Read Bafia RÒMƐŊ 14 Bible Online

RÒMƐŊ 14 - Bafia bible

RÒMƐŊ 14

¹Ghàɓkiina ŋwaànɛ à rì lɛ kpɔ̀gkpɔ̀g ɓi rìgherɛ̀n, kɛ̀ ɓi nyolɛn ri nyi ɓi mom̀zɛ̀n mɛ à rì rì mɔ ɓi kìɓan ki righerɛ̀n.

²Rìgherɛ̀n ɗi ŋwaàdɛŋ ɗi ri lɛ ɗi tinì nyi lɛ a ɗiɗi ɓyom ɓìcèm kɔlɛ ŋwaàmbog ànɛ rìgherɛ̀n ɗii ɗi teèsɛɛ ɓi, nyii ɗiɗì lɔŋ lɛ ɓìnyàa.

³Fɔɔnnɛ ŋwaànɛ a ɗiɗi ɓyom ɓìcèm à ghɛ̀ɛ̀sɛɛ ɓi lɛ à sɛɛtì roànɛ à yin ɓiì ɗiɗii, roànɛ à ki yin ɓiì ɗiɗii ɓyom lɛ ɓus ɓùs ɓus à ghɛ̀ɛ̀sɛɛ ɓi lɛ à sɛɛtì ŋwaànɛ a ɗiɗi ɓyom ɓìcèm ɓisuulɛ Bɛ̀ll à ghàɓkà ŋwaànɛ a ɗiɗi ɓyom ànɛ̀n.

⁴Wɔ̀ɔ̀ rì ghɛn anɛ ù rì lɛ ù yɔ̀m ǹkìì-kìsay a ɓɛ̀gan? Àa soo rì ǹsììrɛn ɓi kìsay kii, àa soo kpìi kìɓan kiǹ ki seesee masà wìì, nni à rì ɓiì ki sììrɛɛ ɓi kìsay kii kɛ̀ɛ kpì, lɛ Kan à rì rì ìtèɗ wulɛ à lènlèm nyi.

⁵Ŋwaàdɛŋ à ti à ghɛngì lɛ ɓɛ̀ŋwos ɓɛdɛŋ ɓɛ ceerɛɛ rì ɓɛm̀bog, ŋwaàmbog nyii ghɛngì ɓɛ̀ŋwos ɓɛ̀cèm lɛ ɓɛ ri lɔŋ com kìfog, mum ǹcèm à ghɛ̀ɛ̀sɛɛ kì konaagh ki yiì com ki a fèfeg ɓi nɗem wìì.

⁶Ŋwaànɛ a ghaghasi gòn a kìki fɔlɔɔ ɓisuu Kan, ŋwaànɛ a ɗiɗi ɓyom ɓìcèm a ɗiɗi ɓyɔ ɓisuu Kan, lɛ à ti à falàg Bɛ̀ll ɓìtògsɛ̀n; ŋwaànɛ à ti kɛ̀ɛ ɗi, à ti kɛ̀ɛ ɗi ɓisuu Kan, nyi girig à ti à falàg Bɛ̀ll ɓìtògsɛ̀n.

⁷Kɛ̀ɛ̀ ŋwaàdɛŋ ànɛ ɓi ɓìsi ànɛ à ti à ghɛɓkì ɓi kìrɔɔ kii ki nyimiɗ, kɛ̀ɛ̀ roànɛ à ti à wulàg ɓisuu nyimiɗ.

⁸Fɔlɔɔ yɛɛ lɛ i ti ghɛghɛ̀ɓ, ti ghɛghɛɓ ɓisuu Kan, i tì ki wii, tì wii ɓisuu Kan, nni fɔɔnnɛ tyàa soo ghɛghɛ̀ɓ, tyàa ki soo cuu, tì wooghrɛɛ lɔŋ ɗi Kan.

⁹Lɛ Kiris à wughà, à ki ghemɓɛn lɛ di a ɓa Kan ànɛ à làmii lɛ rì ɓìloŋ rì ɓum ɓɛ cem.

¹⁰Nni wɔ̀ɔ yɔmgi goni ɓisuucɛ? Nsoò lɛ wɔ̀ɔ sɛɛtag goni lɛ la? Ɓìsi ɓɛ̀sɛ̀ɛ̀ ɓɛ̀cèm tì rì ɓiì rɛlii ɓɛyɔ̀m ɓi kìkpana ki ɓɛyɔ̀m ki Bɛ̀ll.

¹¹Lɛ ki ri kìkànɛn lɛ: Kan a kpaaghi lɛ: Ǹɗì cem, ɓum ɓɛ̀cèm ɓɛ ri mɛ̀ ɓiì ɓaàgh mɛ̀ɗu asu, mum bimiɗ à làmɓɛ̀n jɛ̀ɛ̀ aɗyoo lɛ, Bɛ̀ll a teɗ rìkem.

¹²Fɔlɔɔ nnɛ mum ǹcèm ànɛ ɓi ɓìsi nyimìɗ yɛɛ ɓiì rèsii Bɛ̀ll cɛɓ ki à ghɛɓkà.

¹³Tì ghɛ̀ɛ̀sɛɛ min ki càri kiɓan ki rifiìfìɓɓɛ̀n ɗì rìfaàfàlɛ̀n, ɗi zɔɔ ɓi nyìinyìm wìs; ǹɗɛli wu ɓì ghɛ̀ɛ̀sɛɛ kì terì wu ri lɛ; kɔ̀ɔ kì kiɓan ki ki ri lɛ ki kɛɓtì goni fìɓàg nsoò lɛ ki tinì nyi lɛ a kpi ɓi kìɓe.

¹⁴Mɛ̀ ǹ-yii kɔɔ̀kɔɔ̀ à rìyi lɛ ɓi Yeesus Kiris com kidɛŋ ki yin ɗi kìsyeg ɓi kɔmiɗ, wɔ̀lɛ i ŋwaà ghɛɛ lɛ com kidɛŋ ki ri rì kìsyeg, com kìn ki ghay lɛ ki ti rì kìsyeg ɓisu wìì.

¹⁵I ù ɓeɓsii goni ǹɗem ɓi rìkuu ɗi ɓiɗilàg ɗidɛŋ ɗi u ɗiɗi, di ù rèsii tì ɓi ǹkɔ̀nɛ̀n yɛ̀ɛ ki ghɛɛ̀sɛɛ; ù ghɛ̀ɛ̀sɛɛ kì kɔ̀rii ɗyomzɛ̀n lɛ kɔ̀ɔ kì lɛ, ŋwaànɛ Yeesus Kiris à wughà ɓisu wii a ɗyaŋ̀ lɛ kìɓan ki ɓiɗilàg.

¹⁶Com ki mìnii ghɛɛ lɛ ki ri lɛ syeesyee, ki ghɛɛ̀sɛɛ ɓi ki ɓaà com ki kɛɛ ki lɛ ɓi totog ɓɛ̀geni ɓin kiɓe miì.

¹⁷Ɓisuulɛ kìlɔ̀ŋ ki Bɛ̀ll ki yin kiɓan ki riɗi rì rìnɔ, ki ri lɛ rì saaɗ rì fyòoog, rì kìnyàà ɓi Kìtɛntɛ̀ɛ̀n ki Nghay ki ti ki falàg.

¹⁸Ŋwaànɛ a kìki Kiris kìsay ɓikòò wìn, Bɛ̀ll a woki kirɔɔ rì nyi, ɓum ɓɛ ki sɛki nyi.

¹⁹Fɔlɔɔ nnɛ tì ghɛ̀ɛ̀sɛɛ min kikaà lɛ ti ki ɓìɓan ɓi ɓyɛɛ̀ kìki lɛ fyòoog a ɓa, ɓi ki fa ti ɓisi ɓɛ̀sɛ̀ɛ̀ ɓɛ̀cèm ìtèɗ ɓi rìgherɛ̀n.

²⁰Kɔ̀ɔ yogsi kisay ki Bɛ̀ll lɛ kìɓan ki ɓiɗilàg. Ki ri lɔŋ saaɗ lɛ ɓìɗilàg ɓìcèm ɓi ri kɛ̀ɛ̀ kìsyeg, wɔ̀lɛ ki ɓeɓtɛɛ lɛ mum a ɗi com di kìɓan kiǹ ki ri lɛ ki kɛɓtì ɓum ɓɛdɛŋ fìɓàg.

²¹Kìɓan ki ki ri syeesyee à kìɓan ki ri lɛ, kɔ̀ɔ ɗi ɓyɛn,[1] kɔ̀ɔ nɔ mɛrɔ̀g, ù lɛg com ki ki ri lɛ ki kɛɓtì goni fìɓàg.

²²Fèg ànɛ rìgherɛ̀n ɗyɔɔ ɗi faa wɔ̀ ɓi kìɓan kiǹ, ɓeŋa nyi ɓisu wɔɔ, ɓi mis mɛ Bɛ̀ll. Mààgh rì ŋwaànɛ à ti kɛ̀ɛ̀ falɛn nyimiɗ zɔɔ ɓi cààmɛ̀n ki à teri ǹɗɛli lɛ a ki kìɓan.

²³Wɔ̀lɛ i ŋwaà ɗii ɓìɗilàg ɓidɛŋ rì ìris ɓi nɗem, Bɛ̀ll à fa nyi bɛ̀lɛn ɓisuulɛ à kìi ɓi kiɓan kiǹ ɗì rìgherɛ̀n ɓi nɗem; fɔɔnnɛ kìɓan kicèm ki mum à rì lɛ à kì kɛ̀ɛ̀ rìgherɛ̀n ɓi nɗem ki ri kìɓe.