Read Bafia MƐ̀KÌKÌÌ MƐ ƁƐKƐ̀NÌ-FÌTOM 6 Bible Online

MƐ̀KÌKÌÌ MƐ ƁƐKƐ̀NÌ-FÌTOM 6 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 6

¹Ɓi cààmɛ̀n kiǹ, yɛ̀ɛ bàlì ì ɓɛ̀gherɛ̀n ì tèèghtèghɛ̀ngà nni ɓumɓɛ ɓɛ totòkà rìgìrɛg ɓɛ tumɛ̀ngà rìcɛɛ̀cɛ̀mdɛ̀n ɗi ɓɛroɓɛ ɓɛ totòkà kìtòkì ki Ɓɛ̀yudɛ̀n, ɓisuulɛ ɓɛ ǹti ɓɛ ɗimzàg mɛ̀kpɔɓ maa ɓi kàɓ à ɓìɗilàg ànɛ ɓɛ ǹkìlàg ɓɛ̀ŋwos ɓɛ̀cèm.

²Ɓɛ̀kɛ̀nì-fìtom ǹtɛ̀ɗ ɗì ɓɛɓɛɛ̀ ɓɛ taŋzɛ̀ngà ɓɛ̀kìristɛ̀n ɓɛ̀cèm ɓɛ kpaa lɛ: Ki ghɛɛ̀sɛɛ ɓi lɛ, ti caɗ rìghagsì ɗi jɛ̀ɛ̀ ì Bɛ̀ll, lɛ ti kaàkàɓsì ɓum ɓìɗilàg.

³Fɔɔnnɛ mìni ɓɔɔsoŋ̀, ɓì ghɛ̀ɛ̀sɛɛ kì ɓɔ̀ni ɓum taàɓɛ̀ɛ̀ ɓi nyìinyìm wiǹ, ɓɛ ɓum ɓɛ yii lɛ, ɓɛ rɔɔtaagh ɓìsyɔ̀ɔ̀, ɓɛ ki ɓa ɓɛronɛn ɗì Kìtɛntɛ̀ɛ̀n ki Nghay, rì ɗyomzɛ̀n, ɓɛɛ̀ ɓɛ ti fa kìsay ki rikàɓsì ɗi ɓiɗilàg.

⁴Fɔɔnnɛ ɓìsii ri ɓiì kɛ̀ɛ asu, tì sììrɛ̀n ɓi bɔ̀ŋzɛ̀n, rì ɓi rìghagsì ɗi jɛ̀ɛ̀ ì Bɛ̀ll.

⁵Fèg ànɛn à kɔ̀ngà ǹɗaŋ wu ɓɛgherɛ̀n wùcèm nni ɓɛ ɓɔngà min lɛ, rì Ityɛn ànɛ à ɓaghà rì coo righerɛ̀n à ki ɓati ǹɗonɛn ri Kìtɛntɛ̀ɛ̀n ki Nghay, rì Filiɓ, rì Pikɔɔri, rì Nikanɔɔri, rì Timɔŋ, rì Parimenas, rì Nikola ànɛ à ɓaghà a Aŋtyos, à ki lɔ̀ɔ̀ghrɛn à ɗiŋì ɓi rìgherɛ̀n ɗi Ɓɛ̀yudɛ̀n.

⁶Nni ɓɛ yughày rì ɓumɓɛ kitaàɓɛ̀ɛ̀, ɓɛ resì ɓɛ̀kɛ̀nì-fìtom, ɓɛ̀kɛ̀nì-fìtom, ɓɛ ɓɔŋzàg Bɛ̀ll, ɓɛ ki saaghràg ɓɔ ɓyàg ɓi nyòò.

⁷Fɔɔnnɛ jɛ̀ɛ̀ ì Bɛ̀ll ì kɛ̀ngà asu di yɛ̀ɛ sààsàà, ɓàlì ì ɓɛ̀gherɛ̀n ì ki ɓɔg lɛɛ̀gwey a Yorisalɛm, kìgwey ki ɓɛpìrɛɛtìrɛ̀ ki ki foŋ ǹtyweeyi ɓi Yeesus.

⁸Ityɛn à ɓaghà ǹɗonɛn lɛ, rì geesɛ̀n, rì ìtèɗ wu Bɛ̀ll, à kìkìghà lɛ, rì ɓɛ̀koŋnyoo ɓɛ ɓiɓan, rì dàm yi ɓiɓan ɓi nyìinyìm à kìlɔ̀ŋ.

⁹Fɔɔnnɛ gàɓ ì ɓum ìdɛŋ ìnɛ ɓi naà-bɔ̀ŋzɛ̀n, ìnɛ ì ɓaghà naa ì ɓumɓɛ ɓɛ ka ɓaghà ɓɛ̀kpàn, ɓɛ nyoònyòlɛ̀ngà rì Ityɛn, ɓumɓɛ̀n ɓɛ ɓaghà Ɓɛ̀yudɛ̀n ɓɛ ɓi ɓìlɔ̀ŋ ɓi lɛ: rì Sirɛn rì Alɛgsaŋdirii, rì ɓumɓɛ a Silisii, rì ɓɛ a Azii.

¹⁰Wɔ̀lɛ ɓɛ ɓaghà ɓi lɛ, ɓɛ yagsàg Ityɛn ɓi nyoey, ɓisuulɛ, nyii totòkà rì ɗyomzɛ̀n ɗi Kitɛntɛ̀ɛ̀n ki Nghay ki fafàghà nyi.

¹¹Fɔɔnnɛ ɓɛ lakìyà ɓum lɛ ɓɛɛ kpaà lɛ: Tìi nwoogh di Ityɛn a feefengì Moyis, à feèfèngì Bɛ̀ll.

¹²Ɓɛ kighà lɛ ɓum ɓɛ kilɔ̀ŋ, rì ɓɛ̀sɛ̀ɛ̀mɛn, rì ɓɛ̀rèsàg-ɓìdɔ̀gsɛna, ɓɛɛ wog bim, ɓɛ yu ɓɛ sɛn ɓi Ityɛn, ɓɛ kɛǹ ɗì nyi a Sànèdìrɛŋ.

¹³Ɓɛ kɛɛ̀dì wɔɔ ri ɓɛ̀wusìnɛ̀ɗ ɓɛdɛŋ ɓɛ ɓɛ pwaapwààghà Ityɛn ɓìɓan ɓi nyoo di ɓɛɛ kpaakpaa lɛ: Ŋwaànɛ à rì lɔŋ cààmɛ̀n kìcèm ɓi rìfen ɗi naà-Bɛ̀ll, rì ɓìdɔ̀gsɛna ɓi Moyis.

¹⁴Tìi ǹwoogh di a kakali lɛ: Yeesus ànɛ a Nazarɛt à rì ɓiì wààghii jàŋ inɛ, à ki cenɗag ɓidɔ̀gsɛna ɓi Moyis à faghà ɓìsi.

¹⁵Ɓum ɓɛ̀cèm ɓɛ ɓɛ ɓaghà ɓi kìkpanà ki ɓɛyɔ̀m ɓɛ pɛɛzìghà mis dì Ityɛn, ɓɛ ki ghɛn lɛ ìsu wii wɛɛ̀ lònlom yɛ̀ɛ wu ŋwaà-fìtom a Bɛ̀ll.