Read Bafia RÒMƐŊ 11 Bible Online

RÒMƐŊ 11 - Bafia bible

RÒMƐŊ 11

¹Nni ǹtɔɔgh lɛ, Bɛ̀ll àa m̀màagh nya kìlɔ̀ŋ kii? Èe èe, à màagh ɓi kɔ. Ɓisuulɛ, mɛ̀ ǹɗì girig kìyalì ki a Isirayɛl, dòò yì Abiraham ɓi rìpwìɗ ɗi Bɛŋzyamɛŋ.

²Bɛ̀ll à màagh ɓi kilɔ̀ŋ kii ki à lokà kì ɓɔ̀ni abɛ̀y. Ɓì yii ɓi yɛ̀ɛ ki ri kìkànɛn ɓi jàŋ inɛ Eli à sɔmɛɛ Isirayɛl rì Bɛ̀ll, à kpaa lɛ:

³Kan, ɓɛ mɛ kì lɛ, ɓɛ cuusì ɓɛ̀kpaŋzì-ɓìɓan ɓɔɔ, ɓɛ waàghì jàŋ yi ɓɛ ti ɓɛ tɔngì ɓyom ɓi ɓɛɛ ɓɔgsi wɔ̀ rìɓyɔ miì, lɔŋ mɛ̀ cɛ̀ncɛm yɛɛ mɛ rɔ̀ɓ, ɓɛɛ̀ ki kaakaa lɛ ɓɛɛ wey mɛ̀.

⁴Nni rìɓàg ɗi Bɛ̀ll ɗi ri lɛ cɛ? Ɗi ri lɛ: Mɛ̀ɛ m̀mɛ rɔ̀tɛn ɓum ɓɛ̀tɔɔsìm taàɓɛ̀ɛ̀ lɛ ɓɛɛ ɓa ɓɛŋkɛ̀m, ɓumɓɛ̀n ɓɛɛ mɓaagh ɓi mɛɗu ɓi zi lɛ ɓɛɛ ɓɔgsi Baal.

⁵Fɔlɔɔ nnɛ ɓi cààmɛ̀n ki tì rì ki miì, maa gàɓ à ɓum àdɛŋ ànɛ Bɛ̀ll à ɓɔ̀ngà ɓi geesɛ̀n yìì, à rì girig wɔɔ.

⁶À ɓɔ̀ngà ɓɔ lɛ geesɛ̀n yìì, àa lɛ mɛ̀kìkìì maa, i kɛɛ ɓa lɛ mɛ̀kìkìì maa, di geesɛ̀n ì Bɛ̀ll ì yin kɔɔ̀kɔɔ̀ à geesɛ̀n.

⁷Nni la min? Com ki Isirayɛl à kaakààghà, à fɔ̀ngà ɓi kɔ, wɔ̀lɛ ɓɛ̀roɓɛ Bɛ̀ll à ɓɔ̀ngà ɓɛɛ fɔngà com kiŋcèm, ɓɛ̀ro ɓɛm̀bog ɓɔɔ ɗiŋì ɓɛ̀lɔg ɓi ǹɗeèghreŋi wu Bɛ̀ll,

⁸lɔŋ yɛ̀ɛ ki ri kì kànɛn lɛ: Bɛ̀ll à faghà ɓɔ Ǹghay wu laalalɛ̀n, à kì lɛ mis maa mɛ̀ kɛɛ̀ ghɛnɛn, mɛ̀reè maa mɛɛ ɓa rì ɓɛ̀lɔg à kpaŋ gɛɛ̀nɛ.

⁹Davit à kpaa girig lɛ: Teɓèrè wàà a ɓìɗilàg à ghɛ̀ɛ̀sɛɛ kì ɓaà fìram fi fi ri fìgheŋdiyɛn ɓisu waa, nsoò lɛ dam ìnɛ ì ghɛ̀ɛ̀sɛɛ ɓɔ kì wɔɔsii, rì com ki kɛɛ kɛɓti ɓɔ fìɓàg, lɛ ɓɛɛ teɗ mɛ̀lèɓ,

¹⁰mis maa mɛ ghɛɛ̀sɛɛ kì sigtɛɛ birìm lɛ ɓɛ̀ kɛɛ̀ ghɛnɛn ti; kìya lɛ ɓɛɛ ɓa mɛ̀laŋ cààmɛ̀n kìcèm.

¹¹Nni ǹtɔɔgh lɛ, Ɓɛ̀yudɛ̀n ɓɛ kɛɓtɛ̀ngà nya lɛ ɓɛɛ kpi kìzog ki isuùcèm? Èe èe, ki yin fɔlɔɔ, wɔ̀lɛ rìkpì ɗi ɓɛ kpighà ɗyɛ̀ɛ mɛ ki lɛ, ɓìlɔ̀ŋ ɓi zɛy ɓyɛ̀ɛ ɓa ɓìkòrɛn, lɛ di Ɓɛ̀yudɛ̀n ɓɛɛ ki yɔ̀ɔ̀tì.

¹²I zɛ̀ɗ i Ɓɛ̀yudɛ̀n ì mɛ fa ziinɛ ìkum wu ɓi Nghay, kìzog kaa ki kum̀zì ɓum ɓɛ zɛy ɓi Nghay, ɓɔ̀ɓ yaŋ min ɗi rìrɛlì ɗi ɓɛ ri ɓiì pɛ̀ɛ̀zɛɛ ki rɛlii isuùcèm ɓi gòri ì Bɛ̀ll ɓi ɗùm! Rìrɛlì ɗiǹ ɗi ri fa ɓum ɓɛ̀mààgh lɛɛ̀gwey.

¹³Mɛ̀ ǹkalii mìni ɓɛ ɓi yin Ɓɛ̀yudɛ̀n lɛ, ǹɗì ǹkɛ̀nì-fìtom a Yeesus ànɛ à rì ɓisuu ɓumɓɛ ɓɛ yin Ɓɛ̀yudɛ̀n, nni ɓi rìɓa ɗyɛ̀m ɗiǹ, mɛ̀ɛ nnyàanyaàrɛ̀n rì kìsay ki ki falɛ̀ngà kiǹ a lɔ̀ŋkɛm̀.

¹⁴Lɛ i bee yàa rì lɛ ì ɓa, ǹkì lɛ ɓumɓɛ ɓi kìlɔ̀ŋ kɛm̀ ɓɛɛ wog yɔ̀ɔ̀tì, di gàɓ ìdɛŋ yɛ̀ɛ ghɛ̀ɓ.

¹⁵Ɓisuulɛ rìkɛ̀n ɗyaa ɗi ɓi nwɔŋì ɗi kighà lɛ ziinɛ yɛ̀ɛ rarɛn tì rì Bɛ̀ll; nni cɛ kɛɛ ri min ɓiì kìlɛɛ di ɓɛ sugtii yì? Fɔlɔɔ a ɓiì ɓaà cɛɓ ki ki yuu ɓisuu ɓilòŋ.

¹⁶Nni i mum à faa Bɛ̀ll kìɓɛghà ki bìrɛs ki ǹtonto, gàɓ ìnɛ ì rɔ̀ɓi bimiɗ ì wooghrɛ̀n girig ɗì Bɛ̀ll; i ɓɛ faa Bɛ̀ll gàŋ yi kite, di myaɓ mɛ kite kiǹ mɛ wooghrɛɛ girig ɗì nyi.

¹⁷Wɔ̀lɛ i ɓɛ m̀pisii myaɓ mɛ òlivyee mɛdɛŋ, wàànɛ ù rì (fɛlɛ yɛ̀ɛ) òlìvyee ànɛ à ghɛghɛ̀ɓkà ɓi cog, ù ɓa lɛ ɓɛ yuù wɔ̀ kì ɓaatii ɓi nɗyèm wu òlivyee, jàŋ inɛ myaɓ mɛ ɓɛ nɗengii mɛ ǹɗì, u teteɗ girig gàɓ ì mɛ̀yaa mɛ gàŋ yi òlivyee ànɛ ɓɛ ɓɛlà yɛɛ̀ ronɗom̀ yi.

¹⁸Kɔ̀ɔ saasanɛ̀n di u feefengì myaɓ mɛ ɓɛ rengàkà, i ù saasanɛ̀n, ù ghɛ̀ɛ̀sɛɛ kì yiì lɛ àa wɔ̀ yɛɛ ɓanɓani gàŋ, gàŋ yɛɛ ɓanɓani wɔ̀.

¹⁹Wàa rɔ̀ɓ ɓi lɛ ù kpaa ɓi lɛ: Ɓɛ rengàkà myaɓ mɛdɛŋ, lɛ di ɓɛɛ ɓaati mɛ̀ ɓi-kɔ̀ɔ̀ wu myaɓ mɛǹ.

²⁰Ki ri lɔŋ fɔlɔɔ lɛ ɓɛ rengàkà myaɓ mɛǹ lɛ rìɓa ɗi mɛ ɓaghà kɛ̀ɛ̀ rìgherɛ̀n nni kɔ̀ɔ kaakalɛ̀n, ù ghɛ̀ɛ̀sɛɛ gì kì risii.

²¹Ɓisuulɛ Bɛ̀ll à kèŋìghà ɓi myaɓ mɛ kite mɔmiɗ, àa kèŋi ɓi girig wɔ̀,

²²Kuurag kìpuɓì-ǹɗem à Bɛ̀ll, rì kìnyɛn kii; à rèsii kìnyɛn ɓisuu ɓɛroɓɛ ɓɛ kpighà, à rèsì wɔ̀ kìpuɓì-ǹɗem, wɔ̀lɛ kɛɛ̀ kɔ̀ɔkɔnɛ̀n lɛ u ɓaɓa lɔŋ ɓi kìpuɓì-ǹɗem wìì, kɛ̀ɛ̀ fɔlɔɔ ɓɛ pisì girig wɔ̀.

²³Fɔɔnnɛ i ɓɔ girig ɓɛ kɛǹkɛni ɓi asu ɓɛ ɓenɓèn kì gherɛɛ, ɓɛ ɓiì pɛ̀ɛ̀zii ɓɔ kì ɓaatii ɓi ǹɗyèm, lɛ Bɛ̀ll à rì rì ìtèɗ wulɛ à pɛ̀ɛ̀zì ɓɔ kì ɓaatii ɓi ǹɗyèm.

²⁴Wàànɛ ù yin muu Ɓɛ̀yudɛ̀n, ù rì (fɛlɛ yɛ̀ɛ) ŋwaɓ wu òlìvyee ànɛ ɓi cog, ŋwaɓ wii wɛɛ̀wu ɓɛ reniì, ɓɛ yu kì ɓaatii ɓi ǹɗyèm wu òlìvyee ànɛ ɓɛ ɓɛlà m̀ɓɛ̀lɛn, kìɓan ki lɛ ɓɛɛ ɓaati ŋwaɓ wu kite ɓi ǹɗyèm wu kite kidɛŋ, ki ri ki mum kɛ̀ɛ wog; Ɓɛ̀yudɛ̀n ɓɔ yɛɛ ri myaɓ mɛ òlìvyee à m̀ɓɛ̀lɛn, fɔɔnnɛ ki ri ɓiì pɔ̀ɔ̀zii ki ɓaà lɛ fɛnfɛn lɛ ɓɛɛ pɛɛ̀zi ɓɔ kìɓaatii ɓi ǹɗyèm waa.

²⁵Ɓɔɔsoŋ̀, kìɓan kidɛŋ ki a rìnyam ki ri wɔɔ, kɛɛ̀ki ǹkɔ̀ni ɓi lɛ ɓi comɛn lɛ ɓì ɓiì ki ghɛnɛɛ miniì ɓɔmiɗ yɛ̀ɛ ɓum ɓɛ ɗyom̀zɛ̀n; kìɓan kiǹ kɛɛ ri lɛ, gàɓ ì ɓum ìnɛ a Isirayɛl ì yiìdi ri ìtèɗ wulɛ ì wog, wɔ̀lɛ kìɓan kiǹ ki ri ɓiì finɛɛ à kpaŋ yɛ̀ɛ ɓìlɔ̀ŋ ɓimbog ɓi ɓi yin Ɓɛ̀yudɛ̀n ɓìcèm ɓi ɓiì ɗiŋii ɓi gòri ì Bɛ̀ll.

²⁶Fɔlɔɔ nnɛ Isirayɛl bimiɗ à rì ɓiì ghɛɛ̀ cɛɓ yɛ̀ɛ ki ri kì kànɛn lɛ: Ǹkòri-bum à ɓiì ɓaà yì a Siyon, à pisì ǹtoòtèɗ wu dòò yi Yakɔɓ.

²⁷Bee inɛ ǹɗì ɓiì renì rì ɓɔ yɛ̀ɛnɛ̀n lɔɔ, di màa pisi ɓiɓe ɓyaa.

²⁸Ɓi san ànɛ a Syeesyee à Ɓɔlɛ ànɛ ɓɛ ɓengà, Ɓɛ̀yudɛ̀n ɓɛ ri ɓɛ̀bènàbena ɓɛ Bɛ̀ll, fɔlɔɔ à ki ɓa ɓi kìrɔɔ kin, wɔ̀lɛ i tì nɔ̀ɔ̀tii rìɓɔ̀n ɗi Bɛ̀ll à ɓɔ̀ngà ɓɔ, Ɓɛ̀yudɛ̀n ɓɛ ri ɓɛ̀roɓɛ Bɛ̀ll à keesii ɓisuu ɓɛseŋi ɓaa ɓɛ ɓɛsɛ̀ɛ̀.

²⁹Ɓisuulɛ rìɓòò ɗi Bɛ̀ll à tì à kìlàg ɓum kɛ̀ɛ̀ azi adɛŋ, rì ǹɗeèghreŋi wii, ɓi yin lɛ ɓi lɔgtɛ̀n.

³⁰Fɛlɛ yɛ̀ɛ mìnii kighà Bɛ̀ll ǹtoòtèɗ ɓi mɛ̀ru mɛ abɛ̀y, ɓigomìnɛ, Bɛ̀ll à mɛ wog mini nyìighnyìg lɛ ǹtoòtèɗ wu Ɓɛ̀yudɛ̀n ɓɛ nkii nyi.

³¹Fɔlɔɔ nnɛ ɓɔ girig ɓɛ mɛ rèsi ǹtoòtèɗ ɓigomìnɛ, lɛ di Bɛ̀ll a wog ɓɔ girig nyìighnyìg fɛlɛ yɛ̀ɛ àa ncenɛɛ mìni.

³²Ɓisuulɛ Bɛ̀ll à ghaasìghà ɓum ɓɛ̀cèm ɓɛ̀kpàn ɓi ǹtoòtèɗ, ɓi ɗùm, lɛ di a wog ɓɔ ɓɛ̀sɛ̀ɛ̀ ɓɛ̀cèm nyìighnyìg.

³³Rìkuu ɗi coo nɗem wu nyìighnyìg ɗi Bɛ̀ll à rì rì ɗyɔ! Ɗyomzɛ̀n ɗii, rì rìyi ɗii ɗi ɓiɓan, ɓi rimi yɛ̀ɛ mɛ̀nɔ̀ɓɔ̀. Mum à yin lɛ à yi ɓɛ̀fèg ɓii, mɛ̀yitì mii mɛ yin lɛ mum à wog.

³⁴Ɓi saaɗ ghɛn yɛɛ ɓaghà lɛ à yi fèg à Kan, ghɛn yɛɛ ki ɓaghà lɛ à reɓ nyi?

³⁵Ghɛn yɛɛ ka lokà nyi kìfaà com ki à rì lɛ à ɓoŋɓòŋ mɛ̀lèɓ mɛ miì?

³⁶Lɛ ɓyom ɓìcèm ɓi fuuyì ɓi nyi, ɓi ri lɛ nyi, ɓi ki rì ɓisu wìì, nnyɛ̀ɛ ghɛɛ̀sɛɛ rì rìkem fìɗyàɓ fikɔ̀ɔ̀. Ààmɛ̀n.