Read Bafia RÒMƐŊ 4 Bible Online

RÒMƐŊ 4 - Bafia bible

RÒMƐŊ 4

¹Cɛ kɛɛ̀ki tì rì lɛ tì kpaatì min ɗi Abiraham à seŋi wìs a ǹsɛ̀ɛ̀ ànɛ ɓi mɛ̀mùù? Cɛ kɛɛ̀ki à fɔ̀ngà?

²I Bɛ̀ll à ghɛngà lɛ Abiraham à rì saaɗ à mum ɓi mɛ̀kìkì mii, di à rì lɛ à saàsànɛ̀n; kìɓan kifog, kɛ̀ɛ sanɛn ɓi mis mɛ Bɛ̀ll.

³Ɓisuulɛ kaàtà à Bɛ̀ll à kpaa lɛ Abiraham à gherɛ̀ngà Bɛ̀ll, kìɓan kiǹ kɛɛ̀ki Bɛ̀ll à ghɛngà nyi miì lɛ à rì saaɗ à mum.

⁴Kɔlɛ mɛ̀lèɓ mɛ ŋwaànɛ à kìi kìsay mɛ yin lɛ ɓɛ kpaa lɛ geesɛ̀n yɛɛ̀nɛ ɓɛ kii nyi; mɛ ri lɔŋ mɛlèɓ mɛ à ghɛ̀ɛ̀sɛɛ kì terì.

⁵Wɔ̀lɛ i mum à kìi ɓi kisay, kìɓan kifog à gherɛ̀n Bɛ̀ll ànɛ à ti à kìlàg lɛ ǹkì-kìɓe a ɓa lɛ saaɗ ɓi mis mii, rìgherɛ̀n ɗii ɗi ki lɛ Bɛ̀ll a ghɛǹ nyi lɛ saaɗ à mum.

⁶Kìɓan kiǹ kɛɛ̀ki Davit à rèsii kìnyàà ki ŋwaànɛ Bɛ̀ll à teri lɛ saaɗ à mum, kɛ̀ɛ fiɓi mɛkìkìì mii.

⁷Mààgh rì ɓumɓɛ Bɛ̀ll à mɛ kì lɛ: à càɗ mɛ̀nànì maa, à ki cenɛn ɓɔ ɓìɓe ɓyàa.

⁸Mààgh rì mum ànɛ Bɛ̀ll à ɓàli ɓi kiɓe kii.

⁹Nni kìnyàà kiǹ ki ri nya lɔŋ ɓisuu ɓumɓɛ ɓɛ ri ɓɛ̀kɛ̀rɛn gìn ki ri girig ɓisuu ɓɛroɓɛ ɓɛ yin ɓɛkɛ̀rɛn? Tì kalii yì lɛ: Bɛ̀ll à ghɛngà Abiraham lɛ saaɗ à mum ɓisuu righerɛ̀n ɗii.

¹⁰Kìɓan kiǹ ki kilɛ̀ngà ɓi cààmɛ̀n ki be? Ki ɓaghà di Abiraham à ti ǹkɛ̀rɛn giǹ di à ka yin ǹkɛ̀rɛn? Ki kilɛɛ ɓi di à mɛ kɛ̀rɛ̀n; ki ɓaa lɔŋ di à ka yin ǹkɛ̀rɛn.

¹¹Fɔlɔɔ nnɛ ɓɛ faghà nyi kɛ̀rɛ̀n ɓi sìg à kìrèmzɛnà ki lɛ, à rì saaɗ à mum lɛ rìgherɛ̀n, cààmɛ̀n ki à ɓaghà di à ka kɛrɛn ɓi; kìɓan kiǹ kɛɛ̀ki à rì miì seŋi ɓum ɓɛ̀cèm ɓɛ ɓɛ gherɛɛ, nsoò ɓɛ̀roɓɛ ɓɛ yin ɓɛ kɛ̀rɛn, lɛ di ɓɛɛ ɓa lɛ saaɗ ɓi mis mɛ Bɛ̀ll.

¹²À rì tì girig seŋi ɓumɓɛ ɓɛ ri ɓɛ̀kɛ̀rɛn, ɓɛ ɓɛ rɔɓi ɓi lɔŋ lɛ kɛ̀rɛ̀n nyi rì nyi, kìɓan kifog ɓɛ ɓɛɛ̀ nɔ̀ɔnɔɔ̀tì kìfèèghrɛnà ki righerɛ̀n ɗi Abiraham à seŋi wìs a ɓaghà rì ɗyɔ, di à ka kɛrɛn ɓi.

¹³I Bɛ̀ll à kàkà Abiraham rì dòò yii lɛ ɓɛ ri ɓiì fɔ̀ni zi ɓi mɛ̀wus, ǹkàg wiǹ wu falɛ̀ngà ɓi ɓisuulɛ Abiraham à ɓègà ɓìdɔ̀gsɛna; kìɓan kifog Bɛ̀ll à faghà nyi ǹkàg wiǹ lɛ à ghɛngà nyi lɛ à rì lɛ saaɗ ɓi mis mii lɛ rìgherɛ̀n.

¹⁴I mum àa tekì mɛ̀wus mɛ ɓi ǹkàg wu Bɛ̀ll à faghà lɛ rìɓèŋ ɗi ɓidɔ̀gsɛna, di rìgherɛ̀n ɗi yin min ɗi gɛɓsɛ̀n, ǹkàg wiǹ wu ɓa com ki zɛy.

¹⁵Ɓisuulɛ ɓìdɔ̀gsɛna ɓi ti ɓi syogàg yì bim i Bɛ̀ll, rì tì lɛ mum à yin lɛ à kpì kìdɔ̀gsɛna jàŋ inɛ ɓìdɔ̀gsɛna ɓi yin.

¹⁶Fɔlɔɔ nnɛ ǹkàg wu falɛ̀ngà lɛ rìgherɛ̀n lɛ di wɛɛ ɓa yɛ̀ɛ rìɓòò ɗi Bɛ̀ll à kìi ɓum zɛy rì zɛy, wu ɓa ɓisuu dòò yi Abiraham yìcèm, wɛ̀ kɛɛ̀ ɓa lɔŋ lɛ ɓisuu dòò yi yɛɛ̀ ɓèŋɓeŋ ɓidɔ̀gsɛna; wu ɓa tì girig ɓisuu ɓɛroɓɛ ɓɛ gherɛɛ lɔŋ yɛ̀ɛ Abiraham à seŋi wìs a ɓɛ̀sɛ̀ɛ̀ ɓɛ̀cèm à gherɛ̀ngà, lɔŋ yɛ̀ɛ ki ri kìkànɛn lɛ:

¹⁷Ǹɗɛsìghà wɔ̀ lɛ u ɓa seŋi à ɓìlɔ̀ŋ lɛ ɓìlɔ̀ŋ. Abiraham à rì seŋì wìs ɓi mis mɛ Bɛ̀ll ànɛ nyii gherɛ̀ngà, Bɛ̀ll ànɛn nnyɛɛ ti à falàg ɓìloŋ cɛɓ, à ki kìlag lɛ com ki ki ka ɓaghà ɓi, kɛɛ ɓa.

¹⁸Abiraham à kìghà lɛ, à gherɛ̀n, à ki ɗyàɓag, jàŋ inɛ com ki mum à ɓaghà lɛ à ɗyàɓàg ki ɓaghà ɓi; fɔlɔɔ nnɛ à ghalà seŋi ɓìlɔ̀ŋ lɛ ɓìlɔ̀ŋ lɔŋ yɛ̀ɛ Bɛ̀ll à kpaaghà nyi lɛ: Dòò yɔɔ yi ɓaa gɛ bàlì fɛlɛ.

¹⁹Fɔlɔɔ nnɛ rìgherɛ̀n ɗii ɗi fɔghìghà ɓi, kɛ̀ɛ ki foŋ nto ɓi rìɓa ɗi lɛ nyoo yìì i ti ǹtɔ̀gtiyɛn, lɛ à ɓaghà di à ti nunùg bèg mɛ̀tin mɛtaǹ, Sara kɛ̀ɛ ki ɓa ti giɓ a cem ànɛ à sòɓtì cɛ̀y.

²⁰Ɓi nkàg wu Bɛ̀ll à faghà nyi, à tekà ɓi nyoey lɛ a tuùzi, kìɓan kifog rìgherɛ̀n ɗii ɗi fatìghà nyi ìtèɗ, à ki fa Bɛ̀ll rìkem.

²¹A gherɛ̀ngà rì ǹɗem wii wucèm lɛ Bɛ̀ll à rì rì ìtèɗ wulɛ à ki com ki à kàagh lɛ à ɓiì kìi.

²²Kìɓan kiǹ kɛɛ̀ki Bɛ̀ll à ghɛngà nyi miì lɛ à rì saaɗ à mum.

²³Wɔ̀lɛ àa ɓisu wii cɛ̀ncii nnɛ ki ri kìkànɛn lɛ, ɓɛ ghɛngà nyi lɛ saaɗ à mum ɓisuu kiɓan kiǹ.

²⁴Ki ri girig kìkànɛn ɓisu wis; ɓìsi ɓɛ rìgherɛ̀n ɗis ɗi ɓiì ki lɛ Bɛ̀ll a ghɛǹ ɓìsi lɛ ɓum ɓɛ saaɗ, lɛ rìgherɛ̀n ɗi tì gherɛɛ roànɛ à ghèmzìghày a ɓìloŋ Kan wìs Yeesus.

²⁵Yeesus ànɛ̀n nnɛ ɓɛ kaɓkà ɓisuu ɓiɓe ɓis, à ghèmɓɛ̀n a ɓìloŋ lɛ di ti ɓa lɛ saaɗ ɓi mis mɛ Bɛ̀ll.