Read Bafia MƐ̀KÌKÌÌ MƐ ƁƐKƐ̀NÌ-FÌTOM 18 Bible Online

MƐ̀KÌKÌÌ MƐ ƁƐKƐ̀NÌ-FÌTOM 18 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 18

¹Ajɛ̀m ìnɛn, Pol à pɛ̀sɛ̀ngà à Atɛn à kɛ̀n a Kɔrɛŋt.

²A tuusɛ̀ngà wɔɔ ri muu Ɓɛ̀yudɛ̀n àdɛŋ ɗii lɛ Akilas; ŋwaànɛ̀n à yalɛ̀ngà ɓi kìlànà ki zi ki lɛ Pɔŋ. A pɛ̀sɛ̀ngày a Italii ɓɛɛ̀ Pirisilya à giy, ɓisuulɛ rìfòm ɗi lɛ Kiloodɛ ɗi rengà lɛ Ɓɛ̀yudɛ̀n ɓɛ̀cèm ɓɛ a Rom ɓɛɛ pɛsɛn wɔɔ. Fɔɔnnɛ Pol à ràrɛ̀ngà rì ɓɔ.

³Yɛ̀ɛ ɓɛ ɓaghà rìkuu ɗi kisay ɗifog, kìsay ki toŋtoŋɛn ɓilaa rì tàpot, nni Pol à kɔ̀rìghà a lɔ̀ŋkaa ɓɛ sasày ǹɗaŋ.

⁴Gòn yi Saɓàt yìcèm, Pol àa ǹtòòghraagh ɓi naà-bɔ̀nzɛ̀n lɛ à kaakààghà bee lɛ a syoŋ̀ lɛ rì Ɓɛ̀yudɛ̀n rì Gìrɛg.

⁵Wɔ̀lɛ yɛ̀ɛ Silas rì Timote ɓɛ kpagà a Kɔrɛŋt di ɓɛ pɛsɛɛ yì a Masedwan, Pol à nagà ɓɔɔ ɓisay ɓimbog, à rɔ̀ɓ lɔŋ lɛ a kpaàkpaa ɓum ɓìɓan ɓi Bɛ̀ll, à kakàlì Ɓɛ̀yudɛ̀n à ki sììrɛn lɛ, Yeesus yɛɛ ri Kiris.

⁶Yɛ̀ɛ Ɓɛ̀yudɛ̀n ɓɛ ɓeèdɛ̀ngà ɓìɓan ɓi Pol à kpaakpààghà, ɓɛ ki sɛmgi nyi, fɔɔnnɛ à sàɗkà kùrùɓu ànɛ à ɓaghà nyi ɓi ɓìlàà à kpaa ɓɔ lɛ: Ì ɓì ɗyaŋi ŋwos yɛ̀ɛ gɛɛ̀nɛ, di zɛ̀ɗ yiǹ ì mìniìɓɔmiɗ, mɛ̀ ǹ-yiìdi miì rì bɛ̀lɛn. Fɔɔnnɛ à tumɛ̀n ɓigomìnɛ, ǹ-yùu kì kɛ̀ɛ a ɓɛ̀roɓɛ ɓɛ yin Ɓɛ̀yudɛ̀n.

⁷Nni à pɛ̀sɛ̀ngà foo à kɛ̀n a mɛɛ mɛ ŋwaàdɛŋ ànɛ àa ǹɗisàg Bɛ̀ll ɗii lɛ Tityus-Yustus, mɛɛ mii mɛ ɓaghà jàŋbog ɗì naà-bɔ̀ŋzɛ̀n.

⁸Nsoò fɔlɔɔ, rìfòm ɗi naà-bɔ̀ŋzɛ̀n, ɗii lɛ Kirispus ɗi gherɛ̀ngà Kan, rì rìmɛɛ ɗii ɗicèm, fɔlɔɔ nnɛ ɓumɓɛ a Kɔrɛŋt lɛɛ̀gwey ɓɛ ɓɛ wokà ɓìɓan ɓi Pol ɓɛ gherɛ̀ngà girig, ɓɛ ki ɓàɓtag.

⁹Ɓi-ru wudɛŋ, Kan à kpaaghà Pol a ɓìdɛ̀ndɛm lɛ: Kɔ̀ɔ risi, kɛ̀na asu rì rìkakàlì ɗi ɓɔlɛ, kɔ̀ɔ mam.

¹⁰Ɓisuulɛ, ǹɗì wɔ̀ ajɛ̀m, ŋwaàdɛŋ à yin lɛ à saàgh wɔ̀ càg ɓi nyoo lɛ a ki wɔ̀ kìɓe ɓisuulɛ ɓum ɓɛm ɓɛ ronɛɛ fɛ ɓi bàn ìnɛ.

¹¹Pol à kɔ̀rìghà a Kɔrɛŋt bèg bog rì kìden di a rèresi ɓum ɓìɓan ɓi Bɛ̀ll.

¹²Ɓi mɛ̀ru mɛ Galyɔŋ à ɓaghà gɔmìnà ànɛ ɓi kìlànà ki zi ki lɛ Akayi, Ɓɛ̀yudɛ̀n ɓɛ wɔrɛ̀ngà ɓɔɔ̀cèm, ɓɛ ɓigtì paàzì rì Pol ɓɛ kɛǹ ɗì nyi ɓi naà-ɓɛ̀yɔ̀m.

¹³Ɓɛ kpaa lɛ: Ŋwaànɛ a tootoòsì, ɓum lɛ ɓɛɛ ɓɔgsi Bɛ̀ll ɓi rìkuu ɗi riɓɔgsì ɗi ɓìdɔ̀gsɛna ɓi reègh.

¹⁴Lɔŋ yɛ̀ɛ Pol à mɛɛ kìghà lɛ a pini ŋwɔm a toòghrɛn, Galyɔŋ à kpaa Ɓɛ̀yudɛ̀n ɓɛǹ lɛ: Mìni Ɓɛ̀yudɛ̀n! I kaa rì lɛ Pol à woliì mum nsoò lɛ à sɛ̀raaghiì coo kiɓan kidɛŋ, di ǹɗì lɛ ǹkɔ̀rì lɛ fyòoog ǹkonàg tì kì woògh sɔmìnà wìn yɛ̀ɛ ki ghɛɛ̀sɛɛ.

¹⁵Nni yɛ̀ɛ ki rì lɛ ɓi nyoonyolɛ̀n ɓi dɔgtɛ̀n ìdɛŋ rì ɓi mii mɛdɛŋ, rì ɓi ɓìdɔ̀gsɛna ɓin, mìniìɓɔmiɗ yɛɛ ghɛɛ̀sɛɛ kìpègsɛɛ kiɓan kin; mɛ̀ ǹ-yin lɛ ǹ-yɔ̀m ɓìɓan ɓi fɔlɔɔ.

¹⁶Fɔɔnnɛ à kpaŋzìghà ɓɔ ɓi naà-ɓɛ̀yɔ̀m.

¹⁷Nni Ɓɛ̀yudɛ̀n ɓɛǹ ɓɛ̀sɛ̀ɛ̀ ɓɛ̀cèm ɓɛ sɛngà ɓi Sostɛn ànɛ à ɓaghà ǹlàmì naà-bɔ̀ŋzɛ̀n, ɓɛ tumɛ̀n nyi rìɓog ɓi mis mɛ ɓɛyɔ̀mì-ɓìɓan, wɔ̀lɛ rìkì ɗiǹ ɗyɛ̀ kɛɛ̀ yeesi Galyɔŋ nsoò lɛsàg.

¹⁸Pol à kɔ̀rìghà tì a Kɔrɛŋt gàɓ, fɔɔnnɛ à ghesɛ̀ngà ɓɛ̀geni ɓɛ righerɛ̀n, à teɗ min kikɔm lɛ a kɛǹ a Sirii. À kɛ̀ɛ̀zɛ̀ngà rì Pirisilya ɓɛɛ̀ Akilas. Pol à kɛ̀ŋɗɛ̀ngà ǹto à Saŋkire ɓisuulɛ, à càrɛ̀ngà tyòŋ ɓi bɛ̀ɗ idɛŋ ìnɛ ɓɛ ǹɗegi lɛ bɛ̀ɗ i nàziryià.

¹⁹Yɛ̀ɛ ɓɛ kpagà a Efɛɛzɛ Pol à càɗ Pirisilya wɔɔ ɓɛɛ̀ Akilas, à kɛ̀n ɓi naà-bɔ̀ŋzɛ̀n à tòkì rì Ɓɛ̀yudɛ̀n.

²⁰Ɓɛ̀roɓɛ̀n ɓɛ tɔg nyi lɛ a kɔri gàɓ ì mɛ̀ru rì ɓɔ, à ɓèn.

²¹Kìɓan kifog à ghasɛ̀ngà rì ɓɔ, à ki kàg ɓɔ lɛ, à rì ɓiì sugtii yi a lɔ̀ŋkaa ŋwos adɛŋ di Bɛ̀ll à kɔ̀ni. Fɔɔnnɛ à kpaghà lɛ: Ki ghɛɛ̀sɛɛ lɛ, nɗi tìcàɓ ti ti riì ti a Yorisalɛm nsoò kaa ɓaa la. Nni à pɛ̀sɛ̀ngà a Efɛɛzɛ ɓi fìtimà.

²²Yɛ̀ɛ à sɛni fìtimà à Sezare, à ɓɔg kitògsii ǹɗaŋ wu ɓɛgherɛ̀n wu a Yorisalɛm, fɔɔnnɛ à sɛngà min a Aŋtyos.

²³Yɛ̀ɛ à kɔ̀rìghà wɔɔ gàɓ, nni à pɛ̀sɛ̀ngà tì, à reni zi ì Galasi bimiɗ, à ghaàgh min a Firizii, di a sìisiìràg ɓɛ̀yilàg ɓɛ̀cèm ɓi rìgherɛ̀n.

²⁴Muu Ɓɛ̀yudɛ̀n àdɛŋ ɗii lɛ Apolos, ànɛ à yalɛ̀ngà a Alɛgsaŋdirii, à kpagà a Efɛɛzɛ. Ŋwaànɛ̀n à kìghà lɛ, à yi rìlɛ̀ŋì ɗi ɓitòkì, à ki yi ɓiɓan ɓi ɓi kaàtà à Bɛ̀ll lɛɛ̀gwey.

²⁵Ɓɛ ɓaghà di ɓɛ mɛ rèsi nyi bee ì Kan ǹɗem wii wu ki falɛn miì lɛɛ̀gwey. A kakàlìghà ɓum, à ki rèresi ɓɔ ɓìɓan ɓi Yeesus yɛ̀ɛ ki ghɛɛ̀sɛɛ, kìɓan kifog, bàɓtis ì Zyaŋ yɛɛ̀nɛ nyii yighà yɔ̀riyɔ̀.

²⁶Nni Apolos à tumɛ̀ngà rìtòtòg ɓi naà-bɔ̀ŋzɛ̀n kɛ̀ɛ̀ ìris, yɛ̀ɛ Pirisilya rì Akilas ɓɛ wokà ɓìtòkì ɓii, nni ɓɛ tekà nyi, ɓɛ konàg nyi kì tɛɛ̀zaagh bee inɛ yɛ̀ɛ Bɛ̀ll.

²⁷Ajɛ̀m ìnɛn, Apolos à fèkà lɛ a kɛǹ a Akayi, ɓɛ̀geni ɓii ɓɛ righerɛ̀n ɓɛ teèsì nyi nyoo lɛ a kɛǹ, ɓɛ ki kàn ɓɛgherɛ̀n ɓɛ wɔɔ lɛ, ɓɛɛ ghaɓ nyi lɛ syeesyee. Yɛ̀ɛ à kpàgà wɔɔ, à ɓaghà rì ǹghɛɓsɛn ɓisuu ɓum ɓɛ̀cèm ɓɛ geesɛ̀n ì Bɛ̀ll ì kìghà lɛ, ɓɛɛ ɓa ɓɛ̀gherɛ̀n,

²⁸lɛ àa ǹti à ciìzàg Ɓɛ̀yudɛ̀n lɛ kɔɔ̀kɔɔ̀ di ɓɛɛ̀ ǹyoonyolɛ̀n ɓi gwìy. À rèrèsì ɓɔ, di a ɓaaɓaàzì rì kaàtà à Bɛ̀ll lɛ, Yeesus à rì Kiris.