Read Bafia RÒMƐŊ 12 Bible Online

RÒMƐŊ 12 - Bafia bible

RÒMƐŊ 12

¹Ɓɔɔsoŋ̀, ɓisuu nɗem wu nyìighnyìg wu Bɛ̀ll à rèsìghà ɓi ɓɛg wìs, ǹtɔɔgh mìni lɛ ɓi funɛn mìniì ɓɔmiɗ fɛlɛ yɛ̀ɛ kìtuwe ki mum à ti à weeyì ɓi rìɓɔgsì ɗi Bɛ̀ll; ɓi funɛn mìniì ɓɔmiɗ rifunɛ̀n ɗi ɗi ri cem, ɗyɔ rìtɛnɛn, ɗi ki ɓa ɗi ɗi rɔɔ Bɛ̀ll. Fɔlɔɔ yɛɛ ri ɓiì ɓaà syeesyee à rìɓɔgsì ànɛ ɓì ghɛ̀ɛ̀sɛɛ kì ɓɔgsii Bɛ̀ll.

²Kɛ̀ bi nɔ̀ɔ̀ti cɛɓ ki ɓumɓɛ ɓi mɛ̀ru mɛ ɓɛɛ̀ ghɛghɛ̀ɓ, kìɓan kifog, càrɛɛnà lɛ Bɛ̀ll a lɔgti mìni di à koɓsɛɛ mɛ̀yitì mɛ̀cèm mɛ mɛ ri mìni ɓi mɛ̀rem, ìsuùcèm, rì mɛ nyɔn, fɔlɔɔ nnɛ ɓi rì min ɓiì yiì rìkɔ̀n ɗi Bɛ̀ll, rì ɓìɓan ɓi ɓi rɔɔtɛɛ, rì ɓi ɓyɛɛ̀ rɔɔghi nyi, rì ɓi ɓi ri kɛ̀ɛ̀ kìɓan ki ɓɛ fen miì.

³Lɛ geesɛ̀n ìnɛ Bɛ̀ll à kighà mɛ̀, ǹkpaa mum ǹcèm ànɛ ɓi mìni lɛ: Kɛ̀ ɓi rɛsag miniì ɓɔmiɗ ɓi nɗɛli wu wu cee rìɓa ɗin, kìɓan kifog ɓaana lɔŋ ri mɛ̀yitì mɛ lɛ ɓi sɛɛ̀di mìniì ɓɔmiɗ ɓi zi, mum ǹcèm à rɛsɛ̀n ɓi nɗɛli wu wu ghɛɛ̀sɛɛ rì gàɓ ì rìgherɛ̀n ìnɛ Bɛ̀ll à faghà nyi.

⁴Lɛ fɛlɛ yɛ̀ɛ tì rì rì ɓìkàɓ lɛɛ̀gwey, ɓìkàɓ ɓiǹ ɓi ki ɓa ɓikàɓ ɓi nyoo bog, ɓìcèm ɓyɛ̀ kɛɛ̀ ki ɓa rikuu ɗi kisay ɗifog,

⁵fɔlɔɔ nnɛ ɓìsi ɓɛ tì rì kìtuu, tì ri nyoo bog ɓi Kiris ɓi ɗùm; tì ki ɓa ti ɓikàɓ ɓi ɓi nyoo bog,

⁶lèg ànɛ yɛ̀ɛ geesɛ̀n ì Bɛ̀ll ì ghɛnɛ̀ngà a lɔ̀ŋkis, tì ri lɛ rì mum, rì rìkuu ɗi kiɓan ɗi Bɛ̀ll à faghà nyi lɛ a kilag, fɔɔnnɛ roànɛ Bɛ̀ll à faghà ìtèɗ wulɛ a kpaàkpàŋzì ɓìɓan ɓi Bɛ̀ll à rèsii nyi, à ghɛ̀ɛ̀sɛɛ kì kìi kisay kiǹ lɔŋ yɛ̀ɛ ki ghɛɛ̀sɛɛ ɓi rìgherɛ̀n.

⁷Roànɛ à rì ǹɗeŋiyɛn lɛ a ɓa ǹkìì-kìsay à ɓɛ̀ro ɓɛmbog, a siìrɛn ɓi rìkì ɗi kisay; roànɛ Bɛ̀ll à faghà lɛ a ɓa ǹɗèsàg, à ghɛ̀ɛ̀sɛɛ kì falɛɛ ɓi rìrèrèsì.

⁸Roànɛ Bɛ̀ll à faghà lɛ a teètèèsì ɓɛ̀geni nyoo rì deɓ à ghɛ̀ɛ̀sɛɛ kì sììrɛɛ ɓi rìkìkì ɗi fɔlɔɔ; roànɛ a kàakàɓsì ìkum wii, à ghɛ̀ɛ̀sɛɛ kì kìi kiɓan kiǹ kɛ̀ɛ̀ ǹkàŋɗɛ̀n; roànɛ a kɛ̀ɛkɛɛ̀sì ǹɗaŋ à ghɛ̀ɛ̀sɛɛ wɔ kì kɛ̀ɛ̀sii ri tìkɛɗ; roànɛ a ghɛɛghɛɓsì ɓum ɓɛ nyìighnyìg à ghɛ̀ɛ̀sɛɛ kì kìi kiɓan kiǹ rì kìnyàà.

⁹Nkɔ̀nɛ̀n à ghɛ̀ɛ̀sɛɛ kì ɓaà kɛ̀ɛ̀ mɛ̀ghèy azi, ɓì ɓèèzɛ̀n kìɓe, ɓì ki sììrɛn ɓi rìkì ɗi kirɔɔ rì ìtèɗ.

¹⁰Ɓì ghɛ̀ɛ̀sɛɛ kì rèsii, kirɔɔrɛɛ ki ǹkɔ̀nɛ̀n à rìgeni ɓi nyìinyìm wìn; lɛ nnyaasɛ̀n ànɛ à ghɛ̀ɛ̀sɛɛ kì ɓaà, rèsiina bɔgsɛ̀n lɛɛ̀gwey ɓi nyìinyìm wiǹ.

¹¹Ɓaana rì kìsììrì, kɛ̀ ɓi kì iɓwɛɗ; kìina Kan kìsay rì ìtèɗ ɓi nɗem.

¹²Ɓì ghɛ̀ɛ̀sɛɛ kì nyàànyaa ɓi dyàɓɛn inɛ ɓì rì rì yɔ̀, ɓì nìɗ ǹɗem cààmɛ̀n ki ɓì tulɛɛ ri mɛ̀tɔɓ, ɓì ki sììrɛn bi bɔ̀ŋzɛ̀n.

¹³Ɓì ghɛ̀ɛ̀sɛɛ kì ghɛɓsaagh ɓɛgeni ɓin ɓɛ ɓi rìgherɛ̀n ɓi ɓìɓan ɓi ɓyɛɛ̀ yeeyeèsì ɓɔ, ɓì ki yi rìghàɓ ɗi ɓɛ̀kèn lɛ syeesyee.

¹⁴Màŋina ɓumɓɛ ɓɛɛ̀ yeeyeèsì mìni, kɛ̀ ɓi cɛ̀m ɓɔ.

¹⁵Nyààrɛɛna nɗaŋ ɗi ɓumɓɛ ɓɛ ri ɓi kìnyàà, ɓì rèn nɗaŋ ɗi ɓɛ̀roɓɛ ɓɛɛ̀ rènɗèn.

¹⁶Ɓì ghɛ̀ɛ̀sɛɛ kì wooghrɛɛ ɓi nyìinyìm wìn, kɛ̀ ɓi ɓɔɔɓɔgsɛ̀n, lɔŋ càrɛɛnà lɛ ɓi ki ɓìsay ɓi ɓyɛ̀ɛ tɔtɔg lɛ mum a sɛɛ̀di nyimiɗ ɓi zi, kɛ̀ ɓi ghɛn miniì ɓɔmiɗ lɛ ɓìrì ɓum ɓɛ ɗyomzɛ̀n.

¹⁷Kɛ̀ ɓi lèɓ mum kìɓe ri kìɓe, kaana lɔŋ lɛ ɓi ki kìrɔɔ ɓi mis mɛ ɓum ɓɛ̀cèm.

¹⁸I bee ì rì lɛ ì ɓa, lèg ànɛ yɛ̀ɛ ìtèɗ win wu ri lɛ wu kpaŋ, ɓì ghɛ̀ɛ̀sɛɛ kì ghɛɓì lɛ fyòoog rì ɓum ɓɛ̀cèm.

¹⁹Mìni ɓɛ̀geni ɓɛ̀m ɓɛ nɗem, kɛ̀ ɓi rɔ̀ŋ kiɓan kin miniì ɓɔmìɗ, kìɓan kifog càrina lɛ Bɛ̀ll a saɗ bim yiì, lɛ ki ri kì kànɛn lɛ: Kan lɛ: Mɛ̀ yɛ̀ɛ ghɛɛ̀sɛɛ rì rɔ̀ŋɗɔ̀ŋ, mɛ̀ yɛ̀ɛ ghɛɛ̀sɛɛɛ kì lèɓi.

²⁰Wɔ̀lɛ, i bènàbena wɔɔ̀ a wowog zày, faa nyi ɓìɗilàg, i a wowog kinɔli, faa nyi mɛ̀nig mɛnɔyɛn, lɛ cààmɛ̀n ki ù kìi fɔlɔɔ, di ù kùnii nyi ɓɛ̀ràŋ ɓɛ ɗuu ɓɛ ghɛ̀g-ghɛ̀g ɓi nto.

²¹Kɔ̀ɔ càrɛn lɛ kìɓe kɛɛ lami wɔ̀, kaaya lɔŋ lɛ u lami kìɓe ɗì rìkì ɗi kirɔɔ.