Read Bafia MƐ̀KÌKÌÌ MƐ ƁƐKƐ̀NÌ-FÌTOM 13 Bible Online

MƐ̀KÌKÌÌ MƐ ƁƐKƐ̀NÌ-FÌTOM 13 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 13

¹Ɓi kìseŋi ki a Aŋtyos, ɓɛ̀kpaŋzì-ɓìɓan ɗì ɓyoo ɓɛrèsàg sùkurù ɓɛ ɓaghà wɔɔ. Ɓɛ ɓaghà lɛ: rì Ɓarinaɓas rì Simeyɔŋ ànɛ à ɓatìghà ɗii lɛ ŋwaà-ǹfin, rì Lusyus ànɛ a Sirɛn rì Manaɛŋ ànɛ ɓɛ tɔɔsɛ̀ngà rì gɔmìnà ànɛ lɛ Eroodɛ, rì Sol.

²Ŋwos adɛŋ ànɛ ɓɛ ɓaghà ɓi rìɓɔgsì ɗi ɗii ɗi Kan, ɓɛ ki cèli ɓiɗilàg ɓi ŋwos àncèm ànɛn, Kìtɛntɛ̀ɛ̀n ki Nghay ki kpaaghà ɓɔ lɛ! Pisiina mɛ̀ ɓum ɓɛ lɛ rì Ɓarinaɓas, rì Sol, lɛ ɓɛɛ ki kìsay ki ǹɗegìghà ɓɔ lɛ ɓɛɛ ki.

³Fɔɔnnɛ ɓɛ kighà lɛ, ɓaa cèli ɓiɗilàg, ɓɛ ɓɔŋzàg Bɛ̀ll, ɓɛ ki saaghrag ɓɔ ɓyàg ɓi nyoo, ɓɛ càɗ min ɓɔ lɛ ɓɛɛ ghaàgh.

⁴Yɛ̀ɛ Kìtɛntɛ̀ɛ̀n ki Nghay ki romgà Sol ɓɛɛ̀ Ɓarinaɓas fɔlɔɔ, fɔɔnnɛ ɓɛ sɛngà a Silisii, wɔɔnnɛ ɓɛ ɓɔkà kìkɔm lɛ ɓɛɛ kɛǹ a Siipirɛ.

⁵Yɛ̀ɛ ɓɛ kpagà a Salamin, ɓɛ kpaakpàà ɓum Ɓɔlɛ à Bɛ̀ll ɓi naa yi bɔ̀ŋzɛ̀n yi Ɓɛ̀yudɛ̀n; ɓɛ ɓaghà ɗì Zyaŋ lɛ a ghɛɛ̀ghɛ̀ɓsì ɓɔ.

⁶Ajɛ̀m ìnɛn, di ɓaa syàà kirìŋ ki riɓày kìcèm, nni ɓɛ kpagà a Pafos, wɔɔnnɛ ɓɛ tanɛ̀ngà ǹkìì-majìg àdɛŋ ɗii lɛ Bari-Yeesus, à ɓaghà muu Ɓɛ̀yudɛ̀n, à ki yèeghyegsì ɓum lɛ nyii ri ǹkpaŋzì-ɓìɓan.

⁷Ŋwaànɛ̀n à ɓaghà rìghan ɗi gɔmìnà ànɛ lɛ, Sɛrizyus-Paolus, gɔmìnà ànɛ̀n à ɓaghà ŋwaà ɗyomzɛ̀n, fɔɔnnɛ à reŋìghà Ɓarinaɓas ɓɛɛ̀ Sol lɛ, à kɔ̀nkɔ̀ngà lɛ a wog ɓìɓan ɓi Bɛ̀ll.

⁸Nni Elimas, yɛɛ lɔɔ lɛ ǹkìì-majìg ɓi rìgìrɛg, nyii ramzɛ̀ngà rìbaŋì rì ɓɛ̀-Ɓarinaɓas ɓɛɛ̀ Sol, à kaakàà bee inɛ lɛ gɔmìnà kɛ̀ɛ gherɛn Bɛ̀ll.

⁹Fɔɔnnɛ Sol ànɛ à ɓatìghà ɗii lɛ, Pol à ɓaghà ǹɗonɛn ri Kìtɛntɛ̀ɛ̀n ki Nghay; à fiɓìghà ŋwaànɛ̀n lɛ fyɛɛɛyi

¹⁰à kpaa lɛ: Wɔ̀ ŋwaànɛ, ù rì lɛ, wɔ̀ coo ghèghes̀, wɔ̀ ɓèèɓeè, man à Satàn anɛ lɛ wɔ̀, bènàbena à ɓìɓan ɓi saaɗ, ù yin ɓìì rɛɛrɛɛ̀sì rìyoòyògsì ɗi bee yi Kan yi yi ri lɛ saaɗ?

¹¹Ɓigomìnɛ, yiya lɛ Kan à rì wɔ̀ ɓiì pɔnɔsii, ù rì ɓiì ɗiŋii tiɗyaŋ, fɔɔnnɛ ù rì ɓiì finɛɛ maa cààmɛ̀n kɔ̀ɔ ghɛɛ̀di kisaa ki ŋwos. Nni mis mii mɛ ghaskà kì ɓulì, birìm ì sigtɛ̀n nyi, à tumɛ̀n rìgbɔ̀mgbɔ̀m di a kaakaa ŋwaànɛ a ɓan nyi ɓi càg, a kɛɛ̀si nyi.

¹²Yɛ̀ɛ gɔmìnà à ghɛngà kìɓan kiǹ, nni à gherɛ̀ngà Bɛ̀ll ɓisuulɛ, dɔgtɛ̀n ì ɓìɓan ɓi ɓi seesee Kan, ì kòmgà nyi ǹɗem lɛ syeesyee.

¹³Yɛ̀ɛ Pol rì ɓɛ̀reŋkàŋ ɓii ɓɛ pɛsɛ̀ngà a Pafos, ɓɛ teɗ kìkɔm lɛ ɓɛɛ kɛǹ a Pɛrizɛ ànɛ a Paŋfilii Zyaŋ nyii ghasɛ̀ngà rì ɓɔ, à sugti a Yorisalɛm.

¹⁴Nni yɛ̀ɛ ɓɛ pɛsɛ̀ngà a Pɛrizɛ, ɓɛ ghagsì rìkɛ̀ɛ̀ ɗyaa, ɓɛ kɛǹ kìkpaŋì a Aŋtyos ànɛ a Pisidii. Nni ɓɛ ɗiŋìghà ɓi naa ì bɔ̀ŋzɛ̀n ì Ɓɛ̀yudɛ̀n, ŋwosi Saɓàt ɓɛ kɔri ɓi zi.

¹⁵Yɛ̀ɛ ɓɛ lègsìghà ki ɓàli kaàtà à Bɛ̀ll, ɓi kaàtà à ɓìdɔ̀gsɛna ɓi Moyis rì ɓi à ɓɛ̀kpaŋzì-ɓìɓan, nni ɓɛ̀làmì naà-bɔ̀ŋzɛ̀n ɓɛ romgà mum lɛ a kali ɓɛ̀-Pol lɛ: Bɔɔsoŋ! ì ɓì rì rì deɓ yidɛŋ yi ɓì rì lɛ ɓì fa ɓum, tòòghrɛɛna ɓigominɛ.

¹⁶Nni Pol à pɛ̀sɛ̀ngà aɗyoo, à maasì ɓum ɗì càg, à kpaa lɛ: Mìni ɓɔn ɓɛ Isirayɛl rì mìni ɓɛ ɓi risag Bɛ̀ll, ramina mɛ̀reè!

¹⁷Bɛ̀ll à kìlɔ̀ŋ ki lɛ Isirayɛl, à ɓɔ̀ngà ɓɛ̀seŋi ɓis, à ki kì lɛ kìlɔ̀ŋ kiǹ kɛɛ tɔɔ̀, cààmɛ̀n ki ɓɛ ɓaghà a Egiɓtɛn, ajɛ̀m inɛn nnɛ à pisìghày ɓɔ wɔɔ ri ìtèɗ wii.

¹⁸À mɛnìghà ɓɔ ɓi-reɓ nunùg bèg mɛ̀tin mɛɓɛɛ̀.

¹⁹Nni yɛ̀ɛ à cuusìghà ɓìlɔ̀ŋ taàɓɛ̀ɛ̀ ɓi ziì Kanaaŋ, fɔɔnnɛ à faghà zi yaà rì ɓɛ̀seŋi ɓis.

²⁰Kìɓan kiǹ ki finɛ̀ngà fɛlɛ yɛ̀ɛ bèg ɓɛ̀hɔnɗɛ̀ɗ ɓɛnin, rì bèg mɛ̀tin mɛɓɛɛ̀ rì ǹtɛ̀ɗ. Ajɛ̀m ìnɛn Bɛ̀ll à faghà ɓɔ ɓɛ̀renì-ɓìɓan ɓɔ yɛɛ kɛɛ̀kɛ̀ɛ̀sìghà kìlɔ̀ŋ ɓi mɛ̀ru mɛ ǹkpaŋzì-ɓìɓan ànɛ lɛ Samuɛl.

²¹Fɔɔnnɛ ɓɛ tɔkà lɛ ɓɛɛ ɓa rì rìfòm, nni Bɛ̀ll à faghà ɓɔ Saul, man à Kis ànɛ ɓi rìpwìɗ ɗi Bɛŋzyamɛŋ, nnyɛɛ lamìghà ɓɔ bèg mɛ̀tin mɛɓɛɛ̀.

²²Yɛ̀ɛ Bɛ̀ll à pisìghà Saul, à fa ɓɔ Davit lɛ nnyɛɛ ɓa rìfòm ɗyaa. Davit ànɛ̀n innɛ Bɛ̀ll à sɛkà à kpaa lɛ: Mɛ̀ɛ nghɛɛ Davit, man à lzayii, à rì rìkuu ɗi mum ɗi nɗem wɛ̀m wu ǹfèfeegh, nnyɛɛ rì ɓiì kìi ɓiɓan ɓìcèm ɓi ǹkɔ̀ni lɛ a ki.

²³Ɓi dòò yi Davit ànɛ̀n nnɛ Bɛ̀ll à kìghà lɛ Yeesus a yalɛn fɛlɛ yɛ̀ɛ ǹghɛɓsì lsrayɛl, lɔŋ yɛ̀ɛ nyimiɗ a kàkà.

²⁴Di Yeesus à ka yu ɓi, Zyaŋ à rerèŋìghà ɓumɓɛ a Isirayɛl lɛ ɓɛɛ lɔɔ̀ghrɛn mɛ̀rem, ɓɛ ɓaɓtàg.

²⁵Yɛ̀ɛ Zyaŋ à ɓaghà di à ti ɓiì lègsii kìsay kii, nni à kpaaghà lɛ, àa mɛ̀ yɛɛ rì roànɛ ɓi ɓoŋɓòŋ, kìɓan kifog, ŋwaàdɛŋ à rìì mɛ̀ ajɛ̀m, nnyɛɛ ri rìkuu ɗi mum ɗi mɛ̀ ǹkpaŋi ɓi ɓi ǹkoŋ wulɛ, ǹfùmì ǹɗig wii wu gòò.

²⁶Ɓɔɔsoŋ̀! Mìni dòò yi Abiraham rì mìni ɓum ɓɛ zɛy ɓɛ ɓì ti ɓì risàg Bɛ̀ll, ɓɔlɛ à cɛɓ ànɛ, à rì ɓisu wis ɓɛsɛ̀ɛ̀ ɓɛ̀cèm.

²⁷Ɓumɓɛ a Yorisalɛm rì ɓɛ̀làmì ɓaa, ɓɛ roòzɛ̀ngà Yeesus, kìɓan kìfog ɓi rìren ɗi ɓɛ rengà lɛ ɓɛɛ wey nyi, ɓɛ ròzìghà rìkalì ɗi ɓɛkpaŋzì-ɓìɓan ɗi ɓɛti ɓɛ ɓaàyì ɓɛ̀ŋwos ɓɛ Saɓàt ɓɛ̀cèm.

²⁸Nsoò yɛ̀ɛ ɓɛ ghɛngà ɓi ǹto wu kiɓan wu ɓɛɛ wey nyi miì, ɓɛ tɔkà Pilat lɛ a kali ɓɛɛ wey Yeesus.

²⁹Fɔɔnnɛ yɛ̀ɛ ɓɛ lègsìghà kì kìi ɓiɓan ɓìcèm ɓi ɓi ɓaghà ɓì kànɛn ɓi rarɛ̀n ɗì nyi, nni ɓɛ kɔsìghày nyi ɓi kɔrɔs ɓɛ ɓom nyi ɓi zɔ̀ŋ.

³⁰Nsoò fɔlɔɔ, Bɛ̀ll à ghèmzìghày nyi ɓi nyìinyìm à ɓìloŋ.

³¹Fɔɔnnɛ à rèsɛ̀ngà bàlì ì mɛ̀ru lɛɛ̀gwey a ɓumɓɛ à pɛ̀sɛ̀ngày rì ɓɔ a Galile ɓɛ ɓɔg a Yorisalɛm ǹɗaŋ, ɓɔ yɛɛ ti ɓɛ̀wusìnɛ̀ɗ ɓɛ ɓɛɛ̀ tɛɛtɛɛ̀zì ɓumɓɛ a Isirayɛl kìɓan kii.

³²Ɓìsi girig, tì yùu mìni rì Syeesyee à Ɓɔlɛ ànɛ lɛ, ǹkàg wu wu falɛ̀ngà a ɓɛ̀seŋi ɓis,

³³Bɛ̀ll à roozii wɔ ɓisu wis, ɓɛ tì rì ɓɔn ɓaa, ɓi rìghèmzì ɗi àa ǹghèmzii Yeesus, fɛlɛ yɛ̀ɛ ki ri kìkànɛn ɓi Sam à kìɓɛ̀ɛ̀ lɛ: Ù rì man wɛm̀, mɛ̀ ǹki ɓa soŋì à tumɛ̀n gɛɛ̀nɛ.

³⁴Rìghèmzì ɗi à ghèmzìghà nyi a ɓìloŋ lɛ kɛ̀ɛ ɓwɛ̀y, ɗi ri lɔŋ kiɓan ki nyimiɗ à kpaaghà lɛ: Ǹɗì mìni ɓiì faà ɓɛ̀kɔɔ̀kɔ̀ɔ ɓɛ ɓyom ɓɛ ɓɛ ri ɓɛ̀tɛnɛn, ɓɛ ǹkàkà Davit.

³⁵Kìɓan kiǹ kɛɛ̀ki à kpaatii jàŋ idɛŋ ɓi kaàtà wìì lɛ: Wàa càɗ ɓì mum wɔ̀ɔ̀ ànɛ àrì ntɛnɛn lɛ, a ɓwɛy ɓi zɔ̀ŋ.

³⁶Wɔ̀lɛ, Davit à kìghà rìkɔ̀n ɗi Bɛ̀ll ɓi cààmɛ̀n kii nni à wughà, ɓɛ ɓom̀ nyi ɓi jàŋ inɛ ɓɛ ɓomgà ɓɛ̀seŋi ɓii, à ki ɓwɛ̀y ɓi zɔ̀ŋ.

³⁷Kìɓan kifog, roànɛ Bɛ̀ll à ghèmzìghà, nyii ɓɔlà ɓi ɓi zɔ̀ŋ.

³⁸Ɓɔɔsoŋ̀! Konaaghna kì yiì lɛ ɓisu wii nnɛ ɓɔlɛ ànɛ lɛ, Bɛ̀ll à rì ɓiì cenɛɛ ɓum ɓìɓe ɓyaa, a kpaakpaàrɛ̀n a lɔ̀ŋkin.

³⁹Ɓi Yeesus ànɛn nnɛ mum ǹcèm ànɛ à gherɛɛ à rì ɓiì tɔ̀sɛɛ ɓiɓe ɓìcèm ɓi ɓìdɔ̀gsɛna ɓi Moyis ɓi ɓaghà ɓi lɛ, ɓi pisì.

⁴⁰Kɔ̀riina ɗyomzɛ̀n! Lɛ kɛ̀ ɓi tulɛn ɗi kìɓan ki ɓɛ̀kpaŋzì-ɓìɓan ɓɛkpaaghà, ɓi jɛ̀ɛ̀ ìnɛ lɛ:

⁴¹Mìni ɓɛ̀daŋàdaŋa, ghɛɛna di ɓi kuughrag, ɓì ki pɛ̀sɛn mɛ ɓi mis, ɓisuulɛ ǹɗì ɓiì kìi rikuu ɗi kiɓan ɗidɛŋ ɓi mɛ̀ru min ɗi ɓì ɓaghà ɓi lɛ ɓì gherɛ̀n lɛ, ɗi ri lɛ ɗi kilɛ̀n di ŋwaàdɛŋ yɛɛ kpaa mìni lɛ ɗyaa kìlɛɛ.

⁴²Yɛ̀ɛ Sol ɓɛɛ̀ Ɓarinaɓas ɓɛ ɓaghà di ɓɛ ti ɓiì kpaŋìì ɓi naà-bɔ̀ŋzɛ̀n, ɓumɓɛ̀n ɓɛ tɔg ɓɔ lɛ, ɓɛɛ sugtiì ŋwosi Saɓàt ànɛ à ɓɔ̀ɓkày, lɛ ɓɛɛ ɓiìti ɓɔ kì kalii kiɓan kiǹ.

⁴³Yɛ̀ɛ rìghàdà ɗi lekà, Ɓɛ̀yudɛ̀n lɛɛ̀gwey rì ɓum ɓɛ zɛy ɓɛ ɓɛ ɗiŋìghà ɓi rìgherɛ̀n ɗi Ɓɛ̀yudɛ̀n ɓɛ nɔɔ̀tìghà Pol ɓɛɛ̀ Ɓarinaɓas, ɓɛ̀roɓɛ̀n ɓɛ kuùkùrɛ̀n ɗì ɓɔ, ɓɛ teètèèsì ɓɔ nyoo di ɓɛɛ̀ kpaakpaa ɓɔ lɛ, ɓɛɛ kɛn asu, ɓɛ ki sììrɛn ɓi geesɛ̀n ì Bɛ̀ll.

⁴⁴Nni gòn i Saɓàt ìnɛ ì ɓɔ̀ɓkà foo, ɓaàyiɓi bàn bimiɗ yɛ̀ɛ taŋzɛ̀ngà lɛ ɓɛɛ wog jɛ̀ɛ̀ ì Bɛ̀ll.

⁴⁵Yɛ̀ɛ Ɓɛ̀yudɛ̀n ɓɛ ghɛngà gɛ ɓum ànɛ̀n, nni ǹɗem wu yàaka wu ɓɔkày ɓɔ, ɓɛ tumɛ̀n rìfeèfèngì ɗi Pol di ɓɛɛ̀ sɛɛsɛ̀mgì nyi.

⁴⁶Fɔɔnnɛ ɓɛ̀-Pol ɓɛɛ̀ Ɓarinaɓas ɓɛ kpaghà ɓɔ lɛ fwàafwàày lɛ: Ki ǹghɛ̀ɛ̀sɛɛ lɛ, jɛ̀ɛ̀ ì Bɛ̀ll yɛ̀ɛ log kì kpaarɛɛ a lɔ̀ŋkin, nni yɛ̀ɛ ɓì ɓèni yɔ̀ yɛɛ lɔɔ lɛ, ɓì ghɛɛ lɛ cɛɓ ki fìɗyàɓ fikɔ̀ɔ̀ ki ghɛɛ̀sɛɛ ɓi ri mìni, nni ɓìsii tiŋ̀mɛɛ min a ɓumɓɛ ɓɛ yin Ɓɛ̀yudɛ̀n.

⁴⁷Ɓisuulɛ, Kan a kalag ɓisi lɛ: Ǹɗɛsìghà wɔ̀ lɛ, ù ɓa fɛlɛ yɛ̀ɛ kìtɛɛtɛn ɓi nyìinyìm à ɓìlɔ̀ŋ ɓimbog ù ki sààti cɛɓ ɓi zi bimiɗ.

⁴⁸Yɛ̀ɛ ɓumɓɛ ɓɛ ɓaghà ɓi Ɓɛ̀yudɛ̀n ɓɛ wokà rìkpaa ɗìn ɓɛ nyaàrɛ̀n lɛɛ̀gwey, ɓɛ tumɛ̀n rìkeèkèmzì ɗi jɛ̀ɛ̀ ì Kan. Nni fɔɔnnɛ ɓum ɓɛ̀cèm ɓɛ ɓɛ ɓaghà ɓɛ̀ɓɔ̀nɛn lɛ ɓɛɛ ɓa rì cɛɓ ki fiɗyàɓ fikɔ̀ɔ̀, ɓɛ gherɛ̀ngà Bɛ̀ll.

⁴⁹Ɓɔlɛ à Kan à sààghà jàŋbimiɗ ɓi kìlɔ̀ŋ kiǹ.

⁵⁰Kìɓan kifog, Ɓɛ̀yudɛ̀n ɓɛ toosìghà lɛ, rì ɓìtèetèɗ ɓi ɓɛ̀yiɓ ɓi ɓi falɛ̀ngà ɓi rìgherɛ̀n rì gìni-ɓum yi ɓi bàn ìnɛn lɛ ɓɛɛ ɓigti paàzì rì ɓɛ̀-Pol ɓɛɛ̀ Ɓarinaɓas; fɔɔnnɛ ɓɛ kpagà ɓɔ rìbaŋì, ɓɛ ki nàɓ ɓɔ ɓi kìlɔ̀ŋ kaa.

⁵¹Ɓɛ̀roɓɛ̀n ɓɛ kwiɗ kùrùɓu ànɛ ɓi mɛ̀kòò maa ɓi ɓɔ, lɛ a ɓa kìrèmzɛnà ki lɛ, ɓɛ nàɓi ɓɔ; fɔɔnnɛ ɓɛ pɛsɛ̀ngà min ɓɛ kɛǹ a Ikonyɔm.

⁵²Ɓi ɓɛg ànɛ a ɓɛgherɛ̀n ɓɛ a Aŋtyos, ɓɛ roǹgàkà rì kìnyàà ɓi ǹɗem, ɓɛ ki ɓa ti ɓɛ ronɛn ɗi Kìtɛntɛ̀ɛ̀n ki Nghay.