Read Bafia RÒMƐŊ 13 Bible Online

RÒMƐŊ 13 - Bafia bible

RÒMƐŊ 13

¹Mum ǹcèm à ghɛɛ̀sɛɛ kìwoògh ɓɛ̀làmì ɓɛ ɓɛɛ̀ kɛ̀ɛkɛɛ̀sì kìlɔ̀ŋ ɓisuulɛ rìlàmì ɗi ti ɗyɛ̀ kɛɛ̀ kpì yi ǹlɛŋlɛŋ̀ di Bɛ̀ll à faa ɓi, rì tì lɛ, Bɛ̀ll yɛɛ rɛsàkà ɓɛ̀làmì ɓɛ̀cèm ɓɛ ɓɛ ri ɓi ziinɛ.

²Kìɓan kiǹ kɛɛ̀ki, mum ànɛ à ɓiì ramì wɛ̀y ɗi rìlàmì, a yi lɛ à rami wɛ̀y ri rìkɔ̀n ɗi Bɛ̀ll, nni ɓɛ̀roɓɛ ɓɛ ri fɔlɔɔ ri ǹtoòtèɗ, ɓɛ ri ɓiì syoŋiì ɓɔmìɗ ǹcɛ̀m ɓi nyòò.

³Ɓɛ̀làmì ɓɛ yin ɓumɓɛ lɛ mum à nìŋ di a kìki ɓiɓan ɓi syeesyee, lɔŋ ɓumɓɛ ɓɛɛ̀ kìki ɓiɓan ɓi ɓeɓtɛn, ɓɛɛ ti ɓɛ risàg ɓɔ. I ù kɔ̀ni lɛ kɔ̀ɔ ririsi rilàmì, ù ghɛ̀ɛ̀sɛɛ kì kìkii ɓiɓan ɓi syeesyee fɔɔnnɛ rìlàmì ɗi sɛg wɔ̀.

⁴Rìlàmì ɗyɛɛ̀ kìki Bɛ̀ll kìsay lɛ ɗyɛɛ toni wɔ̀ lɛ u ki kìrɔɔ, kìɓan kifog i ù kìi kìɓe, ù ghɛ̀ɛ̀sɛɛ ɗyɔ kì risii lɛ àa zɛy nnɛ ɗi ri rì ìtèɗ wulɛ ɗyɛɛ pɔnɔ̀sag ɓum; ɗyɛɛ̀ kìki kisay ki Bɛ̀ll lɛ ɗyɛɛ resi bim yiì ɓi ɓɛg ànɛ ŋwaànɛ à kìi kìɓe.

⁵Kìɓan kiǹ kɛɛ̀ki ki ghɛɛ̀sɛɛ lɛ mum a ki ɓɛ̀làmì mɛ̀wog, àa lɔŋ ɓaà lɛ yɛ̀ɛ a ririsi ribaŋì ɗi Bɛ̀ll, kìɓan kifog à ghɛ̀ɛ̀sɛɛ ɓɔ kì kìi mɛwog rì nɗem wulɛ com ki à ghɛ̀ɛ̀sɛɛ kì kìi kɛɛ ri.

⁶Ɓisu wìn miì nnɛ ɓì ti ɓì peeghì girig ɓɛ̀làmpoŋ̀; ɓumɓɛ ɓɛ ti ɓɛ tekì làmpoŋ̀ ɓɛ ri ɓɛ̀roɓɛ Bɛ̀ll à faghà ìtèɗ wulɛ ɓɛɛ kilag kìɓan kiǹ yɛ̀ɛ ki ghɛɛ̀sɛɛ.

⁷Lèɓkiina mum ǹcèm com ki ki ghɛɛ̀sɛɛ rì nyi, ɓì peeghì làmpoŋ̀ rì ŋwaànɛ a tɔtɔg mini làmpoŋ̀, ɓì peeghì tikis rì ǹtɔɔ̀gh-tikis, ɓì risàg ɓɛ̀roɓɛ ɓì ghɛ̀ɛ̀sɛɛ kì risii, ɓì ki nyaasag ɓɛroɓɛ ɓì ghɛ̀ɛ̀sɛɛ kì nyaasii.

⁸Kɛ̀ ɓi ɓa mum rì pon i ki yin lɛ pon anɛ lɛ ɓi kɔnɛn mìni rì mìni; lɛ ŋwaànɛ à keesii romum, à mɛ roozi ɓidɔ̀gsɛna yɛ̀ɛ kɛɛ̀ kɔ̀nkɔ̀n.

⁹Ɓisuulɛ ɓìdɔ̀gsɛna ɓi lɛ: Kɔ̀ɔ̀ kì fisɔ̀mɔ̀g, kɔ̀ɔ wey mum, kɔ̀ɔ yii com ki mum, kɔ̀ɔ lem com ki mum, rì ɓimbog ɓìcèm, ɓi ri ɓì ɓasɛn ɓi jɛ̀ɛ̀ ìnɛ lɛ: Ù rì ɓiì keesii romum ànɛ wɔ̀ jàŋbog yɛ̀ɛ wɛ̀ɛmìɗ.

¹⁰Ŋwaànɛ à rì rì ǹkɔ̀nɛ̀n à ti kɛ̀ɛ kì romum kìɓe, ǹkɔ̀nɛ̀n à rì syeesyee à rìroòzì ɗi ɓidɔ̀gsɛna.

¹¹Lɛ yɛ̀ɛ ɓì yii cààmɛ̀n ki tì rì miì ki, cààmɛ̀n ki ɓi ghemɓɛn min ɓi fìlo kɛɛ ti lɛ, ɓisuulɛ gòri ì ti ɓìsi jàŋbog ɓigomìnɛ, à cee lèg ànɛ ì ɓaghà ɓi cààmɛ̀n ki tì gherɛ̀ngà.

¹²Iru waa rim, duri i kɛ̀ɛ̀kɛ̀ɛ̀ yì, nni ti riniina ɓìɓan ɓi birìm, tì wotì ɓyom ɓi ribaŋì ɓi mum à rì lɛ à ɗùù rì ɓyɔ ɓi kìtɛɛtɛn.

¹³Tì ghɛ̀ɛ̀sɛɛ kì ghɛɓì cɛɓ ki ki ri lɛ tɛntɛ̀ɛ̀n ki ki ghɛɛ̀sɛɛ rì kìtɛɛtɛn ki ŋwos, tì womzɛ̀n ɗì dili, rì kìɓan ki riceesì ɗi rinɔ ɗi mɛrɔ̀g ɗì tìsɔ̀mɔ̀g, rì cɛɓ ki sààsaa, rì ɓɛ̀paàzì, rì yàaka.

¹⁴Kìɓan kifog, waatɛɛna Kan Yeesus Kiris kɛ̀ ɓi càɗ mɛrem min lɛ mɛɛ ɓɔm̀ɓɔm ɓìɓan ɓi ɓi mɛ̀mùù, lɛ di ɓi kaàkaa rìyɛ̀y ɗi ɓiɓan ɓiǹ.