Read Bafia 1 KƆ̀RƐ̀ŊTYƐŊ 15 Bible Online

1 KƆ̀RƐ̀ŊTYƐŊ 15 - Bafia bible

1 KƆ̀RƐ̀ŊTYƐŊ 15

¹Ɓɔɔsoŋ̀, n-yiti mìni Syeesyee à Ɓɔlɛ ànɛ ǹkalìghà mìni, ànɛ ɓì tekà, innɛ ɓì rì ɓɛ̀sììrɛn miì;

²Syeesyee à Ɓɔlɛ ànɛ̀n innɛ ɓì ki rì ɓiì ghɛɛ̀ cɛɓ lɛ nyi, di ɓì ɓèŋi nyi lɔŋ yɛ̀ɛ ǹghagsìghà mìni nyi, kɛ̀ɛ̀ fɔlɔɔ, di rìgherɛ̀n ɗi ɓì gherɛ̀ngà ɗi ri kɛ̀ɛ̀ ìsu.

³Ǹlokà mìni kìghagsii rirèsì ɗi mɛ̀ɛmiɗ ǹtekà girig, ɗyɛɛ ri lɛ: Kiris à wughà ɓisuu ɓiɓe ɓis lɔŋ yɛ̀ɛ ki ɓaghà kì kànɛn.

⁴Ɓɛ ɓomgà nyi ɓi zɔ̀ŋ, à ki ghèmɓɛn ɓi ŋwos a kìraa lɔŋ yɛ̀ɛ ki ɓaghà kì kànɛn.

⁵À rèsɛ̀ngà Sefas, ajɛ̀m ìnɛn à rèsɛ̀ntì ɓɛ̀yilàg ɓɛ kiǹtɛ̀ɗ rì ɓɛɓɛɛ̀.

⁶Ajɛ̀m ìnɛ̀n, à rèsɛ̀ngà tì ɓɛ̀gherɛ̀n ɓɛ ɓɛ ceeghà ɓum ɓɛ̀hɔnɗɛ̀ɗ ɓɛtaǹ, di ɓɛ ri nɗaŋ. Kìgwey ki ɓi ɓɔ ki kaka cem, wɔ̀lɛ gàɓ ìdɛŋ ì mɛ cuu.

⁷Fɔɔnnɛ à rèsɛ̀ngà Zyag, à ɓɔ̀ɓ min ɓɛkɛ̀nì-fìtom ɓɛ̀cèm.

⁸Ajɛ̀m ì ɓumɓɛ̀n ɓɛ̀sɛ̀ɛ̀ ɓɛ̀cèm fɔɔnnɛ à rèsɛ̀ngà mɛ̀ girig, mɛ̀ ànɛ ǹɗì yɛ̀ɛ man ànɛ ɓɛ yali ɗyem kìɓwɛɗ,

⁹ɓisuulɛ ǹɗì ŋwaà siitòn ɓi nɗaŋ wu ɓɛ̀kɛ̀nì-fìtom; ǹghɛ̀ɛ̀sɛɛ ɓi lɛ ɓɛ reŋì mɛ̀ lɛ ǹkɛ̀nì-fìtom ɓisuulɛ ǹ-yeesìghà kìseŋi ki ɓɔn ɓɛ Bɛ̀ll.

¹⁰Lɛ geesɛ̀n ì Bɛ̀ll, nnɛ ǹɗì com ki ǹɗì, nni geesɛ̀n yìì ɓi ɓɛg wɛ̀m ì wughà ɓi zɛy, ǹsalà gì kɔm̀ ǹcee ɓɔ ɓɛ̀sɛ̀ɛ̀ ɓɛ̀cèm, wɔ̀lɛ, àa mɛ̀ɛmiɗ yɛɛ salà, lɔŋ geesɛ̀n ì Bɛ̀ll ìnɛ ì rì rì mɛ̀, yɛ̀ɛ kighà kìsay.

¹¹Nni fɔlɔɔ nnɛ, kaa soo rì lɛ mɛ̀, kaa soo rì lɛ ɓɔ, com ki ti kpaakpaa ɓum kɛɛ̀kìn, kɛɛ̀ki ɓì ki gherɛ̀ngà.

¹²I ɓɛɛ̀ ki kakali lɛ Kiris à ghèmɓɛ̀ngà a ɓìloŋ, lannɛ ɓum ɓɛdɛŋ ɓɛ ɓi nyìinyìm wìn ɓɛ ri lɛ ɓɛ kpaa lɛ ɓìloŋ ɓi yin lɛ ɓi ghemɓɛ̀n?

¹³I ɓìloŋ ɓi yin lɛ ɓi ghemɓɛ̀n, di Kiris à ghèmɓɛ̀ngà ɓi girig a ɓìloŋ.

¹⁴I Kiris à ghèmɓɛ̀ngà ɓi, di ɓìɓan ɓi Bɛ̀ll ɓi ɓìsiì kakali ɓum, ɓi ri min yɛɛ lɔɔ kɛ̀ɛ̀ ìsu, rìgherɛ̀n ɗin irig ɗi ɓa kɛ̀ɛ̀ ìsu.

¹⁵Ki ɓa gì kɔm̀ lɛ ɓìsii ri ɓɛ̀nkɔ̀ɔwa ɓɛ ɓɛɛ̀ kpaakpaa ɓiɓan ɓi ɓɛpwàà ɓɛ raràɗ rì Bɛ̀ll, ɓisuulɛ tì pwààghà Bɛ̀ll kìɓan ɓi nyoo, yɛ̀ɛ tì kpaaghà lɛ, à ghèmzìghà Kiris, kɔm̀ lɛ à ghèmzìghà ɓi nyi, di ki ɓaa saaɗ lɛ, ɓìloŋ ɓi yin lɛ ɓi ghemɓɛ̀n ɓi.

¹⁶Lɛ i ɓìloŋ ɓyaa ghèmɓɛn ɓi, di Kiris girig à ghèmɓɛ̀ngà ɓi.

¹⁷I Kiris à ghèmɓɛ̀ngà ɓi di rìgherɛ̀n ɗin ɗi ri kɛ̀ɛ̀ ìsu, di ɓì kaka lɔŋ ɓi ɓìɓe ɓin ɓi ɗùm.

¹⁸Fɔlɔɔ a rèsì kɔm̀ lɛ, ɓumɓɛ ɓɛ wughà di ɓɛ ri ɓɛ̀gherɛ̀n Kiris, ɓɛ ri ɓɛ̀ɗyaŋɛn.

¹⁹I dyàɓɛn yis ìnɛ yɛ̀ɛ Kiris yàa rì lɔŋ ɓi cɛɓ ki ɓi ziinɛ kɔrìkɔ, di ɓìsi yɛɛ raŋzii kì ɓaà nyìinyìg tì cee ɓum ɓɛ̀cèm.

²⁰Wɔ̀lɛ ɓigomìnɛ, Kiris à mɛ ghèmɓɛn a ɓìloŋ, fɔɔnnɛ à rì kìɗùn ki ǹtonto ki ɓi ɓìloŋ ɓi ɓi wughà.

²¹Ɓisuulɛ, yɛ̀ɛ rìwu ɗi yughày ɓi mum bog, ɓi mum bog innɛ rìghèmɓɛ̀n ɗi ɓiloŋ ɗi mɛ yùy girig.

²²Lɛ fɛlɛ yɛ̀ɛ ɓum ɓɛ̀cèm ɓɛ ti ɓɛ wulàg lɛ rìɓa ɗi ɓɛ ri ɓɛ̀ràrɛn ri Adam, fɔlɔɔ nnɛ ɓum ɓɛ̀cèm ɓɛ ri girig ɓiì ghɛɓì lɛ rìɓa ɗi ɓɛ ri ɓɛ̀ràrɛn ɗi Kiris.

²³Kìɓan kifog, ki ɓa lɛ, rì ɓum, rì cààmɛ̀n kaa; Kiris à ɓa ŋwaà beèbɛ̀y, ɓumɓɛ ɓɛ ri lɛ ɓɛŋkii, ɓɛ ɓɔ̀ɓ ŋwosi risugtìì ɗii.

²⁴Ajɛ̀m ìnɛn nnɛ rìsugtɛ̀n ɗi ɓaa gɛ, yɛ̀ɛ Kiris à faa gɛ rìlàmì rì roànɛ à rì lɛ, nyi Bɛ̀ll, nyi Seŋi, di à mɛ yogsi lɛ: rì mɛ̀tèɗ mɛ mɛ ri mɛ̀ làŋɛn, rì rìlàmì ɗìcèm, rì mɛ̀tèɗ mɛ nghay mɛmbog mɛ̀cèm.

²⁵Lɛ ki ghɛɛ̀sɛɛ lɛ a lami à kpaŋ yɛ̀ɛ à rì ɓiì foŋì ɓɛ̀bènàbena ɓii ɓɛ̀cèm a mɛ̀kòò mii zi

²⁶Nni bènàbena anɛ à ɓiì siitɛɛ kiyogsii yɛɛ ri rìwu.

²⁷Ɓisuulɛ Bɛ̀ll à faghà nyi ìtèɗ wu làmiyɛn ɓyom ɓìcèm, kìɓan kifog, i à kpaa lɛ, à faghà nyi rìlàmì ɓi ɓyom ɓìcèm, ki yin ɗi nywey lɛ ŋwaànɛ à faghà Kiris rìlàmì, à yin ɓi bàlì ì ɓyom ɓi à làmii.

²⁸Fɔlɔɔ yɛɛ ri ɓa lɛ, i ɓyom ɓìcèm ɓi ti ɓi rìlàmì ɗii a zi, fɔɔnnɛ Man à rì ɓiì sɛɛ̀dii nyimiɗ ɓi rìlàmì ɗi roànɛ à faghà nyi ìtèɗ wulɛ a lami ɓyom ɓìcèm, lɛ di fɔɔnnɛ Bɛ̀ll a ɓa com kìcèm ɓi ɓɛ̀sɛ̀ɛ̀ ɓɛ̀cèm.

²⁹I kaa yin fɔlɔɔ, di ɓumɓɛ ɓɛ ti ɓɛ̀ ɓaɓtàg ɓisuu ɓiloŋ ɓɛ ti ɓɛ kilàg fɔlɔɔ lɛ cɛ? I ki ri saaɗ lɛ ɓìloŋ ɓyaa ghèmɓɛn ɓi, ɓɔɔ ki ɓàaɓaɓtɛ̀n ɓisu waa lɛ cɛ[4]?

³⁰Ɓìsiì ɓɔmiɗ tì rì min ɓi ɓɛ̀koŋnyoo cààmɛ̀n kìcèm lɛ la?

³¹Lɛ ŋwos anɛ aɗyoo bimiɗ, mɛ̀ ǹɗì ǹɗɛrɛliyɛn ɓi koŋnyoo à rìwu; ǹkpaa mìni kìɓan kiǹ ɓi saaɗ, ɓisuu rikem ɗi ǹɗì rì ɗyɔ lɛ mìni, ɓi Yeesus Kiris à Kan wìs ɓiɗùm.

³²I ɓisuu ɓiɓan ɓi mum nyimiɗ yɛɛ ri lɛ à sɛg, innɛ ǹɗùùghà rì nyàm a Efɛɛzɛ, ki ghɛɓsii min mɛ cɛ? I ɓìloŋ ɓyaa ghèmɓɛn ɓi, ti kìkiina lɛ tì ɗi tì nɔ lɛ rìduri tì ɓiì wiì.

³³Kɛ̀ ɓi pwààrɛn, rìkɛ̀ɛ̀kɛ̀ɛ̀ ɗi rì ɓìɓeɓtàg ɓi ɓum ɗi ti ɗi yogsàg ɓìsyɔ̀ɔ̀ ɓì syeesyee ɓi mum à rì rì ɓyɔ.

³⁴Sugtiina ɓi mìniìɓɔmiɗ yɛ̀ɛ ki ghɛɛ̀sɛɛ kɛ̀ ɓi kì kiɓe. Ɓisuulɛ ɓum ɓɛdɛŋ ɓɛ ɓi nyìinyìm wìn ɓɛ yii ɓi Bɛ̀ll; kìɓan ki ǹkpaa kìn ki ri ǹtoòrìɗ ɓi ɓɛg wìn.

³⁵Wɔ̀lɛ ŋwaàdɛŋ à rì lɛ à tɔg lɛ, lannɛ ɓum ɓɛ ri ɓiì ghèmɓɛɛ? Nyoo aɗi yɛɛ̀nɛ ɓɛ ri ɓa ri yɔ̀?

³⁶Kìdùŋdùŋ ki mum ki! Com ki ù ɓɛ̀li ki yin lɛ ki ghɛɓ di ki wii ɓì!

³⁷Com ki ù ti ù ɓɛ̀ɛ̀yì ki yingagti rì nyoo ìnɛ ki ɓaghà rì yɔ̀ ɓi rìròò; lɛ ɓaà yiɓi ɗis ɗi bààzì ɗi zɛy ɗyɔ yɛɛ ri, nsoò lɛ ɗi boo ì com ìdɛŋ.

³⁸Ajɛ̀m ìnɛn, Bɛ̀ll à fa com kìn nyoo ìnɛ à kɔ̀ni lɛ a fa; fɔɔnnɛ à ti à kìlàg lɛ rì boo ì com ìnɛ̀n miì, rì rìkuu ɗii ɗi nyoo.

³⁹Ɓyom ɓìcèm ɓi yin ɗi rìkuu ɗi nyoo ɗìfog; ɓum ɓɛ ri rì rìkuu ɗyaa ɗi nyoo, nyàm rì ɗinkàà, tììlì rì rìkuu ɗyaa ɗi nyoo, ɓìzɛn ìrig rì rìkuu ɗyàà.

⁴⁰Fɔlɔɔ nnɛ nyoo yi aɗyoo yi ri wɔɔ, yi ɓi ziinɛ wɔɔ; nyoo yi aɗyoo yi ghasɛɛ ɓi ri yi ɓi ziinɛ ɓi rìseesèèrɛ̀n ɗi ɓi mis.

⁴¹Kìtɛɛtɛn ki ŋwos ki ri dɛŋ, ki ŋwii dɛŋ, ki tyɔɛy dɛŋ, nsoò tyɔɛy tyɔmiɗ ti ghasɛɛ rìlòm.

⁴²Fɔlɔɔ nnɛ ki ri ɓa girig ɓi rìghèmɓɛ̀n ɗi ɓiloŋ, nyoo ìnɛ ɓɛ ti ɓɛ ɓomgì, ì rì nyoo ìnɛ ì ti ì ɓwɛ̀ɛ̀yì; ɓi rìghèmɓɛ̀n ì ɓa nyoo ìnɛ ì yin lɛ ì ɓwɛ̀y.

⁴³Nyoo ìnɛ ɓɛ ti ɓɛ ɓomgì, ì rì rì mɛ̀sòo, ɓi rìghèmɓɛ̀n ì ɓa rì rìkem; i ɓɛ ɓomi yɔ̀ ri ɓìlɛm, ì ghèmɓɛ̀n lɛ kpegkpeg, rì ìtèɗ lɛɛ̀gwey.

⁴⁴Ɓɛ ti ɓɛ ɓomgì yɔ̀ lɛ nyoo ì mɛ̀mùù, ɓi rìghèmɓɛ̀n ì ɓa nyoo ì nghay, lɛ i nyoo ì mɛ̀mùù ì rì wɔɔ, ìnɛ ɓi nghay ì ɓa girig wɔɔ.

⁴⁵Kìɓan kiǹ kɛɛ̀ki ki ri miì kìkànɛn lɛ: Mum à ǹtonto ànɛ lɛ Adam à ghalà com ki kɛɛ̀ ghɛghɛ̀ɓ; Adam à siitòn à ti nghay wu wɛɛ̀ fafa cɛɓ.

⁴⁶Wɔ̀lɛ àa com ki ki ri nghay kɔ yɛɛ ti ki lokì, lɔŋ ki ki ri mɛ̀mùù, ajɛ̀m ìnɛn, ki ki ri nghay ki nɔɔ̀tìì.

⁴⁷Mum à ǹtonto à kìlɛ̀ngà rì zi, fɔɔnnɛ à rì miì ŋwaànɛ ɓi ziinɛ; ŋwaà kìɓɛ̀rɛn nyii rii aɗyoo.

⁴⁸Ɓumɓɛ ɓi ziinɛ ɓɛ ri ɓi kìpisɛn ki roànɛ à ɓaghày ŋwaànɛ ɓi ziinɛ; ɓɛ̀roɓɛ aɗyoo ɓɔɔ ɓa ɓi kìpisɛn ki roànɛ à ɓaghày aɗyoo.

⁴⁹Nni lɔŋ yɛ̀ɛ tì pisɛ̀ngà roànɛ à rì ŋwaànɛ ɓi ziinɛ nnɛ tì ɓiì pisɛɛ girig roànɛ à ɓaghày aɗyoo.

⁵⁰Ɓɔɔsoŋ̀, com ki nkpaaghi ki ri lɛ: Ɓyom ɓi lɛ, rì mɛ̀mùù rì bwaɓ, ɓyaa teɗ ɓi gàɓ ɓi kìlɔ̀ŋ ki Bɛ̀ll, fɔɔnnɛ com ki ki ti ki wulàg ki yin lɛ ki ɓa rì gàɓ ɓi rìɓa ɗi lɛ com kɛ̀ kɛɛ̀ wu.

⁵¹Nɗesi mìni kìɓan ki rim ki a rìnyam: Tyàa wu ɓi ɓɛsɛ̀ɛ̀ ɓɛ̀cèm, kìɓan kifog ɓìsi ɓɛ̀sɛ̀ɛ̀ ɓɛ̀cèm tì rì ɓiì koɓsɛɛ,

⁵²ɓi maa cààmɛ̀n, lɔŋ yɛ̀ɛ rìpwaɗ ɗi mis, di ɗyam ɗi siitòn ɗi mɛ tòòghrɛ̀n; lɛ yɛ̀ɛ ɗyam ɗi siitòn ɗi rɔŋi gɛ, ɓìloŋ ɓi ghembɛ̀n ɗì nyoo ìnɛ ì yin lɛ ì wutì; ɓìsii lɔɔ̀ghrɛ̀n nyoo.

⁵³Lɛ ki ghɛɛ̀sɛɛ lɛ, nyoo ìnɛ ì ti ì ɓwɛ̀ɛ̀yì ìnɛ yɛ̀ɛ waàtɛn nyoo ìnɛ ì yin lɛ ì ɓwɛ̀y tì; nyoo ìnɛ ì ti ì wulàg ìnɛ, ì waàtɛn nyoo ìnɛ ì yin lɛ ì wutì.

⁵⁴Yɛ̀ɛ nyoo ìnɛ ì ti ì ɓwɛ̀ɛ̀yì ìnɛ ì ri waatɛɛ gɛ nyoo ìnɛ yɛ̀ kɛɛ̀ wu, fɔlɔɔ nnɛ jɛ̀ɛ̀ ìnɛ ì rì ǹkànɛn i ɓiì ronì. Jɛ̀ɛ̀ ìnɛn yɛ̀ɛ ri lɛ: Rìwu ɗi ti ɗì ɓimɛn ɓi rìcee ɓiɗùm.

⁵⁵Rìwu, nni rìcee ɗyɔɔ ɗyɛɛ̀ m̀be? Rìwu, rìkɔ̀ŋ ɗyɔɔ ɗyɛɛ̀ m̀be?

⁵⁶Rìkɔ̀ŋ ɗi riwù ɗyɛɛ̀ɗi kìɓe, ìtèɗ wu kiɓe wu riì ɓi ɓìdɔ̀gsɛna.

⁵⁷Ti faana Bɛ̀ll ɓìtògsɛ̀n lɛ à kìi lɛ ti ceè, lɛ Yeesus Kiris ànɛ à rì Kan wìs.

⁵⁸Fɔlɔɔ nnɛ mìni ɓɔɔseŋi ɓɛ̀m ɓɛ nɗem, sììrɛɛna kɛ̀ ɓi kpig, ɓì tɔɔtɔ̀ɔ̀ ntɔɔtɔyɛn ɓi kìsay ki Kan, ɓì ki yi lɛ, kìsay ki ɓi kìki nyi kaa wu ɓi zɛy.