Read Bafia RÒMƐŊ 10 Bible Online

RÒMƐŊ 10 - Bafia bible

RÒMƐŊ 10

¹Ɓɔɔsoŋ̀ com ki nɗem wɛ̀m wɛɛ̀ kɔ̀nkɔ̀n, ki mɛ̀ɛ nki tɔtɔg Bɛ̀ll ɓisu waa ki ri lɛ ɓɛɛ ghɛǹ cɛɓ.

²Ɓisuulɛ ǹɗì lɛ m̀ɓa ɓɔ wusìnɛ̀ɗ ɓi rìfalɛ̀n ɗi ɓɛ ri ɓɛ̀falɛn ri Bɛ̀ll, kìɓan kifog rìfalɛ̀n ɗiǹ ɗi bas̀ ɓi zɛ̀ɗ i rìwog.

³Yɛ̀ɛ ɓɛ yighà ɓi lannɛ Bɛ̀ll à ti à kìlàg lɛ mum à ɓa lɛ saaɗ ɓi mis mii, ɓɔɔ kaakàà bee yaa yi ɓɛ ri lɛ ɓɛ ɓa miì lɛ saaɗ ɓi mis mɛ Bɛ̀ll, ɓɛ ɓeǹ kì nɔ̀ɔ̀tii bee inɛ Bɛ̀ll à ti à kìlàg ɓum miì lɛ ɓɛɛ ɓa lɛ saaɗ ɓi mis mii.

⁴Ɓisuulɛ Kiris à rì rìsugtɛ̀n ɗi ɓidɔ̀gsɛna, lɛ di mum ǹcèm ànɛ à gherɛɛ a ɓa lɛ saaɗ ɓi mis mɛ Bɛ̀ll.

⁵Ɓi kìɓan ki ki seesee rìɓa ɗi mum à rì lɛ à ɓa lɛ saaɗ ɓi mis mɛ Bɛ̀ll lɛ rìɓèŋ ɗi ɓidɔ̀gsɛna, Moyis à kàngà lɛ: Ŋwaànɛ à nɔ̀ɔ̀tii yɛ̀ɛ ɓìdɔ̀gsɛna ɓyɛɛ̀ kpaakpàà, à rì ɓiì ghɛɓì lɛ ɓyɔ.

⁶Wɔ̀lɛ fɛlɛ nnɛ ki ri kì kaliyɛn ɓi san ànɛ a rìɓa ɗi mum à rì lɛ à ɓa lɛ saaɗ ɓi mis mɛ Bɛ̀ll lɛ rìgherɛ̀n: Kɔ̀ɔ kpaa ɓi nɗem wɔɔ lɛ, ghɛn yɛ̀ɛ ri ɓɔɔgh gɛ aɗyoo? Fɔlɔɔ a rì lɛ ù kɔ̀sii yì Kiris wɔɔ.

⁷Nsoò lɛ ù kpaa lɛ: Ghɛn yɛ̀ɛ ri sɛni gɛ a nyɔ̀ɛ̀y? Fɔlɔɔ a rì lɛ ù pɛ̀ɛ̀zii tì Kiris ɓi nyìinyìm à ɓìloŋ.

⁸Nni ki ri min ki kaliyɛn lɛ cɛ? Jɛ̀ɛ̀ ì rì wɔ̀ jàŋbog, yɔ̀ wɔ̀ ɓi ŋwɔm, ì ki ɓa ti wɔ ɓi nɗem, jɛ̀ɛ̀ ìnɛn ì rì jɛ̀ɛ̀ ì rìgherɛ̀n ɗi ɓìsiì làalam̀ɓɛ̀n.

⁹I ù pinii ŋwɔm wɔɔ ɓi nyìinyìm à ɓum, ù kpaa lɛ Yeesus à rì Kan, ù ki gherɛn ɓi nɗem wɔɔ lɛ Bɛ̀ll à ghèmzìghà nyi a ɓìloŋ, ù ɓiì ɓaà rì cɛɓ.

¹⁰Ɓisuulɛ i mum à gherɛɛ rì nɗem wii, à ɓa lɛ saaɗ ɓi mis mɛ Bɛ̀ll, i a kpaakpaa ɓi ŋwɔm wii lɛ à gherɛɛ Bɛ̀ll à fa nyi cɛɓ.

¹¹Lɛ ki ri kìkànɛn lɛ: Mum ǹcèm ànɛ à gherɛɛ nyi, àa teɗ ɓi ǹtoòrìɗ.

¹²Fɔɔnnɛ gasɛ̀n ì yin ɓi nyìinyìm ànɛ lɛ rì muu Ɓɛ̀yudɛ̀n, rì muu Gìrɛg, lɛ ɓɛ̀sɛ̀ɛ̀ ɓɛ̀cèm ɓɛ ri lɔŋ Kan bog ànɛ à ti à falàg ɓumɓɛ ɓɛɛ̀ rereŋi nyi ɓyom.

¹³Ɓisuulɛ mum ǹcèm ànɛ à ɓiì reŋii ɗii ɗi Kan, à ɓiì ghɛɛ̀ cɛɓ.

¹⁴Nni lannɛ ɓɛ ri min nyi ɓiì reŋii, di ɓɛ gherɛ̀ngà ɓi nyi? Nni lannɛ ɓɛ ri min nyi ɓiì gherɛɛ di ɓɛ woogh ɓi yɛ̀ɛ ɓum ɓɛɛ̀ kpaakpaa kiɓan kii? I ɓum ɓɛ ki kpaakpaa ɓi, lannɛ ɓɔɔ ri min ɓiì woògh?

¹⁵Nni lannɛ mum à rì ɓiì kɛ̀ɛ ki kpaakpaa di ɓɛ romi ɓi nyi? Fɛlɛ yɛ̀ɛ ki ri kìkànɛn lɛ: Ki rɔɔtɛɛ yɛ̀ɛ mɛ̀nɔ̀ɓɔ̀ lɛ u ghɛǹ ɓumɓɛ ɓɛ riì rì ɓɛ̀syeesyee ɓɛ ɓɛ̀ɓɔlɛ di ɓɛɛ yùyuiy.

¹⁶Wɔ̀lɛ ɓɛ̀sɛ̀ɛ̀ ɓɛ̀cèm ɓɛ ghaɓkà ɓi Syeesyee à Ɓɔlɛ, kìɓan kiǹ kɛɛ̀ki Ezayii a kpaaghi lɛ: Kan! Ghɛn yɛɛ gherɛ̀ngà com ki tì lààlàmɓɛ̀ngà?

¹⁷Fɔlɔɔ nnɛ rìgherɛ̀n ɗi ti ɗi fuughìì ɓi kìɓan ki ŋwaà woogh; nni kìɓan ki ɓɛ ti ɓɛ wokì, ki riì ɓi jɛ̀ɛ̀ ì Kiris.

¹⁸Nni ǹtɔɔgh lɛ, ɓɛ rɔɓkà nya ɓɛ̀ kɛɛ̀ wog? Ɓɛ ɓaghà ɓi lɛ ɓɛ rɔɓ, jɛ̀ɛ̀ yaa yi wooghrɛ̀ngà zi bimiɗ, ɓìtòkì ɓyaa ɓi kpagì lɛ rì a ɓɛ̀yɔ̀ŋyɔ̀ŋ ɓɛ zi miì.

¹⁹Nni mɛ̀ ǹtɔɔgh lɛ, Isirayɛl à wokà ɓi nya yɛɛ lɔɔ? Lɛ Moyis yɛɛ loogh kì kpaà lɛ: Mɓiì kìi lɛ yɔ̀ɔ̀tì a ki mìni rì ɓumɓɛ ɓɛ yin bimiɗ à kìlɔ̀ŋ, ǹkì com ki lɛ ɓi wog bim ri kìlɔ̀ŋ ki ki ri kɛ̀ɛ̀ ɗyomzɛ̀n.

²⁰Ezayii à ràm à kpaa lɛ: Ɓumɓɛ ɓɛ kaakààghà ɓi mɛ, ɓɛ ǹtulii ɓi mɛ̀, ǹki rèsɛn a ɓɛ̀roɓɛ ɓɛ tɔkà ɓi mɛ com.

²¹Wɔ̀lɛ ɓi san ànɛ a Isirayɛl, à kpaa lɛ: Bimiɗ à ŋwos, mɛ̀ɛ m̀mɛɛ̀ nàmnam kilɔ̀ŋ ki ki kii lɛ ki yaaghrɛ̀n ki ki ɓa ri ǹtoòtèɗ ɓyàg.