Read Bafia RÒMƐŊ 5 Bible Online

RÒMƐŊ 5 - Bafia bible

RÒMƐŊ 5

¹Yɛ̀ɛ tì ti min ɓumɓɛ ɓɛ ri lɛ saaɗ ɓi mis mɛ Bɛ̀ll lɛ rìgherɛ̀n, tì yiìdi ɓi paàzì rì Bɛ̀ll lɛ Kan wìs Yeesus Kiris.

²Nnyɛɛ mɛ kì lɛ, ti ɗiŋi ɓi geesɛ̀n ì Bɛ̀ll ìnɛ tì ti ìnɛ miì ǹsììrɛn lɛ rìgherɛ̀n, com ki ti nyàànyàà ki ri dyàɓɛn ìnɛ tì rì rì yɔ̀ lɛ tì rì ɓiì ɓaà rì gàɓ ɓi rìkem ɗi Bɛ̀ll.

³Àa lɔŋ foo ri foo, ti nyàanyaàrɛ̀n girig rì mɛ̀tɔɓ mis, lɛ tì yii lɛ ǹtɔɓ wu ti wu kilàg lɛ mum a ɓa rì kìsììrì,

⁴kìsììrì ki kilàg lɛ, mum a ceè mɛ̀fèèghrɛn, rìcee ɗi mɛfèèghrɛn ɗiǹ, ɗi fogì mum dyàɓɛn ɓi nɗem.

⁵Fɔlɔɔ nnɛ dyàɓɛn inɛ̀n ì ti yɛ̀ kɛɛ̀ ɓɔ̀ŋ ɓisi ɓisuulɛ Bɛ̀ll à ɗyɛɛghà ǹkɔ̀nɛ̀n wìì ɓi mɛ̀rem mis, rì Kìtɛntɛ̀ɛ̀n ki Nghay ki à faghà ɓìsi.

⁶Ɓisuulɛ, cààmɛ̀n ki tì ɓaghà di tì ka yin ɗi ìtèɗ, Kiris à wughà ɓisuu ɓiɓeɓtàg ɓi ɓum, ɓi cààmɛ̀n ki Bɛ̀ll à siŋdɛ̀ngà.

⁷Ki ɓaghà ǹtɔɓ lɛ mum a gherɛn lɛ a wu ɓisuu mum à saaɗ; mum à ɓaghà nya lɛ à cenɛ̀n lɛ a wu ɓisuu ŋwaànɛ à rì rì syeesyee à ǹɗem.

⁸Wɔ̀lɛ kìɓan ki Bɛ̀ll a rèsag ǹkɔ̀nɛ̀n wìì ɓi ɓɛg wìs ki ri lɛ: Kiris à wughà ɓisu wis, cààmɛ̀n ki tì ɓaghà di tì kaka ɓɛ̀kìì-kìɓe.

⁹I bwaɓ yii yi mɛ ka kì lɛ ti ɓa lɛ saaɗ ɓi mis mɛ Bɛ̀ll ɓigomìnɛ, di rì ɗi lɛ a ghɛɓsi ɓìsi lɛ bim i Bɛ̀ll yɛ̀ kɛɛ̀ kpaŋ a lɔ̀ŋkis.

¹⁰Tì ɓaghà ɓɛ̀bènàbena ɓɛ Bɛ̀ll, wɔ̀lɛ à pègsɛ̀ngà paàzì ànɛ lɛ rì ɓìsi rì nyi ɓi rìwu ɗi Man wiì. Nni ɓigomìnɛ yɛ̀ɛ tì ti min lɛ syeesyee rì nyi, cɛɓ ki Man wiì ki ɓiì ghɛɓsii ɓisì.

¹¹Àa lɔŋ foo nyi rì nyi, ti nyàànyaa ɓi Bɛ̀ll lɛ Kan wìs Yeesus Kiris ànɛ à mɛ pègsɛn paàzì ànɛ lɛ rì ɓìsi rì Bɛ̀ll.

¹²Kìɓan kiǹ kɛɛ̀ki yɛ̀ɛ kìɓan ki mum bog à kìghà ki ɗiŋzìghày kìɓe ɓi ziinɛ, rìwu ɗi ki ɗiŋiì lɛ kìɓe, rìwu ɗìn ɗi ki ràm ɓum ɓɛ̀cèm ɓisuulɛ ɓɛ̀sɛ̀ɛ̀ ɓɛ̀cèm ɓɛ kighà kìɓe;

¹³lɛ yɛ̀ɛ ɓìdɔ̀gsɛna ɓi ɓaghà di ɓi ka yin, kìɓe ki ɓaghà lɔŋ ɓi ziinɛ wɔ̀lɛ, ki yin lɛ ki ɓalɛ̀n lɛ kìɓe, di ɓìdɔ̀gsɛna ɓi yin.

¹⁴Kɔlɛ à tumɛ̀n ɓi Adam à kpaŋ ɓi Moyis, rìwu ɗi ciìzìghà lɛ rì ɓum ɓɛ̀cèm ɓɛ ɓɛ kighà ɓi kiɓe ki Adam à kìghà miì. Adam ànɛn yɛɛ ɓaghà kìfèèghrɛnà ki roànɛ à ghɛ̀ɛ̀sɛ̀ngà kì yùu.

¹⁵Wɔ̀lɛ rìnàn ɗi yin com kìfog ɗì rìɓòò ɗi Bɛ̀ll à kìi ɓum; i ɓum lɛɛ̀gwey ɓɛ cuughà ɓi rìnàn ɗi mum bog, bɔ̀ɓ yaŋ ɗi geesɛ̀n rì rìɓòò ɗi Bɛ̀ll à kìghà ɓum zɛy rì zɛy ɓi m̀bobog à mum ànɛ lɛ Yeesus Kiris; rìɓòò ɗi Bɛ̀ll ɗiǹ ɗi ri ɗìkòmɛn ɓum lɛɛ̀gwey à cee fɔlɔɔ.

¹⁶Rìsyɔn ɗi ɓi rìɓòò ɗi Bɛ̀ll ɗi yin com kìfog rì rìsyɔn ɗi ɓi kìɓe ki mbobog à mum. Ɓɛ̀yɔ̀m ɓɛ ɓi kìɓe ki kìbog ki mum ki kighà, ɓɛ syɔngà rì ǹcɛ̀m, kɔlɛ rìɓòò ɗi Bɛ̀ll à kìghà ɓum zɛy rì zɛy di ɓɛ mɛ kì ɓiɓe lɛɛ̀gwey ɗi syɔngà lɛ ɓum ɓɛɛ ɓa lɛ sɛɛghisɛɛghi ɓi mis mɛ Bɛ̀ll.

¹⁷I rìnàn ɗi kibog ki mum ɗi kighà lɛ rìwu ɗyɛɛ̀ ragɛn, lɛ kìbog ki mum kìn, bɔ̀ɓ yaŋ ri ɓumɓɛ ɓɛɛ̀ teki lɛ rì geesɛ̀n yìì inɛ ì tèghɛɛ, rì rìɓòò ɗi ɓi rìren ɗii ɗi ɓiɓan, ɓɛ ri kì lɛ, ɓɛ ghɛɓ, ɓɛ ki làmi lɛ m̀bobog à mum ànɛ lɛ Yeesus Kiris.

¹⁸Nni fɔlɔɔ nnɛ yɛ̀ɛ rìnàn dìfog ɗi kighà lɛ ǹcɛ̀m a saà a ɓum ɓɛ̀cèm, fɔlɔɔ nnɛ syeesyee à rìkì bog à mɛ kì lɛ rìɓa ɗi lɛ sɛɛghisɛɛghi ɓi mis mɛ Bɛ̀ll, ɗi ɗi ti ri falàg cɛɓ, ɗyɛè saà girig a ɓum ɓɛ̀cèm.

¹⁹Ɓisuulɛ yɛ̀ɛ ǹtoòtèɗ wu kìbog ki mum ki kighà, wu ghaasìghà ɓum lɛɛgwey ɓɛ̀kìì-kìɓe, mɛ̀wog mɛ m̀bobog à mum à kìghà mɛ ri ɓiì kìi lɛ ɓum lɛgwey ɓɛɛ ɓa lɛ saaɗ ɓi mis mɛ Bɛ̀ll.

²⁰Kɔlɛ ɓìdɔ̀gsɛna ɓi yughày lɛ di kìɓe kɛɛ teghɛn, wɔ̀lɛ jàŋ bimiɗ ìnɛ kìɓe ki ɓaghà kì rììtɛn geesɛ̀n ì Bɛ̀ll ì tèghɛ̀ngà tì ì cee fɔlɔɔ.

²¹Ɓi lèg ànɛ lɛ, yɛ̀ɛ kìɓe ki ciìcììzìghà ɓum ɗì rìwu, geesɛ̀n ì Bɛ̀ll yɛ̀ɛ làlami rì saaɗ, ɓisuu cɛɓ ki fiɗyàɓ fikɔ̀ɔ̀ lɛ Yeesus Kiris à Kan wìs.