Read Bafia MƐ̀KÌKÌÌ MƐ ƁƐKƐ̀NÌ-FÌTOM 9 Bible Online

MƐ̀KÌKÌÌ MƐ ƁƐKƐ̀NÌ-FÌTOM 9 - Bafia bible

MƐ̀KÌKÌÌ MƐ ƁƐKƐ̀NÌ-FÌTOM 9

¹Yɛ̀ɛ sol à ɓaghà di à kaka rì coo ǹɗem wu rìgɛn wulɛ, a cuùcùùsì ɓɛ̀gherɛ̀n ɓɛ Kan, nni à kɛ̀ngà kì ghɛɛ̀ ǹkɔ̀mɛ̀n ɓɛ̀pìrɛɛtìrɛ̀ àgwey,

²à tɔg nyi ɓɛ̀kaàtà ɓɛ ɓɛ faa nyi Ìtèɗ wulɛ, a kɛǹ a Damas, i à tanɛɛ ɓum ɓi naa yi bɔ̀ŋzɛ̀n, nsoò, ɓɛ̀yiɓ nsoò ɓɛ̀baŋì ɓɛ ɓɛɛ̀ nɔ̀ɔnɔɔ̀tì bee i Kan, a ɓangiì ɓɔ a ki sug yi rì ɓɔ a Yorisalɛm ɓɛ̀kàgakɛn.

³Yɛ̀ɛ à kɛ̀nkɛni a Damas, di à ti ɓiì wuuwuɓsɛ̀n bàn, nni à sìgmɛ̀ngà di kìtɛɛtɛn ki mɛ làn yi ɗyoo lɛ ŋwààɗ, ki ceŋzɛ̀n nyi.

⁴Fɔɔnnɛ à kpìghà ɓi zi à wog di jɛ̀ɛ̀ yɛ̀ɛ kpaakpaa nyi lɛ: Sol, Sol wɔ̀, ɓisuucɛ nnɛ u tɔtɔɓ mɛ fɛlɛ̀?

⁵Sol à tɔg lɛ: Kan, wɔ̀ ghɛn wɔ̀ yɛɛ ri? Jɛ̀ɛ̀ ì pɛ̀ɛ̀zì nyi lɛ: Mɛ̀ yɛɛ ri Yeesus ànɛ u tɔtɔ̀ɓ ki ri wɔ̀ ɓiì ɓaà ǹtɔɓ lɛ u ki ti ǹtoòtèɗ di mɛ̀kɔ̀ŋ mɛɛ̀ roorogì wɔ̀. Nni Sol à risìghà, à tumɛ̀n rìnììghnìŋdɛ̀n à kpaa lɛ: Kan nni wɔ̀ɔ kɔ̀ngi lɛ nki la? Kan à ɓàg min nyi lɛ:

⁶Pɛ̀sɛn aɗyoo, u ɗiŋi ɓi bàn, wɔɔnnɛ ɓɛ ri wɔ̀ ɓiì kpaà com ki ù ghɛ̀ɛ̀sɛɛ kì kìi.

⁷Ɓumɓɛ Sol à kɛ̀ɛ̀kɛ̀ɛ̀ghà ǹɗaŋ ri ɓɔ, ɓɛ rɛlìghà, ìris wu mamzì ɓɔ, ɓisuulɛ, ɓɛ wowɔkà jɛ̀ɛ̀ yɔ̀ ri yɔ̀, ɓɛ̀ kɛɛ̀ ghɛn ŋwaànɛ à tòtòkà.

⁸Nni Sol à pɛ̀sɛ̀ngà aɗyoo, wɔ̀lɛ kɛ̀ɛ ghɛnɛnti nsoò yɛ̀ɛ mis mii mɛ ɓaghà mɛ̀ ŋwàrɛn. Fɔɔnnɛ ɓɛ ɓangà nyi ɓi càg, ɓɛ kɛɛ̀sì nyi à kpaŋ a Damas.

⁹À kɔ̀rì mɛ̀ru mɛraa, kɛ̀ɛ ghɛnɛn, kɛ̀ɛ ɗi, kɛ̀ɛ nɔ.

¹⁰Ǹgherɛ̀n àdɛŋ ɗii lɛ Ananyas à ɓaghà a Damas, nyi nnɛ Kan à reŋìghà fɛlɛ yɛ̀ɛ ɓìdɛ̀ndɛm à kpaa nyi lɛ: Ananyas wɔ̀! Roànɛ̀n à ɓàg nyi lɛ: Kan, mɛ̀ɛnɛ lɛ.

¹¹Kan à kpaa tì nyi lɛ: Pɛ̀sɛn aɗyoo, u kɛǹ ɓi bee ì mɛ̀rɛy, u kpaŋ a mɛɛ mɛ Zyudas, u tɔg ŋwaàdɛŋ wɔɔ lɛ Sol, ànɛ à yalɛ̀ngà a Tarisi àncèm a kìki bɔ̀ŋzɛ̀n ɓigomìnɛ;

¹²nni ɓi bɔŋ̀zɛ̀n ìnɛn, ki kiì yì nyi fɛlɛ yɛ̀ɛ ɓìdɛ̀ndɛm lɛ à ghɛɛ yì mum ɗii lɛ Ananyas di à ɗiŋii yì ɓi naa yìì, à ki saagh nyi ɓyàg ɓi nyoo lɛ di a ghɛnɛn tì.

¹³Ananyas à ɓàg lɛ: Kan, m̀mɛ wog di ɓum lɛɛ̀gwey ɓɛɛ sɛsɛg rigɛn ɗi ŋwaànɛ̀n àa nkìi ɓɛ̀gherɛ̀n ɓɛ a Yorisalɛm.

¹⁴Nni ɓi ɗi à rì ɗi fɛ, ɓɛ̀pìrɛɛtìrɛ̀ ɓɛgwey ɓɛ nfaa nyi ìtèɗ wulɛ a ɓangi ɓum ɓɛ̀cèm ɓɛ ɓɛɛ̀ rereŋi ɗii ɗyɔɔ, à ki fogi ɓɔ ɓi ɓìsɔŋ.

¹⁵Nsoò fɔlɔɔ, Kan à kpaatìghà Ananyas lɛ: Kɛ̀na lɔŋ ɓisuulɛ, Sol à rì mɛ̀ fɛlɛ yɛ̀ɛ com ki kisay ki ǹsɔnɛɛ. À rì ɓiì rèresii ɗii ɗyɛ̀m ɓi ɓìlɔ̀ŋ ɓi ɓɛ yii ɓi mɛ wɔɔ, rì a mɛ̀fòm, rì ɓi nyìinyìm à ɓɔn ɓɛ Isirayɛl.

¹⁶Mɛ̀ɛmiɗ ǹɗì nyi ɓiì rèsii mɛtɔɓ mɛ̀cèm mɛ à ɓiì woògh ɓisu wɛ̀m.

¹⁷Fɔɔnnɛ Ananyas à kɛ̀ngà min wɔɔ; nni yɛɛ̀ à ɗiŋìghà ɓi naa ìnɛ Sol à ɓaghà miì, à saagh nyi ɓyàg ɓi nyoo a ki kpaa nyi lɛ: Geni wɛ̀m Sol, Kan Yeesus ànɛ àa ǹɗèsɛɛ yì wɔ̀ ɓi bee di u yùyuiy fɛ, yɛɛ romiì mɛ̀ a lɔ̀ŋkɔɔ, lɛ mɛ̀ nsaagh wɔ̀ ɓyàg ɓi nyoo di wɔ̀ɔ ghɛnɛn tì, ù ki ɓa nɗonɛn ɗi Kìtɛntɛ̀ɛ̀n ki Nghay.

¹⁸Lɔŋ ɓi gom yɔ̀miɗ inɛ̀n, ɓyom ɓidɛŋ fɛlɛ yɛ̀ɛ ɓìɓaaɓaa ɓi ɓìzɛn ɓi ɓaaghrɛ̀ngày ɓi mis mɛ Sol, ɓi kpi ɓi zi, à ghɛnɛ̀n tì min, fɔɔnnɛ à pɛ̀sɛ̀ngà aɗyoo, ɓɛ ɓaɓtì nyi.

¹⁹Yɛ̀ɛ à ɗighà ɓìɗilàg, ìtèɗ wu yutì nyi ɓi nyoo. À kɔ̀rìghà tì gàɓ ì mɛ̀ru rì ɓɛ̀gherɛ̀n ɓɛ a Damas.

²⁰Nni à ghagsɛ̀ngà lɔŋ wɔɔ foo ɗi rìkakàlì ɗi ɓum ɗii ɗi Yeesus ɓi naa yi bɔ̀ŋzɛ̀n, à lààlàmɓɛ̀n lɛ: Yeesus à rì Man à Bɛ̀ll.

²¹Ɓum ɓɛ̀cèm ɓɛ ɓɛ wowòkà di a kpaakpaa fɔlɔɔ, ɓɛ Kuuràkà, ɓɛ tɔtɔ̀g lɛ: Àa ŋwaànɛ yɛɛ ǹ-yeèyèèsì ɓum ɓɛ̀cèm ɓɛ ɓɛɛ kpɔŋkpɔŋ ɗii ɗi Yeesus a Yorisalɛm? Àncèm aà n-yuyuu yì ɓi fɛ rì fèg ànɛ lɛ, a ɓangi bɔ, a fogi ɓɔ ɓi ɓìsɔŋ, di a kɛǹ ɗì ɓɔ a ɓɛ̀pìrɛɛtìrɛ̀ ɓɛgwey?

²²Kìɓan kifog Sol à kɛ̀nkɛ̀ngà lɔŋ asu, à ki sìisiìrɛ̀n ɓi rìrèrèsì ɗi ɓum lɛ ɓɛɛ yi saaɗ lɛ Yeesus à rì lɔŋ Kiris; Ɓɛ̀yudɛ̀n ɓɛ a Damas ɓɛ rɔɓkà kɛ̀ɛ̀ kìɓan ki ɓɛ ri lɛ ɓɛ pɛ̀ɛ̀zì Sol.

²³Yɛ̀ɛ gàɓ ì mɛ̀ru ì ghaghìghà tì foo, Ɓɛ̀yudɛ̀n ɓɛ wɔrɛ̀n lɛ ɓɔɔ wey Sol.

²⁴Kìɓan kifog, Sol à yighà kìtɔ̀kɔ̀ kaa ɓisuulɛ ɓɛ ramgàkà nyi a mɛ̀suunaa mɛ bàn lɛ ɓɛɛ wey nyi, ɓɛ beŋ̀ mɔ lɛ rì ìru rì ŋwos.

²⁵Nni ɓɛ̀yilàg ɓii ɓɛ tekà nyi ɓi-ru wudɛŋ, ɓɛ kaŋ̀ nyi ɓi kìkpoŋ, ɓɛ ɓɔg gari ɗi nyi lɛ ɓɛɛ sɛɛ̀di nyi rì ǹɗig ɓɛg àmbog.

²⁶Yɛ̀ɛ Sol à kpagà a Yorisalɛm, nni à kaaghà bee ìnɛ a rarɛn ɗì ɓɛ̀gherɛ̀n ɓɛ wɔ̀ɔ̀, kìɓan kifog ɓɛ̀roɓɛ̀n ɓɛ̀sɛ̀ɛ̀ ɓɛ̀cèm ɓɛ rirìsìghà nyi, lɛ ɓɛ ɓiisɛ̀ngà ɓi kigherɛɛ lɛ à ti ǹ-yilàg.

²⁷Fɔɔnnɛ Ɓarinaɓas à tekà Sol à kɛ̀n ɗì nyi a ɓɛ̀kɛ̀nì-fìtom, à kpaa ɓɔ yɛ̀ɛ Sol à ghɛngà Kan ɓi bee ìnɛ a Damas rì yɛ̀ɛ Kan à tòòghrɛ̀ngà ɗì nyi, nni à kpaatìghà ɓɔ rìkuu ɗi ǹtyweeyi ɗi Sol àa ǹɗì rì ɗyɔ a Damas di a kakali ɓum ɗii ɗi Yeesus.

²⁸À tumɛ̀n ɓi cààmɛ̀n kiǹ innɛ Sol à ɓasɛ̀ngà rì ɓɔ, ɓɛ kikì lɛ, ɓɛ ɓɔg, ɓɛ sɛn ǹɗaŋ di ɓɛɛ̀ rèresi ɓum ɗii ɗi Kan rì ǹtyweeyi ɓi nɗem.

²⁹Sol à kuùkùrɛ̀ngà ɗì Ɓɛ̀yudɛ̀n ɓɛ ɓɛ ǹtòkì rìgìrɛg, à ki nyoonyolɛ̀n ɗì ɓɔ, wɔ̀lɛ ɓɛ̀roɓɛ̀n ɓɔɔ kaakàà bee inɛ lɛ ɓɛɛ wey nyi.

³⁰Yɛ̀ɛ ɓɛ̀geni ɓɛ Sol ɓɛ righerɛn ɓɛ wokà fɔlɔɔ, fɔɔnnɛ ɓɛ kɛngà ɗì nyi a Sezare; yɛ̀ɛ ɓɛ kpagà wɔɔ, ɓɛ càɗ nyi lɛ a ghaàgh a Tarisi.

³¹Kìseŋi ki ɓaghà lɛ fyòoog, ɓi zi ì Zyude bimiɗ, a Galile rì a Samari; kìseŋi ki tetèkà ìtèɗ, ki kikì Kan mɛ̀wog, ki ki tèeghteghɛ̀n rì ǹghɛɓsɛn wu Kitɛntɛ̀ɛ̀n ki Nghay.

³²Pyɛɛri à rerènìghà kìlɔŋ kìcèm, nni nwos adɛŋ, à sɛngà a Lida lɛ a ghɛn ɓɛ̀gherɛ̀n ɓɛ ɓɛ ɓaghà wɔɔ.

³³Fɔɔnnɛ à tanɛ̀ngà ŋwaàdɛŋ wɔɔ ɗii lɛ Enee ǹnɔ̀nɔŋiyɛn ɓi kon. Ki ɓaghà di ki ti bèg taàraa yɛ̀ɛ ŋwaànɛ̀n à kpìghà ɓi zi, lɛ à ɓaghà ǹwɔ̀ɔ̀ghrɛn.

³⁴Nni Pyɛɛri à kpaaghà ŋwaànɛ̀n lɛ: Enee wɔ̀, Yeesus Kiris à wɔ̀ɔ̀zii wɔ̀, pɛ̀sɛn aɗyoo, u pegsɛn ɓyom ɓilɔ̀ŋ ɓyɔɔ. Fɔɔnnɛ ŋwaànɛ̀n à ghàskà kì pɛ̀sɛɛ aɗyoo.

³⁵Yɛ̀ɛ ɓum ɓɛ̀cèm ɓɛ a Lida, rì ɓɛ ɓi-reɓ wu lɛ Sarɔn ɓɛ ghɛngà ŋwaànɛ̀n, nni ɓɛ gherɛ̀ngà Kan.

³⁶Giɓ adɛŋ yɛɛ ɓaghà ǹgherɛ̀n a Zyope ɗii lɛ Taɓita yɛɛ lɔɔ lɛ Dorikas; à kìkìghà kìrɔɔ lɛɛ̀gwey à ki ghɛɛghɛɓsì ɓum ɓɛ nyìighnyìg.

³⁷Ɓi mɛ̀ru mɛ̀n, nni à roɓkà, à ki wu. Yɛ̀ɛ ɓɛ wuɓsìghà kìloŋ kii, ɓɛ kɛǹ kɔ kì nɔ̀ŋzii ɓi kìden ki naa ɓi mɛɛ mɛ aɗyoo.

³⁸Yɛ̀ɛ ɓɛ̀gherɛ̀n ɓɛ a Zyope ɓɛ wokà lɛ Pyɛɛri à rì a Lida, Lida ànɛn à ràɓsɛ̀ngà ɓi loò rì Zyope, nni ɓɛ romgà ɓum ɓɛɓɛɛ̀ lɛ ɓɛɛ kɛǹ kì kpaà Pyɛɛri lɛ: Kùrùg yuis̀ a lɔ̀ŋkis, kɔ̀ɔ̀ lɛ̀mziì.

³⁹Fɔɔnnɛ à pɛ̀sɛ̀ngà, à kɛ̀ɛ̀zɛ̀n ɗì ɓɔ. Yɛ̀ɛ à kpagà wɔɔ, ɓɛ ɓɔg ɗì nyi ɓi kìden ki naa ki ɓi mɛɛ aɗyoo, mɛ̀kpɔɓ mɛcèm mɛ tyoŋdɛ̀n nyi a nyoo di mɛɛ̀ rènɗèn ɓɛ rerèsì nyi lɛ, rì bùɓa rì ɓɛ̀kàɓà ɓɛ Dorikas à raràɗkà di à kaka cem.

⁴⁰Nni Pyɛɛri à kpaŋzìghà min ɓum ɓɛ̀cèm ɓidan, à ɓag mɛ̀ɗu ɓi zi, à ɓɔ̀ŋzàg Bɛ̀ll, ajɛ̀m ìnɛn à lɔ̀ɔ̀ghrɛ̀n min ɓi ɓɛg à kìloŋ à kpaa lɛ: Taɓita wɔ̀, pɛ̀sɛn aɗyoo! Nni à ŋwàɗkà min mis à ghɛn Pyɛɛri, à pɛ̀sɛ̀n kìkɔ̀ɔ̀kɔ̀ɔ̀.

⁴¹Pyɛɛri à ɓan nyi ɓi càg, à pɛ̀sì nyi mɛ̀rɛy. À regìì min lɛ, rì ɓɛ̀gherɛ̀n rì mɛ̀kpɔɓ, à rèsì ɓɔ nyi, ɓɛ ghɛn lɛ à ti cem.

⁴²Bàn ì Zyope bimiɗ ì wokà kìɓan kiǹ, ɓum lɛɛ̀gwey ɓɛ ki gherɛn Kan.

⁴³Pyɛɛri à finɛ̀ngà a Zyope lèg àdɛŋ, à kɔ̀kɔ̀rì yɛ̀ɛ ŋwaàdɛŋ lɛ Simɔn ànɛ à ɓaghà ǹkìì-gòò.