Read Bafia MƐ̀KÌKÌÌ MƐ ƁƐKƐ̀NÌ-FÌTOM 20 Bible Online

MƐ̀KÌKÌÌ MƐ ƁƐKƐ̀NÌ-FÌTOM 20 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 20

¹Yɛ̀ɛ kìyoòyòò kiǹ ki lekà, Pol à taŋzɛ̀n ɓɛ̀gherɛ̀n, fɔɔnnɛ à ɓaa lɛ à mɛ reɓ ɓɔ, à ghesɛ̀n min ɓɔ, à kɛ̀n a Masedwan.

²A renìghà kìlànà ki zi kiǹ di a fafa ɓɛgherɛ̀n deɓ lɛɛ̀gwey, ajɛ̀m ìnɛn nnɛ à kɛ̀ɛ min ki kpaŋì ɓi kìlɔ̀ŋ ki Gìrɛg.

³A kɔ̀rìghà wɔɔ ɓɛ̀ŋwii ɓɛraa, yɛ̀ɛ à mɛɛ̀ tekà fìtimà lɛ a kɛǹ a Sirii, nni à wokà lɛ Ɓɛ̀yudɛ̀n ɓɛ mɛ tɔ̀kɛn nyi, fɔɔnnɛ à tekà min nɗɛli lɛ, a sugti a Masedwan.

⁴Ɓumɓɛ Pol à ɓaghà ǹɗaŋ ɗi ɓɔ, ɓɛ ɓaghà lɛ: Sopatɛr, ànɛ à ɓaghà man à Pirus ànɛ a Bere, rì Aristarikɛ ɓɛɛ̀ Sekunɗus ɓumɓɛ a Tesalonika, Gayus ànɛ à ɓaghà ŋwaànɛ a Dɛriɓɛ, rì Timote, rì Tisig, rì Tirofim ɓɛ̀roɓɛ̀n ɓɛ̀sɛ̀ɛ̀ ɓɛ̀cèm ɓɛ ɓaghà ɓumɓɛ a Azii.

⁵Ɓumɓɛ̀n ɓɛ lokà kì kɛ̀ɛ asu, ɓɛ Kɛǹ ɓìsi kì ɓoŋì a Tirowas.

⁶Ɓi ɓɛg ànɛ a lɔ̀ŋkis, ɓìsii ɓɔkà kìkom a Filiɓ di mɛ̀ru mɛ ɓɛ nkìlàg ɓìrɛsì kɛ̀ɛ̀ nwìɗ mɛ mɛ ghaàgh, fɔɔnnɛ tì kɛ̀ngà ɓɔ kì tanɛɛ a Tirowas ɓi mɛ̀ru mɛtaǹ, tì ki kɔ̀ri wɔɔ mɛru taàɓɛ̀ɛ̀.

⁷Ɓi ŋwos a ǹtonto ànɛ ɓi rìtumɛ̀n ɗi sɔnɗì nnɛ tì ɓaghà ɓɛ̀taŋzɛn lɛ ti teɗ ɓìɗilàg ɓi Bɛ̀ll. Pol nyii ghɛɛ̀sɛ̀ngà kì ghaghii ɓi duri tana, nni à tòkàkà rì ɓɛ̀gherɛ̀n, à ki ràɓsi ɓitòkì à kpaŋ nyìinyìm à-ru.

⁸Ɓɛ̀lamɓà ɓɛ ɓaghà lɛɛ̀gwey ɓi kìden ki naa ki tì taŋzɛ̀ngà miì ɓi mɛɛ mɛ aɗyòò.

⁹Nni dɛlì ì mum ìdɛŋ ɗii lɛ Etig ìnɛ ì kɔ̀kɔ̀rìghà ɓi wonɗò ì ghaghìghà rì fìlo lɛ kɔɔ̀kɔɔ̀ di Pol a ka ràaraɓsì lɔŋ ɓitòkì ɓii, yɛ̀ɛ fìlo fi teri nyi fɔlɔɔ, nni à kɔ̀sɛ̀ngày ɓi dɛg ì kìraa, à kpì azi; yɛ̀ɛ ɓɛ mɛɛ̀ pɛ̀sìghà nyi, ɓɛ ghɛn lɛ, à mɛ wu.

¹⁰Fɔɔnnɛ Pol à sɛngà min à kɛ̀n mɛ̀ree à pɛ̀sì dɛlì ìnɛn, à kpaa ɓum lɛ: Kɔ̀riina lɛ fyòoog, à rì cem.

¹¹Nni à sugtìghà kìɓɔɔ̀gh, à ɓɛg bìrɛs à ɗi ajɛ̀m ìnɛn nnɛ à kɛ̀ɛ̀dìtìghà lɔŋ ri ɓìtòkì ɓii asu, duri ì ràm ì tan, fɔɔnnɛ à ki ghaghìghà min.

¹²Ɓɛ sukà rì mutyàà dɛlì ànɛn, di à rì cem, kìɓan kiǹ ki ki lɛ, mɛ̀rem mɛɛ kpi ɓum ɓi mùm.

¹³Fɔɔnnɛ ɓìsii lolòkà kì kɛ̀ɛ beèbɛ̀y ɓi fìtimà fi fi kɛnkɛ̀ngà a Asɔs, wɔɔnnɛ tì ghɛ̀ɛ̀sɛ̀ngà kì teetii Pol, ɓisuulɛ nyii kɔnkɔ̀ngà lɛ, a kpaŋ wɔɔ ɓi zi.

¹⁴Nni yɛ̀ɛ à tanɛ̀ngà ɓìsi a Asɔs, tì teɗ nyi ɓi fìtimà lɛ, ti kɛǹ a Mitilɛn.

¹⁵Yɛ̀ɛ tì Pɛ̀sɛɛ wɔɔ, tì ghagsì lɔŋ rikɛ̀ɛ̀ ɗis ɓi fìtimà, tì kɛ̀n kìkpaŋì a Siyos ɓi duri tana, ŋwos anɛ à ɓɔ̀ɓkà foo, tì syaàghà a Samos, ɓi ànɛ à ɓɔ̀ɓtìtìghà nnɛ tì kpagà a Milɛ.

¹⁶Pol à ɓaghà ǹsììrɛn lɛ kɛ̀ɛ rɛli a Efɛɛzɛ lɛ, cààmɛ̀n ki ri nyi ɓiì cee a Azii. À ɓòòɓòòzɛ̀ngà lɛ, a ɓa a Yorisalɛm ɓi ŋwosi Pàŋtèkot, di bee i ɓaa.

¹⁷Pol à pɛ̀sìghà ɓum a Milɛ, à rom lɛ ɓɛɛ regiì nyi ɓɛ̀sɛ̀ɛ̀mɛn ɓɛ kiseŋì ɓɛ ɓi kìseŋi ki a Efɛɛzɛ.

¹⁸Yɛ̀ɛ ɓɛ̀roɓɛ̀n ɓɛ yughày, à kpaa ɓɔ lɛ: Ɓì yi yɛ̀ɛ mɛ̀ɛ ǹghɛghɛɓi rì mìni cààmɛ̀n kìcèm ki mɛ̀ɛ nɗì rì mìni, à tumɛ̀n lɔŋ ɓi ŋwos à ǹtonto ànɛ ǹkpagà ɓi kìlànà ki zi ki a Azii.

¹⁹Mɛ̀ɛ nkìi Kan kìsay kɛ̀ɛ m̀ɓɔgsɛn mɛ̀ɛmiɗ nsoò lɛsàg, rì misì ɓi mɛ̀tam ɓi nyìinyìm à mɛ̀tɔɓ mɛ mɛ̀ɛ nghɛɛ lɛ ɓìtɔ̀kɔ̀ ɓi Ɓɛ̀yudɛ̀n ɓɛ ntɔɔ̀tɔ̀kɛ̀n mɛ̀.

²⁰Ɓì yii lɛ, ǹnyamgà ɓi mini kìɓan kidɛŋ ki ki ri lɛ, ki ghɛɓsì mìni, kɛ̀ɛ ǹki risi mini rìkpaakpàà, ɗì rìrèèrèsàg ɗi ɓiɓan ɓi Bɛ̀ll ɓi gwìy ì ɓum, nsoò lɛ a ɓɛ̀mɛɛ ɓin.

²¹Ǹɗerèŋìghà lɛ, rì Ɓɛ̀yudɛ̀n rì Gìrɛg lɛ ɓɛɛ lɔɔ̀ghrɛn mɛ̀rem, ɓɛ gherɛ̀n Bɛ̀ll, ɓɛ ki tyweeyi Yeesus à Kan wìs.

²²Nni ɓigominɛ, ǹkɛ̀ɛ a Yorisalɛm lɔŋ yɛ̀ɛ Nghay a titini mɛ lɛ nkɛǹ, ǹ-yii ɓi com ki kɛɛ̀ ɓoŋɓoŋ mɛ wɔɔ.

²³Kìɓan kifog, ǹ-yii lɛ ɓi bàn bimiɗ ìnɛ ǹkpaŋi wɔɔ, Kìtɛntɛ̀ɛ̀n ki Nghay ki ti ki resàg mɛ̀ lɛ, rì naà-zày, rì ǹkulɛ̀n ɓyɛɛ̀ ɓoŋɓoŋ mɛ wɔɔ.

²⁴Mɛ̀ m̀ɓiisɛɛ gì ɓi ki foŋì ǹto ɓi cɛɓ kɛ̀m ki mɛ̀ɛmìɗ, com ki nfɔmfɔ̀m ki ri lɛ, nkɛnkɛn asu rì rìkɛ̀ɛ̀ ɗyɛm̀ yɛ̀ɛ ki ghɛɛ̀sɛɛ, ǹki kì kisay ki Kan Yeesus à faghà mɛ̀, kɛɛ ri lɛ, ǹghagsi Syeesyee à Ɓɔlɛ à geesɛ̀n ì Bɛ̀ll.

²⁵Mìni ɓɛ̀sɛ̀ɛ̀ ɓɛ̀cèm ɓɛ ǹghaghìghà a lɔ̀ŋkin di nkakali Ɓɔlɛ à kìlɔ̀ŋ ki Bɛ̀ll, ǹ-yii lɛ syeesyee lɛ, ɓyàa ghɛɛ̀di ɓi ìsu wɛ̀m à tumɛ̀n ɓigomìnɛ.

²⁶Kìɓan kiǹ kɛɛ̀ki ǹkalii mìni gɛɛ̀nɛ lɛ: Bwaɓ yi wààdɛŋ yi yìn lɛ, yi kɛǹ mɛ̀ ɓi ǹto.

²⁷Ɓisuulɛ, ǹkpàkàkà mìni dwìɗ i Bɛ̀ll bimiɗ, kɛ̀ɛ nnyam mini nsoò maa kìɓan adɛŋ.

²⁸Fɔɔnnɛ, ɓèŋina mìniìɓɔmiɗ, ɓì ki ɓèŋ di kituu ki jɔ̀ɔ̀ yi Bɛ̀ll, yi Kìtɛntɛ̀ɛ̀n ki Nghay ki rɛsìghà mìni lɛ ɓi ɓeŋ̀ɓeŋ. Mɛniina kìseŋi ki Bɛ̀ll lɛ syeesyee, lɛ à làkà kɔ rì bwaɓ yii.

²⁹Mɛ̀ ǹ-yii lɔŋ lɛ ɓum ɓɛdɛŋ ɓɛ ɓɛ rì yɛ̀ɛ ɓìmonɗo, ɓɛ ri ɓiì ɗiŋii ɓi nyìinyìm wìn ajɛ̀m yɛ̀m, ɓumɓɛ̀n ɓaa kèŋi ɓi kituu ki jɔ̀ɔ̀.

³⁰Nsoò ɓi nyìinyìm wìn, ɓum ɓɛdɛŋ ɓɛ tumɛɛ gɛ rìrèrèsì ɗi ɓum ɓìɓan ɓi ɓi ghɛɛ̀sɛɛ ɓi, lɛ, ɓɛɛ syoŋ̀ ɓɛ̀gherɛ̀n ɓi bee yaà.

³¹Fɔɔnnɛ ɓaana cem, ɓì ki yiti lɛ, ǹɗeɓi mìni bèg yiraa, yɛ̀ɛ ìru yɛ̀ɛ ŋwos kɛ̀ɛ nfɔɛy, rì misì ɓi mɛ̀tam.

³²Nni ɓi cààmɛ̀n ki, ǹɗeɓsɛɛ mìni rì Bɛ̀ll ǹki reɓsɛnti mìni rì ɓɔlɛ à geesɛ̀n yìì; ɓɔlɛ ànɛ̀n yɛɛ ri lɛ, à kì lɛ ɓi ɓa rì ìtèɗ, à ki fati mini ɓyom ɓi à nyamgà ɓisuu ɓumɓɛ ɓɛ ri ɓɛŋkii.

³³M̀ɓaghà ɓi ri zày ìnɛ lɛ, mum a fa mɛ̀ mɔ̀ɔ̀ni, nsoò gol, nsoò ɓìlàà.

³⁴Mìniìɓomiɗ ɓì yii lɛ, ǹsasàlà rì ɓyàg ɓyɛm̀ ɓi, lɛ ǹtanɛn ɓyom ɓi ti ghɛɓ miì lɛ rì mɛ̀, rì ɓumɓɛ ǹkɛ̀ɛ̀kɛ̀ɛ̀ghà rì ɓɔ.

³⁵Mɛ̀ɛ ǹɗèsii mìni bee yicèm lɛ, cààmɛ̀n ki ɓi sasay fɔlɔɔ, kɛɛ̀ki ɓì rì ɓiì ghɛɓsii ɓɛ̀roɓɛ ɓɛ yin ɗi ìtèɗ, ɓì ki yiti jɛ̀ɛ̀ ìnɛ Kan à kalìghà ɓi ŋwɔm wii lɛ: Rì ŋwaànɛ à faa, rì ŋwaànɛ ɓɛ faa com roànɛ à faa yɛɛ ti à ɓiisàg kì woògh kìrɔɔ.

³⁶Yɛ̀ɛ à lègsìghà ɓìtòkì ɓiǹ fɔɔnnɛ à ɓakà mɛ̀ɗu ɓi zi, à ɓɔ̀ŋzì Bɛ̀ll ǹɗaŋ rì ɓɔ.

³⁷Fɔɔnnɛ mum bimiɗ ànɛ ɓi ɓɔ à kpusɛ̀ngà rì ǹkɛ̀gh, à ki fyuŋ Pol ɓi kìmììgh lɛ a lɔɛɗ nyi.

³⁸Kìɓan ki ki ɓiisɛ̀ngà ɓɔ kì faà ǹɗemi-kɛŋɛn ki ɓaghà jɛ̀ɛ̀ ìnɛ Pol à kpaaghà ɓɔ lɛ, ɓaa ghɛɛ̀di ɓi ìsu wii ŋwos adɛŋ. Nni ɓɛ kɛ̀ngà min nyi ki foŋì a fìtimà.