Read Bafia RÒMƐŊ 1 Bible Online

RÒMƐŊ 1 - Bafia bible

RÒMƐŊ 1

¹Pol, ǹkìì-kìsay a Yeesus Kiris, ànɛ Bɛ̀ll à reŋìghà lɛ a ɓa ǹkɛ̀nì-fìtom a Yeesus, à ki ɓa ti nɗɛsiyɛn dɛgà ɓi rìghagsì ɗi Syeesyee à Ɓɔlɛ à Bɛ̀ll.

²Bɛ̀ll à kàkà Syeesyee à Ɓɔlɛ ànɛ̀n abɛ̀y, ɓɛ̀kpaŋzì-ɓìɓan ɓɛ ki kàngà kìɓan kiǹ ɓi kaàtà à Bɛ̀ll.

³Syeesyee à Ɓɔlɛ ànɛ̀n à seesee Man wiì, ànɛ à yalɛ̀ngà mum ɓi boo ì ɓum ì Davit.

⁴Ɓi san ànɛ a Kìtɛntɛ̀ɛ̀n ki Nghay, ki ghɛnɛ̀n lɛ à rì Man à Bɛ̀ll, rì ìtèɗ, ɓi rìghèmɓɛ̀n ɗi à ghèmɓɛ̀ngày a ɓìloŋ.

⁵Ɓi Yeesus Kiris à Kan wìs nnɛ Bɛ̀ll à kìghà mɛ̀ geesɛ̀n ìnɛ lɛ mɓa ǹkɛ̀nì-fìtom ɓi rìkem ɗi Kiris lɛ nsyoŋ̀ yì ɓumɓɛ ɓi ɓìlɔ̀ŋ ɓìcèm lɛ ɓɛɛ gherɛn nyi, ɓɛ ki nyi mɛ̀wog.

⁶Ɓì rì girig ɓi bàlì ì ɓumɓɛ̀n, mìni ɓɛ Yeesus Kiris à reŋìghày;

⁷nni mìni ɓɛ̀sɛ̀ɛ̀ ɓɛ̀cèm ɓɛ Bɛ̀ll à keesii yɛ̀ɛ mɛ̀nɔ̀ɓɔ̀, ɓɛ bì rì a Rom, mìniì ɓɛ à reŋìghà lɛ ɓi ɓa ɓum ɓii, Bɛ̀ll à Seŋì wìs ɓɛɛ̀ Kan Yeesus, ɓɛɛ fa mìni lɛ rì geesɛ̀n rì fyòoog.

⁸Mɛ̀ ǹka faa Bɛ̀ll wɛ̀m ɓìtògsɛ̀n lɛ Yeesus Kiris, ɓisu win mɛ̀to mɛ̀cèm ɓisuulɛ rìgherɛ̀n ɗin ɗyɛɛ̀ keŋkem zi bimiɗ.

⁹Bɛ̀ll ànɛ nkìki kisay ɓi nghay wɛ̀m ɓi rìghaàghàgsì ɗi Syeesyee à Ɓɔlɛ à Man wiì, à rì mɛ̀ wusìnɛ̀ɗ lɛ ǹti mɓùgì mìni ɓyààmɛ̀n ɓìcèm,

¹⁰ɓi bɔ̀ŋzɛ̀n yɛm̀ kɛ̀ɛ nfɔɛy, ǹtɔtɔ̀g Bɛ̀ll lɛ, i ki ri lɛ ki kɔǹ nyi, mɛ̀ɛ mɓa ɓà min ɗi bee inɛ lɛ n-yu a lɔ̀ŋkin.

¹¹Ɓisuulɛ ǹɗì rì coo zày ìnɛ lɛ di màa ghɛɛ mìni, lɛ n-yuy mìni rì rìfa ɗi Kitɛntɛ̀n ki Nghay ridɛŋ ɗi ɗyɛɛ fati mìni ìtèɗ.

¹²Nsoò gì lɛ di ti faàfàlɛ̀n ìtèɗ nɗaŋ a lɔ̀ŋkin ɓi rìgherɛ̀n ɗi ɗi ri ɓìsi bas lɛ rì mɛ̀ rì mìni.

¹³Ɓɔɔsoŋ̀ ǹkɔ̀ni ɓi lɛ ɓi naǹ lɛ, mmɛ ɓeg ɓyààmɛ̀n ɓidɛŋ lɛ n-yu mìni kì ghɛɛ̀ lɛ di kìsay kɛm̀ kɛɛ wum gàɓ ì ɓìɗùn a lɔ̀ŋkin, yɛ̀ɛ ki faghà ɓi ɓìlɔ̀ŋ ɓimbog. Nni à kpaŋ ɓigomìnɛ, bee ì ka ghɛnɛ̀ngà ɓi.

¹⁴Ɓisuulɛ ǹɗì rì ǹtɛ̀g wulɛ nkɛǹ a ɓum ɓɛ̀cèm, a ɓɛ̀roɓɛ ɓɛ yii cɛɓ rì a ɓɛ̀roɓɛ ɓɛ ka yi ɓi cɛɓ, a ɓɛ̀yiì-ɓìɓan, rì a ɓumɓɛ ɓɛ yii ɓi com.

¹⁵Kìɓan kiǹ kɛɛ̀ki ǹɗì rì coo zày ìnɛ lɛ nghagsi girig mìni Syeesyee à Ɓɔlɛ, mìni ɓɛ ɓì rì a Rom.

¹⁶Ɓisuulɛ, ǹ-yin lɛ ǹwog ǹtoòrìɗ ɓi rìghagsì ɗi Syeesyee à Ɓɔlɛ, lɛ à rì ìtèɗ wu Bɛ̀ll wu wɛɛ̀ ghɛɛghɛɓsì ɓum ɓɛ̀cèm ɓɛ ɓɛ gherɛɛ, à tumɛ̀n lɛ Ɓɛ̀yudɛ̀n à kpaŋ lɛ ɓumɓɛ ɓɛ yin Ɓɛ̀yudɛ̀n.

¹⁷Ɓisuulɛ Syeesyee à Ɓɔlɛ a rèresi yɛ̀ɛ Bɛ̀ll à ti à kìlàg lɛ ɓum ɓɛɛ ɓa lɛ saaɗ ɓi mis mii lɛ rìgherɛ̀n rì ɓisuu righerɛ̀n lɔŋ yɛ̀ɛ ki ri kìkànɛn lɛ: Ŋwaànɛ à rì mum à saaɗ ɓi mis mɛ Bɛ̀ll, lɛ rgherɛ̀n, à ɓiì ghɛɓì.

¹⁸Bim i Bɛ̀ll ì ti ì rèsàg yì aɗyoo ɓisuu kiɓe kicèm, rì kìtɛ̀ŋtɛ̀ŋ kicèm ɓi ɓum ɓɛ ri rì ɓyɔ, ɓyɛɛ ɓanɓani saaɗ ɓi rìkpàn ɓi zɛ̀ɗ aɗyòò;

¹⁹ɓisuulɛ, ɓìɓan ɓi ɓum ɓɛ ri rì ìtèɗ wulɛ ɓɛ yi ɓi ɓɛg ànɛ yɛ̀ɛ Bɛ̀ll, ɓi ri lɛ tɛntɛ̀ɛ̀n ɓi mis maa, lɛ Bɛ̀ll à rèsìghà ɓɔ ɓyɔ lɛ syeesyee.

²⁰À tumɛ̀n yɛ̀ɛ Bɛ̀ll à kìghà zi, mɛ̀ròŋa mii mɛ ɓum ɓɛ yin lɛ ɓɛ ghɛn lɛ, rì ìtèɗ wii wu wu ri fìɗyàɓ fikɔ̀ɔ̀, rì rìɓa ɗii ɗi àrì Bɛ̀ll, ɓyɛɛ̀ rèeresɛ̀n ɓi ɓyom ɓi à kìghà; fɔlɔɔ nnɛ ɓɛ yin ɗi com ki ɓɛ ri lɛ ɓɛ kpaa ki ki ki lɛ ɓɛɛ cenɛn ɓɔ.

²¹Ɓisuulɛ ɓɛ yii Bɛ̀ll, kìɓan kifog ɓɛ̀ kɛɛ̀ ɓɔgsi nyi yɛ̀ɛ ki ghɛɛ̀sɛɛ lɛ ɓɛɛ ɓɔgsag nyi, ɓɛ̀ kɛɛ̀ ki fa nyi ɓìtògsɛ̀n, wɔ̀lɛ ɓìdìmìdimi ɓyaa ɓi ɓɛfèg ɓi mɛ tɔɔsi ɓɔ cog, ɓìdùŋdùŋ ɓyaa ɓi mɛrèm ɓi sigtɛ̀n birìm.

²²Ɓɛ sasànɛ̀n lɛ ɓɛ wom̀zɛɛ, kɔlɛ ɓɛ ri ɓìyèg.

²³Jàŋ inɛ ɓɛ ghɛɛ̀sɛ̀ngà kìɓɔgsii Bɛ̀ll ànɛ à rì Loy ɓìfèèghrɛnà ɓi lɛ, rì mum ànɛ à ti à wulàg, rì tììlì, rì nyàm yi mɛkòò mɛnin, rì yi wɔwɔghɛn ri mùm, ɓyɛɛ̀ ɓi ɓɔɔ ɓɔɔ̀ɓɔ̀gsì.

²⁴Kìɓan kiǹ kɛɛ̀ki Bɛ̀ll à cìtɛ̀ngà ɓɔ ɓi ɓìɓan ɓi tifin, ɓi mɛ̀rem maa mɛ ɓiisɛ̀ngà kì kɔ̀ni, fɔlɔɔ nnɛ ɓɛɛ̀ sòosoòtì nyoo yaa yi ɓɔmiɗ.

²⁵Ɓɛ koɓsɛ̀n saaɗ à Bɛ̀ll rì ɓɛ̀pwàà, ɓɛ ɓɔɔ̀ɓɔ̀gsì ɓyom ɓi Bɛ̀ll à kìghà, ɓɛ kikì ɓyɔ mɛ̀wog jàŋ inɛ ɓaa ghɛ̀ɛ̀sɛɛ kìɓɔgsii ǹkìì-ɓyom ɓìcèm ànɛ à ghɛ̀ɛ̀sɛɛ rì rìkem fìɗyàɓ fikɔ̀ɔ̀, ààmɛ̀n.

²⁶Kìɓan kiǹ kɛɛ̀ki Bɛ̀ll à tinìghà ɓɔ lɛ ɓɛɛ kiki ɓìɓan ɓi ntoòrìɗ; ɓɛ̀yiɓ ɓaa ɓɛ pɛɛ̀zì rìràrɛ̀n ɗi Bɛ̀ll à fèkà lɛ rì giɓ rì baŋì ɓi bee ì dùne.

²⁷Fɔlɔɔ nnɛ ɓɛ̀baŋì girig, ɓɛ mɛ càɗ riràrɛ̀n ɗi Bɛ̀ll à fèkà lɛ baŋì yɛ̀ɛ rarag rì giɓ, ɓɛ̀ro ɓɛ̀baŋì ɓɛɛ̀ɓɛ ɓɛ kɔnkɔ̀n lɛ ɓɛɛ rarɛn ɗì ɓɔ. Ɓɛ̀baŋì ɓɛ kikì min ɓiɓan ɓi ntoòrìɗ rì ɓɛ̀ro ɓɛ̀baŋì, rìsyɔn ɗi miì ɗi ɓa lɛ ɓɛɛ teɗ mɛ̀lèɓ mɛ mɛ ghɛɛ̀sɛɛ rì rìnàn ɗyàa ɗiǹ.

²⁸Yɛ̀ɛ ɓɛ ghɛngà ɓi kirɔɔ lɛ ɓɛɛ yiti lɛ Bɛ̀ll à rì wɔɔ, nni Bɛ̀ll à nagà ɓɔ rì kìyèg kaa ki ɗyomzɛ̀n lɛ ɓɛɛ kiki ɓìɓan ɓi ɓaa ghɛ̀ɛ̀sɛɛ ɓi kikìi.

²⁹Fɔlɔɔ nnɛ ɓɛ ri ɓɛ̀ronɛn ɗi mɛ̀bèe mɛ̀kuu mɛ̀cèm, ɗì rìgɛn, rì zày ì ìkum, rì mɛ̀ghèy; ɓɛ ɓa tì ɓɛ̀ronɛn ri yàaka, ɓɛɛ woowoòsɛ̀n, ɓɔ rì ɓɛ̀paàzì, rì wii wu mɛghèy, ɓɛ keesì cɛɓ ki tisɔ̀mɔ̀g,

³⁰rì ɓɛ̀ɓɔlɛ, rì mɛ̀wɔ̀wɔrì, ɓɛ ɓa ɓɛ̀bènàbena ɓɛ Bɛ̀ll, ɓɔ ɓɛ̀kaà-ɓìɓan, ɓɔ rì ɓìdaŋà rì kalɛn, ɓɛ womzɛ̀n ɓi rìkì ɗi kiɓe, ɓɛ ki ɓa ri ntoòtèɗ rì ɓɛ̀yalì ɓaa.

³¹Ɓɔ kɛ̀ɛ̀ ɗyomzɛ̀n , ɓɛ̀ kɛɛ̀ ki ɓa ɓumɓɛ mum à tyweeyàg, ɓɔ kɛ̀ɛ̀ ǹkɔ̀nɛ̀n, kɛ̀ɛ̀ ǹɗem wu woghɛn romum nyìighnyìg.

³²Nsoò yɛ̀ɛ ɓɛ yii lɛ Bɛ̀ll à rengà lɛ ɓumɓɛ ɓɛɛ̀ kìki mɛkuu mɛ ɓiɓan mɛǹ, ɓɛ ghɛɛ̀sɛɛ dì rìwu, ɓɔɔ kɛnkɛ̀n lɔŋ asu ɓɛ kikì ɓyɔ, ɓɛ̀ kɛɛ̀ ki sugtɛn foo, ɓɛ kɛɛ̀dì asu ɓɛ sɛsɛ̀g ɓumɓɛ ɓɛɛ̀ kìki girig ɓìɓan ɓi fɔ̀lɔ̀ɔ̀.