Read Bafia MƐ̀KÌKÌÌ MƐ ƁƐKƐ̀NÌ-FÌTOM 28 Bible Online

MƐ̀KÌKÌÌ MƐ ƁƐKƐ̀NÌ-FÌTOM 28 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 28

¹Yɛ̀ɛ tì ghɛɓkàkà fɔlɔɔ lɛ soghàsogha, nni ɓɛ kalìghà ɓìsi lɛ, kìrìŋ ki riɓày kiǹ ki ɓaghà ɗii lɛ Maltɛ.

²Ɓumɓɛ ɓi kìrìŋ kiǹ ɓɛ ghaɓkà ɓìsi rì geesɛ̀n lɛɛ̀gwey; yɛ̀ɛ bwey ì sɛngà, kìfɛɓ ki ki kìki lɛɛ̀gwey, ɓɛ ghɛŋzɛ̀ngà coo kikaŋì ki ɗuu, ɓɛ reŋì ɓìsi lɛ, ti kɛǹ kì woògh ɓìsiìcèm.

³Pol à raɓkà ǹkun wu tìcaàgh lɛ a foŋ̀ ɓi ɗuu, nni kìgòm ki faŋìghày ɓi ǹkun wu tiwon wìn yɛ̀ɛ ɗuu ɗi komgày kɔ, ki fyuŋ Pol ɓi càg.

⁴Yɛ̀ɛ ɓumɓɛ ɓi kìrìŋ ki riɓày kiǹ ɓɛ ghɛngà di nyoo ìnɛ̀n ì fyufyuŋii Pol fɔlɔɔ ɓi càg, nni ɓɛ tumɛ̀ngà rìkpaakpàà lɛ: Ki ri lɔŋ saaɗ lɛ ŋwaànɛ à rì ǹwolì-ɓum. Ɓisuulɛ, rìren ɗi ɓiɓan ɗi Bɛ̀ll ɗi ghɛɛ lɛ, kɛ̀ɛ ɓati ɓi cɛɓ, nsoò yɛ̀ɛ à ghɛɓiì rìwu ɓi rìɓày.

⁵Wɔ̀lɛ, yɛ̀ɛ Pol à sàɗkà càg, nyoo ì kpì ɓi ɗuu, kɛ̀ɛ ki wog nsoò maa rìkɛŋ.

⁶Nni ɓumɓɛ̀n ɓɛ pɛɛ̀zìghà mis, lɛ ɓɛɛ ghɛn yɛ̀ɛ Pol à ɓiì mìkii, nsoò lɛ yɛ̀ɛ à biì nàrɛɛ à wu; kìɓan kifog, yɛ̀ɛ coo cààmɛ̀n ki ghaghìghà ɓɛ̀ kɛ̀ɛ ghɛn kirèmzɛna ki ɓeɓtɛn, ɓɛ lɔɔ̀gh jɛ̀ɛ̀, ɓɛ tumɛ̀n rìkpaakpàà lɛ, à rì bɛ̀ll ìdɛŋ.

⁷Rìfòm ɗi ɓi kìrìŋ ki riɓày kiǹ ɗi ɓaghà wɔɔ ri fyòomà jàŋbog; rìfòm diǹ ɗi ɓaghà ɗii lɛ Puɓilyus; ɗi ghaɓkà ɓìsi a mɛɛ mii lɛ syeesyee, tì lay wɔɔ mɛru mɛraa.

⁸Seŋi Puɓilyus à ɓaghà ǹnɔ̀nɔŋiyɛn ɓi zi, lɛ à ɓaghà rì bàɓ-bàɓ ɓi nyoo, ɗùm ɗi bwaɓ ɗi ki kìki nyi. Nni Pol à ɗiŋìghà ɓi naa yɛ̀ɛ tààta ànɛ̀n, à ɓɔ̀ŋzì Bɛ̀ll, à saghì nyi ɓyàg ɓi nyoo, à wɔ̀ɔ̀zì nyi.

⁹Ajɛ̀m ìnɛn nnɛ ɓɛ̀roroɓ ɓɛdɛŋ ɓɛ ɓi kìrìŋ ki riɓày ɓɛ yughày, à wɔ̀ɔ̀zì girig ɓɔ.

¹⁰Ɓumɓɛ̀n ɓɛ nyaasìghà ɓìsi lɛɛ̀gwey; yɛ̀ɛ tì ɓaghà di tì ti ɓiì pɛ̀sɛɛ, ɓɛ faghà ɓyom ɓìcèm ɓi ɓi kaarɛ̀ngà ɓìsi bisuu rikɛ̀ɛ̀ ɗis.

¹¹Yɛ̀ɛ tì ghagsìghà ɓɛ̀ŋwii ɓɛraa wɔɔ, nni tì ɓɔkà fìtimà fidɛŋ fi a Alɛgsaŋdirii, fi fi ghagsìghà bùmà wɔɔ ɓi kìrìŋ ki riɓày kiǹ. Fìtimà fiǹ fi ɓaghà ɗii lɛ, bɛ̀ll yi rifas.

¹²Yɛ̀ɛ fìtimà fiǹ fi rɛlìghà ɓi bàn ìnɛ lɛ Sirakuuzɛ, nni tì kɔ̀rìghà wɔɔ mɛ̀ru mɛraa.

¹³Yɛ̀ɛ tì pɛ̀sɛ̀ngà foo, tì sòrì bèn ì rìɓày, tì kɛ̀n kìkpaŋì a Regyo. Bi duri tana, bɛ̀ɓ ì tumɛ̀ngà rìfɛɓsìì duŋzi, ɓìsii kɛǹ min kikpaŋì a Puzɔl ɓi mɛ̀ru mɛɓɛɛ̀.

¹⁴Tì tanɛ̀ngà ɓɛ̀geni ɓis ɓɛ righerɛ̀n wɔɔ ɓi jàŋ inɛ̀n, ɓɛ tɔg ɓìsi lɛ ti lay mɛ̀ru taàɓɛ̀ɛ̀ a lɔ̀ŋkaa, fɔɔnnɛ tì ki kɛ̀ngà a Rom.

¹⁵Yɛ̀ɛ ɓɛ̀geni ɓis ɓɛ righerɛ̀n ɓɛ a Rom ɓɛ wokà lɛ tì kpaŋi, ɓɛ yughà ɓìsi kì ɓoŋì a fyèè fi Apiyus, rì ɓi jàŋ inɛ ì ɓaghà ɗii lɛ: Naa yi ɓɛ̀kèn yiraa. Yɛ̀ɛ Pol à ghɛngà ɓɔ, à tògsàg Bɛ̀ll, nyoo yìì i tèèsɛ̀n.

¹⁶Yɛ̀ɛ tì kpagà a Rom, ǹkɔ̀mɛ̀n ɓɛ̀sujàà à sɛdɛ̀ngà ɓimbùŋ rì ǹkɔ̀mɛ̀n àgwey, wɔ̀lɛ ɓɛ caɗ Pol lɛ a kɔri cɛ̀ncii, rì sujàà ànɛ à ɓèŋɓèŋgà nyi.

¹⁷Ajɛ̀m ì mɛ̀ru mɛ̀ra, Pol à lààghràkà ɓɛ̀sɛ̀ɛ̀mɛn ɓɛ Ɓɛ̀yudɛ̀n. Yɛ̀ɛ ɓɛ taŋzɛ̀ngà, nni Pol à kpaaghà ɓɔ lɛ: Ɓɔɔsoŋ̀, ǹkìi ɓi ɓumɓɛ ɓi kìlɔ̀ŋ kis kiɓan kiɓeɓtɛn, kɛ̀ɛ nki yogsi ɓìsyɔ̀ɔ̀ ɓi ɓɛseŋi ɓis. Nsoò fɔlɔɔ, ɓɛ ɓangà mɛ̀ a Yorisalɛm, ɓɛ kaàɓ mɛ̀ rì Ɓɛ̀ròmɛŋ.

¹⁸Yɛ̀ɛ Ɓɛ̀ròmɛŋ ɓɛ tɔkàkà mɛ̀ mɛ̀tɔɔ̀tɔɔgh ɓɛ̀ kɛɛ̀ ghɛn kiɓan kiɓeɓtɛn kì ǹkìi, ki ki ghɛɛ̀sɛɛ rì ǹwolɛ̀n, fɔɔnnɛ ɓɛ mɛɛ̀ kìghà lɛ, ɓɛɛ caɗ mɛ̀,

¹⁹kìɓan kifog Ɓɛ̀yudɛ̀n ɓɛ ɓeǹ lɛ ɓɛ̀ kɛɛ̀ càɗ mɛ, fɔlɔɔ nnɛ mɛ̀ɛ ǹɗì ǹtiniyɛn lɛ nghagsiì kìɓan kɛm̀ yɛ̀ɛ Kaaza. Ǹki yin rì fèg ànɛ lɛ, ǹsɔmɛn ɓumɓɛ ɓi kilɔ̀ŋ kɛm̀.

²⁰Kìɓan kiǹ kɛɛ̀ki mɛ̀ɛ ntɔɔgh lɛ di màa ghɛɛ mìni, ǹkalì mìni lɛ bɛn yi ǹɗì yi rì yɔ, yi ri ɓisuu ǹtyweeyi wu Isirayɛl a rì rì wɔ.

²¹Nni ɓɛ ɓakà nyi lɛ: Ɓìsii ghɛɛ ɓi kaàtà àdɛŋ ànɛ à rìì a Zyude à ɓùŋ kìɓan kɔɔ nsoò ŋwaàdɛŋ à yùu ɓi fɛ, à kpaa kìɓan à ràɗ rì wɔ̀.

²²Ɓìsiì kɔ̀nkɔn lɛ ti wog ɓi ŋwɔm wɔɔ com ki wɔ̀ɔ fèfèg, ɓisuulɛ tì yii lɛ bee inɛ̀n, ɓum ɓɛɛ̀ ɗùùɗuu ri yɔ̀ jàŋbimiɗ.

²³Fɔɔnnɛ ɓɛ faghà nyi ǹkàg wulɛ ɓɛɛ ghɛnɛn, nni ɓɛ yughày kìtuu lɛ ɓɛɛ ghɛǹ nyi a mɛɛ mii. Ɓi ɓìtòkì ɓii, Pol à kalìghà ɓɔ kìɓan ki ki taataa kìlɔ̀ŋ ki Bɛ̀ll, à ki kaakaa bee lɛ rì ɓi ɓìdɔ̀gsɛna ɓi Moyis, rì ɓi ɓɛ̀kpaŋzì-ɓìɓan, lɛ a ki lɛ ɓɛ̀ kɛɛ̀ teeti nyoey ɓi kìɓan ki Yeesus. A tòkàkà rì ɓɔ fɔlɔɔ à tumɛ̀n sariwa à kpaŋ cɛŋkò.

²⁴Gàɓ ìdɛŋ ì gherɛ̀ngà ɓìɓan ɓi à kpaakpààghà, wɔlɛ ɓɛ̀ro ɓɛmbog ɓɛ teɗ nyoey.

²⁵Nni yɛ̀ɛ ɓɛ pɛsɛ̀ngà rìsug, di ɓɛ mɛ rɔ̀ɓ kɛ̀ ɓɛɛ̀ wooghrɛn jɛ̀ɛ̀, com ki Pol à kpaatìghà ɓɔ ki ɓaghà lɛ: Kìtɛntɛ̀ɛ̀n ki Nghay ki kpaghà lɔŋ saaɗ yɛ̀ɛ ki kalìghà rì ɓɛ̀seŋi ɓin ɓi ŋwɔm wu ǹkpaŋzì-ɓìɓan Ezayii lɛ:

²⁶Kɛ̀na u kpaà kìlɔ̀ŋ kiǹ lɛ: Ɓì ɓiì ɓaà lɛ ɓì soo woogh lɛ syeesyee kɛ̀ ɓi yì, ɓì ri ki seesèè lɛ syeesyee kɛ̀ ɓi ghɛn

²⁷ɓisuulɛ mɛ̀rem mɛ ɓumɓɛ ɓi kìlɔ̀ŋ ki, mɛ tɔgtii ɓi, ɓɛ mɛ simgi dɔm ɓi mɛ̀reè ɓɛ ki ɓuusag mis lɛ ɓɛ̀ kɛɛ̀ ghɛnɛn, ɓɛ̀ kɛɛ̀ yi kiɓan ɗi nɗem, lɛ i ɓɛ lɔɔ̀ghrɛɛ mɛ̀rem ǹwɔ̀ɔ̀zì ɓɔ.

²⁸Nni yiina min lɛ, ɓɔlɛ̀ à gòri ì Bɛ̀ll ìnɛ, à mɛ romɓɛn a ɓumɓɛ ɓɛ yin Ɓɛ̀yudɛ̀n. Nsoò ɓɔ, ɓɛ ri nyi ɓiì ghàɓi.

²⁹Yɛ̀ɛ Pol à kpaghà fɔlɔɔ, Ɓɛ̀yudɛ̀n ɓɛ pɛsɛ̀ngà ɗì rìghaàgh di ɓɛɛ̀ nyoonyolɛ̀n ɓɔrìɓɔ rì ìtèɗ.

³⁰Pol à kɔ̀rìghà ɓɛ̀bimiɗ ɓɛ bèg ɓɛɓɛɛ̀ ɓi naa ìnɛ à rɛntìghà. Ɓum ɓɛ̀cèm ɓɛ ɓɛ yuyùghày nyi kìghɛɛ̀ à tetèkà ɓɔ rì kìnyàà.

³¹A lààlàmɓɛ̀n kìlɔ̀ŋ ki Bɛ̀ll, à ki rèresi ɓum ɓìɓan ɓi ɓi seesee Kan Yeesus Kiris lèg bimiɗ ànɛ ki ɓaghà lɛ ki kɔ̀n nyi, kɛ̀ɛ̀ ntɔɓ.