Read Bafia MƐ̀KÌKÌÌ MƐ ƁƐKƐ̀NÌ-FÌTOM 23 Bible Online

MƐ̀KÌKÌÌ MƐ ƁƐKƐ̀NÌ-FÌTOM 23 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 23

¹Pol à pɛ̀ɛ̀zìghà mis rì ɓumɓɛ ɓi Sànèdìrɛŋ à kpaa lɛ: Ɓɔɔsoŋ̀, à kpaŋ gɛɛ̀nɛ, ǹɗem wu yin mɛ rì mɛ̀riighrikì nsoò lɛsàg, ɓi rìba ɗi lɛ rì mɛ̀ rì Bɛ̀ll.

²Fɔɔnnɛ ǹlàmì ɓɛ̀pìrɛɛtìrɛ̀ àgwey ànɛ lɛ Ananyas à reɓsìghà ɓumɓɛ ɓɛ ɓaghà Pol jàŋbog lɛ ɓɛɛ ɓog nyi com ɓi ŋwɔm; nni Pol à kpaaghà min nyi lɛ:

³Bɛ̀ll nnyɛɛ wɔ̀ ɓiì ɓoògh, wɔ̀ com ki bàŋbàŋ ki puɓ ki! Ù kɔ̀rii foo lɛ, u yɔm̀ mɛ̀ ɓi ɓìdɔ̀gsɛna aɗyoo, kìɓan kifog kɔ̀ɔ ki nɔ̀ɔ̀ti com ki ɓìdɔ̀gsɛna ɓyɛɛ̀ kpaakpàà, ɓisuulɛ ù kpaa lɛ ɓɛɛ ɓog mɛ̀.

⁴Fɔɔnnɛ ɓumɓɛ ɓɛ ɓaghà Pol jàŋbog ɓɛ tɔkà nyi lɛ: Ù sɛmgii pìrɛɛtìrɛ̀ àgwey à Bɛ̀ll!

⁵Nni Pol à ɓàkà ɓɔ lɛ: Ɓɔɔsoŋ̀, màa yii ɓi lɛ pìrɛɛtìrɛ̀ àgwey yɛɛ ri, lɛ ki ri kì kànɛn lɛ, kɔ̀ɔ sɛm rifòm ɗi ɓi kìlɔ̀ŋ kɔɔ.

⁶Yɛ̀ɛ Pol à yighà lɛ ɓumɓɛ̀n ɓɛ ri mɛ̀raŋ mɛɓɛɛ̀ lɛ, rì Ɓɛ̀fàrìzyɛŋ rì Ɓɛ̀sàdùsyɛŋ, fɔɔnnɛ à kpaaghà jɛ̀ɛ̀ aɗyoo ɓi nyìinyìm wàà lɛ: Ɓɔɔsoŋ̀, mɛ̀ ǹɗì Fàrìzyɛŋ, man à Fàrìzyɛŋ nni ɓɛɛ̀ sɔmag mɛ ɓisuulɛ, ǹɗì rì ǹtyweeyi lɛ ɓìloŋ ɓi ri ɓiì ghèmɓɛɛ.

⁷Pol à syɔɔ̀dìghà ɓi jɛ̀ɛ̀ inɛn di kìyoòyòò ki mɛ kpì ɓi nyìinyìm ànɛ lɛ, rì Ɓɛ̀fàrìzyɛŋ rì Ɓɛ̀sàdùsyɛŋ, fɔɔnnɛ ǹtaŋzɛn wu ghasɛ̀ngà gàɓ yiɓɛɛ̀.

⁸Ɓisuulɛ Ɓɛ̀sàdùsyɛŋ ɓɛɛ̀ sììrag ɓi ǹdɛli wulɛ: Com kidɛŋ ki yin lɛ rìghèmɓɛ̀n ɗi ɓilòŋ, nsoò lɛ ɓum ɓɛ titom, nsoò lɛ ǹghay. Wɔ̀lɛ Ɓɛ̀fàrìzyɛŋ ɓɔɔ̀ gheràg lɛ ɓyom ɓìn ɓìcèm ɓi ri wɔɔ.

⁹Yɛ̀ɛ kìyoòyòò ki kɛnkɛ̀ngà lɔŋ asu rì ìtèɗ, nni ɓɛ̀rèsàg-ɓìdɔ̀gsɛna ɓɛdɛŋ ɓɛ ɓi ǹɗaŋ wu Ɓɛ̀fàrìzyɛŋ ɓɛ pɛ̀sɛ̀ngà aɗyoo, ɓɛ rɛli ɓi kìɓan kiǹ rì ìtèɗ, ɓɛ kpaa lɛ: Ɓìsii ghɛɛ ɓi kiɓan ki ŋwaànɛ à kìi, ɓaà yi ɓi ǹghay wudɛŋ nsoò lɛ ŋwaà-fìtom adɛŋ yɛɛ ǹɗì lɛ à tòòghrɛ̀n rì nyi.

¹⁰Yɛ̀ɛ kìɓan ki ɓaghà di ki mɛ ɓàŋ, ǹkɔ̀mɛ̀n ɓɛ̀sujàà àgwey a risì lɛ ɓɛ ri ɓiì ki pàkii Pol nsoò m̀pàkakɛn fɔɔnnɛ à romgày ɓɛ̀sujàà lɛ ɓɛɛ yu nyi kì terì ɓi nyìinyìm a ɓumɓɛ̀n, ɓɛɛ pɛɛ̀zi nyi ɓi gari.

¹¹Yɛ̀ɛ ìru wu fingà, Kan à rèsɛ̀n Pol à kpaa nyi lɛ: Pol, kɔ̀ɔ càrɛn! Lɔŋ yɛ̀ɛ wɔ̀ɔ ǹlòmi kìtɛɛtɛn ɓi kìɓan ki ki seesee mɛ̀ a Yorisalɛm, nnɛ ù ghɛ̀ɛ̀sɛɛ tì kì lòmì aà Rom.

¹²Yɛ̀ɛ duri i tangà nni Ɓɛ̀yudɛ̀n ɓɛ wɔrɛ̀ngà, ɓɛ kanɛ̀n bɛ̀ɗ lɛ, ɓwaànɛ̀n ɓwaa ɗi ɓi com, ɓɔ kɔɔ̀ ki nɔ nsoò mɛ̀nig di ɓɔɔ ka wey ɓi Pol.

¹³Ɓumɓɛ ɓɛ ɓaghà a dwìɗ i m̀ɓeɓɛn inɛ̀n ɓɛ ceeghà mɛ̀tin mɛɓɛɛ̀.

¹⁴Nni ɓɛ kɛngà kì tanɛɛ lɛ, rì ɓɛpìrɛɛtìrɛ̀ ɓɛgwey rì ɓɛ̀sɛ̀ɛ̀mɛn ɓɛ Ɓɛ̀yudɛ̀n, ɓɛ kpaa ɓɔ lɛ: Tyàa kànɛɛ bɛ̀ɗ ri ɓìsiì ɓɔmiɗ lɛ tì yin lɛ tì ɗi com di tì ka wey ɓi Pol.

¹⁵Nni ɓigomìnɛ, rì mìni rì ɓumɓɛ ɓi Sànèdìrɛŋ, tɔɔghna ǹkɔ̀mɛ̀n ɓɛ̀sujàà àgwey lɛ a yuiy mìni rì Pol, ɓi pwaà lɛ ɓi kɔ̀nkɔn lɛ, ɓi konag kì fiɓii kiɓan kii lɛ syeesyee. Ɓi ɓɛg wìs, tì ti ɓɛ̀pègsɛn lɛ ti wey nyi di à ka kpaŋ ɓi a lɔ̀ŋkin.

¹⁶Yɛ̀ɛ mancɛɛ Pol àdɛŋ à wokà dwìɗ inɛ̀n, nni à kɛ̀ngà jàŋ inɛ ɓɛ lɔkà Pol, à wogsì nyi yɔ̀.

¹⁷Fɔɔnnɛ Pol à reŋìghà kìbog ki ɓi ɓɛ̀kɔ̀mɛ̀n ɓɛ̀sujàà, à kpaa nyi lɛ: Kɛ̀na kì foŋì dɛlì ìnɛ yɛ̀ɛ ǹkɔ̀mɛ̀n ɓɛ̀sujàà àgwey lɛ, à rì rì kìɓan ki lɛ a kpaà nyi.

¹⁸Nni ǹkɔmɛ̀n ɓɛ̀sujàà ànɛn à tekà dɛlì ìnɛn, à kɛ̀n ɗì yɔ̀ yɛ̀ɛ ǹkɔ̀mɛ̀n àgwey à kalì nyi lɛ: Kìmbùŋ ki lɛ Pol, kɛ yaa regii mɛ̀, ki kpaa lɛ ǹ-yuy rì dɛlì ìnɛ a lɔ̀ŋkɔɔ, ɓisuulɛ ì rì rì kìɓan kidɛŋ ki yɛ̀ɛ kpaà wɔ̀.

¹⁹Nni ǹkɔ̀mɛ̀n ɓɛ̀sujàà àgwey à ɓangà ŋwɔɓti ànɛ̀n ɓi càg, ɓɛ kɛǹ dwìɗ, à tɔg nyi lɛ: Kìɓan aɗi kɛɛ̀ki u kɔ̀nkɔn lɛ ù kpaà mɛ̀?

²⁰Dɛlì ìnɛn ì ɓàg lɛ: Ɓɛ̀yudɛ̀n ɓɛ mɛ wooghrɛn jɛ̀ɛ̀ lɛ ɓɛɛ yu wɔ̀ kì tɔɔ̀gh lɛ ù kɛǹ ɗì Pol a Sànèdìrɛŋ rìduri, ɓɛ ri ɓiì ɓanɛɛ ɓi jɛ̀ɛ̀ ìnɛ lɛ, ɓɔɔ̀ kɔ̀nkɔn lɛ ɓɔɔ konag tì kì fiɓii kiɓan ki anɛ̀n.

²¹Nni kɔ̀ɔ wog com ki ɓɛ ri wɔ̀ ɓiì kpaà ɓisuulɛ ɓum ɓɛ ceeyɛn mɛtin mɛɓɛɛ̀, ɓɛ ri nyi ɓɛ̀ ranɗamɛn ɓi bee, ɓum ɓɛncèm ɓɛ ǹkànɛɛ bɛ̀ɗ lɛ, ɓɔɔ yin lɛ ɓɛ ɗi com, ɓɛ̀ kɛɛ̀ ki nɔ nsoò mɛ̀nig di ɓɔɔ ka wey ɓi Pol. Ɓigomìnɛ, ɓɛ ti ɓɛ̀pègsɛn nni jɛ̀ɛ̀ yɔ̀ɔ̀ yɛ̀ɛnɛ ɓɛɛ̀ ɓoŋɓòŋ.

²²Fɔɔnnɛ ǹkɔ̀mɛ̀n ɓɛ̀sujàà àgwey à càɗkà ŋwɔɓti ànɛ̀n lɛ a kɛǹ. À ki siitɛn nyi lɛ kɛ̀ɛ kpaa mum lɛ, àa yùu nyi kì kpàkii dwìɗ inɛ̀n.

²³Nni ǹkɔ̀mɛ̀n ɓɛ̀sujàà àgwey à reŋìghà ɓɛ̀kɔ̀mɛ̀n ɓɛsàg ɓɛɓɛɛ̀, à kpaa ɓɔ lɛ: Terina ɓɛ̀sujàà lɛ: ɓɛ zɛy ɓɛ̀hɔnɗɛ̀ɗ ɓɛɓɛɛ̀, ɓɛ ɓi zòm yi kimbɛ̀rɛ̀ aɗyoo mɛ̀tin mɛraa rì ǹtɛ̀ɗ, ɓɛ̀roɓɛ mɛkɔ̀ŋ ɓɛ̀hɔnɗɛ̀ɗ ɓɛɓɛɛ̀; ɓi pegsɛn lɛ, ɓì rì ɓiì pɛ̀sɛɛ mɛkɛ̀ɛ̀ taànìn à rììru, ɓi rìkɛ̀n ɗi a Sezare.

²⁴Ɓùŋɛɛna girig zòm i kìmbɛ̀rɛ̀ ɓisuu Pol, lɛ ɓi kɛǹ ɗì nyi yɛ̀ɛ gɔmìnà Felis lɛ soghàsogha.

²⁵Fɔɔnnɛ à kàngà min kaàtà lɛ:

²⁶Mɛ̀ Kiloodɛ Lizyas, ǹtogsii wɔ̀ Felis gɔmìnà àgwey.

²⁷Ɓɛ̀yudɛ̀n ɓɛ mɓani ŋwaànɛ ǹɗomiì wɔ̀ ànɛ, ɓɛ ǹki ti lɛ ɓɛɛ wes̀ nyi, nni mɛ̀ɛ ǹkɛ̀ɛ rì ɓɛ̀sujàà, m̀ɓàtɛ̀n nyi ɓi ɓyàg ɓyaa, di m̀mɛ wog lɛ, à rì muu Ròmɛŋ.

²⁸Nni yɛ̀ɛ mɛ̀ɛ ǹɗì rì zày ìnɛ lɛ, di màa yii kìɓan ki àa nkìi ɓɔ, nni mɛ̀ɛ ǹgherɛɛ lɛ ɓɛɛ yɔmzi nyi ɓi ǹtaŋ̀zɛn waa wulɛ Sànèdìrɛŋ.

²⁹Ɓi ɓɛg wɛ̀m, mɛ̀ nghɛɛ lɛ, ɓɛɛ̀ sɔmag nyi ɓisuu ɓiɓan ɓi ɓi seesee ɓìdɔ̀gsɛna ɓyaa. Kìɓan kifog, à kìi ɓi bimiɗ à kìɓan anɛ ɓɛ ri lɛ ɓɛ wey nyi miì, nsoò lɛ ɓɛ pig nyi ɓi naà-zày.

³⁰Nni yɛ̀ɛ ɓaa kɔ̀ŋɗɛɛ mɛ̀ lɛ, Ɓɛ̀yudɛ̀n ɓɛ mɛ tɔ̀kɛn lɛ ɓɛɛ wey nyi, fɔɔnnɛ màa ghàsi wɔ̀ nyi kì romìì, ǹki kpaa ɓum ɓii ɓɛ kiɓan lɛ, ɓɛɛ yu nyi kì sɔmɛɛ a lɔ̀ŋkɔɔ ɓɔmìɗ. Òo òò yaà.

³¹Ɓɛ̀sujàà ɓɛ kighà lɔŋ ɓiɓan ɓìcèm ɓi ɓɛ kpaaghà ɓɔ lɛ ɓɛɛ ki. Ɓɛ teɗ Pol, ɓɛ kɛǹ lɔŋ ɗi nyi rì ìru wìn, ɓɛ kpaŋ a Aŋtipatiris.

³²Ɓi duri tana, ɓɛ̀sujàà ɓɛ ɓɛ ɓaghà ɓi zi ɓɛ caɗkà ɓɛ̀roɓɛ ɓi zòm yi kimbɛ̀rɛ̀ lɛ ɓɛɛ ghaàgh rì nyi beèbɛ̀y, ɓɔɔ sugtìì rì jɛ̀m ɓi jàŋ inɛ ɓɛ ka lɔkà Pol.

³³Yɛ̀ɛ ɓɛ̀sujàà ɓɛ ɓi zòm yi kìmbɛ̀rɛ̀ ɓɛ kpagà a Sezare, ɓɛ fa gɔmìnà kaàtà, ɓɛ ceesì Pol ɗì nyi.

³⁴Nni gɔmìnà à ɓàlà kaàtà ànɛn à tɔg min Pol lɛ: Wɔ̀ɔ̀ rì ŋwaànɛ ɓi tum a zi abe? Ɓɛ resì nyi lɛ, ŋwaànɛ a Silisii yɛɛri.

³⁵Fɔɔnnɛ à kpaaghà min nyi lɛ: Mɛ̀ m̀ɓiì yiì kìɓan kɔɔ di ɓum ɓɔɔ ɓɛ sɔmìnà ɓɛ mɛ kpaŋ fɛ. À reɓsì min ɓum lɛ, ɓɛɛ ka kɛ̀n ki lɔɔ̀gh Pol ɓi mɛɛ mɛ Eroodɛ.