Read Bafia MƐ̀KÌKÌÌ MƐ ƁƐKƐ̀NÌ-FÌTOM 22 Bible Online

MƐ̀KÌKÌÌ MƐ ƁƐKƐ̀NÌ-FÌTOM 22 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 22

¹Mìni ɓɛ̀geni ɓɛ̀m rì ɓɛ̀seŋi ɓɛ̀m, ɓigomìnɛ ramina mɛ̀reè, ɓi wog com ki ǹɗì lɛ ǹɗèsì mìni.

²Yɛ̀ɛ ɓɛ wokà di Pol à toòghrɛɛ ɓi rì ebìreegh ɓɛ mam lɛ kpaɗ; nni Pol à kpaghà lɛ:

³Ǹɗì muu Ɓɛ̀yudɛ̀n, ǹ-yalɛ̀ngà a Tarisi ɓi kìlànà ki zi ki a Silisii. Kìɓan kifog, fɛ ɓi bàn ìnɛ nnɛ ǹtɔɔ, ǹki yilag ɓisyɔ̀ɔ̀ ɓi ɓɛseŋi ɓis yɛ̀ɛ ki ghɛɛ̀sɛɛ, a mɛ̀kòò mɛ Gamalyɛl; m̀ɓaghà girig ǹfalɛn ɗi Bɛ̀ll lɔŋ fɛlɛ yɛ̀ɛ mìni girig ɓì rì ɓɛ̀falɛn ɓɛsɛ̀ɛ̀ ɓɛ̀cèm gɛɛ̀nɛ.

⁴Ǹɗùùɗùùsìghà ɓumɓɛ ɓɛ nɔɔ̀nɔ̀ɔ̀tìghà bee ì Kan, wɛ̀y à kpaŋ yɛ̀ɛ ǹwowòlà ɓɛ̀ro ɓɛdɛŋ, ǹki ɓanɓan lɛ, rì ɓɛ̀yiɓ rì ɓɛ̀baŋì ǹfogì ɓɔ ɓi ɓìsɔŋ, ǹki pìki ɓɔ ɓi naà-zày.

⁵Ǹlàmì ɓɛ̀pìrɛɛtìrɛ̀ àgwey rì ɓɛ̀sɛ̀ɛ̀mɛn ɓɛ Ɓɛ̀yudɛ̀n ɓɛ ri mɛ̀ ɓɛ̀wusìnɛ̀ɗ lɛ, ɓɛ faghà kɔm̀ mɛ̀ ɓɛ̀kaàtà ɓisuu ɓɛgherɛ̀n ɓɛ a Damas. Nni ǹkɛ̀ngà wɔɔ lɛ, ǹsug yì rì ɓɛ̀roɓɛ ǹtanɛɛ, a Yorisalɛm, ɓɛ̀kàgakɛn ɓi ɓìsɔŋ di ɓɛɛ pɔnɔ̀si ɓɔ.

⁶Yɛ̀ɛ m̀ɓaghà di ǹkaka ɓi bee ɓi rìkɛ̀n kì kpaŋì a Damas, nni ǹsìgmɛ̀ngà di Coo kìtɛɛtɛn ki mɛ kì yi aɗyoo lɛ ŋwààɗ, ki yu ki ceŋzɛ̀n mɛ̀.

⁷Fɔɔnnɛ ǹkpìghà ɓi zi, ǹwog di jɛ̀ɛ̀ yɛ̀ɛ kpaakpaa mɛ lɛ: Sol! Sol wɔ̀, u yeeyeèsì mɛ̀ lɛ cɛ yɔ?

⁸Nni m̀ɓàkà lɛ: Kan, wɔ̀ yɛɛ ri ghɛn? Jɛ̀ɛ̀ ì ɓàg mɛ̀ lɛ: Mɛ̀ yɛɛ ri Yeesus ànɛ a Nazarɛt ànɛ ù ti, ù yeèyèèsì.

⁹Ɓumɓɛ m̀ɓaghà ǹɗaŋ ɗi ɓɔ, ɓɛ ghɛngà kìtɛɛtɛn, kìɓan kifog jɛ̀ɛ̀ ìnɛ ì tòòghrɛ̀ngà rì mɛ̀ yɛ̀ɛnɛ ɓɛ wokà ɓi.

¹⁰Fɔɔnnɛ ǹtɔkà min lɛ: Kan, cɛ kɛɛ̀ki ǹghɛ̀ɛ̀sɛɛ kì kìi? Kan à ɓàg mɛ̀ lɛ: Pɛ̀sɛn aɗyoo, u kɛǹ a Damas, wɔɔnnɛ ɓɛ ri wɔ̀ ɓiì rèsii com ki ù ghɛ̀ɛ̀sɛɛ kì kìi.

¹¹Yɛ̀ɛ ǹɗɔ̀ɓkà kɛ̀ nghɛnɛn ti lɛ kìtɛɛtɛn kìn ki ɗiŋzìghà mɛ̀ tìɗyaŋ, nni ɓumɓɛ m̀ɓaghà rì ɓɔ ɓɛ ɓangà mɛ̀ ɓi càg, ɓɛ kɛǹ ɗì mɛ̀ a Damas.

¹²Ŋwaàdɛŋ à ɓaghà wɔɔ ɗii lɛ Ananyas, à ɓaghà ŋwaànɛ à falɛ̀ngà ɓi rìgherɛ̀n à ki nɔ̀ɔnɔɔ̀tì ɓìdɔ̀gsɛna ɓis, Ɓɛ̀yudɛ̀n ɓɛ̀cèm ɓɛ ɓɛ ɓaghà a Damas, ɓɛ sɛsɛ̀kà nyi.

¹³Nni à yùghà mɛ̀ kì ghɛɛ̀, à kpaa mɛ̀ lɛ: Geni wɛ̀m Sol, ghɛnɛn tì, ɓi cààmɛ̀n kɔm̀ kiǹ nnɛ mis mɛ̀m mɛ ghaskà kì ŋwàrɛɛ, ǹtumɛ̀n tì rìghɛnɛ̀n ǹki ghɛn nyi.

¹⁴Nni Ananyas à kpaaghà mɛ̀ lɛ: Bɛ̀ll à ɓɛ̀seŋi ɓis à lokà wɔ̀ kì ɓɔ̀ni lɛ, u yi rìkɔ̀n ɗii, ù ghɛn m̀bobog à mum ànɛ à rì lɛ saaɗ ù ki wog jɛ̀ɛ̀ ìnɛ ì kpaŋiì ɓi ŋwɔm wìì;

¹⁵ɓisuulɛ ù rì ɓiì ɓaà wusìnɛ̀ɗ wìì, lɛ u ghagsi ɓum ɓɛ̀cèm ɓìɓan ɓi ù kìghà lɛ, ù ghɛn, ù ki wog.

¹⁶Nni ɓigomìnɛ, kɔ̀ɔ lɛ̀mziti, pɛ̀sɛn aɗyoo u teɗ bàɓtis ɓi ɗii ɗi Kan, di ɓiɓe ɓyɔɔ ɓyɛɛ ɓa ɓìsòòyɛn.

¹⁷Yɛ̀ɛ ǹsugtìghày a Yorisalɛm, nni ǹghay wɛ̀m wu faŋìghà di m̀ɓɔ̀ɔɓɔŋzàg ɓi naà-Bɛ̀ll,

¹⁸fɔɔnnɛ ǹghɛngà Kan, à kpaa mɛ̀ lɛ: Kìya lɛ fyɛ̀ɗ, u fyaŋzi kì pɛ̀sɛɛ a Yorisalɛm lɛ ɓumɓɛ wɔɔ ɓaa gherɛn ɓi ɓiban ɓi ù rì ɓɔ ɓiì ghagsii ɓi rarɛ̀n ɗì mɛ̀.

¹⁹Nni ǹkpaaghà lɛ: Kan, ɓɔmiɗ ɓɛ yii lɛ, mɛ̀ɛ nkɛ̀ngì ɓi naa yi bɔ̀ŋzɛ̀n, di mɓanɓan yi ɓumɓɛ ɓɛ gherɛɛ wɔ̀, m̀pìpìg ɓɔ ɓi naà-zày, ǹki reereɓsì lɛ ɓɛɛ ɓog ɓɔ kìtòn.

²⁰Yɛ̀ɛ ɓɛ wowɔlà wusìnɛ̀ɗ wɔ̀ɔ̀ ànɛ lɛ Ityɛn mɛɛ̀miɗ m̀ɓaghà wɔɔ, mɛ̀ m̀ɓaghà girig ɓijɛ̀m ì ɓɛ̀roɓɛ ɓɛ wolà nyi ɓɛ̀n, mɛ̀ yɛɛ ki ɓèŋɓèŋgà ɓìlàà ɓyaa.

²¹Nni Kan à kpaaghà min mɛ lɛ: Kɛ̀na ɓisuulɛ, ǹɗì wɔ̀ ɓiì romi fìràɓ, ɓi ɓìlɔ̀ŋ ɓi ɓumɓɛ ɓɛ yin Ɓɛ̀yudɛ̀n.

²²Yɛ̀ɛ Ɓɛ̀yudɛ̀n ɓɛ ɓɛ ka kɔ̀rìghà lɛ fyòoog lɛ ɓɛɛ wog ɓìtòkì ɓii ɓɛ mɛɛ̀ wokà jɛ̀ɛ̀ ì siitòn inɛ̀n, nni ɓɛ tumɛ̀ngà rìsyan jɛ̀ɛ̀ aɗyoo lɛ: Pisi ɓìsi ŋwaànɛ bììbiì, ki ghɛ̀ɛ̀sɛɛ tì ɓi lɛ a ghɛghɛɓ.

²³Yɛ̀ɛ ɓɛ syansyàngà fɔlɔɔ di ɓɛɛ̀ màmag ɓilàà ɓyaa, ɓɛ raràɓ kùrùɓu ɓɛ pampàm aɗyòò.

²⁴Nni ǹkɔ̀mɛ̀n ɓɛ̀sujàà à kpaaghà lɛ ɓɛɛ ɗiŋzi Pol ɓi gari, ɓɛ ki ɓog nyi kìtòn lɛ a kpaà cɛ kɛɛ kiì lɛ ɓumɓɛ̀n ɓɛɛ wog bim fɔlɔɔ ri nyi, ɓɛ syansyàn ɓi lèg ànɛn.

²⁵Yɛ̀ɛ ɓɛ mɛɛ̀ kuɓsìghà Pol lɛ ɓɛɛ ɓog nyi kìtòn, nni à tɔkà ǹkɔ̀mɛ̀n ɓɛ̀sujàà àsàg lɛ: Ɓì rì lɛ ɓì ɓog muu Ròmɛŋ di ɓɛ ka yɔ̀mzi ɓi nyi?

²⁶Yɛ̀ɛ ǹkɔ̀mɛ̀n ɓɛ̀sujàà àsàg ànɛn à wokà fɔlɔɔ, nni à kɛ̀ngà yɛ̀ɛ ǹkɔ̀mɛ̀n àgwey lɛ a kpaa nyi lɛ: Ù yii com ki u kɔ̀nkɔn lɛ u ki? Ŋwaànɛnii à rì muu Ròmɛŋ.

²⁷Fɔɔnnɛ ǹkɔ̀mɛ̀n ɓɛ̀sujàà àgwey a yughà kì tɔɔ̀gh Pol lɛ: Ki ri saaɗ lɛ ù rì muu Ròmɛŋ? Pol à gherì lɛ: Ki ri saaɗ fɔ̀lɔ̀ɔ̀.

²⁸Nni ǹkɔ̀mɛ̀n ɓɛ̀sujàà àgwey à kpaatìghà min lɛ: Mɛ̀ ǹsùùghràkà ɓyoo mɔ̀ɔ̀ni a ɓɛ̀làmì lɛ m̀ɓa ɓi nɗɛli wu muu Ròmɛŋ. Pol à kpaa lɛ: Mɛ̀ ǹɗì muu Ròmɛŋ à tumɛ̀n a rìyalɛ̀n.

²⁹Fɔɔnnɛ ɓumɓɛ ɓɛ mɛɛ̀ ɓokà nyi kìtòn lɛ di a toòghrɛn ɓɛ ghaskà kì ghaaghraagh, nsoò ǹkɔ̀mɛ̀n ɓɛ̀sujàà àgwey à risìghà yɛ̀ɛ à wokà lɛ, Pol à rì muu Ròmɛŋ ɓisuulɛ, nnyɛɛ reɓsìghà lɛ ɓɛɛ kaŋ̀ nyi bɛn.

³⁰Ɓi duri tana, yɛ̀ɛ ǹkɔ̀mɛ̀n ɓɛ̀sujàà àgwey à kɔ̀nkɔ̀ngà lɛ, a konag kì yiì kìɓan ki Ɓɛ̀yudɛ̀n ɓɛ sɔmɛ̀ngà Pol miì nni à kpaaghà lɛ ɓɛɛ fumi nyi bɛn, à ki tɔg ɓɛpìrɛɛtìrɛ̀ ɓɛgwey rì ɓumɓɛ ɓi Sànèdìrɛŋ lɛ ɓɛɛ taŋzɛn, fɔɔnnɛ à yùghày rì Pol à rɛsì ɓɔ nyi asu.