Read Bafia 1 KƆ̀RƐ̀ŊTYƐŊ 11 Bible Online

1 KƆ̀RƐ̀ŊTYƐŊ 11 - Bafia bible

1 KƆ̀RƐ̀ŊTYƐŊ 11

¹Ɓaana ɓumɓɛ ɓɛɛ̀ nɔ̀ɔnɔɔ̀tì kìfèèghrɛnà kɛm̀ fɛlɛ yɛ̀ɛ mɛ̀ɛmiɗ mɛ̀ɛ nnɔ̀ɔnɔɔ̀tì ki Kiris.

²Ǹsɛɛgh mìni yɛ̀ɛ ɓi yiiyitàg mɛ̀ ɓyààmɛ̀n ɓìcèm, rì yɛ̀ɛ ɓi ɓèŋɓeŋ deɓ yɛm̀ lɔŋ yɛ̀ɛ mɛ̀ ǹfaghà mìni yɔ.

³Nni nsoò fɔlɔɔ, kɛɛ̀ kɔ̀nkɔn mɛ lɛ di ɓyàa yii kìɓan ki: Kiris à rì rìfòm ɗi baŋì bimiɗ, baŋì ì ɓa rìfòm ɗi giɓ, Bɛ̀ll à ki ɓa rifòm ɗi Kiris.

⁴Baŋì bimiɗ ìnɛ yɛɛ̀ kìki bɔ̀ŋzɛ̀n nsoò lɛ ìnɛ yɛɛ̀ kpaakpaŋzì ɓìɓan ɓi Bɛ̀ll à rèsii nyi, di ì rì rì tàm ɓi nto ì yin ɗi bɔgsɛ̀n ɓi san ànɛ yɛ̀ɛ rifòm ɗii.

⁵Wɔ̀lɛ giɓ bimiɗ ànɛ a kìki bɔ̀ŋzɛ̀n, nsoò lɛ a kpaakpaŋzì ɓìɓan ɓi Bɛ̀ll à rèsii nyi, di à rì ǹto zɛy, à sɛɛtii rìfòm ɗii; ki ri lɔŋ yɛ̀ɛ giɓ anɛ à rì ǹkɛ̀ŋɗɛn kpuu.

⁶Lɛ i giɓ a yin ɗi yeŋkesì ɓi nto, à ghɛ̀ɛ̀sɛɛ kì kɛ̀ŋɗɛɛ nto; nni i ki ri ǹtoòrìɗ lɛ giɓ a caà tyòŋ tii, nsoò lɛ a kɛŋɗɛn kpuu, à ghɛ̀ɛ̀sɛɛ min ki waatɛɛ yeŋkesì.

⁷Baŋì ì ghɛ̀ɛ̀sɛɛ ɓi lɛ ì lɔɔghrɛ̀n nto ɓisuulɛ, ì rì kìfèèghrɛnà ki Bɛ̀ll, yɔ̀ tì rìkem ɗi Bɛ̀ll, kɔlɛ giɓ a rì rìkem ɗi baŋì.

⁸Lɛ àa ɓi giɓ innɛ ɓɛ tekày com ki ɓɛ kighà baŋì rì kɔ, lɔŋ ɓi baŋì innɛ ɓɛ tekà com ki ɓɛ kighà giɓ miì.

⁹Rì tì lɛ, ɓɛ kighà ɓi baŋì ɓisuu giɓ, lɔŋ giɓ innɛ ɓɛ kighà ɓisuu baŋì.

¹⁰Kìɓan kiǹ kɛɛ̀ki giɓ a ghɛ̀ɛ̀sɛɛ kì waatɛɛ com ɓi nto, ki kɛɛ̀ rèresi lɛ à rì ɓi rìlàmì ɗi yii, lɛ ɓum ɓɛ titom.

¹¹Wɔ̀lɛ ɓi Kan ɓi ɗùm, giɓ a yin lɛ ɓɛ ghasì nyi rì baŋì, yɛ̀ɛ baŋì ì yin lɛ ɓɛ ghasì yɔ̀ ri giɓ

¹²ɓisuulɛ lɔŋ yɛ̀ɛ giɓ a kìlɛ̀ngà rì com ki ɓɛ tekày ɓi baŋì, fɔlɔɔ nnɛ baŋì ì ti ì yalàg yì ɓi ɗùm ɗi giɓ, ɓìɓan ɓiǹ ɓìcèm ɓi ti ɓi ɓalàg yì yɛ̀ɛ Bɛ̀ll.

¹³Mìniìɓɔmiɗ fiɓiina kìɓan kiǹ; ki ghɛɛ̀sɛɛ nya lɛ giɓ a ɓɔŋzi Bɛ̀ll di à rì ǹto zɛy?

¹⁴Rìɓa ɗi ɓum ɗyɔmiɗ ɗyɛɛ̀ rèresi mini lɛ, ki ri ntoòrìɗ lɛ baŋì yɛ̀ɛ raɓsi tyòŋ.

¹⁵Kɔm̀ lɛ fɔlɔɔ a rì rìkem ɗi giɓ, ɓisuulɛ tyòŋ ti ràɓ ti falɛ̀ngà yɛ̀ɛ giɓ lɛ tyɛɛ ɓa nyi fɛlɛ yɛ̀ɛ kìlàà ki kɛɛ gheg nyi ǹto.

¹⁶Wɔ̀lɛ i mum à kɔ̀ni ɓi lɛ a nyolɛn ɓi kìɓan kiǹ, à ghɛ̀ɛ̀sɛɛ kì yiì lɛ ɓìsii yin ɗi kìsyɔ̀ɔ̀ kiǹ, nsoò ɓìseŋi ɓi Bɛ̀ll ɓi yin girig rì kɔ.

¹⁷Yɛ̀ɛ ǹcee ɓi kìɓan ki ǹɗɔ̀gsɛɛ mìni ki, ǹ-yin ɗi ìtèɗ wulɛ ǹsɛg mìni ɓisuulɛ mɛ̀ghàdà min mɛ maa ghɛ̀ɛ̀sɛɛ kì kìi lɛ ɓi koɓsɛn ɓìɓeɓtàg ɓin ɓi ɓisyɔ̀ɔ̀, mɛɛ̀ kìki ti com ki lɛ ɓi ɗyoŋ̀ à cee fɔlɔɔ.

¹⁸Kìɓan ki asu ki ri lɛ, nwoki lɛ ɓì ti lɛ, i ɓì taŋzɛɛ rìghàdà, ǹlànag wu ɓa ɓi nyìinyìm wìn, mɛ̀ nki gherɛɛ kìɓan kiǹ gàɓ.

¹⁹Ki ghɛɛ̀sɛɛ kɔmiɗ lɛ mɛ̀lànag mɛɛ ɓa ɓi nyìinyìm wìn, lɛ di ɓumɓɛ ɓi nɗaŋ win ɓɛ ɓɛ ri ɓɛ̀ sììrɛn ɓɛɛ yilɛn.

²⁰Ɓì ti lɛ i ɓì taŋzɛɛ, àa ɓìɗilàg ɓi Bɛ̀ll ɓyɛɛ̀ɓi ɓì ti ɓì tekì.

²¹Ɓisuulɛ mum ǹcèm à ti à rùnàg kì ɗiì ɓìɗilàg ɓii ɓi nyimiɗ ɓi lèg ànɛ lɛ ŋwaàdɛŋ à wowòg zày, roàmbog ǹŋwaŋɛn mɛrɔ̀g.

²²Ɓì yin gi ri mɛɛ mɛ ɓì rì lɛ ɓì kì lɛ, ɓì ɗi, ɓì nɔ wɔɔ? Gìn kìseŋi ki Bɛ̀ll kɛɛ̀ki ɓi sɛɛsɛɛ̀tì, ɓì ki kɔ̀nkɔn lɛ ɓi woòwògsì ɓumɓɛ ɓɛ ri kɛ̀ɛ̀ com ǹtoòrìɗ? Nni cɛ kɛɛ̀ki nkpaa min mini! Ǹghɛ̀ɛ̀sɛɛ nya lɛ nsɛg mìni? Àg! Mɛ̀ ǹ-yin lɛ ǹsɛg mìni ɓi kìɓan kiǹ.

²³Ɓisuulɛ, rìrèsàg ɗi mɛ̀ ǹtekà yɛ̀ɛ Kan ɗyɛɛɗi mɛ̀ ǹghagsìghà mìni. Lɛ Kan Yeesus, ɓi-ru wu ɓɛ tɔkɛ̀ngà nyi, à tekà bìrɛs

²⁴fɔɔnnɛ à ɓaghà lɛ, à mɛ fa Bɛ̀ll ɓìtògsɛ̀n nni à ɓɛkà yɔ̀, à kpaa lɛ: Nyoo yɛ̀m yɛ̀ɛ ri lɛ, yɛ̀ɛ ri ǹfayɛn ɓisu win, kìlaaghna kìɓan ki ɓì yitàg mɛ̀.

²⁵Fɔlɔɔ nnɛ à tekà girig ɓeŋ di ɓaa lègsi ki ɗiì, à kpaa lɛ: Ɓeŋ ànɛ à rì nyɔɔnyɔn à rìràrɛ̀n ànɛ lɛ rì ɓum rì Bɛ̀ll ɓi bwaɓ yɛm̀; ɓì yitàg mɛ̀ cààmɛ̀n kìcèm ki ɓì nɔɔ nyi.

²⁶Ɓisuulɛ cààmɛ̀n kìcèm ki ɓì ɗii bìrɛs ìnɛ, ɓì ki nɔ ɓeŋ ànɛ, ɓi kakali riwù ɗi Kan, à kpaŋ lɔŋ yɛ̀ɛ à ri yù.

²⁷Kìɓan kiǹ kɛɛ̀ki, ŋwaànɛ à rì ɓiì ɗiì bìrɛs nsoò lɛ à nɔ beŋ à Kan yɛ̀ɛ ki ghɛɛ̀sɛɛ ɓi, à rì ɓiì terì bɛ̀lɛn ɓi nyoo, rì bwaɓ yi Kan.

²⁸Nni mum ǹcèm a fiɓɓɛn nyimiɗ di fɔɔnnɛ a ɗi bìrɛs, à nɔ ɓeŋ,

²⁹ɓisuulɛ ŋwaànɛ à rì ɓiì ɗiì, nsoò lɛ à nɔ, kɛ̀ɛ̀ kì fiɓii nyoo ì Kan, à kìi lɛ, à ɗi, à ki nɔ ncɛ̀m wìì a nyimìɗ.

³⁰Kìɓan kiǹ kɛɛ̀ki ɓɛ̀roroɓ rì ɓɛ̀lɛnlɛm ɓɛ teghɛɛ miì ɓi nyìinyìm wìn; kɛɛ̀ki gàɓ ì ɓum lɛɛ̀gwey ì mɛ ki cuu.

³¹I tyàa ti tì fiɓɓàg ɓìsiìɓɔmiɗ, di Bɛ̀ll à yiǹ lɛ à yɔ̀mdì ɓìsi.

³²Wɔ̀lɛ Kan à ti à yɔ̀mgì ɓìsi lɛ a reɓ ɓìsi, lɛ di tyɛ̀ ki teɗ bɛ̀lɛn nɗaŋ ri ziinɛ.

³³Ɓɔɔsoŋ̀, fɔlɔɔ yɛɛ ri lɛ, cààmɛ̀n ki ɓì taŋzɛɛ ɓi ɓìɗilàg ɓi Bɛ̀ll, ɓì ghɛ̀ɛ̀sɛɛ kì ɓooɓoŋ̀ɗɛ̀n mìni rì mìni.

³⁴I mum a wowog zày, à ghɛ̀ɛ̀sɛɛ kì ɗiì a mɛɛ mii, lɛ di kɛ̀ ɓi syòŋ yi mìniìɓɔmiɗ ncɛ̀m ɓi nyoo, di ɓì taŋzɛɛ. Ǹɗì ɓiì pègsɛɛ ɓiɓan ɓimbog yɛ̀ɛ ǹɗì ɓiì yùu.