Read Bafia MƐ̀KÌKÌÌ MƐ ƁƐKƐ̀NÌ-FÌTOM 8 Bible Online

MƐ̀KÌKÌÌ MƐ ƁƐKƐ̀NÌ-FÌTOM 8 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 8

¹Sol à ghɛngà lɛ rìwey di ɓɛ wolà Ityɛn ɗi ɓaghà syeesyee à kìɓan. Ŋwos àǹcèm ànɛn, wɛ̀y wu pɛsɛ̀ngày ɓisuu kiseŋi ki ki ɓaghà a Yorisalɛm, fɔɔnnɛ ɓɛ̀gherɛ̀n ɓɛ̀cèm ɓɛ saàtɛ̀ngà ɓi ɓɔɔ bàn ɓɛ a Zyude, rì ɓɛ a Samari, lɔŋ ɓɛ̀kɛ̀nì-fìtom cɛ̀ncaa ɓɛɛ rɔɓkà a Yorisalɛm.

²Ɓumɓɛ ɓɛ ɓaghà ɓɛ̀falɛn ɓi rìgherɛ̀n ɓɛ ɓomgà Ityɛn, ɓɛ ki rèn nyi lɛɛ̀gwey.

³Wɔ̀lɛ, ɓi ɓɛg ànɛ yɛ̀ɛ Sol nyii kɛnkɛ̀ngà lɔŋ asu à tɔtɔ̀ɓ ɓɛ̀gherɛ̀n; à ɗiɗìŋìghà ɓi ɓɛ̀naa, di a Kpaakpàŋzìì lɛ, rì ɓɛ̀yiɓ ɗì ɓɛ̀baŋì ɓi-tèɗ à ki foŋfoŋ ɓɔ ɓi naà-zày.

⁴Ɓɛ̀gherɛ̀n ɓɛ ɓɛ Saàtɛ̀ngà ɓɛǹ, ɓɛ Kɛɛ̀kɛ̀ɛ̀ghà jàŋ lɛ jàŋ di ɓɛɛ̀ ghaaghagsì ɓum Syeesyee à Ɓɔlɛ.

⁵Fɔɔnnɛ Filiɓ à Sɛngà ɓi bàn ìdɛŋ ìnɛ a Samari à kakàlì ɓumɓɛ wɔɔ kiɓan ki ǹghɛɓsì ɓum.

⁶Ɓìtuu ɓi ɓum lɔŋ ǹɗem wùfog, ɓi siìrɛ̀ngà ɓi rìwog ɗi ɓiɓan ɓi Filiɓ à Kpaakpààghà, ɓisuulɛ ɓɛ wowòkà, ɓɛ Ki seesee dàm yi ɓiɓan yi à kìkìghà.

⁷Ɓi Saaɗ ɓìɓeɓtàg ɓi mɛghay lɛɛ̀gwey ɓi Kpaŋkpàŋgà ɓi ɓumɓɛ ɓi ɓaghà miì di ɓyɛɛ̀ Syaasyaàdɛ̀n jɛ̀ɛ̀ aɗyoo, ɓìsɛkɛ̀rɛ̀ lɛɛ̀gwey, rì ɓɛ̀lɛnlɛm ɓɛ wɔngàkà.

⁸Fɔɔnnɛ ɓumɓɛ ɓi bàn ìnɛn ɓɛ nyaàrɛ̀ngà lɛɛ̀gwey.

⁹Ŋwaàdɛŋ lɛ Simɔn à ɓaghà ɓi bàn ìnɛn abɛ̀y, à ɓaghà ǹkìì-majìg; à kìkì ɓìɓan ɓi lɛ ɓumɓɛ a Samari ɓɛɛ Kuukùùràg, à ki yèeghyegsì ɓum lɛ nyii ri kìtèetèɗ ki mum.

¹⁰Fɔɔnnɛ ɓum ɓɛ̀cèm ɓɛ Kuuràkà ɗì nyi, à tumɛ̀n ɓi ɓɔɓti ɓɛsàg à Kpaŋ ɓi ɓɛ̀sɛ̀ɛ̀mɛn di ɓɛɛ̀ kpaakpaa lɛ: Roànɛ yɛɛ ri ìtèɗ wu Bɛ̀ll wu ɓɛɛ̀ regi lɛ, ìtèɗ wugwey.

¹¹Ɓɛ kuuràkà fɔlɔɔ ri nyi lɛ, ki ɓaghà di kaa finɛn yɛ̀ɛ ɓìɓan ɓii ɓi majìg ɓi keèghkègsìghà ɓum.

¹²Wɔ̀lɛ, yɛ̀ɛ ɓum ɓɛ gherɛ̀ngà Syeesyee à Ɓɔlɛ ànɛ Filiɓ à kpaakpààghà ɓɔ, Syeesyee à Ɓɔlɛ à kìlɔ̀ŋ ki Bɛ̀ll, rì à ɗii ɗi Yeesus Kiris, fɔɔnnɛ ɓum ɓɛ ɓaɓtàkà lɛ, rì ɓɛ̀yiɓ, rì ɓɛ̀baŋì.

¹³Ǹsoò Simɔn nyimiɗ, à gherɛ̀ngà girig, à ki ɓàɓtɛn, à nɔ̀ɔ̀nɔ̀ɔ̀tìghà Filiɓ, à kuùkùùghràg dàm ɗì ɓɛ̀koŋnyoo ɓɛ ɓiɓan ɓɛ à seesèèghà di roànɛ̀n a kìkì.

¹⁴Yɛ̀ɛ ɓɛ̀kɛ̀nì-fìtom ɓɛ ɓɛ rɔɓkày a Yorisalɛm, ɓɛ wokà lɛ ɓum ɓɛ a Samari ɓɛ ghaɓi jɛ̀ɛ̀ ì Bɛ̀ll lɛ syeesyee, nni ɓɛ romgà lɛ rì Pyɛɛri rì Zyaŋ wɔɔ.

¹⁵Yɛ̀ɛ ɓɛ̀roɓɛ̀n ɓɛ kpagà a Samari, ɓɛ ɓɔŋzàkà ɓisuu ɓɛgherɛ̀n ɓɛ wɔɔ, lɛ Bɛ̀ll a fa ɓɔ Kìtɛntɛ̀ɛ̀n ki Nghay.

¹⁶Ɓisuulɛ, Kìtɛntɛ̀ɛ̀n ki Nghày ki ɓaghà di ki ka sɛn yi ɓi nsoò ɓi kìbog ki ɓi ɓɔ; ɓɛ ɓaghà lɔŋ yɛɛri di ɓɛ ti ɓɛ̀ɓàɓtakɛn ɓi ɗii ɗi Kan Yeesus.

¹⁷Fɔɔnnɛ ɓɛ̀-Pyɛɛri ɓɛɛ̀ Zyaŋ ɓɛ tumɛ̀ngà ɓɔ rìsasààgh ɗi ɓyàg ɓi nyoo, ɓɛ teɗ min Kitɛntɛ̀ɛ̀n ki Nghày.

¹⁸Nni yɛ̀ɛ Simɔn à ghɛngà lɛ ɓɛ̀kɛ̀nì-fìtom ɓɛ ti lɛ i ɓɛ saghii mum ɓyàg ɓi nyoo, à ɓa rì Kìtɛntɛ̀ɛ̀n ki Nghày, fɔɔnnɛ à sɔ̀ŋìghà mɔ̀ɔ̀ni lɛ a fa ɓɔ.

¹⁹Rì jɛ̀ɛ̀ a nwɔm lɛ: Faana mɛ̀ girig ìtèɗ wulɛ, ŋwaànɛ ǹsaghii ɓyàg ɓi nyoo, à ɓa rì Kìtɛntɛ̀ɛ̀n ki Nghày.

²⁰Nni Pyɛɛri à ɓàkà nyi lɛ: Kɔ̀ɔ̀ ɓa gi la rì mɔ̀ɔ̀ni mɔɔ mɛncèm, yɛ̀ɛ ù fèegh lɛ ù rì lɛ ù làg rìfa ɗi Bɛ̀ll rì mɔ̀ɔ̀ni,

²¹lɛ ù yin gi rì gàɓ nsoò rì ìkɔ̀ɔ̀ ɓi kìsay ki, lɛ nɗem wɔɔ wu yin lɛ saaɗ ɓi mis mɛ Bɛ̀ll.

²²Koɓsɛn fèg à m̀ɓeɓtɛn anɛ ùrì ànɛn ɗì nyi, ù ki ɓɔ̀ŋzi Bɛ̀ll lɛ, a cenɛn wɔ̀ kìɓan ki ù mɛɛ̀ fèg kiǹ di à kɔ̀ni.

²³Ɓìɓeɓtàg ɓi mɛyitì ɓi roni wɔ̀ ǹɗem lɛ pisa, kìɓe ki ki ghaasii wɔ̀ ǹkpàn.

²⁴Nni Simɔn à ɓàkà ɓɔ lɛ: mìniìɓɔmiɗ ɓɔ̀ŋzaghna Bɛ̀ll ɓisu wɛ̀m lɛ, ɓìɓan ɓi ɓì kalii ɓìn ɓyɛ̀ kɛɛ̀ kpaŋ a lɔ̀ŋkɛm̀.

²⁵Yɛ̀ɛ ɓɛ̀-Pyɛɛri ɓɛɛ̀ Zyaŋ ɓɛ ɓaghà di ɓaa rèsag ɓum ɓìɓan ɓi ɓɔɔ yighà, ɓi rarɛ̀n rì Yeesus, ɓɛ ki kali ti ɓɔ Syeesyee à Ɓɔlɛ à Kan, fɔɔnnɛ ɓɛ Sugtìghà a Yorisalɛm di ɓɛɛ̀ kakali ɓumɓɛ ɓi ɓìlɔ̀ŋ ɓi a Samari Syeesyee à Ɓɔlɛ.

²⁶Ŋwaàfìtom a Kan à kpaaghà Filiɓ lɛ: Pɛ̀sɛn aɗyoo, u nɔɔ̀ti bee inɛ ì pɛ̀sɛɛ yì a Yorisalɛm ì sɛn a Gaza, ɓum ɓɛ ti ɓɛ̀ kɛɛ̀ fyee ti ɓi bee incèm.

²⁷Nni Filiɓ à pɛ̀sɛ̀ngà, à ghàs kì kɛ̀ɛ, nni à pìkà mis, à ghɛn ŋwaàdɛŋ nyi asu, ŋwaànɛ̀n à ɓaghà ŋwɛg, nyi tì coo ǹsasàlì à Kaŋɗas giɓ anɛ à ɓaghà rìfòm a Etyopii, nyi tì baŋ-masà à giɓ anɛ̀n. A ɓaghày kìɓɔgsii Bɛ̀ll a Yorisalɛm.

²⁸Ŋwaànɛ̀n yɛɛ susùkà ǹkɔ̀kɔriyɛn ɓi calig di a ɓàɓay kaàtà à ǹkpaŋzì-ɓìɓan Ezayii.

²⁹Fɔɔnnɛ Kìtɛntɛ̀ɛ̀n ki Nghay ki kalìghà Filiɓ lɛ: Pìgha mɛ̀kòò, ù tanɛn calig kinii.

³⁰Nni Filiɓ à Cɛ̀ɓtìghà mɛ̀ree, à tanɛ̀n calig kìn, à wog min yɛ̀ɛ muu Etyopii ànɛ̀n à ɓàɓàlà kaàtà à ǹkpaŋzì-ɓìɓan Ezayii. Filiɓ à tɔg nyi lɛ: Tɛɛnɛ, u wowog nya com ki u ɓàɓay kiǹ?

³¹Nni ŋwaànɛ̀n à pɛ̀ɛ̀zìghà Filiɓ lɛ: Lannɛ ǹɗì lɛ ǹwog com ki mɓàɓày di ɓɛ tɛɛ̀zii ɓi mɛ kɔ? Nni à kpaaghà Filiɓ lɛ a ɓɔg yì ɓi calig, a kɔri nyi ɓi nwɔŋì.

³²Kìden ki à ɓàɓàlà ɓi kaàtà ànɛn ki ɓaghà lɛ: À rɔ̀ɓkà lɔŋ yɛ̀ɛ kìtuwe ki ɓɛɛ kɛ̀nkɛn ɗi kɔ lɛ ɓɛɛ gheg̀ ɓoŋ, à ki maarag lɔŋ yɛ̀ɛ man à jɔ̀ɔ̀ ànɛ ɓɛɛ̀ caacaa nyùŋ. Fɔɔnnɛ à rɔ̀ɓkà fɔlɔɔ, kɛ̀ɛ pini nsoò ŋwɔ̀m.

³³Ɓɛ sootìghà nyi, ɓɛ ki ǹyuŋzag nyi, kɛ̀ɛ̀ ŋwaànɛ lɛ à lòèy kìɓan kii; ɓɛ̀ghɛn ɓɛɛ ri ɓùŋ lɛ à càri boo ì mum, yɛ̀ɛ cɛɓ kii ki ti kìtììsiyɛn ɓi ziinɛ?

³⁴Fɔɔnnɛ ŋwaànɛ̀n à tɔkà Filiɓ lɛ: Kùrùg, kali ɓà mɛ, ɓìɓan ɓi ǹkpaŋzì-ɓìɓan a kpaa ɓìn ɓi seesee ghɛn, nyimiɗ gìn ŋwaàdɛŋ?

³⁵Nni Filiɓ à pɛ̀sìghày min kitòkì ɓi jàŋ inɛ ŋwaànɛ̀n à ɓàlà, à kpaŋ yɛ̀ɛ à konàkà nyi kìtɛɛ̀zii Syeesyee à Ɓɔlɛ à Yeesus.

³⁶Yɛ̀ɛ ɓɛ kɛɛdìghà tì beèbɛ̀y, nni ɓɛ kpagà ɓi kìràà, ŋwaànɛ̀n à tɔg Filiɓ lɛ: Mɛ̀nig mɛɛ̀mɛ, cɛ kɛɛ regtii lɛ kɔ̀ɔ ɓàɓti mɛ?

³⁷Filiɓ à ɓàg nyi lɛ: I ù gherɛɛ rì ǹɗem wɔɔ wucèm ǹɗi lɛ m̀ɓàɓtì wɔ̀; ŋwaànɛ̀n à ɓàg nyi lɛ: Ɛ̀ɛ̀, ǹgherɛɛ lɛ Yeesus Kiris à rì Man à Bɛ̀ll.

³⁸Nni ŋwaànɛ̀n à tɔkà m̀pusì calig lɛ a rɛli. Ɓɛ sɛn min ɓɛɛ̀ Filiɓ, ɓɛ ɗiŋì ɓi kìràà, Filiɓ à ɓàɓtì min nyi.

³⁹Yɛ̀ɛ ɓɛ kpagày a cɛɗ, Nghay à Bɛ̀ll à tɛ̀g Filiɓ à kɛ̀n ɗi nyi, ŋwaànɛ̀n kɛ̀ɛ ghɛɛ̀di nyi; nsoò fɔlɔɔ, muu Etyopii ànɛ̀n à ghagsìghà rìkɛ̀ɛ̀ ɗii di a nyàànyàà.

⁴⁰Filiɓ à sìgmɛ̀ngà di à ti a Azɔt, à pɛ̀sɛ̀n wɔɔ, à kɛ̀n a Sezare, à kakàlì ɓum Ɓɔlɛ à Bɛ̀ll, ɓi bàn yìcèm yi à ghaghìghà ɓi bee.