Read Bafia MƐ̀KÌKÌÌ MƐ ƁƐKƐ̀NÌ-FÌTOM 2 Bible Online

MƐ̀KÌKÌÌ MƐ ƁƐKƐ̀NÌ-FÌTOM 2 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 2

¹Ŋwosi Pàŋtèkot, ɓɛ̀gherɛ̀n ɓɛ̀cèm ɓɛ ɓaghà ɓɛ̀ taŋzɛn jàŋbog.

²Nni ɓɛ sigmɛ̀ngà lɛ, gom ì rìì aɗyoo, ì ɓa yɛ̀ɛ gom ì coo bɛ̀ɓ ki kɛɛ̀ fɛɛfɛɓsì, ki yu kì ronì naa ìnɛ ɓɛ ɓaghà miì.

³Fɔɔnnɛ ɓɛ ghɛngà ɓyom yɛ̀ɛ mɛ̀ròò mɛ ɗuu, ɓincèm ɓì ghasakɛn dɛŋ-dɛ̀ŋ-dɛŋ di ɓyɛɛ̀ ɓɛ̀ɓɛli ɓɔ ɓi nyòò.

⁴Ɓɛ̀sɛ̀ɛ̀ ɓɛ̀cèm ɓɛ ɓa min ɓɛronɛn ri Kìtɛntɛ̀ɛ̀n ki Nghay, ɓɛ ki tòtog ɓitòkì ɓidɛŋ lɔŋ yɛ̀ɛ Nghay à fafàghà ɓɔ ìtèɗ wu lɛ ɓɛɛ totòg.

⁵Wɔ̀lɛ Ɓɛ̀yudɛ̀n ɓɛ ɓɛ falɛ̀ngà ɓi rìgherɛ̀n ɓɛ ɓaghà girig a Yorisalɛm, di ɓɛ pɛsaagh yì ɓi ɓìlɔ̀ŋ ɓìcèm ɓi ɓi ziinɛ.

⁶Yɛ̀ɛ gom ìnɛ̀n ì kìlɛ̀ngà fɔlɔɔ, ɓum ɓɛ ghɛŋmɛ̀n yì nni yɛ̀ɛ mum ǹcèm ànɛ ɓi ɓumɓɛ̀n à woogh di ɓɛ̀kɛ̀nì-fìtom ɓɛɛ̀ tòtog kitòkì kii, ɓɛ rɔɓ lɛ rèèree.

⁷Ɓɛ̀sɛ̀ɛ̀ ɓɛ̀cèm ɓɛ kuuràkà ɓɛ rɔɓ myɔm ɓìkpaŋ. Fɔɔnnɛ ɓɛ tɔɔ̀tɔ̀ɔ̀ghrɛ̀ngà ɓɔrìɓɔ lɛ: Nti ɓum ɓɛ̀cèm ɓɛ ɓɛɛ̀ tòtog ɓɛ, ɓɛ rì ɓumɓɛ a Galile?

⁸Nni cɛ kɛɛ kiì lɛ, mum bimiɗ ànɛ ɓi ɓìsi a wowog di ɓɛɛ̀ tòtog kitòkì kii?

⁹À tumɛ̀n lɛ ɓɛ̀-Paritɛ, ɓɛ̀-Mɛɛɗɛ, ɓɛ̀-Elamit, ɓumɓɛ a Mɛzopotamii, ri ɓɛ a Zyude rì ɓɛ a Kapados, rì ɓɛ a Pɔŋ, rì ɓɛ a Azii,

¹⁰ɓɛ̀roɓɛ a Firizii, rì ɓɛ a Paŋfilii, rì ɓɛ a Egiɓtɛn, rì ɓɛ ɓi, kìden ki zi ki a Liɓii ki ki wòŋzɛɛ rì Sirɛn, rì ɓɛ̀roɓɛ ɓɛ pɛsɛ̀ngày a Rom, à teɗ lɛ, Ɓɛ̀yudɛ̀n ɓɔmiɗ, rì ɓɛ̀roɓɛ ɓɛ lɔɔ̀ghrɛ̀ngà ɓi rìgherɛ̀n ɗi Ɓɛ̀yudɛ̀n à kpaŋ lɛ,

¹¹ɓumɓɛ a Kirɛɗɛ, rì ɓɛ a Araɓii, cɛ kɛɛ kii lɛ, ti wowog yɛ̀ɛ ɓɛɛ̀ kakali dàm yi ɓiɓan yi Bɛ̀ll ɓi ɓìtòkì ɓis?

¹²Ɓɛ̀sɛ̀ɛ̀ ɓɛ̀cèm ɓɛ kuuràkà; ɗyomzɛ̀n ɗi ɗim ɓɔ, ɓɛ tɔɔ̀tɔ̀ɔ̀ghrɛ̀n ɓɔmiɗ lɛ: Rìkuu ɗi kiɓan aɗi ɗyɛɛ̀ ri lɛ?

¹³Kìɓan kifog, ɓum ɓɛdɛŋ ɓɛ wɔwɔ̀là ɓɛ̀yilàg ɓɛ kpaakpàà lɛ, ɓɛ ri ɓɛ̀ŋwaŋɛn mɛrɔ̀g lɛ kɔɔ̀kɔɔ̀.

¹⁴Nni Pyɛɛri à pɛ̀sɛ̀ngà aɗyoo rì ɓɛ̀kɛ̀nì-fìtom ǹtɛ̀ɗ rì bog, à kpaa ɓumɓɛ̀n jɛ̀ɛ̀ aɗyoo lɛ: Mìni Ɓɛ̀yudɛ̀n, rì mini ɓɛ̀sɛ̀ɛ̀ ɓɛ̀cèm ɓɛ ɓi kɔ̀kɔrii a Yorisalɛm, ramina mɛ̀ree, ɓi wog kìɓan ki nkìki lɛ, nkpaà mìni:

¹⁵Ɓumɓɛ ɓɛ ŋwaŋi ɓi mɛrɔ̀g yɛ̀ɛ ɓi fèfeg lɔɔ, lɛ mɛ̀kɛ̀ɛ̀ taànìn à sariwa yɛɛ kaka lɛ.

¹⁶Kìɓan kifog, Bɛ̀ll yɛɛ roozii jɛ̀ɛ̀ yìì inɛ à kpaaghà ɓi ŋwɔm wu ǹkpaŋzì-ɓìɓan wiì ànɛ lɛ Zyuwɛl lɛ:

¹⁷Ɓi mɛ̀ru mɛ siitòn, ǹɗomigɛy Ǹghay wɛ̀m ɓi mum bimiɗ, fɔɔnnɛ ɓɛ̀dɛlì ɓin rì ɓɛ̀gɔ̀n ɓin ɓɛ ɓaà gɛ ɓɛ̀kpaŋzì-ɓìɓan ɓɔn ɓin ɓɛ ghɛnghɛ̀n dàm yi ɓiɓan rì ìtèɗ wu Nghay à Bɛ̀ll, ɓìdɛ̀ndɛm ɓi kikì ɓìtùg ɓin ɓi ɓum.

¹⁸Ɛ̀ɛ̀! ɓi mɛ̀ru mɛ̀n nfoŋi gɛ Ǹghay wɛ̀m ɓi ɓɛ̀kìì-ɓìsay ɓɛm lɛ, rì ɓɛ ɓɛbaŋì, rì ɓɛ ɓɛ̀yiɓ lɛ ɓɛɛ kpaŋzi ɓìɓan.

¹⁹Nɗi kìi gɛ lɛ dàm yi ɓiɓan yɛɛ resɛn ɓi ɗyoo ɓi ɗùm, ɓɛ̀koŋnyoo ɓɛ ɓiɓan ɓɛ kilɛ̀n ɓi ziinɛ; rì bwaɓ, rì ɗuu, rì fìsilì ɓi ɓaa gɛ;

²⁰ŋ̀wos à suu gɛ ɓi mis yɛ̀ɛ birìm, ŋwii à lɔɔ̀ghrɛ̀n m̀ɓàŋ yɛ̀ɛ bwaɓ, di gòn i rìyù ɗi Kan ì ka kpaŋ ɓi, yɛ̀ɛ ri ɓaa gɛ coo ŋwos a rìkem ɗii.

²¹Fɔɔnnɛ mum ǹcèm ànɛ à reŋii gɛ ɗii ɗi Kan lɛ a ghɛɓsi nyi à ghɛɓi gɛ.

²²Mìni ɓumɓɛ a Isirayɛl, wooghna kìɓan ki nkìki lɛ, nkpaà mìni: Yeesus ànɛ a Nazarɛt àa nɗì ŋwaànɛ Bɛ̀ll àa ǹɗèsii mìni lɛ, nnyɛɛ romgày nyi, ɓi dàm yi ɓiɓan, rì ɓɛ̀koŋnyoo ɓɛ ɓiɓan, rì ɓìrèmzɛnà ɓi à faghà nyi ìtèɗ wulɛ a ki ɓi nyìinyìm wìn lɔŋ yɛ̀ɛ mìniìɓɔmiɗ ɓì yii.

²³Yeesus ànɛn innɛ ɓɛ nkàɓi lɔŋ yɛ̀ɛ ki ɓaghà kìkaliyɛn, lɔŋ yɛɛ̀ Bɛ̀ll à fèkà ɓi coo ɗyomzɛ̀n ɗii, nyi nnɛ ɓìi nkpani ɓi kɔrɔs aɗyoo, ɓì ki fa nyi rì ɓɛ̀kìì-kìɓe lɛ ɓɛɛ wey.

²⁴Wɔ̀lɛ Bɛ̀ll àa ǹghèmzii nyi, à fùmì nyi bɛn yi riwù, lɛ ki n-yin lɛ ki kilɛ̀n lɛ, rìwu ɗyɛɛ ghaatɛn yì rì nyi.

²⁵Lɛ Davit à ɓùgà kìɓan kii yɛ̀ɛ à kpaaghà lɛ: Ǹseesèèghà lɔŋ Kan mɛ̀ asu ɓyààmɛ̀n ɓìcèm, ɓisuulɛ, à rì mɛ̀ ɓi weèlem lɛ m̀ɓa kɛ̀ɛ ǹnìŋdɛ̀n.

²⁶Kìɓan kiǹ kɛɛ̀ki ǹɗem wɛ̀m wu roni rì kìnyàà, ɓìtòkì ɓyɛm̀ ɓi ki ɓa ɓikpakpag ɓi kinyàà; nsoò nyoo yɛ̀m ì rì ɓiì fɔɔsɛɛ lɛ fyòoog rì ǹtyweeyi wu ǹɗì rì wɔ.

²⁷Lɛ, wàa rini ɓi ǹghay wɛ̀m a ǹyɔ̀ɛ̀y ìsuùcèm, kɔ̀ɔ ki gherɛn lɛ ǹkìì-kìsay wɔɔ̀ ànɛ àrì ǹtɛnɛn a ɓwɛy ɓi zɔ̀ŋ.

²⁸Ù rèsìghà mɛ̀ bee ì cɛɓ, fɔɔnnɛ rìɓa ɗi ù rì mɛ̀ jàŋbog, ɗi ri fa mɛ coo kinyàà.

²⁹Ɓɔɔsoŋ̀, ǹɗì lɛ ǹkpaa mìni lɛ tɛntɛ̀ɛ̀n ɓi ɓɛg ànɛ yɛ̀ɛ Davit à seŋi wis a ǹsɛ̀ɛ̀ lɛ: À wughà, ɓɛ ki ɓòm nyi, zɔ̀ŋ yìì i rì fɛ a lɔ̀ŋkis à kpaŋ gɛɛ̀nɛ.

³⁰Kìɓan kifog, yɛ̀ɛ à ɓaghà ǹkpaŋzì-ɓìɓan à ki yi ǹkàg wu Bɛ̀ll à kàkà nyi à kànɛ̀n bɛ̀ɗ lɛ, à kɔ̀ɔ̀sii gɛ dòò yìì idɛŋ ɓi-kɔ̀ɔ̀ wii wu rilàmì,

³¹rìghèmɓɛ̀n ɗi Kiris ɗyɛɛ̀ɗi à lokà lɔɔ ki ghɛɛ̀, à ki kpaa lɛ: Bɛ̀ll àa rini ɓi nyi a nyɔ̀ɛ̀y, kɛ̀ɛ ki càɗ lɛ nyoo yìì yɛ̀ɛ ɓwɛy ɓi zɔ̀ŋ.

³²Yeesus ànɛ̀n nnɛ Bɛ̀ll àa ǹghèmzii, ɓìsiìcèm tì rì ɓɛ̀wusìnɛ̀ɗ ɓɛ ɓi rìghèmɓɛ̀n ɗii.

³³Yɛ̀ɛ àa mɓɔɔ ki kɔ̀rii ɓi weèlem à Bɛ̀ll, Seŋi àa nfaa nyi Kìtɛntɛ̀ɛ̀n ki Nghay ki à kàkà, kɛɛ̀ki à romiì lɔŋ yɛ̀ɛ ɓi seesee lɛ, ɓì ki wowog.

³⁴Davit à ɓɔkà ɓi aɗyoo kìɓan kifog nyimiɗ a kalag lɛ: Kan Bɛ̀ll à kàlighà Kan wɛ̀m lɛ, kɔ̀ri mɛ̀ fɛ ɓi weèlem

³⁵à kɛ̀n kì kpaŋì yɛ̀ɛ ǹɗì ɓiì ghaasii ɓɛ̀bènàbena ɓɔɔ com ki, u rɛsag mɛ̀kòò miì.

³⁶Ɓum ɓɛ̀cèm ɓɛ a Isirayɛl ɓɛ ghɛɛ̀sɛɛ kì yiì syeesyee à rìyi lɛ, Bɛ̀ll àa ǹkìi lɛ, Yeesus ànɛ ɓìi nkpani ɓi kɔrɔs aɗyoo a ɓa lɛ nyi Kan wis, nyi Kiris.

³⁷Yɛ̀ɛ ɓɛ wokà ɓìtòkì ɓi Pyɛɛri ɓiǹ, ɓi ɗiŋì ɓɔ ɓi ǹɗem lɛ kɔɔ̀kɔɔ̀, nni ɓɛ tɔkà Pyɛɛri ri ɓɛ̀kɛ̀nì-fìtom ɓɛm̀bog lɛ: Ɓɔɔsoŋ̀, ki ghɛ̀ɛ̀sɛɛ min lɛ ti ki la?

³⁸Pyɛɛri à ɓàg ɓɔ lɛ: Lɔ̀ɔ̀ghrɛɛna mɛ̀rem, mum ǹcèm ànɛ ɓi mìni à ki ɓàɓtɛn ɓi ɗii ɗi Yeesus Kiris fɔɔnnɛ Bɛ̀ll a cenɛn ɓìɓe ɓin, à ki fa mini Kìtɛntɛ̀ɛ̀n ki Nghay.

³⁹Lɛ ǹkàg wu Bɛ̀ll à kàkà wu ri ɓisu win, rì ɓisuu ɓɔn ɓin, wu ki ɓa ti ɓisuu ɓum ɓɛ̀cèm ɓɛ ɓɛ ri tìràɓ, ɓɛɛ̀ɓɛ Kan Bɛ̀ll wìs à regiigɛy bàlì ìnɛ ki kɔ̀ni gɛ nyi lɛ a regiì.

⁴⁰Fɔɔnnɛ Pyɛɛri à rèrèsìghà ɓɔ saaɗ, à ki rereɓ ɓɔ rì jɛ̀ɛ̀ yidɛŋ yi à kpaatìghà ɓɔ nwèe: Pɛ̀sɛɛnas̀ lɛfyɛ̀ɗ ɓi nyìinyìm à ɓumɓɛ ɓɛ ri ɓi rìɗim ɓi ɗùm.

⁴¹Ɓumɓɛ ɓɛ gherɛ̀ngà rìkpaa ɗi Pyɛɛri ɗiǹ ɓɛ ɓaɓtàkà, fɔɔnnɛ bàlì ì ɓum ìnɛ ì sagtɛ̀ngà ɓi bàlì ì ɓɛ̀gherɛ̀n, ì ɓaghà nunùg ɓum ɓɛ̀tɔɔsìm ɓɛraa.

⁴²Ɓɛ siìrɛ̀ngà ɓi rìwowòg ɗi rirèsàg ɗi ɓɛkɛ̀nì-fìtom, rì ɓi cɛɓ ki rigeni, rì ɓi rìcusàg ɗi bìrɛs, rì ɓi bɔ̀ŋzɛ̀n.

⁴³Ìris wu ɓangà mum ǹcèm ànɛ ɓi ɓɔ, lɛ ɓɛ̀kɛ̀nì-fìtom ɓɛ kikìghà dàm yi ɓiɓan rì ɓɛ̀koŋnyoo ɓɛ ɓiɓan, lɛɛ̀gwey.

⁴⁴Ɓɛ̀gherɛ̀n ɓɛ ɓaghà kìbyɔg kìfog, ɓyom ɓyaa ɓìcèm ɓi ɓa bùtag.

⁴⁵Ɓɛ kakàɓkà lɛ: Rì ɓìden ɓyaa ɓi zi, rì ɓyom ɓyaa, ɓɛ kaàkàɓɓɛ̀n mɔɔ̀ni mɛ miì ɓɛ̀sɛ̀ɛ̀ ɓɛ̀cèm, mum bimiɗ à tekì gàɓ ìnɛ ì ghɛ̀ɛ̀sɛɛ rì nyi.

⁴⁶Cààmɛ̀n kìcèm ɓɛ ǹti ɓɛ taŋzàg ɓi naà-Bɛ̀ll ŋwos bimiɗ, ɓɛ ɗiɗì ɓìɗilàg ɓyaa ǹɗaŋ ɓi naa yaa ɓɛ ɗiɗì ɓyɔ rì kìnyàà, rì ǹɗem wu risɛɛ̀dɛ̀n.

⁴⁷Ɓɛ mɓɔgsàg Bɛ̀ll, ɓum ɓɛ̀cèm ɓɛ ki keekeèsì ɓɔ, fɔɔnnɛ Kan à tèèghtègsìghà ǹɗaŋ waa ɓɛ ŋwos ɓɛ̀cèm rì ɓum ɓɛ ki kɔngà Bɛ̀ll lɛ a ghɛɓsi.