Read Bafia MƐ̀KÌKÌÌ MƐ ƁƐKƐ̀NÌ-FÌTOM 26 Bible Online

MƐ̀KÌKÌÌ MƐ ƁƐKƐ̀NÌ-FÌTOM 26 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 26

¹Nni Agiripa à kpaaghà Pol lɛ: Tì faa wɔ̀ ìtèɗ wulɛ, u kpaàsɛn. Fɔɔnnɛ Pol à nàmgà càg, à tumɛ̀n mɛ̀kpaà lɛ:

²Rìfòm Agiripa, ǹɗì rì kìnyàà lɛ nɗɛli gɛɛ̀nɛ ɓi mis mɔɔ, lɛ n-yɔm̀ ɓìɓan ɓi Ɓɛ̀yudɛ̀n ɓɛ ti ɓɛ sɔɔ̀sɔ̀mɛ̀n mɛ̀ miì

³ɓisuulɛ, ù yii ɓìsyɔ̀ɔ̀ ɓi Ɓɛ̀yudɛ̀n ɓìcèm lɛ syeesyee, rì ɓìɓan ɓi ɓi ti ɓi syogàg yì nyoey ɓi nyìinyìm wàà, fɔɔnnɛ m̀ɓɔ̀ŋzaagh wɔ̀ lɛ, u maàsi ǹɗem, u woòg kìtòkì kɛm̀.

⁴Ɓɛ̀yudɛ̀n ɓɛ̀cèm ɓɛ yii cɛɓ kɛ̀m, à tumɛ̀n di ǹkaka maa ŋwɔɓti, yɛ̀ɛ ǹghɛghɛɓi a Yorisalɛm ɓi kìlɔ̀ŋ kɛm̀.

⁵Ɓɛ yii mɛ̀ fìɗyàɓ, ɓaa ki rì lɛ, ɓɛ ɓa ɓɛ̀wusìnɛ̀ɗ ɓɛm di ɓɛ kɔnì, lɛ ǹghɛghɛ̀ɓkà yɛ̀ɛ Ɓɛ̀fàrìzyɛŋ ɓɛ ɓɛ ri ɓumɓɛ ɓɛ cìɓtaagh rìɓèŋ ɗi ɓisyɔ̀ɔ̀ ɓi ɓi rìgherɛ̀n ɗis.

⁶I ǹki rɛrɛlii gɛɛ̀nɛ ɓi ɓɛ̀yɔ̀m, ki ri ɓisuu ntyweeyi wu ɓi ǹkàg wu Bɛ̀ll à faghà ɓɛ̀seŋi ɓis.

⁷Nkàg wiǹ wɛɛ̀wu mɛ̀kuu mis mɛcèm ntɛ̀ɗ ɗì mɛɓɛɛ̀rɛn mɛ mɛɛ̀ ɓɔɔɓɔgsì Bɛ̀ll lɛ rì ìru rì ŋwos kɛ̀ɛ̀ rìfɔɛy, mɛ tyweetywèèyì lɛ wu ri ɓiì roni rìfòm, ɓisuu ntyweeyi wiǹ innɛ Ɓɛ̀yudɛ̀n ɓɛɛ̀ sɔmag mɛ.

⁸Ɓisuucɛ nnɛ mìniì teki nyoey lɛ Bɛ̀ll à yin lɛ à ghèmzì ɓìloŋ?

⁹Ɓi ɓɛg ànɛ a lɔ̀ŋkɛm̀ ǹfèfèkà lɛ, ki ghɛɛ̀sɛɛ lɛ nɗuù rì ɗii ɗi Yeesus ànɛ a Nazarɛt bee yicèm.

¹⁰Kìsay kiǹ kɛɛ̀ki ǹkìghà a Yorisalɛm lɛ mɛ̀ɛmiɗ m̀pìkà ɓɛ̀gherɛ̀n lɛɛ̀gwey ɓi naà-zày rì ìtèɗ wu ɓɛ̀pìrɛɛtìrɛ̀ ɓɛgwey ɓɛ faghà mɛ̀. Mɛ̀ɛ nki ti m̀ɓɛmdàg fèg wàà di ki kpaŋi lɛ ɓɛɛ wey ɓɛ̀gherɛ̀n.

¹¹Mɛ̀ɛ nti m̀pɔnɔsàg ɓɔ ɓi naa yi bɔ̀ŋzɛ̀n yìcèm, ǹkàŋkaŋ ɓɔ lɛ, ɓɛɛ càɗ rìgherɛ̀n ɗyaa; bim yɛm̀ ìnɛ rì ɓɔ ì tèghɛ̀ngà lèg ànɛ lɛ, mɛ̀ɛ nti ǹkɛ̀ngàg ɓɔ ki ɓangii nsoò ɓi bàn yi tiràɓ.

¹²Fɔɔnnɛ ǹkɛ̀ngà ŋwos adɛŋ a Damas, di ɓɛ̀pìrɛɛtìrɛ̀ ɓɛgwey ɓɛɛ romi mɛ̀, ɓɛ fa mɛ̀ kaàtà lɛ, ɓɔɔ faa mɛ̀ ìtèɗ wulɛ nkɛǹ.

¹³Yɛ̀ɛ ǹkɛ̀nkɛ̀ngà di toroɓ à tiì rìfòm, fɔɔnnɛ ǹghɛngà di coo kitɛɛtɛn ki kii yì aɗyoo lɛ ŋwààɗ, ki yuis̀, ki ceŋzɛ̀n lɛ rì mɛ̀, rì ɓumɓɛ tì ɓaghà rì ɓɔ.

¹⁴Fɔɔnnɛ ɓìsi ɓɛ̀sɛ̀ɛ̀ ɓɛ̀cèm tì kpìlàkà ɓi zi, ǹwog min di jɛ̀ɛ̀ ìdɛŋ yɛ̀ɛ kakali mɛ ɓi rì èbìreegh lɛ: Sol wɔ̀ sol wɔ̀, ù yeeyeèsì mɛ̀ lɛ cɛ? Ki rì wɔ̀ ɓiì ɓaà ǹtɔɓ lɛ u kɛnkɛn asu, ù yaàghyààghrɛ̀n yɛ̀ɛ Sanìnya ànɛ à risii ɓi nkpas wu m̀ɓèŋì wìì.

¹⁵Nni ǹtɔkà nyi lɛ: Kan, wɔ̀ yɛɛ ri ghɛn? Kan à ɓàg mɛ̀ lɛ: Mɛ̀ yɛɛ ri Yeesus ànɛ u yeeyeèsì.

¹⁶Kìɓan kifog, pɛ̀sɛn aɗyoo, u rɛli mɛ̀rɛy lɛ kìɓan ki ǹɗèsɛɛ wɔ̀ miì ki ri lɛ, nkɔ̀nkɔn lɛ u ɓa ǹkìì-kìsay wɛm̀, ù ki ɓa wusìnɛ̀ɗ wɛ̀m lɛ u kakali ɓum yɛ̀ɛ wàa ghɛɛ mɛ̀ gɛɛ̀nɛ, ù rì ɓiì ki kakalii ti ɓɔ ɓìɓan ɓi ǹɗì wɔ̀ ɓiì rèsii ti.

¹⁷Ǹɗì ɓiì kàmɛɛ ri wɔ̀ ɓi nyìinyìm à Ɓɛ̀yudɛ̀n rì ɓi nyìinyìm à ɓìlɔ̀ŋ ɓizɛy ɓi ǹɗomi wɔ̀ wɔɔ, lɛ u ŋwàɗ ɓyɔ mis,

¹⁸di ɓyɛɛ pɛsɛn yì ɓi birìm, ɓyɛɛ yu ɓi kìtɛɛtɛn, ɓi leg yì ɓi rìlàmì ɗi Satàn, ɓi yuiy yɛ̀ɛ Bɛ̀ll, fɔɔnnɛ ɓɛ ri ɓiì kìi lɛ, i ɓɛ mɛ gherɛn mɛ, Bɛ̀ll à cenɛ̀n ɓɔ ɓìbe ɓyaa, à ki fa ɓɔ ìkɔ̀ɔ̀ ɓi ǹɗaŋ wu ɓum ɓii.

¹⁹Rìfòm Agiripa, fɔlɔɔ nnɛ ǹkìghà ɓi ɓɛ̀lɔg ɓi kìɓan ki ki resɛ̀ngày mɛ̀ kiǹ aɗyòò.

²⁰Wɔ̀lɛ ǹka lokà kìkalii ɓumɓɛ a Damas ɓìɓan ɓi Bɛ̀ll, ǹkalì girig ɓumɓɛ a Yorisalɛm rì ɓɛ ɓi zi ì Zyude bimiɗ, à kpagì lɛ rì ɓumɓɛ ɓi ɓìlɔ̀ŋ ɓizɛy miì; ǹkpaakpààghà ɓɔ lɛ, ɓɛɛ lɔɔ̀ghrɛn mɛ̀rem, ɓɛɛ gherɛn Bɛ̀ll ɓɛ ki kì ɓiɓan ɓi ɓyɛɛ resi lɛ, cɛɓ kaa ki ti kìlɔ̀gtɛn.

²¹Kìɓan kiǹ kɛɛ̀ki Ɓɛ̀yudɛ̀n ɓɛ mɓani mɛ̀ miì ɓi naà-Bɛ̀ll, ɓɛ kɔǹ lɛ di ɓaa woli mɛ̀.

²²Wɔ̀lɛ, rìɓèŋ ɗi Bɛ̀ll a ɓèŋɓeŋ mɛ, ɗyɛɛ kiì lɛ, m̀ɓaɓa ɓi cɛɓ à kpaŋ gɛɛ̀nɛ, fɔɔnnɛ ǹɗì fɛlɛ yɛ̀ɛ wusìnɛ̀ɗ ànɛ a kakali lɛ, rì ɓɔɓti, rì ɓɛ̀sɛ̀ɛ̀mɛn, ɓiɓan ɓii, kɛ̀ɛ ǹki sagti kiɓan kidɛŋ ɓi ɓìɓan ɓi ɓɛ̀kpaŋzì-ɓìɓan rì Moyis ɓɛ kpaaghà lɛ, ɓi ri ɓiì kìlɛɛ,

²³ɓyɛɛ ri lɛ: Kiris à ghɛ̀ɛ̀sɛ̀ngà kìwiì, à ki ɓa ŋwaà ǹtonto ànɛ a ghemɓɛn yì a ɓìloŋ, à lòm kìtɛɛtɛn ɓi kìlɔ̀ŋ kis rì ɓi ɓìlɔ̀ŋ ɓimbog lɛ ɓyɛɛ yi lɛ ɓi ri ɓiì ɓaà rì cɛɓ.

²⁴Yɛ̀ɛ Pol à kpaàkpààsɛ̀ngà fɔlɔɔ, nni Fɛstus à kpaaghà jɛ̀ɛ̀ aɗyoo lɛ: Pol, ù rì kìyèg, coo riyi ɗyɔɔ ɗi ɓiɓan ɗi ghaasii wɔ̀ kìyèg.

²⁵Pol à pɛ̀ɛ̀zì nyi lɛ: Coo gìn i mum Fɛstus, ǹ-yin kiyèg, ɓìɓan ɓi nkpaakpàà ɓi ri ɓìɓan ɓi saaɗ, ɓi ki wooghrɛn,

²⁶Rìfòm ɗi yii ɓìɓan ɓi fɔɔnnɛ nkakali nyi ɓyɔ lɛ fwàafwàày lɛ ǹkonaagh kì yiì lɛ à còmɛɛ ɓi kiɓan miì nsoò kìfog, ɓyɛ̀ kɛɛ̀ ki ɓa ɓiɓan ɓi ɓi kilɛ̀ngà a rìnyam.

²⁷Rìfòm Agiripa, ù gherɛɛ nya ɓìɓan ɓi ɓɛ̀kpaŋzì-ɓìɓan ɓɛ kpaaghà? Mɛ̀ ǹ-yii lɛ, ù ghɛrɛɛ ɓyɔ̀.

²⁸Nni Agiripa à kpaaghà Pol lɛ: Ki rɔɓi lɛsàg lɛ, u ki lɛ m̀ɓa kìristɛ̀n.

²⁹Pol à ɓàg lɛ: Nsoò ki kilɛɛ ɓi fɔlɔɔ ɓigomìnɛ, rìkɔ̀n ɗyɛm̀ ɗi ri lɛ, nsoò gɛ fin, Bɛ̀ll a gherɛn lɛ rì wɔ̀, rì ɓum ɓɛ̀cèm ɓɛ ɓɛɛ̀ wowog ɓitòkì ɓyɛm̀ gɛɛ̀nɛ, ɓi ɓa ɓɛ̀gherɛ̀n yɛ̀ɛ mɛ̀, kìɓan kifog kɛ̀ ɓi ɓa ri ɓɛn yi mɛ̀ ǹɗì yi rì yɔ.

³⁰Fɔɔnnɛ rìfòm, rì gɔmìnà, rì Berenis, rì ɓum ɓɛ̀cèm ɓɛ ɓɛ ɓaghà rì ɓɔ, ɓɛ pɛsɛ̀ngà aɗyoo,

³¹ɓɛ kɛǹ dwìɗ ɓɛ kpaakpàà wɔɔ ɓɔ rì ɓɔ lɛ: Ŋwaànɛ à kìi ɓi kiɓan ki ɓɛ ri lɛ ɓɛ wey nyi miì, nsoò lɛ ɓɛ foŋ nyi ɓi naà-zày.

³²Nni Agiripa à kpaaghà Fɛstus lɛ, i kɛ̀ kɛɛ̀ ɓa lɛ ŋwaànɛ à tɔkà lɛ kìɓan kii kɛɛ kɛǹ yɛ̀ɛ Kaaza, di ɓɛ cari nyi.