Read Bafia RÒMƐŊ 15 Bible Online

RÒMƐŊ 15 - Bafia bible

RÒMƐŊ 15

¹Ɓìsi ɓɛ tì rì rì ìtèɗ ɓi rìgherɛ̀n tì ghɛ̀ɛ̀sɛɛ kì ghɛɓsii ɓɛroɓɛ ɓɛ ri kɛ̀ɛ̀ ìtèɗ, lɛ ɓɛ̀ kɛɛ̀ càrɛn ɓi-ɓwɛɗ waa; tyɛ̀ ki kaa lɛ ti ki ɓìɓan ɓi ɓyɛɛ puɓsi ɓìsi nɗem.

²Mum ǹcèm ànɛ ɓi ɓìsi à ghɛ̀ɛ̀sɛɛ kì puɓsii geni nɗem ɓi kìɓan ki ki rɔɔtɛɛ, lɛ a siìrag nyi ɓi rìgherɛ̀n.

³Ɓisuulɛ Kiris à kaaghà ɓi com ki lɛ kɛɛ puùpùɓsì nyi ǹɗem, wɔ̀lɛ lɔŋ yɛ̀ɛ ki ri kì kànɛn lɛ: Tìfena ti ɓumɓɛ ɓɛɛ̀ feefengì wɔ̀ ti syɔngà rì mɛ̀.

⁴Kɔlɛ ɓìɓan ɓìcèm ɓi ɓɛ lokà kìkàni, ɓi kanɛ̀ngà ɓisuulɛ ɓyɛɛ fa ɓìsi ɗyomzɛ̀n, lɛ di ti ɓa rì dyàɓɛn ɓi bee ì rìnìɗ ɗi nɗem, rì rìfɔɔsì ɗi nɗem ɗi mɛ̀kànì mɛ ti mɛ falàg.

⁵Bɛ̀ll ànɛ a falag kinìri ki nɗem, à ki fɔɔsag mɛrem, à fa mìni ìtèɗ wulɛ ɓi woòghrɛn ɓi nyìinyìm wiǹ yɛ̀ɛ kɛɛ̀ kɔ̀ngi Yeesus Kiris.

⁶Lɛ di mìni ɓɛ̀sɛ̀ɛ̀ ɓɛ̀cèm ɓi ɓasɛn jɛ̀ɛ̀ bog lɛ ɓi kemzi Bɛ̀ll ànɛ à rì Seŋi Kan wìs Yeesus Kiris.

⁷Fɔɔnnɛ ghàaghàɓɓɛɛna mìni rì mìni rì syeesyee à nɗem fɛlɛ yɛ̀ɛ Kiris à ghàɓkà mìni ɓisuu rikem ɗi Bɛ̀ll.

⁸Mɛ̀ ǹkalii mìni lɛ Kiris à ti ǹkìì-kìsay a Ɓɛ̀yudɛ̀n lɛ a resi lɛ Bɛ̀ll a roozag mɛkàg mii, à ki sììrag mɛkàg mɛ à faghà ɓɛ̀seŋi ɓaa ɓɛ ɓɛsɛ̀ɛ̀.

⁹Ɓi san ànɛ a ɓumɓɛ ɓɛ yin Ɓɛ̀yudɛ̀n, ɓɔɔ̀ keekemzì Bɛ̀ll ɓisuu nɗem wu nyìinyìg wu à rì rì wɔ lɔŋ yɛ̀ɛ ki ri kìkànɛn lɛ: Ɓisuu kiɓan kiǹ nnɛ ǹɗi wɔ̀ ɓiì kemzii ɓi nyìinyìm à ɓìlɔ̀ŋ ɓi zɛy ǹki ghàɓ tyem ti tyɛɛ fa wɔ̀ rìkem.

¹⁰Ki ri tì kìkaliyɛn lɛ: Mìni ɓìlɔ̀ŋ ɓimbog nyààrɛɛna ǹɗaŋ ri kìlɔ̀ŋ kii.

¹¹Rì tì lɛ: Mìni ɓìlɔ̀ŋ ɓìcèm ɓɔgsiina Kan, mɛ̀kuu mɛ ɓum mɛ̀cèm mɛɛ fa nyi rìkem.

¹²Ezayii à kpaa girig lɛ: Fyàn fi Isayii fi ri ɓiì yùu, fi pɛsɛ̀n aɗyoo lɛ fyɛɛ lami ɓìlɔ̀ŋ ɓi zɛy, ɓìlɔ̀ŋ ɓiǹ ɓi ki foŋ dyàɓɛn yaà ɓi nyi.

¹³Bɛ̀ll ànɛ à ti à falàg ɓum dyàɓɛn ɓi nɗem a roòzi mìni lɛ rì kìnyàà, rì fyòoog ɓi nɗem lɛ pisa ɓi rìgherɛ̀n, di dyàɓɛn yiǹ yɛ̀ɛ roǹ ì sòsòɓ rì ìtèɗ wu Kitɛntɛ̀ɛ̀n ki Nghày.

¹⁴Ɓɔɔsoŋ̀, ɓi kìɓan ki ki seesee mìni, mɛ̀ɛmiɗ ǹ-yii kɔɔ̀kɔɔ̀ à rìyi lɛ, ɓì rì ɓɛ̀ronɛn ɗi kìrɔɔ-ǹɗem lɛ pisa, ɓi ki konag ki yiì ɓìɓan ɓi mum à ghɛ̀ɛ̀sɛɛ lɛ a yi; ɓì ki rì rì ìtèɗ wulɛ ɓì reèrèɓɓɛ̀n mìni rì mìni.

¹⁵Nsoò fɔlɔɔ mɛ̀ ǹkàniì mìni rì kìghɛɛsii lèg àdɛŋ, lɛ nghem̀zi mìni mɛ̀rem ɓi ɓìɓan ɓi ɓì ɓaghà di ɓyàa yilàg, mɛ̀ɛ ǹkàniì fɔlɔɔ, lɛ geesɛ̀n ìnnɛ Bɛ̀ll à rèsìghà mɛ̀,

¹⁶lɛ mɓa ǹkìì-kìsay a Yeesus Kiris ɓisuu ɓumɓɛ ɓɛ yin Ɓɛ̀yudɛ̀n, fɔɔnnɛ nɗooroòzì kìsay ki righagsì ɗi Syeesyee à Ɓɔlɛ à Bɛ̀ll, kɛɛ ri kìsay ki ki ri kìtɛnɛn, lɛ di ɓumɓɛ ɓɛ yin Ɓɛ̀yudɛ̀n ɓɛɛ ɓa fɛlɛ yɛ̀ɛ rìfa ɗi ɗyɛɛ̀ rɔɔghi Bɛ̀ll; ɗyɛɛ̀ɗi Kìtɛntɛ̀ɛ̀n ki Ǹghay ki mɛ tɛɛ̀zì.

¹⁷Ǹɗì min lɛ ǹsanɛ̀n kìsay ki nkìki Bɛ̀ll ɓi Yeesus ɓi ɗùm.

¹⁸Ɓisuulɛ ǹ-yin lɛ ǹfèg kìɓùŋi kìɓan kidɛŋ ki ki yin ki Kiris yɛɛ kighà di à faa mɛ̀ ìtèɗ wulɛ nki, lɛ di a syoŋ yì ɓumɓɛ ɓɛ yin Ɓɛ̀yudɛ̀n lɛ ɓɛɛ ki Bɛ̀ll mɛ̀wog. À kìghà kìɓan kiǹ lɛ rì ɓi ɓìtòkì, rì ɓi ɓìɓan ɓi à kìkìghà,

¹⁹rì ìtèɗ wu dàm rì ɓɛ̀koŋnyoo ɓɛ ɓiɓan, ɓi-tèɗ wu Kitɛntɛ̀ɛ̀n ki Nghay. Fɔɔnnɛ mɛ̀ɛ nghagsii Syeesyee à Ɓɔlɛ à Kiris lɛɛ̀gwey, à tumɛ̀n a Yorisalɛm à kɛ̀n kì kpaŋì a Ilirii.

²⁰Ǹfalɛ̀ngà mɛ̀ɛmiɗ rikem ɗi lɛ nkakali Syeesyee à Ɓɔlɛ lɔŋ ɓi jàŋ yi ɗii di Kiris ɗi ɓaghà di ɗi ka ɓuŋ̀ɗɛn ɓi, lɛ kɛ̀ɛ nki ɓa lɛ ǹtoŋ ɓi jàŋ inɛ ŋwaàdɛŋ à ɓaghà di à mɛ yàghɛn kitoŋ, wɔ̀lɛ lɔŋ yɛ̀ɛ ki ri kìkànɛn lɛ:

²¹Ɓɛ̀roɓɛ à kalɛ̀ngà ɓi a lɔ̀ŋkaa ɓɛ ri nyi ɓiì ghɛɛ̀, nsoò ɓɛ̀roɓɛ ɓɛ wokà ɓi di ɓɛɛ̀ kakali kiɓan kii, ɓɛ ri ɓiì woògh.

²²Kìɓan kiǹ kɛ yaà rèrèg mɛ̀ rìyù ɗi a lɔ̀ŋkin.

²³Nni ɓigomìnɛ, m̀mɛ lègsi kisay kɛm̀ ɓi ɓìlànà ɓi zi ɓi fɛ. Ki ti bèg lɛɛ̀gwey yɛ̀ɛ maà ɓeɓèg lɛ n-yu a lɔ̀ŋkin; yɛ̀ɛ ǹɗi ɓa ɓi rìkɛ̀n a Kpanya,

²⁴ɓisuulɛ ǹɗì rì dyàɓɛn lɛ ǹɗi ghɛn mini ɓi rìkɛ̀nkɛ̀n, ɓì ki ghɛɓsi mɛ lɛ nkpaŋ wɔɔ di m̀mɛ ka wog gàɓ ì kìnyàà ɓi cààmɛ̀n ki nɗi ghagsi a lɔ̀ŋkin.

²⁵Nni wɔ̀lɛ ɓi cààmɛ̀n ki, ǹkɛ̀ɛ a Yorisalɛm ɓisuu fitom fi fi seesee ɓɛ̀gherɛ̀n ɓɛ wɔɔ.

²⁶Ɓisuulɛ ɓɛ̀gherɛ̀n ɓɛ a Masedwan rì ɓɛ̀roɓɛ a Akayi ɓɛ nghɛɛ kìrɔɔ lɛ ɓɛɛ syɔɔ̀ mɔ̀ɔ̀mi ɓisuu ɓumɓɛ ɓɛ ri nyìinyìg ɓi nyìinyìm à ɓɛ̀gherɛ̀n ɓɛ a Yorisalɛm.

²⁷Lɛ ɓɔmiɗ ɓɔ yɛɛ reǹgà kìɓan kiǹ, ki ki ghɛ̀ɛ̀sɛn fɔlɔɔ lɛ, i ɓumɓɛ ɓɛ yin Ɓɛ̀yudɛ̀n ɓɛ ti rì gàɓ ɓi ɓìrɔɔ ɓi ɓi nghay ɓi ɓi ɓaghà ɓisuu Ɓɛ̀yudɛ̀n, ɓɛ ghɛɛ̀sɛɛ girig ɓɔ kì ghɛɓsii cààmɛ̀n ki ɓɛ ri rì mɛ̀tɔɓ mɛ kisoghà.

²⁸Ǹɗi ɓa lɛ, i màa kì kiɓan kiǹ, ǹfa ɓɔ com ki ki ri kpaŋ ɓi syɔ̀ɔ̀ ànɛn, fɔɔnnɛ ǹɗì min ɓiì kɛ̀ɛ a Kpanya, ǹki fyee yi a lɔ̀ŋkin ɓi rìkɛ̀nkɛ̀n.

²⁹Ǹ-yii lɛ, yɛ̀ɛ ǹɗi yù a lɔ̀ŋkin, ǹɗi yuiy rì ɓɛ̀mààgh ɓɛ̀cèm ɓɛ yɛ̀ɛ Kiris.

³⁰Ɓɔɔsoŋ̀, mɛ̀ ǹtɔɔgh mìni ɓisuu Kan wìs Yeesus Kiris, rì ɓisuu nkɔ̀nɛ̀n ànɛ Kìtɛntɛ̀ɛ̀n ki Nghay ki ti ki falàg lɛ, ɓi lem̀ mɛ̀ ɓyàg ɓi zàà ìnɛ ǹɗì miì, rì bɔ̀ŋzɛ̀n yi ɓì rì ɓiì ɓɔ̀ɔɓɔŋ̀zì Bɛ̀ll ɓisu wɛ̀m.

³¹Di fɔɔnnɛ nghɛɓ ɓumɓɛ ɓɛ yin ɓɛ kìristɛn a Zyude, rì tì lɛ ɓɛ̀gherɛ̀n ɓɛɛ ghaɓ gɛɓsɛ̀n ìnɛ ǹɗì ɓiì kɛ̀ɛ ri yɔ̀ a Yorisalɛm rì kìnyàà.

³²Fɔlɔɔ nnɛ ǹɗì ɓiì kpaŋì a lɔ̀ŋkin ɗi kìnyàà di Bɛ̀ll à kɔ̀ni, ǹki fɔɔsɛn a lɔ̀ŋkin lèg àdɛŋ.

³³Bɛ̀ll à fyòoog a ɓa rì mìni ɓɛ̀sɛ̀ɛ̀ ɓɛ̀cèm. Ààmɛ̀n.