Read Bafia MƐ̀KÌKÌÌ MƐ ƁƐKƐ̀NÌ-FÌTOM 24 Bible Online

MƐ̀KÌKÌÌ MƐ ƁƐKƐ̀NÌ-FÌTOM 24 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 24

¹Ajɛ̀m ì mɛ̀ru mɛtaǹ, nni pìrɛɛtìrɛ̀ àgwey ànɛ lɛ Ananyas à sɛngày a Sezare, ǹɗaŋ rì ɓɛ̀sɛ̀ɛ̀mɛn ɓɛ Ɓɛ̀yudɛ̀n ɓɛdɛŋ, rì loyà àdɛŋ ɗii lɛ Tɛrityul. Fɔɔnnɛ ɓɛ sɔmɛ̀ngà Pol rì gɔmìnà.

²Nni ɓɛ reŋìghày Pol, Tɛrityul à tumɛ̀n rìkpaa ɗi kiɓan ǹŋwèe lɛ:

³Gɔmìnà àgwey, coo syeesyee wɔ̀ɔ̀ a rìkɛ̀ɛ̀kɛ̀ɛ̀sì, rì nyɔɔnyɔn à rìwòŋzì ɗi ɓiɓan anɛ ù mɛ wòŋzì ɓi kìrɔɔ ki kilɔ̀ŋ kis, ɓi mɛ kì lɛ, ti ɓa rì fyòoog, tì ki nyàanyaàrɛ̀n rì ɓɛ̀syeesyee ɓɛ ɓiɓan ɓɛǹ ɓyààmɛ̀n ɓìcèm, jàŋbimiɗ, tì ki fafa ti wɔ̀ ɓìtògsɛ̀n.

⁴Ɓi ɗi lɛ tyɛ̀ ki ɓiisɛn wɔ kìyeesii, m̀ɓɔ̀ŋzii wɔ̀ lɛ, u ram̀ mɛ̀reè, u wog kìɓan ki nkìki lɛ ǹɗesi wɔ̀ kìden lɛ cɔs.

⁵Tìi ǹghɛɛ lɛ ŋwaànɛ à rì fìɓàg, a ɓiighɓigtì kìyoòyòò ɓi nyìinyìm à Ɓɛ̀yudɛ̀n ɓi Zi bimiɗ. Nnyɛɛ ki rìtì rìfòm ɗi righerɛ̀n ɗi nyɔn ɗi ɓumɓɛ a Nazarɛt.

⁶Àa mɛɛ̀ kì gi lɛ, a yogsi rìɓa ɗi naà-Bɛ̀ll yìs, ɗi ì rì kìcèlì nni tìi mɓani nyi, tì fèg lɛ ti yɔmzi nyi ɓi ɓìdɔ̀gsɛna ɓis.

⁷Kìɓan kifog, ǹkɔ̀mɛ̀n ɓɛ̀sujàà àgwey ànɛ lɛ Lizyas, àa n-yùu yì rì coo kigùg, à ɓàtɛ̀n nyi ɓi ɓyàg ɓis,

⁸à ki kpaa lɛ, ɓumɓɛ anɛ̀n ɓɛ kiɓan, ɓɛn ɓɛɛ yuiy fɛ a lɔ̀ŋkɔɔ; yɛ̀ɛ ù rì nyi ɓiì tɔɔ̀gh mɛ̀tɔɔ́ghtɔɔgh, nnɛ wɛ̀ɛmiɗ ù rì ɓiì ghɛɛ̀ saaɗ ànɛ ɓi ɓìɓan ɓi tì sɔmɛɛ nyi ɓi miì.

⁹Ɓɛ̀yudɛ̀n ɓɛ ɓɛm̀dɛ̀ngà rìkpaa ɗi Tɛrityul ɗiǹ, ɓɛ kpaa lɛ fɔlɔɔ nnɛ kiǹ ki nɗì.

¹⁰Nni gɔmìnà à reɓsìghà Pol rì càg lɛ, ànɛ̀n a toòghrɛn, fɔɔnnɛ à kpaaghà min lɛ: Mɛ̀ ǹ-yii lɛ ki mɛ finɛn bàlì yi bèg, yɛ̀ɛ waà yɔ̀myɔ̀m ɓìɓan fɛ ɓi kìlɔ̀ŋ kis, fɔɔnnɛ ǹɗì rì ǹtyweeyi ɓi nɗem ɓi kìɓan kɛm̀ yɛ̀ɛ ǹti ɓiì kpaasɛɛ lɛ.

¹¹Ù rì lɛ ù tɔg rì ɓum ɓɛdɛŋ ǹkòo ki mɛ cee mɛru ntɛ̀ɗ rì mɛɓɛɛ̀, yɛ̀ɛ mɛ̀ɛ mɓɔɔgh a Yorisalɛm lɛ mɓɔgsi Bɛ̀ll.

¹²Fɔɔnnɛ nsoò ɓi naà-Bɛ̀ll, nsoò ɓi naa yi bɔ̀ŋzɛ̀n, nsoò ɓi bàn, ŋwaàdɛŋ à tanɛɛ ɓi mɛ di ǹnyoonyolɛ̀n rì ɓum, nsoò;

¹³ɓumɓɛ ɓɛ ri ɓɛ, ɓɛ yin ɗi kìɓan kidɛŋ ki ɓɛ ri lɛ ɓɛ ɓaàzì sɔmìnà wàà miì yɛ̀ɛ ɓɛ rɛrɛlii lɔ̀ɔ̀.

¹⁴Kìɓan ki mɛ̀ ǹ-yii ki ri lɛ, nkìki Bɛ̀ll à ɓɛ̀seŋi ɓis kisay ɓi bee inɛ ɓɔɔ̀ rereŋi lɛ rìgherɛ̀n ɗi nyɔ̀n. Ǹgherɛɛ ɓìɓan ɓìcèm ɓi ɓi ri ɓi kaàtà à ɓìdɔ̀gsɛna ɓis, rì ɓi ɓɛ̀kpaŋzì-ɓìɓan ɓɛ kangà;

¹⁵ǹɗi rì dyàɓɛn yɛ̀ɛ Bɛ̀ll, nsoò ɓɔ girig, lɛ ɓumɓɛ ɓɛ ri lɛ saaɗ, nsoò ɓɛ ɓɛ yin lɛ saaɗ, ɓɛ ri ɓiì ghèmɓɛɛ ŋwosi righèmɓɛ̀n ɗi ɓilòŋ.

¹⁶Kìɓan kin kɛɛ̀ki mɛ̀ girig ntèeteèsì nyoo ɓyààmɛ̀n ɓìcèm lɛ, ǹɗem wɛ̀m wɛɛ ɓa kɛ̀ɛ̀ bɛ̀lɛn ɓi mis mɛ Bɛ̀ll, rì ɓi mis mɛ ɓum.

¹⁷Di ki mɛ finɛn bèg lɛɛ̀gwey yɛ̀ɛ ǹghaghìghà, nnɛ mɛ̀ɛ n-yùu rì ɓyom lɛ nkaɓsag rì ɓumɓɛ nyìighnyìg ɓɛ ɓi kìlɔ̀ŋ kɛm̀, ǹki fùnɛn ɓituwe ɓi rìɓɔgsì ɗi Bɛ̀ll.

¹⁸Nni fɔɔnnɛ ɓɛ ntanɛɛ mɛ̀ ɓi naà-Bɛ̀ll di ǹti ɓiì lègsii zòghɛ̀n yɛ̀m, nsoò cììba ki ɓum, nsoò kìyoòyòò, com ɗì com ki n-yìn.

¹⁹Kìɓan kifog, Ɓɛ̀yudɛ̀n ɓɛdɛŋ ɓɛ a Azii ɓɔ yɛɛ nghɛ̀ɛ̀sɛɛ mɛ̀ kì yùu ki sɔmɛɛ a lɔ̀ŋkɔɔ, di ɓɛ nki rì lɛ, ɓɛ ɓa rì kìɓan ki ɓɛɛ cɔɓɛn ɓɛ raɗ ɗì mɛ̀.

²⁰I ki yin fɔlɔɔ, ɓumɓɛ ɓɛɛ kali min kiɓan kiɓeɓtɛn ki ɓɛ nghɛɛ lɛ ǹkìi ŋwos anɛ ɓɛ n-yɔ̀mzii mɛ̀ ɓi Sànèdìrɛŋ.

²¹I ki cee ɓi lɛ, jɛ̀ɛ̀ ìnɛ mɛ̀ɛ nkalii ɓi nyìinyìm wàà lɛ: M̀mɛ rɛli ɓɛyɔ̀m gɛɛ̀nɛ ɓi mis min lɛ, kìɓan ki righèmɓɛ̀n ɗi ɓiloŋ wa?

²²Fɔɔnnɛ Felis ànɛ à konàkà kì yiì kìɓan ki ɓi dɔgtɛ̀n ìnɛn, à pɛ̀ɛ̀zìghà kìɓan rijɛ̀m à kpaa ɓɔ lɛ: Ǹɗì ɓiì yɔ̀mi kiɓan kin di ǹkɔ̀mɛ̀n ɓɛ̀sujàà àgwey ànɛ lɛ Lizyas à mɛ kpaŋ fɛ.

²³Nni à reɓsìghà ǹkɔ̀mɛ̀n ɓɛ̀sùjàà àsàg lɛ, a pɛɛ̀zi Pol ɓi naà-zày, ɓɛ̀ kɛɛ̀ ɓiisɛn nyi kìɓèŋɓeŋi, ɓɛ kɛɛ̀ ki règ ɓum ɓii lɛ ɓɛɛ ghɛɛ̀ghɛ̀ɓsì nyi.

²⁴Yɛ̀ɛ̀ ɓɔɔ mɛru ɓɛ ghaghìghà, Felis à yùy ɓɛɛ̀ giy anɛ lɛ Durusil, ànɛ à ɓaghà gɔ̀n ì Ɓɛ̀yudɛ̀n, nni à kpaaghà lɛ ɓɛɛ regiì nyi Pol. Nni Pol à kpaaghà nyi kìɓan ki ki seesee ǹtyweeyi wu ɓi Kiris Yeesus.

²⁵Wɔ̀lɛ yɛ̀ɛ ɓìtòkì ɓi ɓaghà di ɓyaa kɛ̀n ki kòmi saaɗ ànɛ a kɔ̀ngi Bɛ̀ll, rì rìɓan ɗi ǹɗem ɗi lɛ mum kɛ̀ɛ kì ɓiɓan ɓi ɓeɓtɛn, rì yɛ̀ɛ Bɛ̀ll à ri ren ɓum ɓìɓan, nni Felis à risìghà, à kpaa lɛ: Ɓigomìnɛ ù rì lɛ, ù ka sugtì, ǹɗì wɔ̀ ɓiì regii ti di ǹghɛɛ kìrɔŋiɗ.

²⁶À mììmìngàkà tìtyɛɛ̀ lɛ Pol à rì nyi ɓiì faà mɔ̀ɔ̀ni. Fɔɔnnɛ à kìkìghà lɛ, rì ŋwos rì ŋwos à reŋì nyi lɛ ɓɛɛ tokì.

²⁷Yɛ̀ɛ bèg yi ghaghìghà yiɓɛɛ̀, nni ɓɛ romgày gɔmìnà àdɛŋ ɗii lɛ Pɔrisyus-Fɛstus ɓi-kɔ̀ɔ̀ wu Felis. Yɛ̀ɛ Felis à kɔ̀nkɔ̀ngà lɛ a puɓsi Ɓɛ̀yudɛ̀n ǹɗem, nni à càɗkà Pol ɓi naà-zày.