Read Bafia 1 KƆ̀RƐ̀ŊTYƐŊ 3 Bible Online

1 KƆ̀RƐ̀ŊTYƐŊ 3 - Bafia bible

1 KƆ̀RƐ̀ŊTYƐŊ 3

¹Ɓɔɔsoŋ̀! Ɓi ɓɛg ànɛ a lɔ̀ŋkɛm̀, ǹtòòghrɛ̀ngà ɓi ri mìni yɛ̀ɛ rì ɓumɓɛ ɓɛ ti rì Ǹghay à Bɛ̀ll, wɔ̀lɛ ǹtòòghrɛ̀ngà lɔŋ ri mìni yɛ̀ɛ rì ɓumɓɛ ɓɛ ri ɓumɓɛ ɓi mɛ̀mùù, lɔŋ yɛ̀ɛ rì ɓumɓɛ ɓɛ kaka ɓɔn ɓɛsàg ɓi Kiris.

²Milig mɛɛ̀mɛ ǹfaghà mìni àa ɓìɗilàg ɓi ɓi terì, ɓisuulɛ ɓì ɓaghà ɓi lɛ ɓì cenɛ̀n ɓyɔ rìɗi, nsoò ɓigomìnɛ, ɓì ka yin gi lɛ ɓì cenɛ̀n ɓyɔ rìɗi, ɓisuulɛ ɓì kaka ɓumɓɛ ɓi mɛ̀mùù.

³Yɛ̀ɛ ɓì kaka lɛ rì yàaka, rì ɓɛ̀paàzì ɓi nyìinyìm wìn, fɔlɔɔ a yin nya ɓiì rèresii lɛ ɓì rì ɓumɓɛ ɓi mɛ̀mùù, rì tì lɛ, ɓi ghɛghɛɓ lɔŋ yɛ̀ɛ ɓum ɓɛ̀cèm?

⁴I kìbog ki ɓi mìni ki kpaa lɛ: Mɛ̀ ǹɗì ŋwaà Pol, roàmbog lɛ: Mɛ̀ ǹɗì ŋwaà Apolos, rìkì ɗin ɗi ri rìkì ɗi ɓum ɓɛ̀cèm ɓɛ ri lɛ ɓɛ kì!

⁵Cɛ kɛɛ ri min lɛ Apolos? Cɛ kɛɛ ri lɛ Pol? Tì rì lɔŋ ɓɛ̀kìì-ɓìsay ɓɛ ɓɛ kighà lɛ ɓi gherɛn Bɛ̀ll, rìkì ɗi mum ǹcèm ɗi ɓa lɔŋ yɛ̀ɛ Kan à faghà nyi ìtèɗ wulɛ a ki.

⁶Mɛ̀ m̀ɓɛ̀là boo ì ɓyom, Apolos à yù kì tùɓii, kìɓan kifog Bɛ̀ll yɛɛ kighà lɛ ɓyom ɓyɛɛ roò.

⁷Fɔlɔɔ nnɛ ŋwaànɛ à ɓɛ̀li boo ì ɓyom à yin com nsoò roànɛ à tùɓii yɔ̀, lɔŋ Bɛ̀ll ànɛ à ti à kìlàg lɛ ɓyom ɓyɛɛ roò, nnyɛɛ ri com.

⁸Lɛ ŋwaànɛ à ɓɛ̀li boo, rì ŋwaànɛ à tùɓii ɓɛ ri com kìfog, nni mum ǹcèm à rì ɓiì terì mɛ̀lèɓ mɛ mɛ ghɛɛ̀sɛɛ rì kìsay ki à kìghà.

⁹Lɛ ɓìsiì kìki kisay ki Bɛ̀ll ǹɗaŋ, mìni yɛɛ ri dɛm i Bɛ̀ll, ɓì ki ɓa mɛɛ mɛ Bɛ̀ll a toŋtòŋ.

¹⁰Ɓi lèg à geesɛ̀n ànɛ Bɛ̀ll à kìghà mɛ̀, nnɛ ǹ-yàghɛ̀ngà kìgɔ̀ŋgɔ̀m ki mɛɛ lɔŋ yɛ̀ɛ syeesyee à ǹtoŋì-ɓìtoŋ, nni ŋwaàdɛŋ à yùghà kì toŋì ɓi kìgɔ̀ŋgɔ̀m kiǹ aɗyòò; wɔ̀lɛ mum ǹcèm à ghɛ̀ɛ̀sɛɛ kì kɔ̀rii ɗyomzɛ̀n ɗì rìkuu ɗi kitoŋ ɗi a toŋtoŋ miì.

¹¹Ɓisuulɛ ŋwaàdɛŋ à yin ɗi ìtèɗ wulɛ à yàghɛ̀n kìgɔ̀ŋgɔ̀m kidɛŋ ki ki yin ki ki ti kìyàghɛn, kɔ yɛɛ ri lɛ Yeesus Kiris.

¹²Nsoò mum àa toŋi ɓi kìgɔ̀ŋgɔ̀m kiǹ ɗì gol, nsoò rì swiɗ à mɔ̀ɔ̀ni, nsoò rì gɔ̀g yi lònlomɛn, nsoò rì ɓìgeŋ, nsoò rì baɓ, nsoò rì zyoèy;

¹³kìsay ki mum ǹcèm ki ri lɔŋ ɓiì rèsɛɛ. Ɓisuulɛ ŋwosi ɓɛyɔ̀m à ri kì lɛ ɓɛɛ yi kìsay kiǹ, lɛ ŋwos anɛ̀n à rì ɓiì rèsɛɛ ɓi ɗuu; fɔɔnnɛ ɗuu ɗyɛɛ ri biì rèsii riɓa ɗi kisay ki mum ǹcèm.

¹⁴Ŋwaànɛ kìtoŋ kii ki ri ɓiì rɔ̀ɓi kɛ̀ kɛɛ̀ ɗig, à ɓiì terì mɛ̀lèɓ.

¹⁵Wɔ̀lɛ ŋwaànɛ kìtoŋ kii ki ɗiigh, à ɓiì mɛ̀mi mɛlèɓ, kìɓan kifog, nyimiɗ a ghɛɓ fɛlɛ yɛ̀ɛ ŋwaànɛ à faŋii yì ɓi ɗùù.

¹⁶Ɓì yii ɓi lɛ mìni yɛɛ ri naa ìnɛ Bɛ̀ll à kɔ̀kɔrii miì, rì tì lɛ Ǹghay à Bɛ̀ll à rì ɓi mìni.

¹⁷I ŋwaà wààghii naa ìnɛ Bɛ̀ll à kɔ̀kɔrii miì, Bɛ̀ll à wàagh gɛ girig nyi; lɛ naa ìnɛ Bɛ̀ll à kɔ̀kɔrii miì ì rì ǹtɛnɛn, nni mìni yɛɛ ki rì naa ìnɛ̀n.

¹⁸Mum kɛ̀ɛ pwààrɛn, i ŋwaàdɛŋ ànɛ ɓi mìni a fèfeg lɛ nyii ri rì ɗyomzɛ̀n ɗi ɓi ziinɛ, à ghɛ̀ɛ̀sɛɛ ki ghalì kìyèg lɛ di a ɓa min ɗi ɗyomzɛ̀n.

¹⁹Ɓisuulɛ ɗyomzɛ̀n ɗi ɓi ziinɛ ɗi ri kìyèg ɓi mis mɛ Bɛ̀ll, fɔɔnnɛ ki ri kìkànɛn lɛ: Bɛ̀ll à ti à wɔɔsàg ɓum ɓɛ ɗyomzɛ̀n ɓi mɛ̀ghèy maa mɛ ɓɔmiɗ ɓɔ yɛɛ kpaŋiì rì mɔ.

²⁰Rì ti lɛ: Kan à yii ɓɛ̀fèg ɓɛ ɓum ɓɛ ɗyomzɛ̀n ɓɛ ri rì ɓɔ, à ki yi lɛ ɓɛ̀fèg ɓɛǹ ɓɛ yin com.

²¹Fɔɔnnɛ mum à ghɛ̀ɛ̀sɛɛ ɓi ki foŋì rìkem ɗii ɓi ɓum, ɓisuulɛ ɓyom ɓìcèm ɓi ri ɓiŋkìn.

²²Nsoò Pol, nsoò Apolos, nsoò Sefas, nsoò ziinɛ, nsoò cɛɓ, nsoò rìwu, nsoò ɓìɓan ɓi ɓi cààmɛ̀n ki, nsoò ɓi ɓi cɛɓ ki kɛɛ̀ yùyuiy, ɓyom ɓìcèm ɓi ri lɛ ɓyom ɓin.

²³Wɔ̀lɛ mìnii wooghrɛɛ rì Kiris, Kiris nyii wooghrɛ̀n ɗì Bɛ̀ll.