Read Bafia MƐ̀KÌKÌÌ MƐ ƁƐKƐ̀NÌ-FÌTOM 3 Bible Online

MƐ̀KÌKÌÌ MƐ ƁƐKƐ̀NÌ-FÌTOM 3 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 3

¹Pyɛɛri ɓɛɛ̀ Zyaŋ ɓɛ ɓɔ̀ɓɔ̀kà a naà-Bɛ̀ll ɓi cààmɛ̀n à bɔ̀ŋzɛ̀n ì mɛ̀kɛ̀ɛ̀ mɛraa à ŋwos ǹkɛ̀nɛn.

²Fɔɔnnɛ ŋwaàdɛŋ ànɛ à yalɛ̀ngà rì ɓìlɛm, à ɓaghà wɔɔ. Ɓɛ̀ŋwos ɓɛ̀cèm, ɓɛ n-yùlàg nyi kì kɔ̀ɔ̀sii asuunaa wu naà-Bɛ̀ll wu ɓɛ ǹɗegì lɛ: Rɔɔrɔɔ, lɛ a lɔǹlɔn ɓumɓɛ ɓɛɛ̀ ɗiɗiŋi ɓi naà-Bɛ̀ll ɓyom.

³Yɛ̀ɛ ŋwaànɛ̀n à ghɛngà lɛ rì Pyɛɛri rì Zyaŋ di ɓɛɛ̀ kɛ̀nkɛn lɛ ɓɛɛ ɗiŋi ɓi naà-Bɛ̀ll, fɔɔnnɛ à lɔngà ɓɔ mɔ̀ɔ̀ni.

⁴Pyɛɛri rì Zyaŋ ɓɛ ruusìghà mis ɓi nyi ɓɛ fiɓì nyi lɛ fyɛɛɛyi, Pyɛɛri à kpaa nyi lɛ pɛɓsɛn ɓìsi.

⁵Ŋwaànɛ̀n à seesèèghà ɓɔ lɛ tɔ̀ntɔ̀n à fèkì nya lɛ ɓɛ ri nyi ɓiì faà com.

⁶Pyɛɛri à Kpaa min nyi lɛ: Mɛ̀ n-yin ɗi mɔ̀ɔ̀ni nsoò gol lɔŋ com ki ǹɗì rì kɔ kɛɛ̀ki ǹfaa wɔ̀: Ɓi ɗii ɗi Yeesus Kiris ànɛ a Nazarɛt pɛ̀sɛn aɗyoo u kɛɛ̀ghi!

⁷Fɔɔnnɛ à ɓangà ŋwaànɛ̀n ɓi càg ki weèlem à pɛ̀sì nyi mɛ̀rɛy. Lɔŋ ɓi cààmɛ̀n kɔm̀ kiǹ, mɛ̀kòò mii, rì mɛ̀lèŋiɗ mii ɓi ghas kì terì ìtèɗ;

⁸lɔŋ yɛ̀ɛ à lɛlà gɛ̀n bog lɛ doɓtà, à rɛli mɛ̀rɛy à ghagsɛ̀n ɗì rìkɛ̀ɛ̀. Nni à ɗiŋìghà rì ɓɛ̀-Pyɛɛri ɓi naà-Bɛ̀ll di a kɛ̀ɛ̀kɛ̀ɛ̀, à lɛɛ̀lɛ̀ɛ̀tɛ̀n, à ki keekemzì Bɛ̀ll.

⁹Mum bimiɗ à ghɛngà yɛ̀ɛ à kɛ̀ɛ̀kɛ̀ɛ̀ghà di a ɓɔɔɓɔgsì Bɛ̀ll.

¹⁰Yɛ̀ɛ ɓum ɓɛ ghɛngà lɛ ŋwaànɛ̀n yɛɛ nti à kɔ̀ràg asuunaa wu naà-Bɛ̀ll wu lɛ Rɔɔrɔɔ à lɔnlɔ̀n ɓum ɓyom, nni ɓɛ risìghà ɓɛ ki kuurag kiɓan ki ki kilɛ̀ngà kiǹ bi cɛɓ ki ŋwaànɛ̀n, yɛ̀ɛ mɛ̀nɔ̀ɓɔ̀.

¹¹Yɛ̀ɛ Ŋwaàncèm ànɛn à nɔ̀ɔ̀nɔ̀ɔ̀tɛ̀ngà ɓɛ̀-Pyɛɛri ɓɛɛ̀ Zyaŋ, nni ki yeesìghà ɓum rìwog ɓɛ ghɛŋmɛ̀n ɓɔ a nyoo ɓi tuùtuu anɛ ɓɛ nɗegì lɛ tuùtuu à Salomɔŋ.

¹²Yɛ̀ɛ Pyɛɛri à ghɛngà fɔlɔɔ, nnɛ à kalìghà ɓumɓɛ̀n lɛ: Mìni ɓumɓɛ a Isirayɛl, ɓi cɛ nnɛ ɓì rì ri mɛ̀kuùkuugh ɓi kìɓan ki? Ɓisuucɛ nnɛ ɓi fifiɓi ɓisi lɔŋ yɛ̀ɛ ɓɛɛ̀ kali lɛ tì kɛ̀ɛ̀sii ŋwaànɛ rì ìtèɗ wis, nsoò lɛ ɗì rìfalɛ̀n ɗis ɗi ɓi rìgherɛ̀n?

¹³Bɛ̀ll à Abiraham, Bɛ̀ll à Isag, Bɛ̀ll à Yakɔɓ, Bɛ̀ll à ɓɛ̀seŋi ɓis yɛɛ faa ǹkìì-kìsay wiì ànɛ lɛ Yeesus rìkem. Yeesus ànɛn nnɛ ɓìi nkàɓi, ɓi ki roòzɛn nyi ɓi mis mɛ Pilat ànɛ àa m̀mɛɛ̀ kì lɛ di àa càri nyi.

¹⁴Ɓìi nɗoòzɛɛ roànɛ àa nɗì ǹtɛnɛn à ki ɓa ti lɛ saaɗ, ɓi tɔg Pilat lɛ a caɗ roànɛ àa nɗì ǹwolì-ɓum.

¹⁵Ɓìi kìi lɛ ɓɛɛ wey ŋwaànɛ à làmii cɛɓ, nyi nnɛ Bɛ̀ll àa ǹghèmzii yì a ɓìloŋ; tìrì ɓɛ̀wusìnɛ̀ɗ ɓɛ ɓi rìghèmɓɛ̀n ɗii.

¹⁶Ǹtyweeyi wu tì rì rì wɔ ɓi ɗii ɗi Yeesus wɛɛ kii lɛ, ɗii ɗìn ɗyɛɛ fa mɛ̀kòò mɛ ŋwaànɛ ɓi yii ànɛ ìtèɗ yɛ̀ɛ ɓi seesèè, fɔɔnnɛ ǹtyweeyi wu ɓi Yeesus wɛɛ kii lɛ, a wɔǹ lɛ kɔɔ̀kɔɔ̀ lɔŋ yɛ̀ɛ ɓi seesee lɔɔ ɓɛsɛ̀ɛ̀ ɓɛ̀cèm.

¹⁷Nni ɓigomìnɛ, ɓɛ̀geni ɓɛ̀m, ǹ-yii lɛ ɓìi ǹkìi fɔlɔɔ lɛ, rì mìni rì ɓɛ̀làmì ɓin ɓìi n-yii ɓì.

¹⁸Kìɓan kifog, ɓi bee inɛ̀n nnɛ Bɛ̀ll àa ǹdoòzii kìɓan ki à lokà ki kpaà ɓi myɔm mɛ ɓɛkpaŋzì-ɓìɓan ɓɛ̀cèm ɓɛ ɓi mɛ̀ru mɛ ajɛ̀m lɛ: Kiris à ghɛ̀ɛ̀sɛɛ gɛ kì woògh rìkɛŋ.

¹⁹Nni lɔ̀ɔ̀ghrɛɛna min mɛrem, ɓi sugtiì yɛ̀ɛ Bɛ̀ll, di fɔɔnnɛ a tiìsi ɓìɓe ɓin.

²⁰Fɔlɔɔ nnɛ Kan à rì ɓiì romìì ɓyààmɛ̀n ɓi rifɔɔsɛ̀n yɛ̀ɛ à rì mìni ɓiì romìì ǹghɛɓsì-ɓum, ànɛ à pègsɛ̀ngà ɓisu wìn. Nnyɛɛ rì Yeesus Kiris.

²¹Yeesus ànɛ à ka ghɛ̀ɛ̀sɛɛ kì kɔ̀kɔrii aɗyoo, à kpaŋ ɓi cààmɛ̀n ki ɓɛ ri ɓiì pɛ̀ɛ̀zii ki rɛsii ɓyom ɓìcèm ɓi mɛ̀rɛli mɛ ɓyɔ, lɔŋ yɛ̀ɛ Bɛ̀ll à kpaaghà fìɗyàɓ ɓi myɔm mɛ ɓɛkpaŋzì-ɓìɓan ɓii ɓɛ ɓɛ ɓaghà ɓɛ̀ tɛnɛn.

²²Fɔɔnnɛ Moyis à kalìghà lɛ: Kan Bɛ̀ll wìn à romiì gɛ mìni ǹkpaŋzì-ɓìɓan ànɛ à ɓaa gɛ yɛ̀ɛ mɛ̀, à kì ɓa ŋwaànɛ ɓi kìlɔ̀ŋ kin, ɓì ghɛ̀ɛ̀sɛɛ kì woògh com kìcèm ki à kalii gɛ mìni.

²³Ŋwaànɛ à sɛɛtii gɛ jɛ̀ɛ̀ ì ǹkpaŋzì-ɓìɓan anɛ̀n, ɓɛ pisii gɛ nyi ɓi bàlì ì ɓum ɓɛ kilɔ̀ŋ, ɓɛ ki wey nyi.

²⁴Ɓɛ̀kpaŋzì-ɓìɓan ɓɛ ɓɛ ɓɔɔ̀ɓɔ̀ɓsɛ̀ngà, à tumɛ̀n yì ɓi Samuɛl, ɓɛ ɓugà kìɓan ki ɓi mɛ̀ru mɛ̀n, ɓɛ̀sɛ̀ɛ̀ ɓɛ̀cèm.

²⁵Mìni yɛɛ ri ɓɔn ɓɛ ɓɛkpaŋzì-ɓìɓan, ɓì ki ɓa ti ɓɔn ɓɛ ɓi ɓee ìnɛ Bɛ̀ll à rengà rì ɓɛ̀seŋi ɓìn, yɛ̀ɛ à kalìghà Abiraham lɛ: M̀màŋi gɛ naa yi ɓum yìcèm yi ɓi ziinɛ ɓi jɛ̀m ì dòò yɔɔ.

²⁶Mìni yɛɛ ri ɓumɓɛ asu ɓɛ Bɛ̀ll à ɓɔ̀ngà ǹkìì-kìsay wiì ɓisu waa, à rom yì nyi, lɛ a maŋ̀ mìni, di a ki lɛ mum bimiɗ ànɛ ɓi mìni a càɗ ɓìɓeɓtàg ɓii ɓi mɛkìkìì.