Read Bafia MƐ̀KÌKÌÌ MƐ ƁƐKƐ̀NÌ-FÌTOM 25 Bible Online

MƐ̀KÌKÌÌ MƐ ƁƐKƐ̀NÌ-FÌTOM 25 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 25

¹Wɔ̀lɛ ajɛ̀m ì mɛ̀ru mɛraa ànɛ gɔmìnà ànɛ lɛ Fɛstus à kpagà ɓi kìden ki zi ki à kɔ̀mɛ̀ngà, à pɛ̀sɛ̀ngà a Sezare, à ɓɔg a Yorisalɛm.

²Fɔɔnnɛ ɓɛ̀pìrɛɛtìrɛ̀ ɓɛgwey rì ɓìtèetèd ɓi ɓum ɓi a Ɓɛ̀yudɛ̀n, ɓɛ yughà nyi kìghɛɛ̀ lɛ ɓɛɛ sɔmɛn Pol.

³Fɔɔnnɛ ɓɛ ɓɔŋzàkà Fɛstus lɛ, i à rì lɛ à gherɛ̀n lɛ ɓɛɛ yuiy rì Pol a Yorisalɛm, lɛ ɓɔɔ ɓaghà di ɓɛ mɛ tɔ̀kɛn lɛ, ɓɛ ri nyi ɓiì ɓoŋì ɓi bee lɛ ɓɛɛ wey.

⁴Wɔ̀lɛ Fɛstus à pɛ̀ɛ̀zìghà ɓɔ lɛ Pol à rì ǹlɔlɔghɛn a Sezare, rì tì lɛ, nyimiɗ a ghɛ̀ɛ̀sɛɛ kì sugtii wɔɔ lɛ fyɛ̀ɗ.

⁵Nni à ɓɔ̀ɓkà jɛ̀ɛ̀ lɛ: I ɓum ɓɛdɛŋ ɓɛ ɓi mìni ɓɛ ri rì bee, ɓɛɛ nɔɔ̀tiì mɛ̀, di ti sɛǹ a Sezare ǹɗaŋ, lɛ i ŋwaànɛ̀n à rì rì kìɓan kiɓeɓtɛn ki àa nkìi, ɓɛɛ sɔmɛn nyi.

⁶Fɛstus à ghagsìghà ɓi mɛru mɛ ceeyɛn taàraa nsoò lɛ ǹtɛ̀ɗ a lɔ̀ŋkaa, fɔɔnnɛ à sugtìghà a Sezare. Ɓi ɗuri tana nnɛ à kɔ̀rìghà ɓi kìkpanà ki ɓɛyɔ̀m, à rom lɛ ɓɛɛ teɗ yì Pol.

⁷Yɛ̀ɛ Pol à yùghày, Ɓɛ̀yudɛ̀n ɓɛ ɓɛ pɛsɛ̀ngày a Yorisalɛm, ɓɛ kɔmzɛ̀ngà nyi, ɓɛ kpaa ɓìɓan ɓi ɓeɓtɛn lɛɛ̀gwey ɓɛ raràɗ ɗi nyi, kìɓan kifog ɓɛ kpaakpààghà ɓìɓan ɓìn rì ŋwɔm kɛ̀ɛ̀ com ki ki resii lɛ ɓi ri saaɗ.

⁸Pol à yɔ̀myɔ̀mgà lɛ: Ǹsɛ̀rii ɓi kiɓan kidɛŋ ki rarɛ̀n ɗì ɓìdɔ̀gsɛna ɓi Ɓɛ̀yudɛ̀n nsoò lɛ rì naà-Bɛ̀ll, nsoò rì Kaaza.

⁹Yɛ̀ɛ Fɛstus à kɔ̀nkɔ̀ngà lɛ a puɓsi Ɓɛ̀yudɛ̀n mɛ̀rem nni à tɔkà Pol lɛ: Ù rì lɛ, ù gherɛ̀n lɛ, ù kɛǹ a Yorisalɛm ɓɛɛ yɔm̀ kìɓan kɔɔ wɔɔ di mɛ̀ ǹɗì ǹkɔ̀kɔriyɛn?

¹⁰Nni Pol à ɓàkà lɛ: Ǹɗɛrɛlii ɓi ɗi lɛ, nkpaŋ ɓi kìkpanà ki ɓɛyɔ̀m ki Kaaza, wɔɔnnɛ ɓɛɛ reǹ kìɓan kɛm̀; ǹkìi ɓi Ɓɛ̀yudɛ̀n nsoò maa kìɓan adɛŋ à m̀ɓeɓtɛn lɔŋ yɛ̀ɛ wɛ̀ɛmiɗ ù yii.

¹¹Nkòo ki rì lɛ ǹɗì rì zɛ̀ɗ, nsoò lɛ i mɛ̀ɛ ǹkìi kìɓan ki lɛ ɓɛɛ wey mɛ̀ miì, màa ɓèn ɓi riwù, kìɓan kifog i ki ghɛnɛɛ lɛ saaɗ à yin ɓi ɓìɓan ɓi ɓɛ sɔmɛɛ mɛ̀ miì nsoò lɛsàg, mum à yin ri ìtèɗ wulɛ, à teɗ mɛ̀ à fa rì ɓɔ; ǹghagsii kìɓan kɛm̀ yɛ̀ɛ Kaaza.

¹²Yɛ̀ɛ Fɛstus à tɔkà ɗyomzɛ̀n ɗì ɓumɓɛ ɓɛ nɗeɓkì nyi, nni à ɓàkà min Pol lɛ: Yɛ̀ɛ ù ghagsii kìɓan kɔɔ yɛ̀ɛ Kaaza, ù rì ɓiì kɛ̀ɛ a lɔ̀ŋkii.

¹³Yɛ̀ɛ ɓɔɔ mɛru ɓɛ ghaghìghà, nni rìfòm ɗi lɛ Agiripa ɓɛɛ Berenis, ɓɛ yughày a Sezare lɛ ɓɛɛ togsi Fɛstus.

¹⁴Yɛ̀ɛ ɓɛ ghɛ̀ɛ̀sɛ̀ngà kìghagsii gàɓ ì mɛ̀ru wɔɔ, fɔɔnnɛ Fɛstus à rèsìghà rìfòm kìɓan ki Pol à kpaa lɛ: Felis, àa ncàri ŋwaàdɛŋ fɛ ɓi naà-zày.

¹⁵Nni yɛ̀ɛ mɛ̀ɛ ǹɗìì a Yorisalɛm, ɓɛ̀pìrɛɛtìrɛ̀ ɓɛgwey rì ɓɛ̀sɛ̀ɛ̀mɛn ɓɛ Ɓɛ̀yudɛ̀n ɓɛ n-yùu nyi kìsɔmɛɛ, ɓɛ ki kpaa mɛ lɛ, mɛ̀ɛ nfa ànɛ̀n rìnàn.

¹⁶Nni mɛ̀ɛ mɓàagh ɓɔ lɛ: Ɓɛ̀ròmɛŋ ɓɛ yin ɗi kìsyɔ̀ɔ̀ ki lɛ, i ɓɛ sɔmɛɛ mum ɓɛ gherɛ̀n lɛ ɓɛɛ wes̀ ŋwaànɛ̀n, di à ka rɛɛsɛn ɓi ri ɓumɓɛ ɓɛ sɔmɛɛ nyi, ɓɛ càɗ nyi cààmɛ̀n ki lɛ a kpaàsɛn ɓi ɓìɓan ɓi ɓɛ kpaakpaa ɓɛ raràɗ ɗì nyi.

¹⁷Nni yɛ̀ɛ ɓɛ n-yùu yì fɛ, mɛ̀ mɓoŋi ɓi lɛ cààmɛ̀n kɛɛ ghaàgh, mɛ̀ɛ nkɔ̀rii ɓɛ̀yɔ̀m ɓi duri tana, ǹki rom lɛ ɓɛɛ teɗ yì ŋwaàncèm.

¹⁸Yɛ̀ɛ ɓɛ nɗɛlii ɓɛ̀yɔ̀m, ɓum ɓɛ kiɓan ɓɛ ǹkpaa ɓi nsoò kìɓan kifog ɓi ɓìɓan ɓi ɓeɓtɛn ɓi mɛ̀ɛ ǹfèfeegh lɛ, à ɓaghà lɛ à kì.

¹⁹Paàzì wàà àa nɗì ɓi kìɓan ki ki seesee rìgherɛ̀n ɗyaa, à ɓiìɓììsɛ̀n ɓi kìɓan ki ŋwaàdɛŋ lɛ Yeesus, ànɛ à wughà, wɔ̀lɛ Pol nyii kalàg lɛ, ànɛn à rì cem.

²⁰Ɓi ɓɛg wɛ̀m, com ki mɛ̀ɛ nɗi lɛ ǹkpaa ɓi kìɓan kiǹ ki ǹ-yeesii mɛ̀. Fɔɔnnɛ mɛ̀ɛ m̀mɛɛ̀ kpaa nyi lɛ, i à kɔ̀ni a kɛǹ a Yorisalɛm, ɓɛɛ yɔm̀ kìɓan kii wɔɔ.

²¹Wɔ̀lɛ Pol àa ntɔɔgh lɛ kìɓan kii kɛɛ ghaàgh yɛ̀ɛ Kaaza. Fɔɔnnɛ mɛ̀ɛ nkalii lɛ, ɓɛɛ ka ɓèŋ nyi ɓi naà-zày à kpaŋ ŋwos anɛ ǹɗì nyi ɓiì romì yɛ̀ɛ Kaaza.

²²Nni Agiripa à kpaaghà Fɛstus lɛ: Mɛ̀ɛ nkɔ̀nkɔn lɛ nwog ǹkpaà wu ŋwaànɛ̀n. Fɛstus à ɓàg nyi lɛ, ù rì ɓiì woògh rìduri.

²³Yɛ̀ɛ duri i tangà Agiripa ɓɛɛ̀ Berenis ɓɛ yughày ri coo rìgwey ɓɛ ɗiŋì ɓi naà-ɓɛ̀yɔ̀m, ɓɛ̀kɔ̀mɛ̀n ɓɛ̀sujàà ɓɛgwey, rì ɓɛ̀lem ɓɛ ɓum ɓɛ ɓi bàn ɓɛ nɔɔ̀nɔ̀ɔ̀tìghày ɓɔ. Fɔɔnnɛ Fɛstus à romgà min lɛ ɓɛɛ yuis̀ rì Pol.

²⁴Nni Fɛstus à kpaaghà lɛ: Rìfòm Agiripa rì mìniìcèm ɓɛ ɓì rì fɛ rì ɓìsi, ǹwaànɛ ɓi seesee anɛ Ɓɛ̀yudɛ̀n ɓɛ̀cèm ɓɛ yughà mɛ̀ kìghɛɛ̀ lɛ rì a Yorisalɛm rì fɛfɛ bisu wii, ɓɛ tɔtɔ̀g mɛ̀ jɛ̀ɛ̀ aɗyoo lɛ, ɓɛɛ wey nyi.

²⁵Wɔ̀lɛ ɓi mɛ̀, mɛ̀ɛ nghɛɛ ɓi kiɓan kiɓeɓtɛn ki à kìi ki ɓɛ ri lɛ ɓɛ wey nyi miì, nni yɛ̀ɛ nyimiɗ yɛɛ ntɔɔgh lɛ kìɓan kii kɛɛ ghaàgh yɛ̀ɛ Kaaza, nni mɛ̀ɛ nkpaa lɛ, ǹɗi nyi ɓiì romì wɔɔ.

²⁶Wɔ̀lɛ ǹka yin ɗi bimiɗ à kìɓan anɛ ǹɗì lɛ ǹkàn Kaaza ɓi kìɓan ki ǹwaànɛ, fɔlɔɔ nnɛ ǹɗɛsii nyi fɛ ɓi mis min, a ɓiisɛ̀n ɓi mis mɔɔ, wɔ̀ rìfòm Agiripa lɛ i tyàa mɔ̀ɔmɔmgì kìɓan kii, fɔɔnnɛ mɛ̀ ǹ-yi cɛ kɛɛ̀ki ǹɗì lɛ ǹkàn Kaaza;

²⁷lɛ ki ri ɓiì ɓaà kìdìmìdimi ki kiɓan, di ǹɗomi kìmbùŋ yɛ̀ɛ Kaaza kɛ̀ɛ ǹɗèsi ɓiɓeɓtàg ɓi ɓiɓan ɓi ki nsɛ̀raagh lɛ tɛntɛ̀ɛ̀n.