Read Bafia MƐ̀KÌKÌÌ MƐ ƁƐKƐ̀NÌ-FÌTOM 14 Bible Online

MƐ̀KÌKÌÌ MƐ ƁƐKƐ̀NÌ-FÌTOM 14 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 14

¹A Ikonyɔm, Pol ɓɛɛ̀ Ɓarinaɓas ɓɛ ɗiŋìghà girig ɓi naà-bɔ̀ŋzɛ̀n ì Ɓɛ̀yudɛ̀n, ɓɛ kurɛ̀n rì ɓum, lèg ànɛ lɛ Ɓɛ̀yudɛ̀n lɛɛ̀gwey rì ɓumɓɛ ɓɛ ɓaghà ɓi Ɓɛ̀yudɛ̀n ɓɛ gherɛ̀ngà Bɛ̀ll.

²Kìɓan kifog, ɓɛ ɓɛ ɓengà dɔgtɛ̀n ì Pol, ɓɛ toosìghà ɓum ɓɛ zɛy lɛ ɓɛɛ ɓa rì ɓìɓeɓtàg ɓi mɛyitì ɓi ɓɛg ànɛ a ɓɛ̀geni ɓis ɓɛ righerɛ̀n.

³Pol ɓɛɛ̀ Ɓarinaɓas ɓɛ finɛ̀ngà a Ikonyɔm lɛɛ̀gwey, ɓɛ ɓaghà rì coo ǹtyweeyi ri Kan ɓi ɓìɓan ɓi ɓɛ kpaakpààghà, fɔɔnnɛ à fafàghà ɓɔ ìtèɗ wulɛ, ɓɛɛ, kiki lɛ rì dàm, rì ɓɛ̀koŋnyoo ɓɛ ɓiɓan, à kì fɔlɔɔ lɛ a siìrag ɓìɓan ɓi ɓɛ kpaakpààghà ɓi komkòm geesɛ̀n yìì.

⁴Fɔɔnnɛ ɓumɓɛ ɓi bàn ìnɛn ɓɛ lanɛ̀ngà gàɓ yiɓɛɛ̀ lɛ, ɓɛ̀roɓɛ ɓɛ sug jɛ̀m ɗì Ɓɛ̀yudɛ̀n, ɓɛmbog ɓɛ sug jɛ̀m ɗi ɓɛ̀kɛ̀nì-fìtom ɓɛ Yeesus.

⁵Nni yɛ̀ɛ ɓumɓɛ zɛy, rì Ɓɛ̀yudɛ̀n, rì ɓɛ̀làmì ɓaa ɓɛ peèghpègsɛ̀ngà lɛ ɓɛɛ ki ɓɔ ǹtɔɓ, ɓɛ rogì ɓɔ gɔ̀g,

⁶Pol ɓɛɛ̀ Ɓarinaɓas ɓɛ ɓaghà lɛ ɓaa ghɛn fɔlɔɔ, ɓɛ kaa bee inɛ lɛ ɓɛɛ ghɛŋi kì nyàmzɛɛ a Likawonii rì a Listirɛ, rì a Dɛriɓɛ rì ɓi jàŋ yidɛŋ yi yi ɓaghà wɔɔ jàŋbog.

⁷Fɔɔnnɛ ɓɛ ghagsìghà Syeesyee à Ɓɔlɛ wɔɔ ɓi jàŋ yiǹ.

⁸Ŋwaàdɛŋ yɛɛ ɓaghà kìwɔ̀g a Listirɛ. A rɔ̀ɓkà kìsɛkɛ̀rɛ̀ à tumɛn a rìyalɛ̀n ɗii, nsoò ŋwos adɛŋ, ŋwaànɛ̀n à fèèghrɛ̀ngà ɓi kirɛlii mɛrɛy, à ɓày ìkòò.

⁹Nni ŋwos adɛŋ ànɛ ŋwaànɛ̀n à wowòkà di Pol à tòtòg, fɔɔnnɛ Pol à pɛɓsɛ̀ngà nyi, à fiɓì nyi lɛ fyɛɛɛyi à ghɛn lɛ ŋwaànɛ̀n à ɓaghà ɗì ǹtyweeyi lɛ a wɔɔ̀zi nyi.

¹⁰Nni à kpaaghà ŋwaànɛ̀n jɛ̀ɛ̀ aɗyoo lɛ: Pɛ̀sɛn aɗyoo, u rɛli mɛrɛy wɛ̀ɛmiɗ. Fɔɔnnɛ ŋwaànɛ̀n à pɛ̀sɛ̀ngà aɗyoo lɛ fàtweɗ, à ghagsɛ̀n ɗì rìkɛ̀ɛ̀.

¹¹Yɛ̀ɛ gɛ ɓum ànɛ à ɓaghà wɔɔ a ghɛngà kìɓan ki Pol à kìghà kiǹ, nni ɓɛ làmɓɛ̀ngà jɛ̀ɛ̀ aɗyoo ɓi kìtòkì ki ɓumɓɛ a Likawonii lɛ ɓɛ̀y yidɛŋ yɛɛ yuù yì a lɔ̀ŋkaa, ɓi nghay wu ɓum.

¹²Nni ɓɛ roòghà Ɓarinaɓas ɗii ɗi ɓɛ̀y ìnɛ lɛ Zes, ɓɛ ròò Pol ɗii lɛ Ɛrmɛs, ɓisuulɛ nnyɛɛ totòkà.

¹³Nni pìrɛɛtìrɛ̀ à ɓɛ̀y ìnɛ lɛ Zes, inɛ naa yìì i ɓaghà ɓi rìɗigì ɗi ɓi bàn, à yughà rì ɓɛ̀lem ɓɛ ɓɛ̀sanìnya ɓɛ̀rɛ̀gakɛn ri zyònà yi ɓilàà lɛ ɓɛ ɓaghà jɛ̀ɛ̀ bog rì ɓum ɓɛmbog ɓɛ̀cèm lɛ ɓɛɛ funɛn ɓìtuwe ɓiǹ, ɓɛɛ ɓɔgsi ɓɛ̀y yi yi yughà a lɔ̀ŋkaa, yi lɛ rì Ɓarinaɓas rì Pol.

¹⁴Yɛ̀ɛ ɓɛ̀kɛ̀nì-fìtom ɓɛ lɛ, rì Pol rì Ɓarinaɓas ɓɛ ghɛngà fɔlɔɔ, nni ɓɛ ghaskàkà ɓìlàà ɓyaa ɓɛ tɔy ɓi gwìy di ɓɛɛ̀ kpaakpaa jɛ̀ɛ̀ aɗyoo lɛ:

¹⁵Ɓi kìki fɔlɔɔ lɛ la? Ɓìsii ri girig ɓum lɔŋ yɛ̀ɛ mìni. Syeesyee à Ɓɔlɛ ànɛ ti ghaaghagsì mìni à ri lɛ, ɓi caɗ rìɓɔgsì ɗi ɓinùn ɓi zɛy rì zɛy, ɓi lɔɔ̀ghrɛn yɛ̀ɛ Bɛ̀ll ànɛ à rì cencem, ànɛ à kìghà lɛ rì ɗyoo rì zi, rì rìɓày à kìkòn ɗì ɓyom ɓìcèm ɓi ɓi ri miì.

¹⁶Ɓi gbàà yi ajɛ̀m, Bɛ̀ll à càɗkà lɛ ɓìlɔ̀ŋ ɓìcèm ɓyɛɛ nɔɔ̀nɔ̀ɔ̀tì bee yi ɓi kɔni lɛ ɓyɛɛ nɔɔ̀ti.

¹⁷Nsoò fɔlɔɔ, à rèrèsìghà lɔŋ riɓa ɗii, ɓi ɓìrɔɔ ɓi à kìkìghà ɓum, à ti à nɔsàg mìni bwey, à kì lɛ, ɓìɗilàg ɓyɛɛ ɗiŋi mìni, à fa mìni ɓyom ɓiɗiyɛn lɛɛ̀gwey, à ki roòzi mɛrem min ɗi kìnyàà.

¹⁸Rì ǹtɔɓ lɛɛ̀gwey ìnnɛ rìkpaa ɗyaa ɗiǹ ɗi ki rèkà gwìy ì ɓum ìnɛ̀n lɛ, yɛ̀ kɛɛ̀ fùnɛn ɓìtuwe ɓisu waa.

¹⁹Ɓɛ̀yudɛ̀n ɓɛdɛŋ ɓɛ pɛsɛ̀ngày a Aŋtyos ànɛ a Pisidii rì a Ikonyɔm, ɓɛ syoŋ gwìy ì ɓum ɓi gàm yàà, ɓɛ rogì Pol gɔ̀g ɓɛ syòŋ nyi, ɓɛ kɛǹ nyi kì naŋì ɓi nwɔŋì wu bàn lɛ ɓɛ fefèkà lɛ à mɛ wu.

²⁰Wɔ̀lɛ yɛ̀ɛ ɓɛ̀yilàg ɓɛ taŋzɛ̀ngà nyi à nyoo, à pɛ̀sɛ̀n aɗyoo, à sugtì kì ɗiŋii ɓi bàn. Ɓi duri tana, ɓɛ kɛ̀ngà a Dɛriɓɛ ɓɛɛ̀ Ɓarinaɓas.

²¹Yɛ̀ɛ Pol ɓɛɛ̀ Ɓarinaɓas ɓɛ ghagsìghà Syeesyee à Ɓɔlɛ ɓi bàn ìnɛ lɛ Dɛriɓɛ, ɓɛ ki syòŋ ɓum wɔɔ lɛɛ̀gwey, fɔɔnnɛ ɓɛ sugtìghà a Listirɛ, rì a Ikonyɔm, rì a Aŋtyos ànɛ a Pisidii.

²²Ɓɛ fafàghà ɓɛ̀gherɛ̀n ɓɛ wɔɔ itèɗ ɓi ǹɗem ɓɛ rerèɓ ɓɔ lɛ, ɓɛɛ siìrɛn ɓi rìgherɛ̀n, di ɓɛɛ̀ kpaakpaa lɛ: Ki ghɛɛ̀sɛɛ lɛ, ti ka wog mɛtɔɓ lɛɛ̀gwey ɓi ɗi lɛ ti ɗiŋi ɓi kìlɔ̀ŋ ki Bɛ̀ll.

²³Nni ɓɛ rɛsàkà ɓɛ̀sɛ̀ɛ̀mɛn ɓi naa yi Bɛ̀ll yìcèm yi wɔɔ. Fɔɔnnɛ ɓɛ ɓaghà lɛ, i ɓaa cèli ɓiɗilàg, ɓɛ ɓɔŋzì Bɛ̀ll, ɓɛ reɓsɛ̀n min ɓɔ rì Kan ànɛ ɓumɓɛ̀n ɓɛ saghìghà ǹtyweeyi waa ɓi nyi.

²⁴Fɔɔnnɛ ɓɛ ceeghà ɓi kiden ki zi ki lɛ Pisidii, ɓɛ kɛǹ kì kpaŋì a Paŋfilii.

²⁵Ɓɛ mɛ ghagsi Ɓɔlɛ à Bɛ̀ll a Pɛrizɛ, ɓɛ sɛn min a Atalii.

²⁶Wɔɔnnɛ ɓɛ teri min kikɔm lɛ, ɓɛɛ kɛǹ a Aŋtyos ànɛ ɓɛ pɛsɛ̀ngày wɔɔ, jàŋ inɛ ɓɛ reɓsɛ̀ngà ɓɔ rì Bɛ̀ll à geesɛ̀n, ɓisuu kisay ki ɓɛ kighày kiǹ.

²⁷Yɛ̀ɛ ɓɛ kpagà a Aŋtyos, ɓɛ taŋzɛ̀n ɓɛ̀gherɛ̀n ɓɛ ɓi kìseŋi ki wɔɔ, ɓɛ kpaa ɓɔ ɓìɓan ɓìcèm ɓi Bɛ̀ll à faghà ɓɔ ìtèɗ wulɛ ɓɛɛ kikì, à ɓiisɛ̀n rìnɛm ɗi à nɛmgà ɓum ɓɛ zɛy bee inɛ ɓɛɛ gherɛn girig nyi.

²⁸Fɔɔnnɛ ɓɛ kɔrìghà gàɓ ì mɛ̀ru rì ɓɛ̀gherɛ̀n.