Read Bafia 1 KƆ̀RƐ̀ŊTYƐŊ 6 Bible Online

1 KƆ̀RƐ̀ŊTYƐŊ 6 - Bafia bible

1 KƆ̀RƐ̀ŊTYƐŊ 6

¹Ɓi cɛ nnɛ ɓì ti ɓì kìlàg lɛ, i wààdɛŋ ù paàzii rì gòni, ù kɛ̀n ɗì kìɓan kiǹ a ɓumɓɛ zɛy lɛ ɓɔ yɛɛ yɔm̀ mìni kɔ, kɛ̀ ɓi reŋi ɓɛgherɛ̀n lɛ ɓɔ yɛɛ yɔm̀?

²Yɛɛ lɔɔ lɛ ɓì yii ɓi lɛ ɓɛ̀gherɛ̀n ɓɔ yɛɛ ri ɓiì yɔ̀mi ziinɛ? I mìni yɛɛ ghɛɛ̀sɛɛ kì yɔ̀mi ziinɛ lannɛ ɓɔɔ ɓiɓan ɓɛ zɛy ɓɛ ri lɛ ɓɛ yag mìni rìpègsɛ̀n?

³Ɓì yii ɓi lɛ tì rì ɓiì yɔ̀mi ɓum ɓɛ titom? Bɔ̀ɓ yaŋ min ɗi ɓìɓan ɓi ɓi cɛɓ ki fɛ?

⁴Nni la yɛɛ ri min lɛ, i ɓì rì rì paàzì ànɛ à kòmi ɓìɓan ɓi ɓi cɛɓ ki fɛ, ɓumɓɛ kìseŋi ki Kiris ki tɔɔgh ɓi com rì ɓɔ ɓɛɛ̀ɓɛ ɓì rɛsì lɛ ɓɛɛ yɔm̀?

⁵Ǹkpaa kìɓan kiǹ lɛ ɓi wog ǹtoòrìɗ. Fɔlɔɔ a rèsii yɛɛ lɔɔ lɛ mum à ɗyomzɛ̀n à yin ɓi nyìinyìm wìn nsoò bog, ànɛ à rì rì ìtèɗ wulɛ à pègsɛ̀n kìɓan ki ɓɛgeni wa?

⁶Nni geni ɓɛɛ̀ geni ɓɛ ti ɓɛ rɛɛsàg ɓɛ̀yɔ̀m ɓɛ ki rɛli ɓɛncèm ɓi mis mɛ ɓumɓɛ ɓɛ yin ɓɛgherɛ̀n!

⁷Ki ka ti zɛ̀ɗ ɓi ɓɛg ànɛ a lɔ̀ŋkin, lɛ ɓi ɓa rì ɓɛ̀kpaaghi-kpaaghi ɓi nyìinyìm wìn; ɓisuucɛ nnɛ ɓì yin kɔm̀ lɛ ɓì nìɗ nɗem lɛ ɓi caɗ kɛ̀ ɓi nɔ̀ɔ̀ti kiɓan ki ŋwaà sɛ̀raagh rì mìni? Ɓisuucɛ nnɛ ɓi yin kɔm̀ lɛ ɓì càɗ lɛ ɓɛɛ pumzi mìni?

⁸I ù kɛ̀ɛ gì kì fiɓii, lɔŋ mìni yɛɛ̀ kìki ɓiɓan ɓi ɓi ghɛɛ̀sɛɛ ɓi, ɓì yiiyìì ɓyom ɓi ɓum, ɓum ɓɛ̀ncèm lɛ ɓɛ̀geni ɓin.

⁹Ɓì yii ɓi lɔŋ lɛ ɓumɓɛ ɓɛɛ̀ kìki ɓiɓeɓtàg ɓi ɓiɓan, ɓaa ɓa ɓi ri ìkɔ̀ɔ̀ ɓi kìlɔ̀ŋ ki Bɛ̀ll? Kɛ̀ ɓi pwààrɛn, à tumɛɛ lɛ, ɓumɓɛ ɓɛɛ̀ ghɛghɛɓ cɛɓ ki tifin, à kpaŋ lɛ ɓɛ̀kìì-ɓìnùn, rì ɓɛ̀kìì-tìsɔ̀mɔ̀g,

¹⁰rì ɓɛ̀yiɓ ɓɛ ɓɛ ti ɓɛ kɔràg ri ɓɛ̀ro ɓɛ̀yiɓ nsoò lɛ ɓɛ̀baŋì ɓɛ ɓɛ ti ɓɛ kɔràg rì ɓɛ̀ro ɓɛ̀baŋì,[2] à kɛ̀ɛ̀dì kìkpaŋì lɛ ɓɛ̀wiiwìì, rì ɓumɓɛ ɓɛ ri rì kìsee ki-kum, rì ɓɛ̀nɔɔ̀-mɛ̀rɔ̀g rì ɓɛ̀kìì-tìfena, à kpaŋ lɛ ɓɛ̀zyaàzyaa, ɓumɓɛ̀n ɓɛ̀cèm ɓaa ɓa ɓi ri gàɓ ɓi kìlɔ̀ŋ ki Bɛ̀ll.

¹¹Gàɓ ì ɓum ìdɛŋ ìnɛ ɓi mìni, ì ɓaghà mɛ̀kuu mɛ ɓum mɛ̀n; wɔ̀lɛ ɓɛ sooghà mìni, ɓɛ tɛɛ̀zì mìni, ɓɛ ki kì lɛ ɓi ɓa lɛ saaɗ ɓi mis mɛ Bɛ̀ll, ɓi ɗii ɗi Kan Yeesus Kiris, rì ìtèɗ wu Ǹghay à Bɛ̀ll wìs.

¹²Ǹɗì lɛ ǹkì com kìcèm ki ǹkɔ̀ni, kìɓan kifog, àa ɓìɓan ɓìcèm ɓyɛɛ ri mɛ̀ rì gɛɓsɛ̀n; ǹɗì lɛ ǹkì com ki ǹkɔ̀ni, nni màa càrɛn ɓi lɛ mɓa ǹkpàn a com.

¹³Ɓìɗilàg ɓi ri ɓisuu ɗùm, ɗùm ɗi ki ɓa ɓisuu ɓiɗilàg, Bɛ̀ll à rì ɓiì ki yogsii ɓyom ɓi kiɓɛ̀ɛ̀ ɓiǹ; wɔ̀lɛ nyoo ì mum ì yin nkìyɛn ɓisuu cɛɓ ki tifin, ì rì ǹkìyɛn ɓisuu Kan, Kan à ki ɓa ɓisuu nyoo ì mum.

¹⁴Nni Bɛ̀ll ànɛ à ghèmzìghà Kan a ɓìloŋ, à ghèmzii gɛ girig ɓìsi rì ìtèɗ wii.

¹⁵Ɓì yii ɓi lɛ nyoo yin yi ri ɓìkàɓ ɓi Kiris? Nni ǹɗì nya lɛ ǹteɗ ɓìkàɓ ɓi Kiris lɛ nghaasi ɓyɔ ɓìkàɓ ɓi giɓ a rìɓàmɓà?

¹⁶Nsoò ŋwos bog! Ɓì yii lɛ syeesyee lɛ ŋwaànɛ à ràrɛɛ rì giɓ a rìɓàmɓà, à ti nyoo bog rì giɓ anɛ̀n, ɓisuulɛ ki ri kìkaliyɛn lɛ: Kìɓɛ̀ɛ̀ ki ɓum ki ri ɓiì ghalì rìmùù ɗìfog.

¹⁷Wɔ̀lɛ ŋwaànɛ à ràrɛɛ rì Kan ɓɛ ɓiì ɓaa nghay wùfog ɓɛɛ̀ nyi.

¹⁸Lɛɛghna cɛɓ ki tisɔ̀mɔ̀g! Lɛ ɓìɓe ɓimbog ɓìcèm ɓi mum à rì lɛ à kì, ɓi ti ɓyɛ̀ kɛɛ̀ kòm nyoo yìì, wɔ̀lɛ i ŋwaà nɔ̀ɔ̀tii cɛɓ ki tisɔ̀mɔ̀g, di à kìi kìɓe ki kɛɛ yogsi nyoo yìì.

¹⁹Ɓì yii ɓi lɛ, nyoo yìn i rì naa ì Kìtɛntɛ̀ɛ̀n ki Nghay ki ki ri ɓi mìni, ki Bɛ̀ll à faghà mìni? Fɔɔnnɛ ɓì làmii tì ɓi mìniìɓɔmiɗ.

²⁰Ɓisuulɛ ɓɛ kweɗkà mìni dùne ǹkɛŋɛn yɛ̀ɛ mɛ̀nɔ̀ɓɔ̀; fɔɔnnɛ ɓì ghɛ̀ɛ̀sɛɛ kì kemzii Bɛ̀ll lɛ rì nyoo yin, rì ǹghay win lɛ ɓi ri ɓyom ɓi Bɛ̀ll.