Read Bafia RÒMƐŊ 9 Bible Online

RÒMƐŊ 9 - Bafia bible

RÒMƐŊ 9

¹Nkpaakpaa saaɗ ɓi Kiris ǹki pwàa ɓi; rì ǹghɛɓsɛn wu Kitɛntɛ̀ɛ̀n ki Nghay, ǹɗem wɛ̀m wu ri mɛ̀ wusìnɛ̀ɗ lɛ ki ri saaɗ fɔlɔɔ.

²Ǹɗì rì coo bim ɓi nɗem, ǹki wowog ǹɗemi-kɛŋɛn kɛ̀ɛ̀ rìfɔɔsɛ̀n.

³Ǹɗì lɛ ǹkɔ̀n lɛ di màa teri ǹcɛ̀m, ǹki ghasɛn ɗi Kiris, ɓisuu ɓɛgeni ɓɛ̀m ɓɛ tì rì ɓi boo rì ɓɔ.

⁴Ɓɛ ri dòò yi Isirayɛl, ɓɔɔ̀ɓɛ Bɛ̀ll à ghaasìghà ɓɔn ɓii, à fa ɓɔ rìkem; rì ɓɔ nnɛ à rengà bee yiì, à fa ɓɔ ɓìdɔ̀gsɛna, à rèsì ɓɔ rìɓɔgsì ɗi Bɛ̀ll, à ki fa ɓɔ mɛ̀kàg.

⁵Ɓɛ ri dòò yi ɓɛseŋi ɓis ɓɛ ɓɛsɛ̀ɛ̀mɛn, fɔɔnnɛ Kiris, ɓi rìyalɛ̀n ɗii ɗi ɓi mɛ̀mùù, à rì ɓi boo yàà, nyi ànɛ à teŋmɛɛ à cee ɓyom ɓìcèm, à ki ɓa Bɛ̀ll ànɛ a keŋkem fiɗyàɓ fikɔ̀ɔ̀. Ààmɛ̀n.

⁶Fɔlɔɔ a rèsii ɓi lɛ, ǹkàg wu Bɛ̀ll wu wii zɛy ɓisuulɛ dòò yi Isirayɛl yicèm yi yin ɓiyali ɓi Isirayɛl,

⁷lɛ yi ri dòò yi Abiraham, nni àa yìcèm yɛ̀ɛ ri ɓɔn ɓii, kìɓan kifog ki ri kì kaliyɛn lɛ: Ɓijɛ̀m ì Isag innɛ ù ɓiì ɓaà rì dòò yi ǹkàkà wɔ̀.

⁸Yɛɛ lɔɔ lɛ àa ɓɔn ɓɛ ɓɛ yalɛɛ yɛ̀ɛ ɓɔn ɓɛ ti ɓɛ yalàg ɓɛɛ ri ɓɔn ɓɛ Bɛ̀ll, lɔŋ ɓɔn ɓɛ ɓɛ yalɛɛ fɛlɛ yɛ̀ɛ ǹkàg wu Bɛ̀ll wu ri, ɓɛɛ ri ɓɛ̀ɓàlɛn lɛ dòò.

⁹Ɓisuulɛ ǹkàg wu Bɛ̀ll à faghà wɛɛ̀wu fɛlɛ: Ɓi cààmɛ̀n kɔm̀ kiǹ, ǹ-yùu gɛy, fɔɔnnɛ Sara à yali gɛ man à baŋì.

¹⁰Àa kiǹ kɔrìkɔ, fɔlɔɔ nnɛ ki ɓatìghà rì Riɓɛka, m̀bobog à mum ànɛ à fogà nyi ɗyem à ɓaghà lɛ Isag à seŋi wìs a ǹsɛ̀ɛ̀.

¹¹Kɔlɛ ɓɔn ɓii ɓɛ ɓaghà di ɓɛ ka yalɛn ɓi, di ɓɛ ka ki ɓi kirɔɔ nsoò kìɓe, nni yɛ̀ɛ Bɛ̀ll à rì rì bimiɗ wìì a fèg ɓi rìɓɔ̀n ɗi ɓum, fèg wìì anɛ̀n à seesee rìreŋì ɗi à ti à regì ɓɔ, kɛ̀ɛ seesee mɛkìkìì maa ɓi ɗi lɛ a resi lɛ a nɔ̀ɔnɔɔ̀tì lɔŋ rifèg ɗii ɗiǹ,

¹²Bɛ̀ll à kpaaghà rì Riɓɛka lɛ: Man à ǹtonto à ɓiì ɓaà ǹkpàn a roà siitòn.

¹³Lɔŋ yɛ̀ɛ ki ri kì kànɛn lɛ: Mɛ̀ɛ ǹkeesii Yakɔɓ, m̀ɓèèzɛ̀n Eso.

¹⁴Tì rì min lɛ tì kpaa la? Bɛ̀ll à rì nya ɓèèɓeè? Èe, èe, à yin ɓèèɓeè.

¹⁵Lɛ a kalag ri Moyis lɛ: M̀ɓiì woògh ŋwaànɛ ki kɔni mɛ̀ nyìighnyìg, ǹki lem roànɛ ki kɔni mɛ̀ lɛ nlem̀.

¹⁶Kìɓan kiǹ ki yin ɓi rìkɔ̀n ɗi mum, kɛ̀ kɛɛ̀ ki ɓa lɛ kìtèèsii kii ki nyòò, ki seesee lɔŋ Bɛ̀ll ànɛ à ti à wokì mum nyìighnyìg.

¹⁷Ki ri kìkànɛn lɛ Bɛ̀ll à kpaaghà rì Farawɔŋ lɛ: Ǹɗɛsìghà wɔ̀ rìfòm ɓi rìfee lɛ di ǹɗesi ìtèɗ wɛm̀ ɓi wɔ̀; rì tì lɛ, di ɗii ɗyɛ̀m ɗyɛ̀ɛ saà zi bimiɗ.

¹⁸Fɔlɔɔ nnɛ Bɛ̀ll à ti à wokì ŋwaànɛ à kɔ̀ni lɛ a wog nyìighnyìg, à ki tèèsi nɗem wu roànɛ ki kɔni nyi lɛ a teèsi nɗem wiì.

¹⁹Ù rì lɛ ù tɔg min mɛ lɛ: Nni ɓi cɛ nnɛ Bɛ̀ll à ti à fwààdàg tì ɓum?

²⁰Nni wɛ̀ɛmiɗ àǹcèm, ù rì ghɛn anɛ ù rì lɛ ù nyolɛ̀n rì Bɛ̀ll? Bèè i ǹ-yèŋɛn i rì nya lɛ ì tɔg ŋwaànɛ à yèŋi yɔ̀ lɛ: Ɓisuucɛ nnɛ ù yègà mɛ̀ fɛlɛ?

²¹Ǹ-yèŋì-fyòò à rì lɛ à ki com kìcèm ki à kɔ̀ni rì fyòò fii, fyòò fìfog fi à tɔɓi fi ri lɛ à yèŋ syeesyee à bèè miì, à ki yèŋdi bèè inɛ ì rɔɔtɛɛ ɓi miì.

²²Bɛ̀ll à kɔ̀ngà lɛ a resi bim yiì à ki kì lɛ ɓum ɓɛɛ yi ìtèɗ wii. Kìɓan kiǹ kɛɛ̀ki, rì coo riɓìɓ ɗi nɗem, à cenɛ̀ngà ɓumɓɛ à ghɛ̀ɛ̀sɛ̀ngà kì woògh bim ri ɓɔ, lɛ ɓɛ ɓaghà di ɓɛ ti ɓi nɗɛli wu ki ghɛ̀ɛ̀sɛ̀ngà lɛ a cuùsi ɓɔ.

²³A kɔ̀ngà girig lɛ a resi lèg ànɛ yɛ̀ɛ rìkem ɗii ɗi teghɛɛ ɓi san ànɛ a ɓɛ̀roɓɛ à ti à wokì nyìighnyìg, ɓɛɛ̀ɓɛ à lokà kì pègsɛɛ abɛ̀y lɛ ɓɛ ɓiì terì rìkem ɗìì.

²⁴Ɓisuulɛ ɓìsii ri ɓɛ̀roɓɛ à reŋìghà lɛ rì ɓi nyìinyìm à Ɓɛ̀yudɛ̀n, rì ɓi nyìinyìm à ɓìlɔ̀ŋ ɓi zɛy.

²⁵Fɛlɛ yɛ̀ɛ à kalii ɓi kaàtà à Ozee lɛ: Kìlɔ̀ŋ ki ki ɓaghà ɓi kilɔ̀ŋ kɛm̀, m̀ɓiì reŋii kɔ lɛ, kìlɔ̀ŋ kɛm̀; kìlɔ̀ŋ ki mɛ̀ɛ nti kɛ̀ɛ nkeesi, ǹɗeŋì kɔ lɛ, kìlɔ̀ŋ ki ǹkeesii rì nɗem wɛ̀m wùcèm.

²⁶Fɔɔnnɛ jàŋ yɔ̀miɗ inɛ ɓɛ kpaakpààghà ɓɔ lɛ: Ɓì yin ɓum ɓɛm, wɔɔ nnɛ ɓɛ ɓiì reŋii ɓɔ lɛ: Ɓɔn ɓɛ Bɛ̀ll ànɛ à rì cem.

²⁷Ezayii nyii lamɓɛɛ kiɓan ki ki seesee ɓɔn ɓɛ Isirayɛl lɛ: Nsoò ɓɔn ɓɛ a Isirayɛl ɓaa tèghɛɛ yɛ̀ɛ sɛɛ̀sɛɛ à rìɓày, lɔŋ daaraa yi ɓum yɛɛ ri ɓiì ghɛɓì ɓi nyìinyìm wàà.

²⁸Ɓisuulɛ Kan à rì ɓiì fyɛ̀ɗmɛɛ ki kìi lɛ com ki à kpaaghà, kɛɛ kilɛn kìcèm ɓi ziinɛ.

²⁹Lɔŋ yɛ̀ɛ Ezayii à lokà kì kpaà abɛ̀y lɛ: I Kan à mɛ̀raŋ mɛ wɛ̀y kɛ̀ɛ ghagsi ɓisi gàɓ ì dòò, di tì ghalà yɛ̀ɛ kìlɔ̀ŋ ki lɛ Sɔdɔm, tì pisɛ̀n Gɔmɔɔr.

³⁰Cɛ tì rì min lɛ tì kpaa? Ti kpaà lɛ ɓumɓɛ ɓɛ yin Ɓɛ̀yudɛ̀n, ɓɛ kɛɛ̀ ki ɓa ɓumɓɛ ɓɛ kaakààghà lɛ ɓɛɛ ɓa lɛ saaɗ ɓi mis mɛ Bɛ̀ll, ɓɛ ti lɛ saaɗ ɓi mis mii lɛ rìgherɛ̀n.

³¹Kɔmiɗ lɛ Isirayɛl ànɛ à kaakààghà ɓìdɔ̀gsɛna ɓi ɓi ri lɛ ɓi ki lɛ a ɓa lɛ saaɗ ɓi mis mɛ Bɛ̀ll, à rɔ̀mɛ̀ngà com ki à kaakààghà ɓi ɓìdɔ̀gsɛna.

³²Ɓisuucɛ nnɛ ki kilɛ̀ngà fɔlɔɔ? Ɓisuulɛ Isirayɛl à kaakààghà ɓi riɓa ɗi lɛ saaɗ ɗiǹ ɓi rìgherɛ̀n. Ɓɔɔ fefèkà lɔŋ lɛ ɓɛ ri ɓiì ɓaà lɛ saaɗ ɓi mis mɛ Bɛ̀ll lɛ mɛ̀kìkìì maa, ɓɛ ɓagtɛ̀ngà ɓi gɔ̀g ìnɛ ì rì rì fìɓàg,

³³ìnɛ kaàtà à Bɛ̀ll à ɓùŋi ɓi jàŋ inɛ à kpaa lɛ: Ɓì ghɛɛ, ǹfoŋi gɔ̀g ìnɛ ì rì rì fìɓàg a Siyon, rìɓan ɗi ɗi ti ɗi ɓigtàg ɓum, kìɓan kifog ŋwaànɛ à gherɛɛ nyi àa teɗ ɓi ntoòrìɗ.