnɛn à pɛ̀sɛ̀ngà a Zyude à kɛ̀n a Sezare, à ghagsì gàɓ ì mɛ̀ru wɔɔ.

²⁰Eroodɛ à ɓaghà ɓi paàzì rì ɓumɓɛ a Tiir, rì ɓɛ a Sidɔŋ, nni ɓumɓɛ̀n ɓɛ wooghrɛ̀ngày jɛ̀ɛ̀ lɛ ɓɛɛ kɛǹ nyi kì ghɛɛ̀. Ɓɛ ɗiŋi dàŋ rì Bilastus ànɛ à ɓaghà ǹkɔ̀mɛ̀n ɓɛ̀sujàà ɓɛ ɓi gari yiì. Fɔɔnnɛ ɓɛ tɔkà nyi lɛ ɓɔɔ pègsɛn paàzì wàà, ɓisuulɛ kìlɔ̀ŋ kaa ki ǹlakàg ɓìɗilàg rì ɓumɓɛ ɓi kìlɔ̀ŋ ki rifòm.

²¹Ŋwos anɛ kìɓan kiǹ ki ɓaghà ɓiì kìikilɛ̀n Eroodɛ à waatɛ̀ngà ɓìlàà ɓii ɓi rifòm, à kɔ̀rì ɓi kìnuugh, à ki tumɛn ɓitòkì.

²²Fɔɔnnɛ kìlɔ̀ŋ ki kpaaghà jɛ̀ɛ̀ aɗyoo lɛ: Bɛ̀ll ìdɛŋ yɛ̀ɛ tòtog lɔɔ, àa mum yɛɛ ri.

²³Lɔŋ wɔɔ foo, ŋwaà-fìtom a Kan à ɓog nyi ɓisuulɛ à gherɛ̀ngà lɛ ɓum ɓɛɛ fa nyi rìkem ɗi ɗi ghɛɛ̀sɛ̀ngà lɛ ɓɛɛ fa Bɛ̀ll. Fɔɔnnɛ ɓɛgɛn ɓɛ tumɛ̀ngà nyi rìɗiɗì ɓi ɗùm, à wu.

²⁴Nsoò fɔlɔɔ, jɛ̀ɛ̀ ì Bɛ̀ll ì kɛ̀ngà asu ì sààsàà.

²⁵Yɛ̀ɛ ɓɛ̀ Ɓarinaɓas ɓɛɛ̀ Sol ɓɛ lègsìghà fìtom fi ɓɛ kɛngà a Yorisalɛm, nni ɓɛ sugtìghà; ɓɛ ɓasɛ̀n yì ɗì Zyaŋ ànɛ ɓɛ nkpɔgì lɛ Marikus.