Read Bafia RÒMƐŊ 2 Bible Online

RÒMƐŊ 2 - Bafia bible

RÒMƐŊ 2

¹Fɔlɔɔ nnɛ wɛ̀ɛmiɗ anɛ u yɔ̀myɔm ɓum, ù yin ɗi com ki kpaayɛn ɓisuulɛ cààmɛ̀n ki u yɔ̀myɔm ɓɛro, kɛɛ̀ki u faafàlɛ̀n wɛ̀ɛmiɗ bɛ̀lɛn, lɛ wàànɛ u yɔ̀myɔm ɓum ù ti ù kìlàg girig ɓìɓan ɓi ɓɔɔ ti ɓɛ kilàg.

²Ɓìsii yii lɛ rìyɔ̀m ɗi Bɛ̀ll à ɓiì yɔ̀mi ɓumɓɛ ɓɛɛ̀ kìki mɛkuu mɛ ɓiɓan mɛ fɔlɔɔ ɗi ri ɓiì ɓaà yɛ̀ɛ saaɗ à rì.

³Wàànɛ ù ti ù yɔ̀mgì ɓumɓɛ ɓɛ ti ɓɛ kilàg fɔlɔɔ, wɔ̀ɔ̀ ki kìki ɓiɓan ɓyɔm̀ ɓiǹ, u fèki nya lɛ ù ɓiì ghɛɓì ɓɛ̀yɔ̀m ɓɛ Bɛ̀ll?

⁴Gìn wɔ̀ɔ sɛɛsɛɛ̀tì lɛ rì coo kìrɔɔ-ǹɗem à Bɛ̀ll rì kìɓìɓi kii ki nɗem, rì kìpuɓì-ǹɗem wìì? Ù yii ɓi lɛ kìrɔɔ-ǹɗem à Bɛ̀ll à ghɛ̀sɛɛ wɔ̀ kì tinii lɛ u lɔɔ̀ghrɛn ǹɗem?

⁵Kìɓan kifog, rìɓa ɗi ǹɗem wɔɔ wu ri wù tèrɛn, rì yɛ̀ɛ ù kɔ̀ni ɓi lɛ u lɔɔ̀ghrɛn ǹɗem, u taataŋzàg wɛ̀ɛmiɗ coo bim i Bɛ̀ll ɓi nyòò; bim inɛ̀n ì ri rèsɛn ŋwos anɛ Bɛ̀ll à ri sàɗ bim yiì; ŋwos anɛ̀n rìren ɗii ɗi ɓiɓan ɗi ɗi ri lɛ saaɗ ɗi ri yilɛ̀n,

⁶yɛ̀ɛ à ri lèɓ mum ǹcèm lɔŋ yɛ̀ɛ rìkì ɗii ɗi ri.

⁷Fɔlɔɔ nnɛ ɓumɓɛ ɓɛ siìrɛ̀ngà ɓi rìkì ɗi kirɔɔ, ɓɛ kaakàà rìkem ɗi yɛ̀ɛ Bɛ̀ll, rì ǹnyàasɛ̀n, rì cɛɓ ki kɛ̀ kɛɛ̀ lèg, Bɛ̀ll fa ɓɔ cɛɓ ki fiɗyàɓ fikɔ̀ɔ̀.

⁸Wɔ̀lɛ ɓɛ̀roɓɛ ɓɛ ti ɓɛ kilàg nyi ǹtoòtèɗ, ɓɛ̀ kɛɛ̀ kɔ̀n lɛ ɓɛɛ wog com ki saaɗ a kakàlì, lɔŋ kìtɛ̀ŋtɛ̀ŋ kɛɛ̀ki ɓɔɔ nɔɔ̀nɔ̀ɔ̀tì, Bɛ̀ll à rèsì ɓɔ lɛ, rì bim yiì, ɗì rìbaŋì ɗii.

⁹Rìkɛŋ ɗì mɛ̀riighrikì ɓi ri ɓiì sɛnì ɓi mum bimiɗ ànɛ à ti à kìlàg ɓìɓan ɓi ɓeɓtɛn, à tumɛ̀n lɛ muu Ɓɛ̀yudɛ̀n à kpaŋ lɛ ŋwaànɛ à yin muu Ɓɛ̀yudɛ̀n.

¹⁰Wɔ̀lɛ Bɛ̀ll à rì ɓiì kìi lɛ, à kemzì, à ki nyaasi mum ǹcèm ànɛ à ti à kìlàg kìrɔɔ, à fa nyi fyòoog, à tumɛ̀n lɛ muu Ɓɛ̀yudɛ̀n à kpaŋ lɛ ŋwaànɛ à yin muu Ɓɛ̀yudɛ̀n.

¹¹Ɓisuulɛ ǹlànag wu yin yɛ̀ɛ Bɛ̀ll.

¹²Ɓum ɓɛ̀cèm ɓɛ ɓɛ kighà kìɓe, ɓɛ̀ kɛɛ̀ yi ɓidɔ̀gsɛna ɓi Bɛ̀ll à faghà Moyis, ɓɛ ɓiì cuù kɛ̀ɛ̀ ɓìdɔ̀gsɛna ɓincèm. Ɓɛ̀sɛ̀ɛ̀ ɓɛ̀cèm ɓɛ ɓɛ kighà kìɓe di ɓɛ ti rì ɓìdɔ̀gsɛna, ɓɛ ri ɓɔ ɓiì yɔ̀mi ri ɓìdɔ̀gsɛna ɓyɔm̀ ɓiǹ.

¹³Àa ɓumɓɛ ɓɛɛ̀ wowog ɓidɔ̀gsɛna ri mɛ̀reè ɓɛɛ ri lɛ saaɗ ɓi mis mɛ Bɛ̀ll, lɔŋ ɓɛ̀roɓɛ ɓɛ ti ɓɛ kilàg yɛ̀ɛ ɓìdɔ̀gsɛna ɓyɛɛ̀ kakàlì, ɓɛɛ̀ɓɛ àri ghɛn lɛ ɓɛ ri lɛ saaɗ.

¹⁴I ɓumɓɛ ɓɛ yin Ɓɛ̀yudɛ̀n, ɓɔ kɛ̀ɛ̀ ɓìdɔ̀gsɛna ɓi Bɛ̀ll à faaghà Ɓɛ̀yudɛ̀n, ɓɛɛ̀ kìki ɓiɓan ɓi ɓìdɔ̀gsɛna ɓyɛɛ̀ tɔtɔg lɔŋ ɓɔmiɗ, kɛ̀ɛ̀ com ki ki resii ɓɔ lɛ ɓɛɛ ki fɔlɔɔ, di ɓɛ ti fɛlɛ yɛ̀ɛ ɓìdɔ̀gsɛna, ɓisu waa wu ɓɔmiɗ, nsoò yɛ̀ɛ ɓɛ yin ɗi ɓìdɔ̀gsɛna.

¹⁵Ɓi rìkì ɗiǹ, ɓɛ resii yɛɛ lɔɔ lɛ ɓìdɔ̀gsɛna ɓi ri ɓɔ ɓìkànɛn ɓi nɗem; fɔlɔɔ nnɛ ǹɗem waa wu ɓi ɗùm wɛɛ̀ rèresi girig kìɓan kiǹ. Mɛ̀yitì maa mɛ kikì lɛ, ɗi ɗi yii mɛ fa ɓɔ zɔɔ, ɗi ɗi yii, mɛ kamɛ̀n rì ɓɔ.

¹⁶Kìɓan kiǹ kɛɛ ri ghɛnɛn ŋwos anɛ Bɛ̀ll à ri yɔm̀ ɓi Yeesus Kiris ɓìɓan ɓi ɓum ɓɛ ti ɓɛ kilàg a rìnyam; fɔlɔɔ nnɛ Syeesyee à Ɓɔlɛ ànɛ mɛ̀ɛ nghaaghagsì ɓum a rèrèsì.

¹⁷Wàànɛ u reeghreŋ̀ɗɛ̀n lɛ muu Ɓɛ̀yudɛ̀n, ù ghɛɛ̀ghɛ̀gmɛ̀n ɓi ɓìdɔ̀gsɛna, ù saàsànɛ̀n lɛ ù rì ɓi rìghan ɗi Bɛ̀ll,

¹⁸ù yii rìkɔ̀n ɗi Bɛ̀ll, ɓìdɔ̀gsɛna ɓii ɓi mɛ rèsag wɔ yɛ̀ɛ ù rì lɛ ù yi lɛ kìɓan ki kɛɛ ɓiisɛɛ kì ɓaà rì gɛɓsɛ̀n.

¹⁹Wɔ̀ɔ fèfeg lɛ wɔ̀ yɛɛ ri ŋwaànɛ à ɓanɓani ɓɛ̀ɗyaŋɗyàŋ ɓi kìgeŋ, ù kɛ̀ɛ̀kɛ̀ɛ̀sì ɓɔ wɔ̀ tì kìtɛɛtɛn ki ɓɛroɓɛ ɓɛ ri ɓi ɓirìm,

²⁰ù rì roànɛ à ti à reɓkàg ɓìdùŋdùŋ ɓi ɓum, ù ki ɓa nɗèsàg à ɓɔɔɓɔɓti ɓisuulɛ ù rì rì com ki kɛɛ̀ rèresi wɔ rìyi ɗi ɓiɓan ɗyɔmiɗ, rì saaɗ ɓi ɓìdɔ̀gsɛna ɓiɗùm.

²¹Wàànɛ ù ti ù rèrèsì ɓum ɓɛdɛŋ ɓìɓan, kɔ̀ɔ ka rèsi ɓaà wɛ̀ɛmiɗ? Ù kpaakpàà ɓum lɛ ɓɛ̀ kɛɛ̀ yii com, wɔ̀ yiiyìì ɓyom.

²²Ù rèrèg ɓum tìsɔ̀mɔ̀g, kìɓan kifog wɔ̀ɔ̀ kìkì; ù ɓèèzɛ̀n ɓìnùn yɛ̀ɛ mɛ̀nɔ̀ɓɔ̀ nni lannɛ u pyèepyeèzɛ̀n mis rì zàŋ ɓi naa yi ɓɛɛ̀ ɓɔɔɓɔgsì ɓìnùn miì?

²³Ù kaàkàlɛ̀n lɛ ù rì rì ɓìdɔ̀gsɛna ɓi Bɛ̀ll, kìɓan kifog ù sòòsòòtì Bɛ̀ll ɗì rìkìkì ɗi ɓiɓan ɓi ɓìdɔ̀gsɛna ɓii ɓi gherɛɛ ɓi lɛ ɓɛɛ kilag.

²⁴Ɓisuulɛ ɓìlɔ̀ŋ ɓi zɛy ɓyɛɛ̀ sɛɛsɛɛ̀tì ɗii ɗi Bɛ̀ll lɛ rìkì ɗin, lɔŋ yɛ̀ɛ ki ri kìkànɛn.

²⁵Ki ri saaɗ lɛ kɛ̀rɛ̀n à ghɛɓsii, di ù ɓèŋi ɓìdɔ̀gsɛna, kìɓan kifog, uù sɛɛtii ɓìdɔ̀gsɛna, kɛ̀rɛ̀n wɔ̀ɔ̀ à ɓa lɔŋ yɛ̀ɛ ù ka kɛrɛ̀ngà ɓi.

²⁶Nni i ŋwaànɛ à ka yin nkɛ̀rɛn a ɓèŋɓeŋ mɛsiŋdɛn mɛ ɓi ɓìdɔ̀gsɛna ɓi Bɛ̀ll, rìɓa ɗi à yin nkɛ̀rɛn ɗi yin nya lɛ Bɛ̀ll à teɗ ɗyɔ ɓi sìg à kɛ̀rɛ̀n?

²⁷Ŋwaànɛ yin nkɛ̀rɛn, kìɓan kifog à ɓèŋɓèŋ mɛ̀siŋdɛn mɛ ɓi ɓìdɔ̀gsɛna, à ɓiì renì kìɓan ki wàànɛ u sɛɛsɛɛ̀tì ɓìdɔ̀gsɛna nsoò yɛ̀ɛ ù rì rì kaàtà à ɓìdɔ̀gsɛna, ù ki ɓa nkɛ̀rɛn.

²⁸Ɓisuulɛ muu Ɓɛ̀yudɛ̀n à kɔɔ̀kɔɔ̀ à yin lɔŋ lɛ ŋwaànɛ a seeseèrɛ̀n ɓi mis lɛ à rì muu Ɓɛ̀yudɛ̀n, nsoò lɛ à ɓa nkɛ̀rɛn kɛ̀rɛ̀n ànɛ ɓɛɛ̀ seesee ɓi nyòò.

²⁹Wɔ̀lɛ muu Ɓɛ̀yudɛ̀n à rì lɔŋ ŋwaànɛ rì rì nɗem wu Ɓɛ̀yudɛ̀n. Fɔlɔɔ nnɛ syeesyee à kɛ̀rɛ̀n à rì kɛ̀rɛ̀n ànɛ ɓi nɗem, ànɛ a kìikilɛ̀n rì Ǹghay à Bɛ̀ll, kɛ̀ɛ ɓa anɛ à rì yɛ̀ɛ ki ri ki kànɛn ɓi kaàtà à ɓìdɔ̀gsɛna. Mɛ̀sɛɛ̀ghsɛɛgh mɛ rikuu ɗi muu Ɓɛ̀yudɛ̀n ɗi fɔlɔɔ mɛ ti mɛ̀ kɛɛ̀ ɓayi a ɓum, mɛ ti mɛ ɓalàg yì lɔŋ yɛ̀ɛ Bɛ̀ll.