Read Bafia RÒMƐŊ 8 Bible Online

RÒMƐŊ 8 - Bafia bible

RÒMƐŊ 8

¹Nni ɓigomìnɛ, ɓumɓɛ ɓɛ ri ɓi Yeesus Kiris ɓi ɗùm, ɓɛ yiìɗi ri bɛ̀lɛn nsoò lɛsàg, ɓɛ yiìdi ɓiì ghɛghɛɓi yɛ̀ɛ mɛ̀mùù mɛɛ̀ titini ɓɔ lɛ ɓɛɛ ghɛɓ, ɓɛɛ̀ nɔ̀ɔnɔɔ̀tì lɔŋ cɛɓ ki Nghay à Bɛ̀ll a rèresi ɓɔ.

²Ɓisuulɛ kìdɔ̀gsɛna ki Nghay ànɛ a fafa cɛɓ ɓi Yeesus Kiris ɓi ɗùm, ki kwèɗkà mɛ̀ ɓi rìkpàn ɗi kidɔ̀gsɛna ki kiɓe rì rìwu.

³Bɛ̀ll à kìghà com ki ɓìdɔ̀gsɛna ɓi ɓaghà ɓi ri ìtèɗ wulɛ ɓi ki, ɓisuulɛ rìɓa ɗis ɗi ɓi mɛ̀mùù ɗi kighà lɛ ɓyɛ̀ kɛɛ̀ ɓa ri ìtèɗ, à rèsìghà lɛ kìɓe ki ɓeɓtɛɛ ɓi nyoo ì mɛ̀mùù, yɛ̀ɛ à romgày Man wiì à nyimiɗ, Man ànɛ̀n à teɗ nyoo ìnɛ ì rì com kìfog rì nyoo ì ɓɛ̀kìì-kìɓe, lɛ a yu kì pisii kiɓè.

⁴Bɛ̀ll à kìghà fɔlɔɔ lɛ, di ɓìɓan ɓi saaɗ ɓi ɓìdɔ̀gsɛna ɓyɛɛ̀ tɔtɔ̀g, ɓyɛɛ kilɛn ɓi ɓìsi ɓɛ ti nɔ̀ɔnɔɔ̀tì rìrèsì ɗi Kitɛntɛ̀ɛ̀n ki Nghày.

⁵Lɛ ɓumɓɛ ɓɛɛ̀ ghɛghɛɓ ɓi rìkɔ̀n ɗi mɛmùù, ɓɛ ti ɓɛ falàg mɛ̀rem maa ɓi ɓìɓan ɓi mɛ̀mùù mɛɛ̀ kɔ̀nkɔ̀n, wɔ̀lɛ ɓɛ̀roɓɛ ɓɛɛ̀ ghɛghɛɓ yɛ̀ɛ Kìtɛntɛ̀ɛ̀n ki Nghay kɛɛ̀ kɔ̀nkɔ̀n, ɓɛ ti ɓɛ falàg mɛ̀rem maa ɓi ɓìɓan ɓi ɓyɛɛ̀ kɔ̀ngi Nghay.

⁶Rìfa ɗi nɗem ɗi ɓi ɓìɓan ɓi ɓi mɛ̀mùù, ɗi ri rìwu, rìfa ɗi nɗem ɓi ɓìɓan ɓi Nghay, ɗi ri cɛɓ rì fyòoog.

⁷Ɓisuulɛ ɓìɓan ɓi ɓyɛɛ̀ kɔ̀nkɔn mɛmùù ɓi ri ɓi bènà rì Bɛ̀ll, ɓisuulɛ mɛ̀mùù mɛ gherɛɛ ɓi lɛ ɓìdɔ̀gsɛna ɓi Bɛ̀ll ɓyɛɛ lami mɔ, mɛ ki yin ɗi ìtèɗ wulɛ mɛ gherɛ̀n com yɛ̀ɛ kiǹ.

⁸Lɛ ɓumɓɛ ɓɛ ri ɓi rìlàmì ɗi mɛmùù maa, ɓɛ yin lɛ ɓɛ ki com ki lɛ nɗem wɛɛ puɓ Bɛ̀ll rì ɓɔ.

⁹Ɓi san ànɛ a lɔ̀ŋkin, mɛ̀mùù mɛ lamii tì ɓi minì, lɔŋ Ǹghay à Bɛ̀ll yɛɛ lamii mìni, i ki ki rì lɛ, Nghay à Bɛ̀ll à rì ɓi mìni. Ŋwaànɛ à yin ɗi Nghay à Kiris, à yin mum wiì.

¹⁰I Kiris à rì ɓi mìni, nsoò yɛ̀ɛ nyoo yin yi ri ɓiì wiì lɛ kìɓe, Ǹghay à rì cɛɓ ɓi mìni ɓisuulɛ Bɛ̀ll à mɛ kì lɛ ɓi ɓa lɛ saaɗ ɓi mis mìì.

¹¹Ǹghay à roànɛ à ghèmzìghày Yeesus a ɓìloŋ a rì ɓi mìni; roànɛ à ghèmzìghày Yeesus Kiris a ɓìloŋ anɛ̀n à ɓiì faa girig nyoo yin yi yi ti yi wulàg cɛɓ, rì Nghay wìì anɛ à rì ɓi mìni.

¹²Nni fɔɔnnɛ mìni ɓɔɔsoŋ̀, tì rì rì pon, nni wɔ̀lɛ pon anɛ̀n à yin pon anɛ rì mɛ̀mùù lɛ ti ɓa ɓɛ̀tiniyɛn lɛ ti ghɛɓ cɛɓ ki mɛ̀mùù mɛɛ̀ kɔ̀nkɔ̀n.

¹³Ɓisuulɛ, i ɓi ghɛghɛɓ cɛɓ ki mɛ̀mùù mɛɛ̀ kɔ̀nkɔ̀n, ɓì rì ɓiì cuù, wɔ̀lɛ, i ɓì woli mɛ̀kìkìì mɛ ɓeɓtɛn mɛ ɓi mɛ̀mùù rì ìtèɗ wu, Kitɛntɛ̀ɛ̀n ki Nghay, ɓì rì ɓiì ghɛɓì.

¹⁴Ɓum ɓɛ̀cèm ɓɛ Nghay à Bɛ̀ll a kɛ̀ɛkɛɛ̀sì, ɓɛɛ ri ɓɔn ɓɛ Bɛ̀ll.

¹⁵Lɛ Ǹghay ànɛ ɓì tekà à yin Nghay ànɛ a ghaasi mìni ɓɛ̀kpàn ɓi lèg ànɛ lɛ ɓi kɛnkɛn asu ɓì rirìsì tì, kìɓan kifog ɓì tekà Ǹghay ànɛ à mɛ kì lɛ ɓi ɓa ɓɔn ɓɛ Bɛ̀ll. Ǹghay ànɛ̀n yɛɛ ti à falàg ɓìsi ìtèɗ wulɛ ti reŋì Bɛ̀ll jɛ̀ɛ̀ aɗyoo lɛ: Aba, Tààta.

¹⁶Ǹghay à Bɛ̀ll nyimiɗ a ti à sììràg kì rèsii ǹghay wìs lɛ, tì rì ɓɔn ɓɛ Bɛ̀ll.

¹⁷I tì rì ɓɔn ɓii, tì rì girig rì gàɓ ɓi ɓìrɔɔ ɓi Bɛ̀ll, à kàkà ɓum ɓii; tì ki rì ɓɛ̀roɓɛ ɓɛ ri ɓiì kàɓɓɛɛ ɓirɔɔ ɓìn rì Kiris, lɛ, i ti wowog mɛtɔɓ ǹɗaŋ ɗi nyi, tì ɓiì ɓaà girig rì gàɓ ɓi rìkem ɗìì.

¹⁸Mɛ̀ ǹghɛɛ lɛ, mɛ̀tɔɓ mɛ ti wowog ɓi cààmɛ̀n ki, mɛ wuɓsɛɛ ɓi ɓi com ɗì rìkem ɗi Bɛ̀ll à rì ɓiì rèsii ɓisu wìs.

¹⁹Zi bimiɗ ì rì nɗem aɗyoo ì ɓoŋɓòŋ cààmɛ̀n ki Bɛ̀ll à ɓiì rèsii ɓumɓɛ ɓɛ ri ɓɔn ɓii.

²⁰Zi i kpìghà ɓi rìlàmì ɗi com ki kɛ̀ɛ̀ ìsu, àa lɛ yɔ̀miɗ yɛ̀ɛ kɔngà fɔlɔɔ, wɔ̀lɛ ki kilɛ̀ngà fɔlɔɔ ɓi rìkɔ̀n ɗi roànɛ à fogà yɔ̀ ɓi nɗɛli wiǹ.

²¹Zi yɔ̀miɗ inɛ̀n ì rì ɓiì ghɛɓì rìkpàn ɗi ɓi rìɗyaŋ ŋwos adɛŋ, ì ki teɗ gàɓ ɓi rìkan, ɗì rìkem ɗi ɓɔn ɓɛ Bɛ̀ll.

²²Kɔlɛ tì yii lɛ à kpaŋ ɓigomìnɛ, zi bimiɗ yɛ̀ɛ ɓemɓèm ì ki wowog rikɛŋ ɗi giɓ a ti à wokì di à kɔ̀rii rìyay.

²³Àa foo nyi rì nyi, ɓìsi girig ɓɛ tì mɛ teɗ Ǹghay à Bɛ̀ll ɓi sìg à kìrɔɔ ki ǹtonto ki ɓi ɓìrɔɔ ɓi Bɛ̀ll à rì ɓiì kìi ɓisi, ti ɓemɓem girig ɓi mɛ̀rem ɓi ɗùm, tì ɓoŋɓòŋ lɛ Bɛ̀ll a ghaàsi ɓìsi ɓɔn ɓii à ki kwèɗ nyoo yìs.

²⁴Ɓisuulɛ Bɛ̀ll à mɛ kwèɗ ɓisì nni kìɓan kiǹ ki kaka yɛ̀ɛ dyàɓɛn. Lɛ i ŋwaà mɛ ghɛn com ki à ɗyàɓɛɛ, com kìn miì kɛ̀ kɛɛ̀ ɓa ti dyàɓɛn; lannɛ ŋwaà rì lɛ à ɗyàɓàg tì com ki a seesèè?

²⁵Wɔ̀lɛ i ti ɗyàaɗyaɓɛ̀n com ki tì ghɛɛ ɓi, tì rì kɔ ɓiì ɓoŋɓoŋi ri kìsììrì.

²⁶Fɔlɔɔ nnɛ Ǹghay à Bɛ̀ll à ti à yùlàg girig ɓìsi kì ghɛɓsii ɓi rìɓa ɗi tì rì rì ìɓwɛɗ tì yii ɓi com ki tì ghɛ̀ɛ̀sɛɛ kì tɔɔ̀gh ɓi bɔ̀ŋzɛ̀ɛn yis; kìɓan kifog Ǹghay nyimiɗ a ɓɔ̀ɔɓɔŋ̀zì Bɛ̀ll ɓisu wis, rì bemeg yi mum à yin lɛ à yi rìkpaa.

²⁷Nni Bɛ̀ll ànɛ à ti à ghɛngì yɛ̀ɛ mɛ̀rem mɛ ɓum mɛ ri ɓi ɗùm, à yii cɛ kɛɛ̀ki Ǹghay a kɔ̀nkɔn lɛ a tɔg, lɛ Ǹghay a ti à ɓɔ̀ŋzàg ɓisuu ɓum ɓɛ Bɛ̀ll lɔŋ yɛ̀ɛ rìkɔ̀n ɗi Bɛ̀ll ɗi ri.

²⁸Tì ki yii girig lɛ ɓìɓan ɓìcèm ɓi ti ɓi syɔngì ɓi kìrɔɔ ki ɓumɓɛ ɓɛ keesii Bɛ̀ll, ɓumɓɛ̀n ɓɛɛ̀ɓɛ à rèŋìghà lɔŋ yɛ̀ɛ nɗem wii wu ghɛngà lɛ a reŋi ɓɔ.

²⁹Ɓisuulɛ ɓumɓɛ Bɛ̀ll à lokà kì ɓɔ̀ni, à ɓaghà girig di à mɛ ren abɛ̀y lɛ ɓɛ ɓiì ɓaà ɓi kìpisɛn ki Man wiì, lɛ di Man wiì a ɓa man à ǹtonto ɓi kìtuu ki ɓɛgeni.

³⁰Nni ɓɛ̀roɓɛ Bɛ̀ll à lokà ɓɛ̀n kì ɓɔ̀ni abɛ̀y, à reŋìghà girig ɓɔ; ɓɛ̀roɓɛ à ki reŋìghà ɓɛǹ, à kìghà girig lɛ ɓɛɛ ɓa lɛ saaɗ ɓi mis mii; nni ɓɛ̀roɓɛ à ghaasìghà ɓɛǹ ɓum ɓɛ saaɗ, à kemzìghà girig ɓɔ.

³¹Cɛ tì rì min lɛ tì kpaa ɓi kìɓan kiǹ? I Bɛ̀ll à rì ɓi jɛ̀m yìs ghɛn yɛ̀ɛ ri lɛ à ram lɛ a ɗuù rì ɓìsi?

³²Nyi ànɛ à kèŋìghà ɓi Man wiì à nyimiɗ, à faghà Man ànɛ̀n ɓisu wis ɓɛsɛ̀ɛ̀ ɓɛ̀cèm, nni lannɛ à rì ɓiì rɔ̀ɓi kɛ̀ɛ fa ɓisi ɓìɓan ɓìcèm bas rì Man wiì lɛ geesɛ̀n yìì.

³³Ghɛn yɛ̀ɛ ri min ɓiì sɔmɛɛ ɓumɓɛ Bɛ̀ll à ɓɔ̀ngà? Bɛ̀ll yɛ̀ɛ ri roànɛ à ri kpaa lɛ mum à rì lɛ saaɗ.

³⁴Ghɛn yɛ̀ɛ rì min ɓɔ ɓiì faà bɛ̀lɛn? Yeesus Kiris à rì roànɛ à wughà, kɛ̀ɛ ki sugtɛn lɔŋ lɛ foo, à ghèmɓɛ̀n yì a ɓìloŋ, à rì ɓi weèlem à Bɛ̀ll, a ɓɔ̀ɔɓɔ̀ŋzì ɓisu wìs.

³⁵Ghɛn yɛ̀ɛ ri lɛ à ghasì ɓìsi rì ǹkɔ̀nɛ̀n à Kiris? Rìkɛŋ gìn, iris giǹ, ǹ-yeesɛ̀n ànɛ ti tuutulɛ̀n ɗì nyi gìn, zày gìn, kìsoghà gìn, koŋnyoo gìn, rìwu yɔ̀?

³⁶Fɛlɛ yɛ̀ɛ ki ri kìkànɛn lɛ ɓisu wɔɔ nnɛ ɓɛɛ̀ cuucuùsì ɓìsi ŋwos anɛ aɗyoo bimiɗ, ɓɛ tetèɗ ɓìsi yɛ̀ɛ jɔ̀ɔ̀ yi ɓɛ kɛɛ̀ kì ghèegh ɓɛ̀ɓoŋ.

³⁷Wɔ̀lɛ, tì ti tì yakì ɓìɓan ɓiǹ ɓìcèm kɛ̀ɛ̀ vèg, rì ǹghɛɓsɛn wu roànɛ à keesìghà ɓìsi.

³⁸Lɛ mɛ̀ ǹkonaagh kì yiì lɛ, nsoò rìwu, nsoò cɛɓ, nsoò ɓum ɓɛ titòm, nsoò ɓɛ̀làmì, nsoò ɓìɓan ɓi ɓyɛɛ̀ kìikilɛ̀n gɛɛ̀nɛ, nsoò ɓi ɓi mɛ̀ru mɛ mɛɛ̀ yùyuiy,

³⁹nsoò mɛ̀tèɗ, nsoò ɓyom ɓi ɓi riì ɓi jàŋ yi yi teŋmaagh, nsoò ɓi ɓi riì ɓi jàŋ yi rimɛn, nsoò com kidɛŋ ki Bɛ̀ll à kìghà, ki yin lɛ ki ghasì ɓìsi rì ǹkɔ̀nɛ̀n ànɛ Bɛ̀ll à rèsìghà ɓìsi ɓi Yeesus Kiris à Kan wìs.