Read Bafia MƐ̀KÌKÌÌ MƐ ƁƐKƐ̀NÌ-FÌTOM 5 Bible Online

MƐ̀KÌKÌÌ MƐ ƁƐKƐ̀NÌ-FÌTOM 5 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 5

¹Wɔ̀lɛ ŋwaàdɛŋ ɗii lɛ, Ananyas ɓɛɛ̀ Safira à giy ɓɛ Kaɓkà kìden kaa ki zi.

²Nni Ananyas a ghaɓìghà gàɓ ì mɔ̀ɔ̀ni, à kɛ̀n ki faà gàɓ ìmbog rì ɓɛ̀kɛ̀nì-fìtom; giy a yighà kìɓan kiǹ.

³Fɔɔnnɛ Pyɛɛri à kalighà Ananyas lɛ: Ananyas, Satàn a ràgɛɛ ɓà wɔ ri ǹɗem fɛlɛ lɛ cɛ yɔ? Ù pwàa Kìtɛntɛ̀ɛ̀n ki Nghay ù nyam gàɓ ì mɔ̀ɔ̀ni ìnɛ ɓi kiden ki zi ki wɔ̀ɔ ǹkàɓi?

⁴Yɛ̀ɛ wɔ̀ɔ nka kaɓ ɓi jàŋ inɛ̀n, ìi ǹɗì jàŋ yɔɔ̀, yɛ̀ɛ wɔ̀ɔ nki kàɓi yɔ̀, mɔ̀ɔ̀ni mɛ miì mɛ rì mɔ̀ɔ̀ni mɔɔ, nni fèg ànɛ lɛ u ki rìkuu ɗi kiɓan ɗi ù kìi ɗi, à rìì wɔ̀ fe? Yiti lɛ: Àa ɓum ɓɛɛ̀ɓɛ ù pwàa, lɔŋ Bɛ̀ll innɛ ù pwàa.

⁵Yɛ̀ɛ Ananyas à wokà ɓìtòkì ɓi Pyɛɛri ɓiǹ, nni à kpìghà, à wu. Fɔɔnnɛ coo iris wu ɓangà ɓum ɓɛ̀cèm ɓɛ ɓɛ wokà kìɓan kiǹ.

⁶Ɓɛ̀dɛlì ɓɛ ɓum ɓɛ yughày rì com ki lɛ, ɓɛɛ lɔg kiloŋ kii miì, ɓɛ pɛsì min kɔ, ɓɛ kɛǹ kì ɓòmi.

⁷Di cààmɛ̀n kaa ghaàgh fɛlɛ yɛ̀ɛ ɓɛ̀hawò ɓɛraa, nnɛ gili Ananyas à yùghày, kɛ̀ɛ yi com ki ki kilɛ̀ngà.

⁸Nni Pyɛɛri à tɔkà nyi lɛ: Kali ɓà mɛ, mɔ̀ɔ̀ni mɛ̀cèm mɛ ɓi zi inɛ ɓìi nkàɓi mɛɛ ri lɛ? Giɓ anɛ̀n à ɓàg lɛ: Ɛ̀ɛ̀ mɔ yɛɛ ri lɔɔ mɛcèm.

⁹Nni Pyɛɛri à kpaaghà nyi lɛ: Cɛ kɛɛ yaa kìi lɛ ɓi woòghrɛn jɛ̀ɛ̀ lɛ, ɓi feèghrɛn Kìtɛntɛ̀ɛ̀n ki Nghay ki Kan? Ghɛna, ɓumɓɛ ɓɛ ɓomiì yii wɔɔ̀ ɓɛɛ ti lɛ asuunaa, ɓɛɛ teɗ wɔ̀ girig.

¹⁰Bi cààmɛ̀n kɔm̀ kiǹ innɛ à ghàskà kì kpìi a mɛ̀kòò mɛ Pyɛɛri, à wu. Ɓɛ̀dɛlì ɓɛ ɓum ɓɛ ɗiŋìì, ɓɛ tanɛ̀n nyi kìloŋ, ɓɛ pɛsì nyi, ɓɛ kɛn kì ɓòmi ɓi ǹwɔŋì wu zɔ̀ŋ ì yii wiì.

¹¹Fɔɔnnɛ coo iris wu ɓangà kìseŋi kìcèm rì ɓum ɓɛ̀cèm ɓɛ ɓɛ wokà kìɓan kiǹ.

¹²Ɓɛ̀kɛ̀nì-fìtom ɓɛ kikìghà dàm, rì ɓɛ̀koŋnyoo ɓɛ ɓiɓan lɛɛ̀gwey ɓi kìlɔ̀ŋ. Ɓɛ̀gherɛ̀n ɓɛ ǹti ɓɛ rɛlàg ǹɗaŋ ɓi tuùtuu ànɛ ɓisuunaa wu naà-Bɛ̀ll wu Salomɔŋ.

¹³Kìɓan kifog, ŋwaàdɛŋ ànɛ à ghɛɛsìghà lɛ a rarɛn ɗì ɓɔ, à ɓaghà ɓì, nsoò fɔlɔɔ ɓum ɓɛ kilɔ̀ŋ ɓɛ sɛsɛ̀kà ɓɔ lɛɛ̀gwey.

¹⁴Fɔɔnnɛ bàlì ì ɓumɓɛ ɓɛ yuyùghà kì gherɛɛ Kan, lɛ rì ɓɛ̀yiɓ ɗì ɓɛ̀baŋì ì ɓɔɓɔ̀kà mɓɔɓɔghɛn.

¹⁵Nni ɓɛ yuyùghà ɗì ɓɛ̀roroɓ ɓi ɓìɓàà, ɓɛ nɔŋzàg ɓɔ ɓi ɓɛ̀kon rì ɓi ɓìkàrà lɛ, i Pyɛɛri à ti ɓiì ghaghii, nsoò cììziŋ kii ki kom roàdɛŋ.

¹⁶Ɓìtuu ɓi ɓum ɓi ɓi bàn yi ɓi mɛ̀wɔŋì, ɓi yuyùy a Yorisalɛm ɗì ɓɛ̀roroɓ, ɗì ɓumɓɛ ɓìɓeɓtàg ɓi mɛghay ɓi yeèyèèsìghà, ɓɛ ki wɔ̀ɔwɔɔ̀zì ɓɔ ɓɛ̀sɛ̀ɛ̀ ɓɛ̀cèm.

¹⁷Fɔɔnnɛ ǹkɔ̀m̀ɛn ɓɛ̀pìrɛɛtìrɛ̀ ɓɛgwey, ri ɓumɓɛ à ɓaghà rì ɓɔ, ɓɛ ɓɛ ɓaghà ɓi ǹɗaŋ wu Ɓɛ̀sàdùsyɛŋ ɓɛ wokà bim lɛɛ̀gwey ri ɓɛ̀kɛ̀nì-fìtom.

¹⁸Ɓɛ ɓangì ɓɔ, ɓɛ pig ɓɔ ɓi naà-zày.

¹⁹Nni ŋwaà-fìtom à Kan à yùghà rì ìru, à nɛmgì mɛ̀suunaa mɛ naà-zày, à kpaŋzì ɓɛ̀kɛ̀nì-fìtom, à ki kali ɓɔ lɛ:

²⁰Kɛ̀ɛna ɓi naà-Bɛ̀ll, ɓi kakali ɓum ɓìɓan ɓìcèm ɓi ɓi komi cɛɓ ki.

²¹Yɛ̀ɛ ɓɛ wokà fɔlɔɔ, nni ɓɛ pongà ɓi naà-Bɛ̀ll ɓɛ tumɛ̀n ɓum ɗì rèrèsì ɗi ɓiɓan ɓiǹ. Fɔɔnnɛ ǹkɔ̀mɛ̀n ɓɛ̀pìrɛɛtìrɛ̀ ɓɛgwey, rì ǹɗaŋ wii wu ɓum ɓɛ yughày, ɓɛ reŋɗɛ̀n ǹtaŋzɛn wu Ɓɛ̀yudɛ̀n wu lɛ Sànèdìrɛŋ, rì ɓɛ̀sɛ̀ɛ̀mɛn ɓɛ̀cèm ɓɛ a Isirayɛl, ɓɛ rom min ɓɛ̀sujàà lɛ ɓɛɛ kɛǹ yì kì terì ɓɛ̀kɛ̀nì-fìtom ɓi naà-zày.

²²Yɛ̀ɛ ɓɛ̀sujàà ɓɛ kpagà ɓi naà-zày, ɓɛ̀ kɛɛ̀ tanɛn ɓɔ wɔɔ, nni ɓɛ sugtìghày kì kalii ɓumɓɛ ɓi Sànèdìrɛŋ lɛ:

²³Tì tanɛɛ yì lɔŋ naà-zày ǹɗogakɛn lɛ gbàg-gbààg. Ɓɛ̀ɓèŋì naà-zày ɓɛ̀ rɛrɛliyɛn lɔŋ a mɛ̀suunaa wɔ̀lɛ, yɛ̀ɛ ti ŋwàri mɛ̀suunaa, tyɛ̀ ki tanɛn mum ɓi ɗùm nsoò bog.

²⁴Nni yɛ̀ɛ ǹkɔ̀mɛ̀n naà-Bɛ̀ll ɗì ɓɛ̀pìrɛɛtìrɛ̀ ɓɛgwey ɓɛ wokà fɔlɔɔ, ki yeesì ɓɔ lannɛ ɓɛ̀kɛ̀nì-fìtom ɓɛ kighà lɛ ɓɛɛ silì ɓi naà-zày. Ɓɛ tɔɔ̀tɔ̀ɔ̀ghrɛ̀n lɛ: Kìɓan ki ki ri ɓiì ɓaà la?

²⁵Fɔɔnnɛ ŋwaàdɛŋ à yùghày ɓɔ kìkalii lɛ: Ɓì ghɛɛ, ɓumɓɛ ɓìi ǹfoŋi ɓi naà-zày, ɓɛ ri ɓi naà-Bɛ̀ll ɓi rìrèsàg ɗi ɓum.

²⁶Nni ǹkɔ̀mɛ̀n naà-Bɛ̀ll à kɛ̀ngà rì ɓɛ̀sujàà, ɓɛ teɗ yì ɓɛ̀kɛ̀nì-fìtom, lɛ tɛ̀tɛ̀rɛ̀ɛ̀, lɛ ɓɛ̀sujàà ɓɔmiɗ ɓɛ rirìsìghà lɛ ɓum ɓɛ ri ɓɔ ɓiì rogii gɔ̀g.

²⁷Yɛ̀ɛ ɓɛ yughày rì ɓɔ a Sànèdìrɛŋ, ǹkɔ̀mɛ̀n ɓɛ̀pìrɛɛtìrɛ̀ àgwey à tumɛ̀n ɓɔ rìtɔg ɗi mɛtɔɔ̀tɔɔgh

²⁸à kpaa lɛ: Mɛ̀ɛ ǹti tìi ǹɗɔ̀gsɛɛ mìni syeesyee à rìrɔ̀gsɛ̀n lɛ, kɛ̀ ɓi rèsi ti mum ɗii dìn? Nni ghɛɛna com ki ɓì kìi, ɓì sààtii rìrèsì ɗiǹ ɓi bàn ì Yorisalɛm bimiɗ, ɓi kì kɔ̀n yɛ̀ɛ di ɓyàa saghii ɓìsi rìwu ɗi ŋwaànɛ̀n ɓi ǹto.

²⁹Nni Pyɛɛri rì ɓɛ̀kɛ̀nì-fìtom ɓɛ ɓakà lɛ: Bɛ̀ll nnɛ mum à ghɛ̀ɛ̀sɛɛ kì kìi mɛwog, à cee ɓum.

³⁰Bɛ̀ll à ɓɛ̀seŋi ɓìs àa ǹghèmzii Yeesus ànɛ ɓìi ǹwoli di ɓi kpani ɓi kɔrɔs.

³¹Nyi nnɛ Bɛ̀ll àa m̀pɛ̀sii aɗyoo, rì weèlem wìì, lɛ a ɓa lɛ, nyi rìfòm, nyi ǹghɛɓsì-ɓum ànɛ à rì ɓiì nɛmì Isirayɛl bee ìnɛ lɛ ɓɛɛ lɔɔ̀ghrɛn mɛ̀rem di Bɛ̀ll a cenɛn ɓɔ ɓìɓe ɓyaa.

³²Tì rì ɓɛ̀wusìnɛ̀ɗ ɓɛ ɓi ɓìɓan ɓiǹ lɛ, rì ɓìsi, rì Kìtɛntɛ̀ɛ̀n ki Nghay ki Bɛ̀ll àa ǹɗomiì ɓumɓɛ ɓɛɛ̀ kìki nyi mɛ̀wog.

³³Fɔɔnnɛ bim i kìghà ɓumɓɛ ɓi ǹtaŋzɛn wiǹ lɛɛ̀gwey yɛ̀ɛ ɓɛ wokà ɓìtòkì ɓiǹ, ɓɛ feg lɛ ɓɛɛ cuusi ɓɛ̀kɛ̀nì-fìtom,

³⁴wɔ̀lɛ ŋwaàdɛŋ ànɛ ɓi ǹɗaŋ wu Ɓɛ̀fàrìzyɛŋ ɗii lɛ Gamalyɛl, ǹɗèsàg ɓìɓan ɓi Bɛ̀ll ànɛ ɓum ɓɛ̀cèm ɓɛ kuuràkà, à pɛ̀sɛ̀ngà aɗyoo ɓi nyìinyìm à Sànèdìrɛŋ, à tɔg lɛ ɓɛɛ ka kpaŋzi ɓɛ̀kɛ̀nì-fìtom ɓidan.

³⁵À kpaa min ɓum ɓɛ ǹtaŋzɛn lɛ: Mìni ɓumɓɛ a Isirayɛl, konaaghna rì com ki ɓi fèfeg kiǹ lɛ ɓi ki rì ɓumɓɛ;

³⁶lɛ, ki ka finɛn ɓì yɛ̀ɛ ŋwaàdɛŋ lɛ Tedas à peeghày fɛ à yèèghyègsì ɓum lɛ nyii rì bimiɗ à mum à kpaŋ yɛ̀ɛ ɓum ɓɛ nɔɔ̀tìghà nyi nunùg ɓum ɓɛ̀hɔnɗɛ̀ɗ ɓɛnin, nni yɛ̀ɛ ɓɛ wolà ŋwaànɛ̀n ɓum ɓɛ̀cèm ɓɛ ɓɛ nɔɔ̀tìghà nyi ɓɛ sanì, com ki ɓɛ mɛɛ̀ kìghà kɔɔ duŋɛ̀n fɔlɔɔ.

³⁷Ajɛ̀m ì Tedas, ɓi cààmɛ̀n ki bàlì ì kìlɛ̀ngà, ŋwaànɛ a Galile lɛ Zyudas à yùghày, à syòŋ ɓum lɛɛ̀gwey, nni yɛ̀ɛ ɓɛ wootìghà nyi, ɓum ɓɛ̀cèm ɓɛ à syògà ɓɛǹ ɓɛ sanì.

³⁸Nni mɛ̀ ǹkalii mìni ɓigomìnɛ lɛ: kɛ̀ ɓi fifiɓi ti kìɓan ki ɓumɓɛ, càrina gì ɓɔ, ɓɛɛ ghaagh; ɓisuulɛ i ki ri lɛ mum yɛɛ faa bɔ ɗyomzɛ̀n ɗiǹ, kìɓan ki ɓɛɛ̀ kìkì kaa ghay ɓi.

³⁹Kìɓan kifog, i Bɛ̀ll yɛɛ ǹfaa ɓɔ ɗyomzɛ̀n ɗiǹ, ɓyàa ghɛn ɓi bee inɛ lɛ ɓi yogsì kìɓan ki ɓɛɛ̀ kìkì. Konaaghna lɛ, kɛ̀ ɓi ki ram wɛ̀y rì Bɛ̀ll.

⁴⁰Fɔɔnnɛ ɓum ɓɛmbog ɓɛ sɛkà rìkpaa ɗi Gamalyɛl ɗiǹ, nni ɓɛ reŋìghày tì ɓɛ̀kɛ̀nì-fìtom, ɓɛ ɓog ɓɔ ɓi kìtòn, ɓɛ rɔgsɛ̀n ɓɔ lɛ, ɓɛ̀ kɛɛ̀ kpaati ɓum kìɓan ki Yeesus, ɓɛ ki càɗ min ɓɔ.

⁴¹Fɔɔnnɛ ɓɛ̀kɛ̀nì-fìtom ɓɛ pɛsɛ̀ngày a Sànèdìrɛŋ ɗì coo kìnyàà ɓi nɗem lɛ Bɛ̀ll àa ǹghɛɛ lɛ, ki rì syeesyee à kiɓan lɛ, ɓɔɔ ghɛn mɛ̀tɔɓ lɛ, ɗii ɗi Yeesus.

⁴²Nni fɔɔnnɛ ɓɛ fɔlà ɓi rirèsì, ɗì rìghagsì ɗi Syeesyee à Ɓɔlɛ à Yeesus Kiris ɓi naà-Bɛ̀ll, ɗì ɓi ɓɛ̀naa ɓaa ɓɛŋwos ɓɛ̀cèm.