Read Bafia MƐ̀KÌKÌÌ MƐ ƁƐKƐ̀NÌ-FÌTOM 21 Bible Online

MƐ̀KÌKÌÌ MƐ ƁƐKƐ̀NÌ-FÌTOM 21 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 21

¹Yɛ̀ɛ tì ghasɛ̀ngà rì ɓɔ, ɓìsii ɓɔg ɓi fìtimà tì ròŋì bee inɛ a Kos lɛ saaɗ. Ɓi duri tana tì kpaŋ a Roodɛ, yɛ̀ɛ tì pɛ̀sɛ̀ngà wɔɔ, tì kɛ̀n a Patara.

²Tì tanɛ̀ngà fìtimà fi fi ɓaghà ɓiì kɛ̀nkɛni a Fenisii, tì ɓɔg min miì, tì kɛ̀n.

³Yɛ̀ɛ tì ɓaghà di tì ti ɓiì seesee yì kìrìŋ ki riɓày ki lɛ Siipirɛ, tì càdkày kɔ ɓi kìmɛŋ tì nɔ̀ɔ̀tì ɓi ɓɛg ànɛ a Sirii. Tì kɛ̀n kì rɛlii a Tiir, wɔɔnnɛ fìtimà fi ghɛɛ̀sɛ̀ngà kì sɛɛ̀dii mɛtɛ̀g.

⁴Tì kɔrìghà wɔɔ mɛru taàɓɛ̀ɛ̀, lɛ tì tanɛ̀ngà ɓɛ̀gherɛ̀n wɔɔ, Kìtɛntɛ̀ɛ̀n ki Nghay ki tinì bɛ̀gherɛ̀n lɛ ɓɛɛ kpaà Pol lɛ, kɛ̀ɛ ɓɔg a Yorisalɛm.

⁵Di tyàa ghagsi mɛru taàɓɛ̀ɛ̀, nnɛ tì rùɓtɛ̀ngà tì rì rìkɛ̀ɛ̀. Fɔɔnnɛ ɓɛ kɛngà ɓìsi kìfɔŋì ɓɛ̀sɛ̀ɛ̀ ɓɛ̀cèm lɛ rì ɓɛ̀yiɓ ɓaa, rì ɓɔn ɓaa, ɓɛ ceesì ɓìsi ǹdèè wu bàn. Nni tì ɓakà mɛ̀ɗu ɓi zi, tì ɓɔ̀ŋzì Bɛ̀ll ɓi bèn ì rìɓày.

⁶Yɛ̀ɛ tì ghesɛ̀ngà rì ɓɔ, ɓìsii ɓɔg ɓi fìtimà, ɓɔɔ sugtàg a ɓɛ̀mɛɛ ɓaa.

⁷Yɛ̀ɛ tì pɛ̀sɛ̀ngày a Tiir ɓi fìtimà tì yùtìghà lɔŋ ki rɛlii a Pitolemayis, tì tògsì ɓɛ̀geni ɓis ɓɛ righerɛ̀n, tì ki ghagsi bimiɗ à ŋwos ǹɗaŋ ɗi ɓɔ.

⁸Ɓi duri tana nnɛ tì pɛ̀sɛ̀ngà tì kɛ̀n a Sezare, wɔɔnnɛ tì kɛ̀ngà a mɛɛ mɛ Filiɓ ànɛ à ɓaghà ǹkalì-ɓɔlɛ, à ki ɓati kibog ki ɓi ɓum taàɓɛ̀ɛ̀ ɓɛ ɓɛ rɛsìghà a Yorisalɛm; a lɔ̀ŋkii nnɛ tì kɔ̀rìghà.

⁹À ɓaghà rì ɓɛ̀gɔ̀n ɓɛnin, ɓɛ ɓɛ ɓaghà di ɓɛ ka yi ɓi ɓɛbaŋì, ɓɛ ki ɓa ti ɓɛkpaŋzì-ɓìɓan.

¹⁰Yɛ̀ɛ tì ɓaghà di tyàa ghagsi bàlì ì mɛ̀ru wɔɔ, fɔɔnnɛ ǹkpaŋzì-ɓìɓan àdɛŋ ɗii lɛ Agaɓus à pɛ̀sɛ̀ngày a Zyude.

¹¹Yɛ̀ɛ à yughà ɓìsi kìtanɛɛ a teɗ kànɗa à Pol, à kàgì lɛ rì mɛ̀kòò mii, rì ɓyàg ɓii, à ki kpaa lɛ: Kìtɛntɛ̀ɛ̀n ki Nghay kɛɛ̀ kpaaghi lɛ: Ɓì ghɛɛ? Fɛlɛ nnɛ Ɓɛ̀yudɛ̀n ɓɛ ri ɓiì kàŋi ŋwaànɛ à rì rì kànɗa ànɛ, ɓɛ ki teɗ nyi, ɓɛ fa nyi ɓi ɓyàg ɓi ɓumɓɛ ɓɛ yin Ɓɛ̀yudɛ̀n.

¹²Yɛ̀ɛ tì wokà fɔlɔɔ, rì ɓìsi, rì ɓɛ̀geni ɓis ɓɛ a Sezare, tì ɓɔ̀ŋzàg Pol lɛ, kɛ̀ɛ ɓɔg a Yorisalɛm.

¹³Nni Pol à ɓàkà ɓɔ lɛ: Cɛ kɛɛ̀ki ɓi ɗiighɗigsì mɛ̀ ǹɗem miì ɗì mɛ̀kɛɛ̀gh? Àa bɛn yɔ̀riyɔ̀ yɛɛ yi m̀ɓoŋɓòŋ, ǹɗì gì m̀pègsɛn lɛ nwu a Yorisalɛm ɓi ɗii ɗi Kan Yeesus.

¹⁴Yɛ̀ɛ à yaaghrɛ̀ngà, nni ɓìsii caɗkà nyi tì kpaa lɔŋ nyi lɛ, rìkɔ̀n ɗi Kan ɗyɛɛ kilɛn.

¹⁵Yɛ̀ɛ ɓɔɔ mɛru ɓɛ ghaghìghà, nni tì ɓùŋɛ̀ngà tì ɓɔg a Yorisalɛm.

¹⁶Ɓɛ̀gherɛ̀n ɓɛdɛŋ ɓɛ a Sezare ɓɛ tì kɛ̀ɛ̀zɛ̀ngà rì ɓɔ, ɓɛ kɛngà ɓìsi kì foŋì yɛ̀ɛ Nazɔŋ, ŋwaànɛ a Siipirɛ, kìbog ki ɓi ɓɛ̀gherɛ̀n ɓɛ ǹtonto, lɛ ti kɔri wɔɔ.

¹⁷Yɛ̀ɛ tì kpagà a Yorisalɛm, ɓɛ̀geni ɓis ɓɛ righerɛ̀n ɓɛ ghaɓ ɓìsi rì kìnyàà.

¹⁸Ɓi duri tana nnɛ Pol à kɛ̀ngà rì ɓìsi yɛ̀ɛ Zyag. Ɓɛ̀sɛ̀ɛ̀mɛn ɓɛ kiseŋi ɓɛ̀cèm ɓɛ taŋzɛ̀ngà girig wɔɔ.

¹⁹Yɛ̀ɛ Pol à tògsàkà ɓɔ, à tumɛ̀n ɓɔ rìkpaa ɗi ɓiɓan ɓìcèèm ɓi Bɛ̀ll àa ǹkii, a ɓumɓɛ ɓɛ yin Ɓɛ̀yudɛ̀n, ɓi kìsay ki nyii nkìkii.

²⁰Nni ɓɛ wokà ɓìɓan ɓiǹ, ɓɛ fa Bɛ̀ll rìkem ɓɛ ki kpaa Pol lɛ: Maasoŋ̀, ù ghɛɛ yɛ̀ɛ bàlì ì ɓɛ̀tɔɔsìm ɓɛ Ɓɛ̀yudɛ̀n ɓɛ mɛ gherɛ̀n wɔ̀lɛ, ɓɛ ki rì lɔŋ ɓɛsììrɛn ɓi ɓìdɔ̀gsɛna ɓis.

²¹Wɔ̀lɛ ɓɛ ǹwoogh ɓi ɓɔlɛ, lɛ wàànɛ̀n wɔ̀ɔ̀ ti wɔ̀ɔ̀ rèsàg Ɓɛ̀yudɛ̀n ɓɛ a gwèɗ lɛ, ɓɛǹ ɓɛɛ caɗ ɓìdɔ̀gsɛna ɓi Moyis, ɓɛn ɓɛ̀ kɛɛ̀ kɛ̀ɗti ɓɔn ɓɛ ɓɛǹ, ɓɛ̀ kɛɛ̀ ki ɓèŋdi ɓisyɔ̀ɔ̀ ɓi ɓɛseŋi ɓaa.

²²Nni ti ghay la? Ɓaa ki rɔ̀ɓ ɓi lɛ, ɓɛ woogh ɓi lɛ ù rì fɛ.

²³U ki lɔŋ yɛ̀ɛ tì rì wɔ̀ ɓiì kpaà lɛ u ki. Tì rì fɛ rì ɓum ɓɛdɛŋ ɓɛnin, ɓɛ ɓɛ ǹkànɛɛ bɛ̀ɗ i nàzirìyà.

²⁴Tera ɓɔ, ɓi kɛǹ a zòghɛ̀n ìnɛ ɓɛ ghɛɛ̀sɛɛ kì kìlɛɛ, ù peè ɓìkɔ̀tɛn ɓyaa, fɔɔnnɛ ɓɛ ri ɓiì kɛ̀ŋɗɛɛ mɛ̀to, i ù kìi fɔlɔɔ, ɓum ɓɛ̀cèm ɓɛ rì ɓiì ghɛɛ lɛ, ɓɛ̀ɓɔlɛ ɓɛ ɓɛɛ̀ wowòg ɓɛ rarɛ̀n ɗì wɔ̀ ɓɛ yin miì, rì tì lɛ wɔ̀ girig, u ɓèŋɓeŋ ɓidɔ̀gsɛna ɓi Moyis, ù ki nɔ̀ɔnɔɔ̀tì ɓyɔ yɛ̀ɛ ki ghɛɛ̀sɛɛ.

²⁵Ɓi ɓɛg ànɛ a ɓum ɓɛ zɛy ɓɛ ɓɛ ti ɓɛ̀gherɛ̀n, tì kàngà ɓɔ ɓìɓan ɓi tì rengà lɛ, ɓɛɛ celi ɓyɛn ɓi nyàm ìnɛ ɓɛ woli ɓi rìɓɔgsì ɗi ɓinùn ɓi zɛy rì zɛy, ɓɛ celì tì bwaɓ yi nyàm ìnɛ ì wii lɛ swììɗ, rì tìsɔ̀mɔ̀g.

²⁶Nni Pol à tekà min ɓumɓɛ̀n, ɓɛ kɛǹ kì kìlɛɛ zòghɛ̀n ǹɗaŋ ɓi duri tana. Fɔɔnnɛ à ɗiŋìghà min ɓi naà-Bɛ̀ll rì ɓɔ, lɛ a kpaà ɓɔ gòn inɛ ɓɛ ri ɓiì faà ɓìkɔ̀tɛn ɓisuu mum bimiɗ ànɛ ɓi ɓɔ di zòghɛ̀n ì lèegh,

²⁷Di ɓɛ ti lɛ ɓɛɛ lɔgsi mɛ̀ru taàɓɛ̀ɛ̀ ɓi zòghɛ̀n yàà, nni Ɓɛ̀yudɛ̀n ɓɛ a Azii ɓɛ ghɛngà Pol ɓi naà-Bɛ̀ll, ɓɛ toosàg ɓum ɓɛ kilɔ̀ŋ, ɓɛ ɓan Pol

²⁸di ɓɛɛ kuukugsɛ̀n jɛ̀ɛ̀ aɗyoo lɛ: Mìni ɓumɓɛ a Isirayɛl, yùuna ɓìsi fɛ̀! Ŋwaànɛ à ti à kɛ̀ɛ̀kɛ̀ɛ̀ jàŋbimiɗ, di a rèresi ɓum ɓɛ̀cèm lɛ ɓɛɛ ki lɛ, ɓɛ sɛɛtì kìlɔ̀ŋ kis, ɓɛ sɛɛtì ɓìdɔ̀gsɛna ɓi Moyis, ɓɛ ki sɛɛti naa yìs i Bɛ̀ll. Àa rɛ̀ŋii gì kì ɗiŋzii ɓumɓɛ zɛy ɓi naà-Bɛ̀ll. Rìkì ɗiǹ, ɗi yogsii rìɓa ɗi naà-Bɛ̀ll, ì rì kìcèlì.

²⁹Ɓɛ kpaaghà fɔlɔɔ lɛ, ɓɛ lokà kìghɛɛ̀ Tirofim ànɛ a Efɛɛzɛ ɓɛɛ̀ Pol ɓi bàn, ɓɛ fekì nya lɛ Pol àa ɗiŋzii nyi ɓi naà-Bɛ̀ll.

³⁰Bàn bimiɗ ì nyɛ̀ŋɗɛ̀ngà ɓi kìɓan kiǹ ɓum ɓɛ ghɛɛ̀ghɛ̀ŋmɛ̀n yì ɓɛ̀ ɓɛg ɓɛ̀cèm, nni ɓɛ ɓangà Pol, ɓɛ kɛǹ ɗì nyi ɓi dan, ɓɛ ghas kì sìmgii mɛ̀suunaa mɛ naà-Bɛ̀ll.

³¹Yɛ̀ɛ ɓɛ kaakààghà bee inɛ ɓɛɛ wey nyi, nni ɓɔlɛ à kɛ̀ngà kì kpaŋì ɓi mɛ̀reè mɛ ǹkɔ̀mɛ̀n ɓɛ̀sujàà àgwey lɛ: Kìyoòyòò ki ti ɓi bàn ì Yorisalɛm bimiɗ.

³²Ŋwaànɛ̀n à ghàs kì terì ɓɛ̀kɔ̀mɛ̀n ɓɛ̀sujàà ɓɛsàg, rì ɓɛ̀sujàà ɓɛdɛŋ à kɛ̀n mɛ̀ree ɓi jàŋ inɛ gwìy ì ɓaghà. Yɛ̀ɛ ɓum ɓɛ ghɛngày ǹkɔ̀mɛ̀n ɓɛ̀sujàà àgwey ǹɗaŋ ɗì ɓɛ̀sujàà ɓɛdɛŋ, ɓɛ càɗ Pol, ɓɛ̀ kɛɛ̀ ɓogti nyi.

³³Fɔɔnnɛ ǹkɔ̀mɛ̀n ɓɛ̀sujàà àgwey à tyòŋdɛ̀ngày à ɓan Pol, ɓɛ kaŋ̀ nyi bɛn ɗi mɛ̀sɛ̀ŋi, à tɔg min ɓum lɛ, ŋwaàbe yɛɛ rì lɛ, cɛ kɛɛ̀ ki à kìi?

³⁴Kìɓan kifog gwìy ì ɓum ìnɛ̀n ì kìghà lɛ, ɓɛ̀roɓɛ ɓɛ kpaakpàà lɛ ki ri fɛlɛ, ɓɛ̀roɓɛ lɛ, ki ri fɛlɛ̀. Yɛ̀ɛ ǹkɔ̀mɛ̀n ɓɛ̀sujàà àgwey à ghɛngà lɛ bee inɛ lɛ a wog kìɓan miì lɛ syeesyee ì yin lɛ, kìyoòyòò ki ceeghà, fɔɔnnɛ à kpaaghà lɛ ɓɛɛ kɛ̀n kìlɔɔ̀gh Pol.

³⁵Yɛ̀ɛ ɓɛ kpagà rì nyi ɓi ɓɛ̀sìtɛɓ, ki ghɛɛ̀sɛ̀ngà lɛ, ɓɛ̀sujàà ɓɛɛ tɛg nyi ǹtɛ̀ghɛn, ɓisuulɛ, gwìy ìnɛn ì nyɛngà lɛɛ̀gwey

³⁶lɛ, ɓum ɓɛ̀cèm ɓɛ nɔɔnɔ̀ɔ̀tìghà nyi di ɓɛɛ kpaakpaa lɛ: Ɓɛɛ wey nyi, ɓɛɛ wey nyi.

³⁷Ɓi cààmɛ̀n ki ɓɛ mɛɛ̀ ɗiŋzìghà Pol ɓi gari kɛɛ̀ki à tɔkà ǹkɔ̀mɛ̀n ɓɛ̀sujàà àgwey lɛ: Ǹɗì nya lɛ m̀pɔ̀s maa jɛ̀ɛ̀? Nni roànɛ̀n à pɛ̀ɛ̀zìghà nyi lɛ: Ù yii kɔmiɗ rìgìrɛg?

³⁸Àa wɔ̀ yɛɛ ri kɔm̀ muu Egiɓtɛn ànɛ àa m̀ɓigtii wɛ̀y fɛ ɓi mɛ̀ru mɛ mɛ nghaghii mɛ? Nnyɛɛ nɗiŋii ɓìtɔ̀mbɔ̀ ɓi-reɓ, rì ɓum ɓɛ̀tɔɔsìm ɓɛnin.

³⁹Nni à ɓàkà nyi lɛ: Mɛ̀ ǹɗì muu Ɓɛ̀yudɛ̀n ànɛ ɓi bàn ìnɛ a Silisii ìnɛ lɛ Tarisi; ǹɗì ŋwaànɛ ɓi bàn ìnɛ mum à yin lɛ, à còmɛ̀n, kùrùg gherɛn ɓà lɛ ǹtoòghrɛn rì ɓumɓɛ.

⁴⁰Yɛ̀ɛ ǹkɔ̀mɛ̀n ɓɛ̀sujàà àgwey anɛ̀n à gherɛ̀ngà, Pol à rɛlìì ɓi ɓɛ̀sìtɛɓ aɗyoo, à maasì ɓum rì càg. Nni ɓum ɓɛ maarɛ̀ngà, à tòòghrɛ̀n min ɗi ɓɔ ɓi rì èbìreegh, à kpaa lɛ: