Read Bafia MƐ̀KÌKÌÌ MƐ ƁƐKƐ̀NÌ-FÌTOM 7 Bible Online

MƐ̀KÌKÌÌ MƐ ƁƐKƐ̀NÌ-FÌTOM 7 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 7

¹Fɔɔnnɛ ǹkɔmɛ̀n ɓɛ̀pìrɛɛtìrɛ̀ àgwey à tɔkà min lɛ: Ki ri nya saaɗ fɔlɔɔ yɛ̀ɛ ɓɛ kpaa?

²Ityɛn à ɓàg lɛ: Mìni ɓɛ̀geni ɓɛ̀m, rì ɓɛ̀seŋi ɓɛ̀m, ramina mɛ̀ree ɓi konag kìwoògh lɛ: Bɛ̀ll ànɛ à rì ǹkeŋkèmì à rèsɛ̀ngà yɛ̀ɛ Abiraham à seŋi wìs a ǹsɛ̀ɛ̀, cààmɛ̀n ki à ɓaghà a Mɛzopotamii, di à ka kɛn ɓi ki kɔ̀rii a Haraŋ.

³À kpaa nyi lɛ: Pɛ̀sɛn ɓi kìlɔ̀ŋ kɔɔ, u ki ghasɛn ɗi naa yɔ̀ɔ̀ i ɓum, u kɛǹ kì kɔ̀rii ɓi kìlɔ̀ŋ ki ǹɗì wɔ̀ ɓiì rèsii.

⁴Nni Abiraham à pɛsɛ̀ngà min ɓi kìlɔ̀ŋ ki lɛ Kalde, à kɛ̀n kì kɔ̀rii a Haraŋ. Wɔɔ nnɛ ki ɓaa lɛ, seŋi wìì à mɛ wu, Bɛ̀ll à kpaa nyi lɛ, a syaà yì ɓi kìlànà ki zi ki ɓì rì miì ki gɛɛ̀nɛ.

⁵Kìɓan kifog, Bɛ̀ll à faghà ɓi nyi nsoò maa kìden à jàŋ ànɛ a woòghrɛn ɗì nyi ɓi jàŋ inɛ̀n, nsoò maa zyònà à zɛy rì zɛy, wɔ̀lɛ, à kàkà nyi lɛ, à ri faa gɛ nyi zi inɛ̀n, lɛ yɛ̀ɛ woòghrɛn rì nyì nsoò nyaa ki yiìdi, dòò yii yi rɔɓ rì yɔ̀; Bɛ̀ll à faghà Abiraham ǹkàg wiǹ fɔlɔɔ di à ka yin ri màn.

⁶Bɛ̀ll à kpaaghà nyi lɛ: Dòò yɔɔ yi kɔ̀rii gɛ ɓi kìlɔ̀ŋ kidɛŋ, wɔɔnnɛ ɓɛ ghaasii gɛ yɔ ɓɛ̀kpàn, ɓɛ ki tɔɓ yɔ, bèg ɓɛ̀hɔnɗɛ̀ɗ ɓɛnin.

⁷Kìɓan kifog kìlɔ̀ŋ ki ki ghaasii gɛ ɓɔ ɓɛ̀kpàn kiǹ, lɔŋ mɛ̀ yɛɛ yɔ̀mi gɛ kɔ; ajɛ̀m ìnɛn ɓɛ ri pɛ̀sɛɛ gɛ wɔɔ, ɓɛ yu mɛ̀ kìɓɔɔɓɔgsì fɛ ɓi jàŋ ìnɛ.

⁸Fɔɔnnɛ Bɛ̀ll à faghà Abiraham kɛ̀rɛ̀n ɓi sìg à kìrèmzɛnà ki bee inɛ à rengà ɓɛɛ̀ nyi. Yɛ̀ɛ à yali min Isag, à kɛ̀ɗ nyi ɓi mɛ̀ru taàɓɛ̀ɛ̀. Isag à yay Yakɔɓ, à kɛ̀ɗ girig nyi, Yakɔɓ à kɛ̀ɗkì ɓɛ̀seŋi ɓis ɓɛ ɓɛsɛ̀ɛ̀mɛn ǹtɛ̀ɗ ɗì ɓɛɓɛɛ̀.

⁹Yɛ̀ɛ ɓɛ̀seŋi ɓis ɓɛ ɓɛsɛ̀ɛ̀mɛn ɓɛ ɓaghà rì ǹɗem wu yàaka ri Yoosɛɓ à geni wàà, nni ɓɛ kàɓkà nyi a Egiɓtɛn.

¹⁰Kìɓan kifog, Bɛ̀ll à ɓaghà gàm ɗì nyi, à kwèɗ nyi ɓi mɛ̀tɔɓ mii mɛcèm; à faghà nyi ɗyomzɛ̀n, à ki kì lɛ Farawɔŋ, rìfòm ɗi a Egiɓtɛn, ɗyɛɛ keèsi nyi, ɗi ki ɓɔgsi nyi gɔmìnà a Egiɓtɛn, rì ɓi naa yìì bimiɗ.

¹¹Fɔɔnnɛ coo zày ì kìghà ɓi kìlɔ̀ŋ ki a Egiɓtɛn kìcèm rì ki a Kanaaŋ. Ntɔɓ wu ceeghà, ɓɛ̀seŋi ɓis, ɓɛ̀ kɛɛ ghɛɛ̀di com ki ɗiyɛn.

¹²Yɛ̀ɛ Yakɔɓ à wokà lɛ gèŋ ì rì a Egiɓtɛn, nni à romgà ɓɛ̀seŋi ɓis wɔɔ, ɓi gɛ̀n i ǹtonto.

¹³Yɛ̀ɛ ɓɛ kɛɛdìghà wɔɔ ɓi gɛ̀n i kìɓɛ̀ɛ̀, Yoosɛɓ à kì lɛ ɓɛ̀geni ɓɛɛ remi nyi, fɔɔnnɛ Farawɔŋ à yighà min rìfuuyì ɗi Yoosɛɓ.

¹⁴Nni Yoosɛɓ à romgà min lɛ ɓɛɛ teɗ yì, Yakɔɓ à seŋi, rì naa yìì i ɓum ìnɛ ì ɓaghà ɓum mɛ̀tin mɛraa rì ǹtɛ̀ɗ ɗì ɓɛtaǹ.

¹⁵Fɔɔnnɛ Yakɔɓ à kɛ̀ngà min a Egiɓtɛn wɔɔnnɛ nyimiɗ, rì ɓɛ̀seŋi ɓis ɓɛ ɓɛsɛ̀ɛ̀mɛn, ɓɛ cuughà.

¹⁶Nni ɓɛ tɛkà ɓìloŋ ɓyaa, ɓɛ kɛǹ ɗì ɓyɔ a Sikɛm, ɓɛ ɓom ɓyɔ ɓi zɔ̀ŋ ìnɛ Abiraham à làkà wɔɔ ǹlàghɛn, ri ɓɔn ɓɛ Emɔɔr.

¹⁷Yɛ̀ɛ cààmɛ̀n ki lɛ Bɛ̀ll a roòzi ǹkàg wu à kàkà Abiraham ki kɛɛ̀kɛ̀ɛ̀ghày, bàlì ì ɓum ɓis ɓɛ ɓɛ ɓaghà a Egiɓtɛn ì tèèghtèghɛ̀ngà, ɓɛ ki yaayay ti

¹⁸à kpaŋ yɛ̀ɛ rìfòm ɗiɗɛŋ ɗi ɗi yighà ɓi Yoosɛɓ ɗi tekà rìlàmì a Egiɓtɛn.

¹⁹Rìfòm ɗiǹ ɗyɛɛ ɓeèɓèèzɛ̀ngà boo yìs ɓi mɛ̀ghèy ɗi ki tɔ̀ɓ ɓɔ lèg ànɛ lɛ, ɓɛ ǹkàgì ɓɔ lɛ, ɓɛɛ maàg ɓɔn ɓaa, lɛ ɓɛ̀ kɛɛ̀ ghɛɓ.

²⁰Ɓi cààmɛ̀n kiǹ innɛ Moyis à yalɛɛ; à ɓaghà rɔɔrɔɔ à man ànɛ Bɛ̀ll à Keesìghà; ɓɛ̀yalì ɓii ɓɛ ɓegà nyi naa rì naa, à kpaŋ ɓɛ̀ŋwii ɓɛraa.

²¹Nni yɛ̀ɛ ɓɛ rinìghà nyi, fɔɔnnɛ gɔ̀n ì Farawɔŋ ì ɓadɛ̀ngà nyi, ì tɔɔsì nyi lɔŋ yɛ̀ɛ man wiì.

²²Ɓumɓɛ a Egiɓtɛn ɓɛ resàkà Moyis ɓìɓan ɓi ɓi kìlɔ̀ŋ kaa ɓìcèm, fɔɔnnɛ à ɓaghà kìtèetèɗ ki mum lɛ, rì ɓi ɓìtòkì ɓii, rì ɓi mɛ̀kìkìì mii.

²³Nni yɛ̀ɛ à kpagà bèg mɛ̀tin mɛɓɛɛ̀ lɛ rinɗim, fɔɔnnɛ à ɓekà lɛ a kɛǹ kì ghɛɛ̀ ɓɔn ɓɛ Isirayɛl ɓɛ ɓɛgeni ɓii.

²⁴Yɛɛ̀ Moyis à ghɛngà di muu Egiɓtɛn a yeeyeesì gèni wìì adɛŋ, nni à kàmgà geni ànɛ ɓɛ yeeyèèsìghà ànɛn; ɓi ɗi lɛ a rɔŋ̀ kìɓan kiǹ, à wolà muu Egiɓtɛn àncèm.

²⁵À fèfèkà lɛ, ɓɔn ɓɛ Isirayɛl ɓɛ ɓɛgèni ɓɛ ri ɓiì ghɛɛ̀ ɓi rìkì ɗiǹ lɛ, nyi nnɛ Bɛ̀ll à romiì lɛ a ghɛɓsi ɓɔ, wɔ̀lɛ, ɓɔɔ ghɛngà ɓi kiɓan kiǹ fɔlɔɔ.

²⁶Nni ɓi duri tana, Moyis à tanɛ̀ngà ɓɔn ɓɛ Isirayɛl ɓɛɓɛɛ̀, di ɓɛɛ̀ ɗùùɗùù, à kɛ̀n ɓɔ kì ghasii, à kpaa ɓɔ lɛ: Ɓɔɔsoŋ̀ cɛ kɛɛ ri ɓà lɛ, mìni ɓi rìgeni, ɓì ki ciiciìzɛ̀n tì mìni rì mìni?

²⁷Fɔɔnnɛ roànɛ à ciìcììzìghà gèni àmbog à fengàkà Moyis, à ki tɔg nyi lɛ: Ghɛn yɛɛ nkpaa kɔm wɔ̀ lɛ, u yu ɓìsi kìlàmii, ù ki yɔ̀myɔm ɓiɓan ɓis?

²⁸U kɔ̀nkɔn lɛ u wey mɛ̀ yɛ̀ɛ wɔ̀ɔ ǹwoli muu Egiɓtɛn rìŋkò?

²⁹Yɛ̀ɛ Moyis à wokà fɔlɔɔ, nni à ghɛŋìghà, à kɛ̀n kì nyamzɛɛ ɓi kìlɔ̀ŋ ki lɛ Maɗyaŋ, wɔɔnnɛ à yalà ɓɔn ɓɛɓɛɛ̀.

³⁰Ajɛ̀m ì bèg mɛ̀tin mɛɓɛɛ̀, nnɛ ŋ̀waàfìtom à resɛ̀ngà nyi ɓi-reɓ wu dòn ì Sinayi ì rì wɔɔ; à ɓaghà fɛlɛ yɛ̀ɛ ǹɗòò wu ɗuu wu wɛɛ̀ ròòroo ɓi kìtywìɗ.

³¹Moyis à kuughràkà rìkuu ɗi com ɗi à ghɛngà ɗiǹ nni yɛ̀ɛ à mɛɛ̀ tyòŋdɛ̀ngà wɔɔ, à wog di jɛ̀ɛ̀ ì Kan ì tòòghrɛɛ, ì kpaa lɛ:

³²Mɛ̀ yɛɛ rì Bɛ̀ll à ɓɛ̀seŋi ɓɔɔ, Bɛ̀ll à Abiraham, Bɛ̀ll à Isag, Bɛ̀ll à Yakɔɓ, nni Moyis à risìghà, kɛ̀ɛ ghɛɛsi ti rìseesèè wɔɔ.

³³Fɔɔnnɛ Kan à kàlìghà Moyis lɛ: Sɔ̀ŋi ɓɛ̀siripàs ɓɔɔ, ɓisuulɛ jàŋ inɛ ù rɛrɛrii miì ìnɛ̀n, ì rì kìcèlì.

³⁴Mɛ̀ɛ ǹghɛɛ mɛ̀tɔɓ mɛ kilɔ̀ŋ kɛm̀ ki ki ri a Egiɓtɛn, ǹki wog bemeg yaa, fɔɔnnɛ ǹsɛnii lɛ ǹghɛɓsì ɓɔ. Nni ɓi cààmɛ̀n ki, yu, ǹɗom wɔ̀ a Egiɓtɛn.

³⁵Moyis nyimiɗ ànɛ ɓɔn ɓɛ Isirayɛl ɓɛ ɓengà, rì jɛ̀ɛ̀ inɛ lɛ: Ghɛn yɛɛ m̀ɓɔgsii wɔ̀ rìfòm ɗi yɔ̀myɔmɛn ɓisi? Innɛ Bɛ̀ll à romgà lɛ, a lami ɓɔ, à ki kwèɗ ɓɔ ɓi rìkpàn, lɔŋ yɛ̀ɛ ŋwaà-fìtom ànɛ à ghɛngà ɓi kìtwìɗ à kpaaghà nyi.

³⁶Nnyɛɛ kpaŋzìghày ɓɔn ɓɛ Isirayɛl a Egiɓtɛn di a kìki ɓɛ̀koŋnyoo ɓɛ ɓiɓan rì dàm yi ɓiɓan à tumɛ̀n a Egiɓtɛn à kpaŋ ɓi rìɓày à m̀ɓàŋ rì ɓi reɓ bèg mɛ̀tin mɛɓɛɛ̀.

³⁷Lɔŋ Moyis ànɛ̀n yɛɛ kpaaghà ɓɔn ɓɛ Isirayɛl lɛ: Bɛ̀ll à romiì gɛ ŋwaàdɛŋ ànɛ ɓi boo yìn i ɓum, lɛ a ɓa ǹkpaŋzì-ɓìɓan fɛlɛ yɛ̀ɛ mɛ̀.

³⁸Yɛ̀ɛ kìlɔ̀ŋ ki taŋzɛ̀ngà ɓi-reɓ, Moyis yɛɛ ɓaghà ɓi nyìinyìm ànɛ lɛ, rì ɓɛ̀seŋi ɓis rì ŋwaà-fìtom anɛ à tòtòkà ɗì nyi ɓi dòn ì Sinayi. Nnyɛɛ ghaɓkà jɛ̀ɛ̀ yi Bɛ̀ll yi yi ri cem lɛ a ghagsi mìni yɔ.

³⁹Kìɓan kifog ɓɛ̀seŋi ɓis ɓɛ nɔɔ̀tìghà ɓi deɓ yii, ɓɛ ɓengà yɔ, ɓɛ kɔǹ lɛ, di ɓaa sugtii a Egiɓtɛn:

⁴⁰Lɛ ɓɛ kpaaghà Arɔn lɛ: Syagha ɓìsi bɛ̀ll yi yɛɛ syogi ɓìsi bee ɓisuulɛ, ɓìsii yii ɓi com ki ki ǹkìi Moyis ànɛ àa ǹkpaŋzii yì ɓìsi a Egiɓtɛn.

⁴¹Nni ɓɛ syakà min man à sanìnya ɓi cààmɛ̀n kiǹ ɓɛ funɛ̀n ɓìtuwe ɓi rìɓɔgsì ɗi kìfèèghrɛnà kiǹ, ɓɛ ki nyààrɛn lɛɛ̀gwey ri com ki ɓɔmiɗ ɓɔ yɛɛ syakà rì ɓyàg ɓyaa.

⁴²Fɔɔnnɛ Bɛ̀ll à lɔ̀ghìghà ɓɔ jɛ̀m, à càɗ ɓɔ lɛ, ɓɛɛ ɓɔɔ̀ɓɔ̀gsì tyɔɛy ti aɗyoo, fɛlɛ yɛ̀ɛ ɓɛ̀kpaŋzì-ɓìɓan ɓɛ kangà lɛ: Mìni ɓɔn ɓɛ Isirayɛl, ɓi bèg mɛ̀tin mɛɓɛɛ̀ yi ɓì kɔ̀rìghà ɓi-reɓ, mɛ̀ɛnɛ ɓì ɓɔɔ̀ɓɔ̀gsìghà nya lɛ rì ɓìtuwe rì ìkum?

⁴³Èe èe kìcùmà ki bɛ̀ll ìnɛ lɛ Mɔlɔg rì kìfèèghrɛnà ki fyɛy fi bɛ̀ll yìn ìnɛ lɛ Refan ɓyɛɛ̀ɓi ɓì tɛ̀kà, ɓì syag ɓìnùn ɓiǹ lɛ ɓyɛɛ̀ɓi ɓi ɓɔɔ̀ɓɔ̀gsì; kìɓan kiǹ kɛɛ̀ki ǹɗì mìni ɓiì kɛ̀ɛ ki naŋì fìràɓ, Baɓilon à rɔ̀ɓ fɛ ajɛ̀m.

⁴⁴Ɓɛ̀seŋi ɓis ɓɛ ɓaghà rì kìcùmà ki ki ɓaghà kìrèmzɛnà ki lɛ, Bɛ̀ll à rì ɓi nyìinyìm wàà. Bɛ̀ll ànɛ à tòtòkà rì Moyis à kpaaghà nyi lɛ ɓɛǹ ɓɛ ghɛɛ̀sɛɛ kì toŋì kìcùmà lɔŋ yɛ̀ɛ rìkuu ɗi nyii resìghà ànɛn.

⁴⁵Ajɛ̀m ìnɛn, ɓɛ̀seŋi ɓis ɓɛ ɓɛ rɔɓkà rì kìcùmà kiǹ ɓɛ tekà kɔ, ɓɛ ɗiŋì rì kɔ ɓi zi ìnɛ ɓɛ ɓatɛ̀ngà rì ɓìlɔ̀ŋ ɓi Bɛ̀ll à sansàngà ɗi ɓɔɔ tiì yɛ̀ɛ Yooswa à kɛ̀ɛ̀kɛ̀ɛ̀sìghà ɓɔ; kìcùmà kiǹ ki kɔrìghà wɔɔ à kpaŋ ɓi cààmɛ̀n ki Davit à ɓɔkà rìfòm.

⁴⁶Davit ànɛ̀n yɛɛ ghɛngà lɛ Bɛ̀ll à keesii nyi fɔɔnnɛ à tɔkà Bɛ̀ll à Yakɔɓ ìtèɗ wulɛ nyi Davit nyii toŋ̀ ànɛ̀n mɛɛ.

⁴⁷Kìɓan kifog, Salomɔŋ yɛɛ togà Bɛ̀ll mɛɛ.

⁴⁸Wɔ̀lɛ Bɛ̀ll ànɛ à teŋmɛɛ à cee, a maà kɔ̀ri ɓi kɔmiɗ ɓi mɛɛ mɛ ɓum ɓɛɛ toŋi.

⁴⁹Ɓisuulɛ Kan a kpaaghi lɛ, ɗyoo ɗyɛɛ ri ìkɔ̀ɔ̀ wɛm̀ wu rilàmì, ziì ɓa jàŋ i rìrɛsàg ɗyɛm̀ ɗi mɛkòò, nni rìkuu ɗi mɛɛ aɗi ɗyɛɛ̀ɗi ɓì rì mɛ̀ ɓiì toŋì? Nsoò lɛ rìkuu ɗì jàŋ ɗi la ɗyɛɛ̀ɗi mɛ̀ ǹɗì lɛ ǹfɔɔsàg wɔɔ?

⁵⁰Àa mɛ̀ɛmiɗ yɛɛ kìghà ɓyom ɓiǹ ɓìcèm?

⁵¹Mìni ɓum ɓɛ ǹtoòtèɗ ɓɛ ɓì rì lɛ, mìni kɛ̀ɛ̀ mɛ̀rem, mìni rì ɓɛ̀lɔg, fɔɔnnɛ ɓi ɗùùɗuu cààmɛ̀n kìcèm ɗì Kìtɛntɛ̀ɛ̀n ki Nghay, ɓì rì lɔŋ yɛ̀ɛ ɓɛ̀seŋi ɓin ɓɛ ɓɛsɛ̀ɛ̀mɛn.

⁵²Ǹkpaŋzì-ɓìɓan abe nnɛ ɓɛ̀seŋi ɓin ɓɛ rɔɓkà lɛ ɓɛ tɔɓi ɓì? Ɓɛ cuusìghà kɔm̀ ɓɛ̀roɓɛ ɓɛ woòwògsìghà ɓum rìyù ɗi m̀bobog à mum ànɛ à rì lɛ saaɗ. Nni ɓigomìnɛ, ŋwaàncèm ànɛn innɛ ɓì mɛ kì lɛ, ɓì tɔ̀kɛ̀n, ɓi ki wey.

⁵³Mìni ɓɛ ɓi ghàɓkà ɓìdɔ̀gsɛna ɓi Bɛ̀ll ɓi ɓyàg ɓi ɓum ɓɛ titom kɛ̀ ɓi ki ɓèŋ ɓyɔ.

⁵⁴Yɛ̀ɛ ɓumɓɛ ɓi Sànèdìrɛŋ ɓɛ wokà ɓìtòkì ɓi Ityɛn ɓiǹ bim i naasàg ɓɔ, ɓɛ tum rìŋààŋààdì ɗi min lɛ bim inɛ ɓɛ wokà rì Ityɛn.

⁵⁵Wɔ̀lɛ Ityɛn à ɓaghà ǹɗonɛn ɗi Kìtɛntɛ̀ɛ̀n ki Nghay, nni yɛ̀ɛ à pɛɓsɛ̀ngà aɗyoo, à ghɛn kìtɛɛtɛn ki rigwey ɗi Bɛ̀ll rì Yeesus ǹɗɛrɛliyɛn ɓi weèlem à Bɛ̀ll,

⁵⁶fɔɔnnɛ a kalìghà lɛ: Ɓì ghɛɛ! Mɛ̀ɛ ntaataa ɗyoo ɗì nɛmɓɛn, Man à Mum à rɛrɛ̀lì ɓi weèlem à Bɛ̀ll.

⁵⁷Fɔɔnnɛ ɓɔɔ̀cèm ɓɛ kuùghà jɛ̀ɛ̀ aɗyoo, ɓɛ simgì ɓyàg ɓi mɛ̀reè, ɓɛ suùrɛ̀n Ityɛn ɓi nyoo.

⁵⁸Ɓɛ kɛǹ ɗì nyi fìràɓ ɗi bàn, ɓɛ tumɛ̀n nyi rìrogì ɗi gɔ̀g lɛ ɓɛɛ wey nyi. Ɓɛ̀wusìnɛ̀ɗ ɓɛ ɓi kìɓan kiǹ ɓɛ reɓsɛ̀ngà ɓìlàà ɓyaa ri dɛlìì mum ìdɛŋ ɗii lɛ Sol.

⁵⁹Ɓi cààmɛ̀n ki ɓɛ roòrògàkà Ityɛn gɔ̀g mii, nyii ɓɔɔ̀ɓɔ̀ŋzàkà lɛ: Kan Yeesus, tera nghay wɛ̀m.

⁶⁰Fɔɔnnɛ à kpìghà ɓi zi rì mɛ̀ɗu, à nyam jɛ̀ɛ̀ aɗyoo lɛ, Kan, cenɛn ɓɔ kìɓe ki! Yɛɛ̀ à kpaaghà fɔlɔɔ, nni à maasìghà.