Read Bafia MƐ̀KÌKÌÌ MƐ ƁƐKƐ̀NÌ-FÌTOM 17 Bible Online

MƐ̀KÌKÌÌ MƐ ƁƐKƐ̀NÌ-FÌTOM 17 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 17

¹Pol rì Silas ɓɛ fyeeghà a Aŋfipolis rì a Apolonii, ɓɛ kɛǹ kì kpaŋì a Tesalonika, wɔɔnnɛ Ɓɛ̀yudɛ̀n ɓɛ ɓaghà rì naà-bɔ̀ŋzɛ̀n.

²Fɔɔnnɛ Pol à ɗiŋìghà ɓi naà-bɔ̀ŋzɛ̀n ìnɛn lɔŋ yɛ̀ɛ àa nti à kìlàg. À kurɛ̀ngà rì ɓumɓɛ wɔɔ, ɓi ɓìɓan ɓi ɓi kaàtà à Bɛ̀ll, gòn yi Saɓàt yiraa.

³À tɛɛ̀tɛ̀ɛ̀zìghà ɓɔ ɓìɓan ɓiǹ, à rèrèsì ɓɔ lɛ, ki ghɛ̀ɛ̀sɛ̀ngà lɛ, Kiris a wog rìkɛŋ, à ki ghèmɓɛn yi a ɓìloŋ; à kpaakpàà ɓɔ lɛ: Yeesus ànɛ nkakali mini ànɛ yɛɛ rì Kiris.

⁴Fɔɔnnɛ Ɓɛ̀yudɛ̀n ɓɛdɛŋ ɓɛ gherɛ̀ngà ɓìɓan ɓiǹ, ɓɛ ɓasɛ̀n ǹɗaŋ ri Pol rì Silas, rì Gìrɛg lɛɛ̀gwey ì ɓumɓɛ ɓɛ nɗisàg Bɛ̀ll, gàɓ ì ɓìtèetèɗ ɓi ɓɛ̀yiɓ ì nɔɔ̀tìghà girig ɓɔ.

⁵Wɔ̀lɛ Ɓɛ̀yudɛ̀n ɓɛdɛŋ ɓɛ ɓɛ ɓaghà rì yàaka ɓɛ reŋɗɛ̀ngày ɓumɓɛ zɛy ɓɛ ɓɛ yoòyòmgà ɓi bàn, ɓɛ taŋzɛ̀n cììba, ɓɛ tumɛ̀n ɗìkì ɗi kiyoòyòò ɓi bàn. Nni ɓɛ kɛngà kì kaà lɛ rì Pol rì Silas a mɛɛ mɛ Jazɔŋ, lɛ ɓɛɛ rɛsi ɓɔ ɓi mis mɛ kilɔ̀ŋ lɛ kɛɛ yɔm ɓɔ.

⁶Yɛ̀ɛ ɓɛ tanɛ̀ngà ɓì ɓɔ, nni ɓɛ ɓangà lɛ rì Jazɔŋ rì ɓɛ̀gherɛ̀n ɓɛdɛŋ, ɓɛ kɛǹ rì ɓɔ a ɓɛ̀làmì bàn ìnɛn ɓɛ kpaa jɛ̀ɛ̀ aɗyoo lɛ: Ɓumɓɛ ɓɛ ɓuùsìghà ziinɛ bimiɗ, ɓɛ nkpaŋi girig fɛ ɓi bàn yìs,

⁷Nni Jazɔŋ àa ǹghàɓi ɓɔ a mɛɛ mii; rìkìkì ɗi ɓiɓan ɗi ɓumɓɛ̀n ɓɛ̀cèm ɗi wɛɛsɛɛ ɓi ri ɓìdɔ̀gsɛna ɓi Kaaza, lɛ ɓɔɔ kalag lɛ: Rìfòm ɗidɛŋ ɗi rì wɔɔ, ɗyɛɛ ri ɗii lɛ, Yeesus.

⁸Rìkpaa ɗìn ɗi ɓuùsìghà lɛ rì gwìy ì ɓum, rì ɓɛ̀làmì mɛ̀to ɓi lèg ànɛ lɛ,

⁹ɓɛ kagà Jazɔŋ rì ɓɛ̀ro ɓɛmbog lɛ, ɓɛɛ peè làman ɓi ɗi lɛ ɓɛɛ càɗ ɓɔ.

¹⁰Lɔŋ yɛ̀ɛ ìru wu fingà, ɓɛ̀geni ɓaa ɓɛ righerɛ̀n ɓɛ ghas kì kaà bee inɛ lɛ, Pol ɓɛɛ̀ Silas ɓɛɛ pɛsɛn, ɓɛɛ kɛǹ a Bere. Nni yɛ̀ɛ ɓɛ kpagà wɔɔ, ɓɛ ɗiŋì ɓi naà-bɔ̀ŋzɛ̀n ì Ɓɛ̀yudɛ̀n.

¹¹Ɓɛ̀yudɛ̀n ɓɛ a Bere ɓɛ rɔɔtɛ̀ngà ǹɗem ɓɛ cee ɓɛ̀roɓɛ a Tesalonika, fɔɔnnɛ ɓɛ ghaɓkà jɛ̀ɛ̀ ì Bɛ̀ll rì coo kinyàà, ɓɛ̀ŋwos ɓɛ̀cèm, ɓɛ fifìɓìghà kaàtà à Bɛ̀ll lɛ ɓɛɛ ghɛǹ nkòo ɓìɓan ɓi Pol à kpaakpààghà ɓɔ, ɓi ri miì.

¹²Kìgwey ki ɓi ɓɔ, ki gherɛ̀ngà; ɓìtèetèɗ ɓi ɓɛ̀yiɓ ɓi a Gìrɛg rì gàɓ ì ɓɛ̀baŋì ǹɗììtɛn, ɓɛ gherɛ̀ngà girig.

¹³Wɔ̀lɛ yɛ̀ɛ Ɓɛ̀yudɛ̀n ɓɛ a Tesalonika ɓɛ wokà lɛ Pol à titì ɓiì ghaaghagsì jɛ̀ɛ̀ ì Bɛ̀ll a Bere, nni ɓɛ yughày wɔɔ lɛ, ɓɛɛ ɓuùsi jàŋ, ɓɛ ki kì kiyoòyòò ɓi nyìinyìm à ɓum ɓɛ kilɔ̀ŋ.

¹⁴Ɓɛ̀geni ɓaa ɓɛ righerɛ̀n ɓɛ ghas min ki kìi lɛ Pol a kɛǹ ɓi ɓɛg à rìɓày à kìkòn, Silas rì Timote ɓɛɛ rɔɓkà lɔŋ a Bere.

¹⁵Ɓumɓɛ ɓɛ kɛngà kì foŋì Pol, ɓɛ kɛngà lɔŋ ǹɗaŋ ɗì nyi à kpaŋ a Atɛn, fɔɔnnɛ ɓɛ sugtìghày min a Bere, Pol à romgì ɓɛ̀-Silas ɓɛɛ̀ Timote jɛ̀ɛ̀ rì ɓɔ, lɛ, ɓɛɛ nɔɔ̀tiì nyi lɛ fyɛ̀ɗ.

¹⁶Cààmɛ̀n ki Pol à ɓaghà ɓiì ɓoŋɓoŋi ɓɛ̀-Silas a Atɛn, à ɓaghà rì ǹ-yeesɛ̀n ɓi ǹɗem yɛ̀ɛ à ghɛngà lɛ bàn ì Atɛn ì ronɛ̀ngà rì bɛ̀ll yi ɓinùn.

¹⁷A nyoònyòlɛ̀ngà lɛ rì Ɓɛ̀yudɛ̀n rì Gìrɛg ì ɓumɓɛ ɓɛ ǹɗisàg Bɛ̀ll; ki ɓaghà ɓi naà-bɔ̀ŋzɛ̀n. À nyoònyòlɛ̀n tì rì ɓumɓɛ àa ǹtanàg ɓi kìyan ki ɓum ɓɛ kilɔ̀ŋ ɓɛ nkuràg wɔɔ ɓɛŋwos ɓɛ̀cèm.

¹⁸Ɓɛ̀rèsàg dɔgtɛ̀n yidɛŋ yi yɛɛ, kpaakpaa lɛ ŋwaà keèsi rìyɛ̀y ɗi cɛɓ, rì lɛ, ŋwaà ghɛ̀ɛ̀sɛɛ kì ɓiɓì nɗem ɓi rìkɛŋ, ɓɛ tumɛ̀ngà girig ìkurè rì Pol, ɓɛ̀roɓɛ lɛ: Cɛ ǹkìì-kɛɛgh anɛ a kpaakpaa kɔmiɗ? Ɓɛ̀ro ɓɛm̀bog ɓɛ ɓaàg lɛ: Ki pisɛɛ yɛ̀ɛ a kakali kiɓan ki bɛ̀ll yidɛŋ, yi tì yii ɓi; ɓɛ ɓakà fɔlɔɔ ɓisuulɛ, ɓɛ wokà di Pol a kakali Ɓɔlɛ à Yeesus, rì rìghèmɓɛ̀n ɗi ɓiloŋ.

¹⁹Nni ɓɛ tekà Pol ɓɛ kɛǹ ɗì nyi ɓi nyìinyìm à ǹtaŋzɛn wu a Atɛn wulɛ, ayèròpaàzɛ̀ ɓɛ kpaa nyi lɛ: Tì rì nya lɛ tì yi nyɔɔnyɔn à dɔgtɛ̀n ànɛ u rèresi anɛ?

²⁰Ki ri yɛ̀ɛ u kakali ɓisi ɓìkènekènè ɓi ɓiɓan, nni ɓyɛɛ̀ɓi ti kɔ̀nkɔ̀n lɛ di tyàa yii yɛ̀ɛ ɓi ri azi.

²¹Ɓumɓɛ a Atɛn rì ɓɛ̀kèn ɓɛ ɓi bàn ìnɛn, ɓɛ ɓaghà rì kìsyɔ̀ɔ̀ lɛ, ì duri i tani, ɓɛ kɔrì foo lɛ, ɓɛɛ kpaàkpaa, nsoò lɛ ɓɛɛ wowog ɓɛ̀ɓɔlɛ ɓɛ nyɔn.

²²Nni Pol à pɛ̀sɛ̀ngà aɗyoo ɓi nyìinyìm à ǹtaŋzɛn wulɛ, àyèròpaàzɛ̀ a kpaa lɛ: Mìni ɓumɓɛ a Atɛn, mɛ̀ ǹka ghɛɛ lɛ, ɓì rì ɓumɓɛ ɓɛ falɛɛ ɓi ɓìɓan ɓi mɛgherɛn lɛ kɔɔ̀kɔɔ̀.

²³Ɓisuulɛ, yɛ̀ɛ mɛ̀ɛ nɗerenii bàn yìn, ǹseesèè gɛ mɛɛ ànɛ ɓì togii bɛ̀ll yin; mɛ̀ɛ mɓàli kɔm̀ ɓi mɛɛ mɛdɛŋ lɛ: Mɛɛ mɛ, mɛ ri ɓisuu bɛ̀ll ìdɛŋ ìnɛ tì yii ɓi. Nni bɛ̀ll ìnɛ ɓi ɓɔɔɓɔgsì ìnɛn kɛ̀ ɓi yi yɔ̀, yɛ̀ɛnnɛ ǹ-yùu mìni kì rèsii.

²⁴Bɛ̀ll ànɛ à kìghà lɛ, rì zi rì ɗyoo, rì ɓyom ɓìcèm ɓi miì, nnyɛɛ ri Kan ànɛ à làmii ɓyom ɓìn ɓìcèm. Bɛ̀ll ànɛn à yin lɛ à kɔ̀rì ɓi mɛɛ mɛ ɓum ɓɛɛ̀ toŋi rì ɓyàg ɓyaa.

²⁵Fɔɔnnɛ kìsay kii ki yin ɓiì tɔtɔɔgh ɓyàg ɓi ɓum lɛ kɛɛ kìlɛn, ɓisuulɛ com kidɛŋ ki kaarɛɛ ɓi nyi; nnyɛɛ ti à falàg ɓum ɓɛ̀cèm cɛɓ, rì cɔ̀ŋzɛn rì ɓyom ɓimbog ɓìcèm.

²⁶Nnyɛɛ kighà lɛ ɓìlɔ̀ŋ ɓìcèm ɓyɛɛ fuùyì ɓi mum bog, à ki kɔ̀ɔ̀si ɓyɔ ɓi zi bimiɗ; à kìghà lɛ, à wòŋzàg ɓyààmɛ̀n ɓisu waa, à ki rɛsag mɛrèè mɛ zi, yɛ̀ɛ ɓɛ ghɛɛ̀sɛɛ kì kɔ̀rii.

²⁷A kìghà fɔlɔɔ lɛ, ɗi ɓum ɓɛɛ kaàkaa nyi ɓaàyiɓi, fɔɔnnɛ ɓɛ ri lɛ ɓɛ ghɛn nyi di ɓɛ mɛ gbɔ̀mgbɔ̀m, lɛ Bɛ̀ll à raɓsɛɛ gì ɓi ri ɓìsi;

²⁸ti ghɛghɛ̀ɓ, tì nyɛ̀ɛ̀nyɛŋɗɛ̀n, tì ki ɓa ɓum, lɛ nyi. Kìɓan kiǹ kɛɛ̀ki ɓɛ̀toŋì ɓyom ɓɛdɛŋ ɓɛ a lɔ̀ŋkin ɓɛ kpaaghà lɛ: Ɓìsii ri gìrìg boo yìì i mum.

²⁹Nni yɛ̀ɛ tì rì lɔɔ boo ì mum ì Bɛ̀ll, tì ghɛ̀ɛ̀sɛɛ ɓi kifèegh lɛ, Bɛ̀ll à rì lɛ à pisɛ̀n gol, nsoò mɔ̀ɔ̀ni, nsoò gɔ̀g yi ɓum ɓɔ yɛɛ soɓi rì ɗyomzɛ̀n ɗyaa.

³⁰Fɔɔnnɛ Bɛ̀ll à foŋi ɓi ǹto rì ɓyààmɛ̀n ɓi ɓum ɓɛ ɓaghà ɓiǹ ɓi rìɗim, wɔ̀lɛ ɓi gɛɛ̀nɛ, a rereŋi ɓum ɓɛ̀cèm nsoò ɓɛ fe, nsoò ɓɛ fe, lɛ ɓɛɛ lɔɔghrɛn mɛ̀rem.

³¹Ɓisuulɛ à rɛsìghà bimiɗ à ŋwos ànɛ à rì ɓiì yɔ̀mi zi bimiɗ miì, lɔŋ yɛ̀ɛ saaɗ a kɔ̀nkɔ̀n; à ɓɔ̀ngà mum ànɛ à rì ɓiì kìi kisay kiǹ, à fa ɓum ɓɛ̀cèm kìrèmzɛnà ki ki resii lɛ, nnyɛɛ ɓɔngà ŋwaàncèm, yɛ̀ɛ à ghèmzìghày nyi a ɓìloŋ.

³²Lɔŋ yɛ̀ɛ ɓumɓɛ̀n ɓɛ wokà di Pol à ti ɓiì kpaakpaa kiɓan ki righèmɓɛ̀n ɗi ɓiloŋ, ɓɛ̀ro ɓɛdɛŋ ɓɛ kpusɛ̀n ɗi tyɛ̀y, ɓɛm̀bog ɓɛ kpaa nyi lɛ, tì ri wog kiŋkɔɔ kiǹ ŋwos adɛŋ.

³³Fɔlɔɔ nnɛ Pol à kpagà, à ghaàgh.

³⁴Nsoò fɔlɔɔ, gàɓ ì ɓum ìdɛŋ ì nɔ̀ɔ̀tìghà Pol, ì gherɛ̀n. Ɓi ɓumɓɛ ɓɛ gherɛ̀ngà ɓɛǹ, Denis kìbog ki ɓi ɓumɓɛ ǹtaŋzɛn wulɛ àyèròpaàzɛ̀ à ɓaghà miì, rì giɓ adɛŋ ɗii lɛ Damaris, ri ɓum ɓɛdɛŋ tì foo.