Read Bafia 1 KƆ̀RƐ̀ŊTYƐŊ 4 Bible Online

1 KƆ̀RƐ̀ŊTYƐŊ 4 - Bafia bible

1 KƆ̀RƐ̀ŊTYƐŊ 4

¹Ɓì ghɛ̀ɛ̀sɛɛ min ɓisi kì seesee yɛ̀ɛ ɓɛ̀kìì-ɓìsay ɓɛ Kiris, ɓɛ ɓɛ ri ɓɛ̀ɓèŋì ɓɛ ɓɛkɔɔ̀kɔɔ̀ ɓɛ ɓiɓan ɓɛ Bɛ̀ll à nyamgà.

²Nni com ki ɓum ɓɛɛ̀ ɓoŋɓoŋ a ɓɛ̀ɓèŋì-ɓyom ki ri lɛ, ɓɛɛ resi lɛ ɓɛ ri ɓumɓɛ ɓum ɓɛ ghɛɛ̀sɛɛ kì tyweeyii.

³Ɓi ɓɛg ànɛ a lɔ̀ŋkɛm̀, ǹtɔɔgh ɓi com nsoò lɛsàg lɛ mìni yɛɛ yɔm̀ mɛ̀, nsoò lɛ ɓum ɓɛɛ yɔm̀ mɛ̀, kɛ̀ɛ nki yɔ̀m mɛ̀ɛmiɗ

⁴lɛ ǹ-yin ɗi bɛ̀lɛn ɓi nɗem. Kìɓan kifog àa fɔlɔɔ yɛɛ kii lɛ mɓa lɛ sɛɛghi sɛɛghi, ǹ-yɔ̀mì mɛ̀ à rì lɛ Kan.

⁵Ɓisu wìn miì nnɛ kɛ̀ ɓi yɔ̀m kiɓan kidɛŋ di cààmɛ̀n ki ka kpaŋ ɓi, di Kan à ka yu ɓi, nnyɛɛ ri ɓiì tɛɛ̀zii ɓiɓan ɓi ɓi ri ɓì nyamɛn a birìm, à ki kì lɛ ɓɛɛ yi mɛ̀yitì mɛ ɓum ɓɛ ri rì mɔ ɓi mɛ̀rem, fɔɔnnɛ Bɛ̀ll à rì ɓiì faa mum ǹcèm mɛ̀sɛɛ̀ghsɛɛgh mɛ à ghɛ̀ɛ̀sɛɛ rì mɔ.

⁶Ɓɔɔsoŋ̀, ɓisu win nnɛ màa teri dàɗkì yiǹ lɛ rì ɓi Apolos rì ɓi mɛ̀ɛmiɗ, lɛ i ɓì nɔ̀ɔ̀tii kìrèmzɛnà kis, fɔɔnnɛ ɓì ɓiì yilaagh yɛ̀ɛ ɓì rì lɛ ɓì rɔ̀ɓ kɛ̀ ɓi ceesi nɗèè wu ɓiɓan ɓi ɓi ri ɓìkànɛn, kɛ̀ ɓi faafàlɛ̀n mìniìɓɔmiɗ rikem lɛ ɓìi nsuugh ɓi jɛ̀m ì tɛɛnɛ à tɛɛnɛ, ɓì sɛɛtì tɛɛnɛ àmbog.

⁷Ɓisuulɛ ghɛn yɛɛ kpaa wɔ̀ lɛ ù ceeghii ɓum ɓɛmbog? Cɛ ù rì rì kɔ ki ki yin com ki ɓɛ faghà wɔ̀ ǹfayɛn? I ɓɛ ki faghà wɔ̀ ǹfayɛn, ɓisuucɛ nnɛ u kaakalɛ̀n yɛ̀ɛ ɓɛɛ̀ kali lɛ ɓɛ faghà ɓi wɔ kɔ ǹfayɛn?

⁸Ɓì mɛ wuràg, ɓì ki ti ɓɛ̀guŋgum; mìnii mɛ ɓɔg mɛfòm, ɓìsi kɛ̀ɛ̀ kìɓɔɔ̀gh, i ɓyàa rì kɔm̀ lɛ ɓì ɓa mɛ̀fòm mɛncèm lɛ ɓìsi girig ti lami nɗaŋ ri mìni.

⁹Lɛ mɛ̀ɛ nfèki lɛ, ɓìsi ɓɛ̀kɛ̀nì-fìtom ɓɛ Yeesus Kiris, Bɛ̀ll à faghà ɓìsi ìkɔ̀ɔ̀ wu siitòn fɛlɛ yɛ̀ɛ ɓumɓɛ kìɓan kaa ki ti kìrenɛn lɛ ɓɛ ghɛɛ̀sɛɛ ɓɔ kì wolì. Tì rì ɓumɓɛ Bɛ̀ll à rɛsìghà lɛ ziinɛ, rì ɓum ɓɛ titom rì ɓɛ̀ro ɓum ɓɛɛ seèsee yɛ̀ɛ ti yɛɛyɛɓɛ̀n.

¹⁰Tì rì ɓɛ̀ghalɛn ɓiyèg lɛ Kiris, wɔ̀lɛ mìnii ri rì ɗyomzɛ̀n ɓi Kiris ɓi ɗùm; ɓìsii ri ɓɛ̀kɔ̀kɔg, mìni ɓɛ̀tèteɗ; ɓum ɓɛ nyaànyààsì mìni, wɔ̀lɛ ɓɛ sɛɛ̀sɛ̀ɛ̀tì ɓìsi.

¹¹Ɓìsii wowog lɛ rì zày, rì kìnɔli, ɓìsi nyoo zɛy, ɓɛ kukwìy ɓìsi, tì ki rereni zi, à kpaŋ ɓi cààmɛ̀n ki.

¹²Ti woowolɛ̀n ɓìsiìɓɔmiɗ ri ntɔɓ lɛ ti say rì ɓyàg ɓis, jàŋ inɛ ɓum ɓɛɛ̀ sɛɛsɛmgì ɓìsi, ɓìsii maŋmàŋ ɓɔ, ɓɛ ri yeeyeesì ɓisi, tì sììsììrì lɔŋ nɗem.

¹³Ɓɛ ri tòtog ɓisi kìɓe ɓi nyoo, ɓìsii fɔɔfɔ̀ɔ̀sì ɓɔ mɛ̀rem, à kpaŋ ɓigomìnɛ, ɓìsii mɛ ghay fɛlɛ yɛ̀ɛ ɓìsògtɛ̀n ɓi ziinɛ rì ɓìgham ɓi ɓum ɓɛ̀cèm.

¹⁴Nsoò ǹkàniì mìni fɔlɔɔ, ki yin lɛ nfa mìni ǹtoòrìɗ, ki ri lɔŋ lɛ nɗeɓ mìni yɛ̀ɛ ɓɔn ɓɛm ɓɛ nɗem.

¹⁵Ɓisuulɛ nsoò ɓyàa rì rì ɓɛ̀rèsàg ɓɛ̀tɔɔsìm ǹtɛ̀ɗ ɓi cɛɓ ki ɓi ghɛghɛɓ ɓi Kiris ɓi ɗùm, ɓì yin lɛ ɓì ɓa rì ɓɛ̀seŋi kìtuu, lɛ mɛ̀ yɛɛ yali mìni ɓi Yeesus Kiris ɓi ɗùm, rì Syeesyee à Ɓɔlɛ ànɛ ǹghagsìghà mìni.

¹⁶Fɔɔnnɛ ǹtɔɔgh min mini lɛ, ɓi pisɛn mɛ̀.

¹⁷Ɓisuu kiɓan kiǹ nnɛ ǹɗomgày mìni Timote á man wɛm̀ à ǹɗem ànɛ ǹɗì rì ǹtyweeyi ri nyi ɓi rìgherɛ̀n; nnyɛɛ ri mìni biì yitii ɓiɓan ɓi mɛ̀ɛ nnɔ̀ɔnɔɔ̀tì ɓi cɛɓ kɛ̀m ki ɓi Kiris, ɓìɓan ɓi nki rèresi jàŋ bimiɗ ɓi ɓìseŋi ɓi Kiris ɓìcèm.

¹⁸Ɓum ɓɛdɛŋ ɓɛ ɓi nyìinyìm wìn ɓɛ ntumɛɛ rìkìkì ɗi ɓidaŋà rì fèg ànɛ lɛ màa kpaŋdi ɓi a lɔ̀ŋkin.

¹⁹Wɔ̀lɛ i ki kɔni Kan, di ǹɗì ɓiì fyaŋzii foo ki kpaŋì; fɔɔnnɛ máa yi ɓi lɔŋ lɛ ɓìɓan ɓi ɓɛ̀daŋàdaŋa ɓɛǹ ɓɛɛ̀ kpaakpàà, ǹɗì girig ɓiì yiì com ki ɓɛ ri rì ìtèɗ wulɛ ɓɛ ki.

²⁰Ɓisuulɛ kìlɔ̀ŋ ki Bɛ̀ll ki yin kiɓan ki ɓitòkì ɓi rì ŋwɔm, ki ri lɔŋ kiɓan ki mɛkìkì.

²¹Cɛ ɓi kɔ̀ŋkɔn kɔm̀ lɛ twiɗ? Ɓi kɔ̀ŋkɔn lɛ n-yu a lɔ̀ŋkin ri nkpas gìn n-yuiy lɛ rì ǹkɔ̀nɛ̀n rì nɗem wu tɛ̀tɛ̀rɛ̀ɛ̀?