Read Bafia 1 KƆ̀RƐ̀ŊTYƐŊ 10 Bible Online

1 KƆ̀RƐ̀ŊTYƐŊ 10 - Bafia bible

1 KƆ̀RƐ̀ŊTYƐŊ 10

¹Ɓɔɔsoŋ̀, ǹkɔ̀ni ɓi lɛ ɓi rɔɓ kɛ̀ ɓi yi kiɓan ki; ɓɛ̀seŋi ɓis ɓɛ ɓɛsɛ̀ɛ̀ ɓɛ ɓaghà ɓɛ̀sɛ̀ɛ̀ ɓɛ̀cèm ɓi kìkwìɗ a zi, fɔɔnnɛ ɓɛ̀sɛ̀ɛ̀ ɓɛ̀cèm ɓɛ syaàghà rìɓày à m̀ɓàŋ.

²Fɔɔnnɛ ɓɛ̀sɛ̀ɛ̀ ɓɛ̀cèm ɓɛ ɓaɓtɛ̀ngà ɓi kìkwìɗ azi rì ɓi rìɓày ɓiɗùm, yɛ̀ɛ ɓɛ ɓaghà ɓɛ̀ràrɛn ɗi Moyis.

³Ɓɛ̀sɛ̀ɛ̀ ɓɛ̀cèm ɓɛ ɗighà rìkuu ɗi ɓiɗilàg ɗi ɓi nghay ɗìfog.

⁴Ɓɛ ki nɔ rikuu ɗi mɛnig ɗi ɓi nghay dìfog ɓɛ̀sɛ̀ɛ̀ ɓɛ̀cèm, ɓisuulɛ ɓɛ nɔnɔ̀ghà mɛ̀nig mɛ ɓi gɔ̀g ì nghay ìnɛ ì kɛ̀ɛ̀kɛ̀ɛ̀ghà rì ɓɔ; gɔ̀g ìnɛn yɛ̀ɛ ɓaghà Kiris.

⁵Kìɓan kifog, kìgwey ki ɓi ɓɔ ki kighà ɓi ɓiɓan ɓi ɓyɛɛ rɔɔ̀ Bɛ̀ll. Kìɓan kiǹ kɛɛ̀ki ɓɛ raàrɛ̀ngà miì ɓìloŋ ɓi-reɓ.

⁶Ɓìɓan ɓiǹ ɓi ri ɓìsi ɓìrèmzɛnà ɓi ɓiɓan, lɛ di tyɛ̀ ki ɓa ri zày ì ɓìɓeɓtàg ɓi ɓiɓan yɛ̀ɛ ìnɛ ɓɔɔ ɓaghà rì yɔ̀.

⁷Kɛ̀ ɓi ghay ɓɛkìì-ɓìnùn fɛlɛ yɛ̀ɛ ɓum ɓɛdɛŋ ɓɛ ɓi nɗaŋ waa ɓɛ ɓaghà, lɔŋ yɛ̀ɛ ki ri kìkànɛn lɛ: Kìlɔ̀ŋ ki kɔrìghà ɓi zi lɛ kɛɛ ɗi, ki nɔ, ajɛ̀m ìnɛ̀n nnɛ ɓɛ pɛsɛ̀ngà aɗyoo lɛ ɓɛɛ nyuŋzɛn.

⁸Nni tyɛ̀ ki falɛn ɓi cɛɓ ki tisɔ̀mɔ̀g fɛlɛ yɛ̀ɛ ɓum ɓɛdɛŋ ɓɛ ɓi nyìinyìm wàà ɓɛ falɛ̀ngà, fɔɔnnɛ ɓìloŋ ɓi kpighà ŋwos bog ɓum ɓɛ̀tɔɔsìm rìtin ɗì ɓɛraa.

⁹Tyɛ̀ ki fèèghrɛn Kan fɛlɛ yɛ̀ɛ ɓum ɓɛdɛŋ ɓɛ ɓi nyìinyìm wàà ɓɛ feeghrɛ̀ngà nyi, ɓumɓɛ̀n ɓɛ cuughà di nyoo yi taɓkii ɓɔ.

¹⁰Kɛ̀ ɓi ŋwɔ̀ŋwɔŋi Bɛ̀ll yɛ̀ɛ ɓum ɓɛdɛŋ ɓɛ ɓi nyìinyìm wàà ɓɛ ŋwɔŋwɔ̀ŋìghà nyi; ɓɛɛ̀ɓɛ ŋwaà-fìtom a rìwu à cuusìghà.

¹¹Ɓìɓan ɓiǹ ɓi kikìghà ɓɔ fɔlɔɔ, lɛ ɓyɛɛ ɓa ɓìrèmzɛnà ɓisuu ɓum ɓɛdɛŋ, fɔɔnnɛ ɓɛ kangà ɓyɔ ɓisuulɛ ɓyɛɛ reɓ ɓìsi lɛ tì mɛ wuɓsɛn cààmɛ̀n ki risugtɛ̀n.

¹²Fɔlɔɔ nnɛ ŋwaànɛ à yii lɛ à rì mɛ̀rɛy, à kɔ̀rì ɗyomzɛ̀n lɛ kɛ̀ɛ kpì.

¹³Ɓì ka tulɛ̀ngà ɓi ri mɛ̀fèèghrɛn mɛdɛŋ, mɛ mɛ cee ìtèɗ wu mum. Bɛ̀ll à ti à roòzàg mɛ̀kàg mii, fɔɔnnɛ àa càɗ ɓi lɛ ɓi tulɛn rì mɛ̀fèèghrɛn mɛ mɛ cee mìni ɓi-tèɗ; wɔ̀lɛ i mɛ̀fèèghrɛn mɛ kpaŋi mìni, à rì mìni ɓiì rèsii bee inɛ ɓì rì lɛ ɓì cee mɔ miì, à ki fa mini ìtèɗ wulɛ ɓi cenɛn mɔ.

¹⁴Kìɓan kiǹ kɛɛ̀ki, mìni ɓɛ̀geni ɓɛ̀m ɓɛ nɗem, cèliina ɓìnùn.

¹⁵Ntòtog ri mìni yɛ̀ɛ ɓum ɓɛ ɗyomzɛ̀n, mìniìɓɔmiɗ fiɓiina ɓìɓan ɓi nkpaakpàà.

¹⁶Ɓeŋ à ɓɛ̀mààgh ànɛ tì ti tì falàg Bɛ̀ll ɓìtògsɛ̀n lɛ nyi, à ti kɛ̀ɛ kì nya lɛ ti ɓa ɓɛ̀ràrɛn ɗi bwaɓ yi Kiris? Bìrɛs ìnɛ tì ti tì ɓɛkì, ì ti yɛ̀ kɛɛ̀ kì nya lɛ ti ɓa ɓɛ̀ràrɛn ɗi nyoo ì Kiris?

¹⁷Nni yɛ̀ɛ bìrɛs ì rì lɔŋ bog, tyàa soo tèghɛɛ, tì rì lɔŋ nyoo bog ɓisuulɛ ɓìsiìcèm ti teteɗ gàɓ ɓi m̀bobog à bìrɛs ànɛ̀n.

¹⁸Ghɛɛna ɓɔn ɓɛ Isirayɛl; ɓumɓɛ ɓɛ ti ɓɛ ɗilàg ɓìtuwe ɓi ɓɛ woli ɓi rìɓɔgsì ɗi Bɛ̀ll ɓɛ yin nya ɓɛ̀ràrɛn ɗi rìkùna ɗi ɓɛ ti ɓɛ tɔngì ɓyom ɓi ɓɛɛ̀ ɓɔɔɓɔgsì Bɛ̀ll miì?

¹⁹Fɔlɔɔ a rèsii nya yɛɛ lɔɔ lɛ nkɔ̀nkɔn lɛ ɓyɛn ɓi ɓɛ funɛɛ ɓi ɓìnùn, nsoò ɓìnùn ɓyɔmiɗ, ɓi ri nya rì bimiɗ à rìɓa àdɛŋ?

²⁰Àg! Wɔ̀lɛ ɓìɓeɓtàg ɓi mɛghay ɓyɛɛ̀ɓi ɓɛ ti ɓɛ funàg ɓyom ɓìn ɓisu waa àa ɓisuu Bɛ̀ll. Nni mɛ̀ ǹkɔ̀ni ɓi lɛ ɓi ɓa ɓɛ̀ràrɛn ɗi ɓìɓeɓtàg ɓi mɛghay.

²¹Ɓì yin lɛ ɓì kì lɛ: di ɓi nɔ ɓeŋ à Kan, di ɓi nɔ ɓeŋ à ɓìɓeɓtàg ɓi mɛghay fɔɔnnɛ ɓì yin lɛ ɓì kì lɛ: ɓì ɗi ɓi teɓèrè à Kan, ɓì ɗi ɓi teɓèrè à ɓìɓeɓtàg ɓi mɛghay.

²²Ti kɔ̀nkɔn lɛ ti tini Kan lɛ a ki yɔ̀ɔ̀tì gìn? Ɓìsi yɛɛ cee nyi ɓi-tèɗ?

²³Tì rì rì ìtèɗ wulɛ tì kì ɓìɓan ɓìcèm ɓi tì kɔ̀ni, nni àa ɓìɓan ɓìcèm ɓyɛɛ ri rì gɛɓsɛ̀n. Tì rì rì ìtèɗ wulɛ tì ki com kìcèm wɔ̀lɛ àa kìcèm kɛɛ kìki lɛ ŋwaa siìrɛn ɓi rìgherɛ̀n.

²⁴Mum kɛ̀ɛ kaaghi kìrɔɔ kii ki nyimiɗ, à kaa lɔŋ ki ɓɛro ɓɛm̀bog.

²⁵Ɓì rì rì ìtèɗ wulɛ, ɓi ɗi com kìcèm ki ɓɛɛ̀ kàkaɓ a fyèè, kɛ̀ɛ̀ mɛ̀riighrikì ɓi nɗem ɓisuu kiɓan ki righerɛ̀n.

²⁶Ɓisuulɛ, zi rì ɓyom ɓìcèm ɓi miì, ɓi wooghrɛɛ rì Kan.

²⁷I ŋwaànɛ à yin ngherɛ̀n à lààghraagh mìni, ɓì ki gherɛn lɛ ɓi kɛǹ, ɓì ghɛ̀ɛ̀sɛɛ kìɗiì com kìcèm ki ɓɛ faa mìni, kɛ̀ɛ̀ mɛ̀riighrikì ɓi nɗem ɓisuu kiɓan ki righerɛ̀n.

²⁸Kìɓan kifog, i ŋwaà kpaa mìni lɛ, ɓyom ɓi, ɓi ri ɓyom ɓi ɓɛ nfùnɛɛ ɓi ɓìnùn, ɓì ghɛ̀ɛ̀sɛɛ ɓi ɓyɔ kì ɗiì, lɛ kɛ̀ ɓi kɛ̀ɓti ŋwaànɛ àa kalii mìni fɔlɔɔ fiɓàg rì tì lɛ, nɗem wɛ̀ kɛɛ̀ fa mini bɛ̀lɛn.

²⁹Kìɓan ki nkpaakpaa ki, ki seesee ɓi nɗem win wu righerɛ̀n wɔmiɗ, ki ri ɓisuu nɗem wu righerɛ̀n wu ŋwaànɛ̀n. Nni ɓisuucɛ nnɛ rìɓa ɗyɛ̀m ɗi ǹɗì rì ìtèɗ wu kìyɛn com kìcèm ki ǹkɔ̀ni ɗi ri lɛ ɗi ɓa rì mɛ̀rèè lɛ nɗem wu righerɛ̀n wu ŋwaàdɛŋ?

³⁰I mɛ̀ ǹfaa Bɛ̀ll ɓìtògsɛ̀n ɓisuu com ki nɗiɗì, ɓisuucɛ nnɛ ɓɛ ri lɛ ɓɛ totòg mɛ̀ kìɓe ɓi ɓìɗilàg ɓi m̀mɛ fa Bɛ̀ll ɓìtògsɛ̀n miì?

³¹Ɓyàa soo ɗiɗì, ɓyàa soo nɔnɔ, nsoò cɛ kɛɛ̀ki ɓyàa kìkì, kìina ɓìɓan ɓìcèm ɓisuu rikem ɗi Bɛ̀ll.

³²Kɛ̀ ɓi ɓa gɔ̀g ìnɛ ì rì lɛ ì kɛ̀ɓtì nsoò muu Ɓɛ̀yudɛ̀n nsoò muu Gìrɛg nsoò kìseŋi ki Bɛ̀ll fìɓàg.

³³Fɛlɛ yɛ̀ɛ mɛ̀ɛ ntèeteèsì nyoo lɛ mpuɓsi ɓum ɓɛ̀cèm mɛ̀rem ɓi ɓìɓan ɓicèm; mɛ̀ ǹ-yin ɓiì kaakaa kirɔɔ kɛ̀m ki mɛ̀ɛmiɗ, nkaakaa lɔŋ kirɔɔ ki ɓum lɛɛ̀gwey lɛ di ɓɛɛ ghɛǹ cɛɓ.