Read Bafia MƐ̀KÌKÌÌ MƐ ƁƐKƐ̀NÌ-FÌTOM 15 Bible Online

MƐ̀KÌKÌÌ MƐ ƁƐKƐ̀NÌ-FÌTOM 15 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 15

¹Ɓum ɓɛdɛŋ ɓɛ Pɛsɛ̀ngày a Zyude ɓɛ yu a Aŋtyos, ɓɛ tumɛ̀n rìrèrèsì ɗi ɓɛgherɛ̀n di ɓɛɛ̀ kpaakpaa lɛ: Ì ɓì kɛ̀rɛɛ ɓi, yɛ̀ɛ ɓìdɔ̀gsɛna ɓi Moyis ɓyɛɛ̀ kpaakpàà, ɓì yin lɛ ɓì ghɛn cɛɓ.

²Fɔɔnnɛ coo kiyoòyòò ki kpighà, dì Pol ɓɛɛ̀ Ɓarinaɓas ɓɛ mɛ teɗ rirèsàg ɗi ɓumɓɛ̀n nyoey, ɓɛ ren min lɛ, rì Pol rì Ɓarinaɓas rì ɓum ɓɛdɛŋ, ɓɛ ghɛɛ̀sɛɛ kì ɓɔɔ̀gh a Yorisalɛm lɛ, ɓɛɛ ghɛn ɓɛ̀kɛ̀nì-fìtom, rì ɓɛ̀sɛ̀ɛ̀mɛn ɓɛ kilɔ̀ŋ lɛ ɓɛɛ fiɓi kìɓan kiǹ.

³Kìseŋi ki ki a Aŋtyos ki faghà ɓɔ ɓyom ɓi ɓi kɔ̀ɔ̀kɔ̀nɛ̀ngà ɓi rìkɛ̀ɛ̀ ɗyaa: Fɔɔnnɛ ɓɛ fyeeghà a Fenisii rì a Samari di ɓɛɛ̀ kpaakpaa ɓɛgeni ɓaa rilɔ̀ɔ̀ghrɛ̀n ɗi ɓum ɓɛ zɛy ɓɛ lɔɔ̀ghrɛ̀ngà, ɓɛ gherɛ̀n Bɛ̀ll. Ɓɔlɛ ànɛ̀n à faghà ɓɛ̀geni ɓaa ɓɛǹ coo kinyàà ɓi ǹɗem.

⁴Yɛ̀ɛ ɓɛ kpagà a Yorisalɛm nni kìseŋi rì ɓɛ̀kɛ̀nì-fìtom, rì ɓɛ̀sɛ̀ɛ̀mɛn ɓɛ ghaɓkà ɓɔ, fɔɔnnɛ Pol ɓɛɛ̀ Ɓarinaɓas ɓɛ resìghà ɓɔ ɓìɓan ɓìcèm ɓi Bɛ̀ll à kìghà rì ɓɔ.

⁵Ajɛ̀m ìnɛn nnɛ ɓum ɓɛdɛŋ ɓɛ ɓi ǹɗaŋ wu Ɓɛ̀fàrìzyɛŋ ɓɛ ɓɛ ɓaghà ɓɛ̀kìristɛ̀n, ɓɛ pɛsɛ̀ngà aɗyoo, ɓɛ kpaa lɛ: Ɓumɓɛ ɓɛ yin Ɓɛ̀yudɛ̀n ɓɛ ghɛɛ̀sɛɛ kì kɛ̀raagh, ɓɛ kì kàŋ ɓɔ lɛ ɓɛɛ ɓeŋ ɓìdɔ̀gsɛna ɓi Moyis.

⁶Fɔɔnnɛ ɓɛ̀kɛ̀nì-fìtom rì ɓɛ̀sɛ̀ɛ̀mɛn ɓɛ taŋzɛ̀ngà lɛ ɓɛɛ fiɓi kìɓan kiǹ.

⁷Di ɓaa nyolɛn lɛɛ̀gwey, nni Pyɛɛri à pɛ̀sɛ̀ngà aɗyoo, à kpaa ɓɔ lɛ: Ɓɔɔsoŋ̀! Ɓì yii lɛ Bɛ̀ll à ɓɔ̀ngà mɛ̀ ɓi nyìinyìm wìn lɔŋ a rìtumɛ̀n lɛ, nkali Syeesyee à Ɓɔlɛ a ɓum ɓɛ ɓɛ yin Ɓɛ̀yudɛ̀n, lɛ i ɓɛ woogh Syeesyee à Ɓɔlɛ ànɛ̀n, ɓɛɛ gherɛn Bɛ̀ll.

⁸Nni Bɛ̀ll ànɛ à yii mɛ̀rem mɛ ɓum, àa ǹɗèsii lɛ à ghàɓi ɓɔ, yɛ̀ɛ àa ǹfaa ɓɔ girig Kìtɛntɛ̀ɛ̀n ki Nghay lɔŋ yɛ̀ɛ à faghà ɓìsi;

⁹àa ǹɗèsii ɓi ǹɗèè ɓi nyìinyìm ànɛ lɛ rì ɓìsi rì ɓɔ, àa ǹtɛɛ̀zii ɓɔ mɛ̀rem lɛ rìgherɛ̀n ɗi ɓɛ ǹgherɛɛ nyi.

¹⁰Nni lannɛ ɓi kɔ̀nkɔn lɛ ɓi feèghrɛn Bɛ̀ll, yɛ̀ɛ ɓi kìki lɛ ɓi tɛgsi ɓɛ̀yilàg ǹtɛ̀g wu wu kighà lɛ, wu yag ɓɛ̀seŋi ɓis, wu ki yag ti ɓisi rìtɛ̀g?

¹¹Wɔ̀lɛ ɓìsii gherɛɛ lɛ Bɛ̀ll à mɛ ghɛɓsi ɓisi lɛ geesɛ̀n ì Kan Yeesus lɔŋ yɛ̀ɛ ɓɔ girig.

¹²Fɔɔnnɛ ɓumɓɛ ɓɛ ɓaghà a rìghàdà ɗiǹ ɓɛ maaghà lɛ fyòoog, ɓɛ wowòg yɛ̀ɛ Pol ɓɛɛ̀ Ɓarinaɓas ɓɛ kpaakpààghà lɛ, rì dàm yi ɓiɓan, rì ɓɛ̀koŋnyoo ɓɛ ɓiɓan ɓɛ Bɛ̀ll à kìghà rì ɓɔ ɓi nyìinyìm à ɓum ɓɛ zɛy.

¹³Yɛ̀ɛ ɓɛ lègsìghà ɓìtòkì, nni Zyag à pɛ̀sɛ̀ngà aɗyoo, à kpaa lɛ: Ɓɔɔsoŋ̀! Wooghna girig rìkpaa ɗyɛ̀m!

¹⁴Simɔn àa rèsii ɓìsi yɛ̀ɛ ki kilɛ̀ngà a rìtumɛ̀n lɛ, Bɛ̀ll a ɓɔn kìlɔ̀ŋ ki kɛɛ ɓa kiŋkii, ɓi nyìinyìm à ɓìlɔ̀ŋ ɓi zɛy.

¹⁵Kìɓan kiǹ ki ghɛɛ̀sɛɛ gì rì jɛ̀ɛ̀ ì ɓɛ̀kpaŋzì-ɓìɓan ìnɛ ì rì ǹkànɛn lɛ:

¹⁶Kan lɛ, ajɛ̀m ìnɛn, ǹɗi sugtii gɛs̀ m̀pɛ̀sì mɛɛ mɛ Davit mɛ mɛ kpilàkà; fɔɔnnɛ m̀pègsaagh gɛ jàŋ yi yi ri yìwààrɛn, m̀pɛ̀ɛ̀zì mɔ kì rɛsii.

¹⁷Fɔɔnnɛ ɓum ɓɛmbog ɓɛ̀cèm ɓɛ kaa gɛ lɛ ɓɛɛ ghɛǹ Kan, rì ɓumɓɛ ɓi ɓìlɔ̀ŋ ɓìcèm ɓi ɓyɛɛ rereŋi ɗii ɗyɛ̀m.

¹⁸Rìkalì ɗi Kan ànɛ à rèsìghà ɓìɓan ɓiǹ à tumɛ̀n fìɗyàɓ ɗyɛɛ̀ɗìn.

¹⁹Fɔlɔɔ nnɛ mɛ̀ ǹghɛɛ lɛ, tyɛ̀ ki rììsi ɓum ɓɛ zɛy ɓɛ ɓɛ lɔɔ̀ghrɛɛ mɛ̀rem, ɓɛ gherɛ̀n Bɛ̀ll ǹtɛ̀g ɓi nyoo.

²⁰Tì ghɛ̀ɛ̀sɛɛ lɔŋ ɓɔ kì kàni kaàtà, ti kpaa ɓɔ lɛ, ɓɛ ghɛɛ̀sɛɛ kì cèlii lɛ: rì riɗi ɗi ɓituwe ɓi ɓɛ woli ɓisuu riɓɔgsì ɗi ɓinùn, rì tìsɔ̀mɔ̀g, rì rìɗi ɗi ɓituwe ɓi ɓi wii lɛ swììɗ bwaɓ yɛ̀ kɛɛ̀ kpaŋ.

²¹Ɓisuulɛ à tumɛ̀n ɓi gbàà yi ajɛ̀m, bàn yìcèm yi ri rì ɓum ɓɛdɛŋ ɓɛ ɓɛɛ̀ rèeresàg ɓum ɓìdɔ̀gsɛna ɓi Moyis, lɛ ɓɛ ti ɓɛ ɓaàyì ɓyɔ ɓi naa yi bɔ̀ŋzɛ̀n ɓɛ̀ŋwos ɓɛ Saɓàt.

²²Nni fɔɔnnɛ ɓɛ̀kɛ̀nì-fìtom rì ɓɛ̀sɛ̀ɛ̀mɛn rì kìseŋi kìcèm ɓɛ ghɛngà lɛ ɓɛɛ ɓɔǹ ɓum ɓɛɗɛŋ ɓi nyìinyìm wàà, di ɓɛɛ rom ɓɔ nɗaŋ ri Pol ɓɛɛ̀ Ɓarinaɓas a Aŋtyos. Nni ɓɛ ɓɔngà min lɛ, rì Zyuudɛ ànɛ ɓɛ nɗegàg tì lɛ Ɓarisaɓas, rì Silas. Kìɓɛ̀ɛ̀ ki ɓum kìn ki ɓaghà ɓumɓɛ ɓɛ̀geni ɓaa ɓɛ righerɛ̀n ɓɛ keesìghà lɛɛ̀gwey.

²³Fɔɔnnɛ ɓɛ romgà ɓɔ rì kaàtà ànɛ à ɓaghà ǹkànɛn fɛlɛ̀: Ɓɛ̀geni ɓin ɓɛ lɛ, rì ɓɛ̀kɛ̀nì-fìtom, rì ɓɛ̀sɛ̀ɛ̀mɛn, ɓɛ togsaghiì mìni ɓɛ̀geni ɓaa, ɓɛ ɓì yin Ɓɛ̀yudɛ̀n, ɓɛ ɓì kɔ̀kɔrii a Aŋtyos, rì a Sirii, ri a Silisii.

²⁴Tìi nwoogh lɛ, ɓum ɓɛdɛŋ ɓɛ m̀pɛ̀sɛɛ yì fɛ, ɓìsi tyɛ̀ ki rom yi ɓɔ, ɓɛ yu mìni kì ɓùùsii, ɓɛ ki syaŋdi mini mɛ̀rem rì ɓìtòkì ɓyaa.

²⁵Fɔɔnnɛ tìi n-yɔɔsii jɛ̀ɛ̀ bog lɛ: Ti ɓɔǹ ɓumɓɛ tì romiì a lɔ̀ŋkin ǹɗaŋ ɗi Pol ɓɛɛ̀ Ɓarinaɓas, ɓɛ ɓɛ rì ɓɛ̀geni ɓis ɓɛ ǹɗem.

²⁶Ɓɛ ri ɓumɓɛ ɓɛ mɛ kàɓɓɛn ɓɔmiɗ ɓisuu kisay ki Yeesus Kiris Kan wìs.

²⁷Nni tì romiì mìni lɛ, rì Zyuudɛ rì Silas lɛ ɓɔmiɗ ɓɛɛ kpaàti mìni ɓìɓan ɓi tì kàniì ɓi.

²⁸Lɛ rì ɓìsiì ɓɔmìɗ rì Kìtɛntɛ̀ɛ̀n ki Nghay, tìi nghɛɛ lɛ, tyɛ̀ ki tɛ̀gsi ti mìni ǹtɛ̀g wudɛŋ, i ki cee ɓi lɛ ɓìdɔ̀gsɛna ɓì ɓi ghɛ̀ɛ̀sɛɛ kì ɓèŋi, ɓi ɓi ri lɛ:

²⁹Kɛ̀ ɓi ɗi ɓyɛn ɓi nyàm ìnɛ ɓɛ woli ɓi rìɓɔgsì ɗi ɓinùn, rì bwaɓ, rì ɓyɛn ɓi nyàm ìnɛ ì wii lɛ swììɗ, kɛ̀ ɓi kì tisɔ̀mɔ̀g, i ɓì lɛɛgh ɓìɓan ɓiǹ, di ɓì konaagh, ÒO òona yàà!

³⁰Fɔɔnnɛ ɓumɓɛ ɓɛ romgà ɓɛǹ, ɓɛ kɛngà min a Aŋtyos, ɓɛ taŋzɛ̀n ɓɛ̀gherɛ̀n ɓɛ wɔɔ, lɛ ɓɛɛ fa ɓɔ kaàtà ànɛ ɓɛ kangày ɓɔ.

³¹Yɛ̀ɛ ɓɛ ɓalà nyi, ɓum ɓɛ̀cèm ɓɛ nyaàrɛ̀n, lɛ à tèèsìghà ɓɔ nyòò.

³²Zyuudɛ ɓɛɛ̀ Silas ɓɛ ɓaghà ɓɛ̀kpaŋzì-ɓìɓan, fɔɔnnɛ ɓɛ tokàkà rì ɓɛ̀geni ɓaa ɓɛǹ lɛɛ̀gwey ɓɛ teèsì ɓɔ nyoo, ɓɛ ki sììrag ɓɔ ɓi rìgherɛ̀n.

³³Yɛ̀ɛ Silas ɓɛɛ̀ Zyuudɛ ɓɛ kɔrìghà wɔɔ lèg àdɛŋ, fɔɔnnɛ ɓɛ̀geni ɓaa ɓɛ ghesɛ̀ngà ɓɔ, ɓɛ kpaa ɓɔ lɛ: Ɓì kɛ̀n lɛ fyòoog; nni ɓɛ sugtìghà min a ɓɛ̀geni ɓaa ɓɛ ɓɛ romgày ɓɔ

³⁴(Kìɓan kifog Silas à ghɛngà lɛ, à ghɛ̀ɛ̀sɛɛ kì rɔ̀ɓi a Aŋtyos).

³⁵Fɔɔnnɛ ɓɛ̀-Pol ɓɛɛ̀ Ɓarinaɓas ɓɛ rɔ̀ɓkà a Aŋtyos, ɓɛ ɓasɛ̀n ɗì ɓum ɓɛdɛŋ ɓi rìrèrèsì rì ɓi rìkakàlì ɗi Syeesyee à Ɓɔlɛ à Kan.

³⁶Yɛ̀ɛ mɛ̀ru mɛ ghaghìghà foo, Pol à kpaa Ɓarinaɓas lɛ: Ti sugtiina kì ghɛɛ̀ ɓɛ̀geni ɓis ɓɛ ɓi bàn yi tìi nkpaa Syeesyee à Ɓɔlɛ à Kan wɔɔ, lɛ ti ghɛn yɛ̀ɛ ɓɛ ri,

³⁷Ɓarinaɓas à kɔ̀nkɔ̀ngà lɛ, ɓɛɛ kɛǹ ǹɗaŋ ɗi Zyaŋ ànɛ à ɓaghà ɗii lɛ Marikus,

³⁸wɔ̀lɛ Pol à gherɛ̀ngà ɓi lɛ ɓɛɛ Kɛǹ ɗì Zyaŋ, ɓisuulɛ, à rinìghà ɓɔ a Paŋfilii, kɛ̀ɛ ki teeti gàɓ ɓi kìsay ki ɓɛ kɛngà kì kìi.

³⁹Ɓɛ nyolɛ̀ngà lɛɛ̀gwey lèg ànɛ lɛ, ɓɛ syɔngà kì ghasɛɛ, lɛ rì mum à ròŋì bee yiì, fɔɔnnɛ Ɓarinaɓas ɓɛɛ̀ Marikus ɓɛ ɓɔkà kìkɔm, ɓɛ kɛǹ a Siipirɛ.

⁴⁰Pol nyii tekà Silas ɓɔɔ kɛǹ, dì ɓɛ̀geni ɓaa ɓɛ mɛ reɓsɛn ɓɔ rì geesɛ̀n ì Kan.

⁴¹Fɔɔnnɛ à fyeeghà a Sirii rì a Silisii di a tèeteèsì ɓɛ̀gherɛ̀n ɓɛ wɔɔ nyoo ɓi rìgherɛ̀n.