Read Bafia 1 KƆ̀RƐ̀ŊTYƐŊ 7 Bible Online

1 KƆ̀RƐ̀ŊTYƐŊ 7 - Bafia bible

1 KƆ̀RƐ̀ŊTYƐŊ 7

¹Tì cee min ɓi ɓìɓan ɓi ɓìi ntɔghiì mɛ̀ ɓi kaàtà wìn; ki ri kìrɔɔ lɛ, mum a kɔri kɛ̀ɛ wɛy giɓ.

²Kìɓan kifog, ɓi ɗi lɛ cɛɓ ki tisɔ̀mɔ̀g kɛ̀ kɛɛ̀ sàà, baŋì bimiɗ ì ghɛ̀ɛ̀sɛɛ kìɓaà rì giɓ wiì à nyimìɗ, giɓ bimiɗ à ɓa rì yii wiì.

³Baŋì ì ghɛ̀ɛ̀sɛɛ kì roòzii ɓiɓan ɓìcèm ɓi à ghɛ̀ɛ̀sɛɛ kì kìi giɓ wiì, giɓ a roòzì girig ɓìɓan ɓi à ghɛ̀ɛ̀sɛɛ kì kìi yii.

⁴Giɓ a làmii ɓi nyoo yìì nyimìɗ, lɔŋ yii yɛɛ lamii yɔ̀, fɔlɔɔ nnɛ baŋì ì làmii ɓi girig nyoo yìì nyimìɗ, lɔŋ giy yɛɛ lamii yɔ̀.

⁵Ki ghɛɛ̀sɛɛ ɓi lɛ bog a celi roàmbog di ki yin lɛ ɓì ka wooghrɛɛ jɛ̀ɛ̀ lɛ ɓi celɛn ɓi maa cààmɛ̀n lɛ ɓi falɛn ɓi bɔ̀ŋzɛ̀n, ajɛ̀m ìnɛn, ɓì ghɛ̀ɛ̀sɛɛ kì sugtii ki ràrɛɛ, lɛ Satàn kɛ̀ɛ ɓa lɛ à ghɛn kìrɔŋiɗ ki lɛ a feèghrɛn mìni ɓisuulɛ mɛ̀rem min mɛ ɓanɛɛ ɓi.

⁶Kìɓan ki ǹkpaa kìn, ki yin kiɓan ki ki ghɛɛ̀sɛɛ kìɓaà rì ǹkàŋɗɛ̀n, ki ri lɔŋ kiɓan ki ɓì rì lɛ ɓì kìlàg.

⁷Ɓi mɛ̀, ǹɗì lɛ ǹkɔ̀n lɛ di ɓum ɓɛ̀cèm ɓaa ɓaa yɛ̀ɛ mɛ̀; nni wɔ̀lɛ mum ncèm à rì rì kìɓan ki Bɛ̀ll à faghà nyi lɛ a kilàg; à fa roànɛ rìkuu ɗi kiɓan ɗi, à fa roàmbog rìkuu ɗi kiɓan ɗidɛŋ.

⁸Mɛ̀ ǹkpaa ɓɛ̀kwɛ̀y rì mɛ̀kpɔɓ mɛ ɓɛ̀yiɓ lɛ, ki ri kìrɔɔ lɛ ɓɛɛ kɔri fɛlɛ yɛ̀ɛ mɛ̀.

⁹Kìɓan kifog i mɛ̀rem maa mɛ ɓanɛɛ ɓi, ɓɛ ghɛɛ̀sɛɛ kì wɔlɛɛ, lɛ ki pɔɔzii kìɓaà kìrɔɔ lɛ mum a wɔlɛn, à cee lɛ a wuwu dudug.

¹⁰Ɓi ɓɛ̀roɓɛ ɓɛ ri ɓɛ̀wɔlɛn, ǹfaa ɓɔ ǹsiŋdɛn - nni àa mɛ̀ yɛɛ ki faa ǹsiŋdɛn wuncèm, lɔŋ Kan yɛɛ faa: Giɓ kɛ̀ɛ ghasɛn ri yii wiì;

¹¹i à ki ghasɛɛ rì nyi, à kɔ̀rì kɛ̀ɛ kɛ̀ɛ̀di riwɛy, nsoò lɛ ɓɛ pegsɛ̀n kìɓan ki ki ghasìghà nyi rì yii, fɔlɔɔ nnɛ baŋì ì ghɛ̀ɛ̀sɛɛ ɓi ki nàɓi giy.

¹²Com ki mɛ̀ ǹkpaa ɓum ɓɛmbog ki yin lɛ Kan yɛɛ kalii, lɔŋ mɛ̀ɛmiɗ yɛɛ kpaa, ki ri lɛ: I kìristɛ̀n à rì rì giɓ anɛ à yin ngherɛ̀n, nni giɓ anɛ̀n à gherɛɛ lɛ ɓɛɛ kɛǹ asu ɓɛ ghɛghɛ̀ɓ ǹɗaŋ, nyii ghɛɛ̀sɛɛ ɓi ki nàɓi giɓ anɛ̀n.

¹³I kìristɛ̀n à giɓ a rì rì yii ànɛ à yin ngherɛ̀n, yii ànɛ̀n à ki gherɛn lɛ ɓɛɛ kɛǹ asu ɓɛ ghɛghɛ̀ɓ naa bog, giɓ anɛ̀n à ghɛ̀ɛ̀sɛɛ ɓi ki ɓèni yii ànɛ̀n.

¹⁴Ɓisuulɛ baŋì ìnɛ ì yin ngherɛ̀n ì rì ǹtɛnɛn lɛ giɓ wiì, giɓ anɛ à yin ngherɛ̀n à rì ntɛnɛn lɛ yii wiì à rì kìristɛ̀n; kɛ̀ɛ̀ fɔlɔɔ di ɓɔn ɓin ɓɛ ri lɛ ɓɛ ɓa yɛ̀ɛ ɓɔn ɓɛ ɓumɓɛ ɓɛ gherɛɛ ɓi Bɛ̀ll, kɔm̀ lɛ ɓɛ ri ɓɛ̀tɛnɛn ɓi syeesyee à rìkalì.

¹⁵I ŋwaànɛ à yin ngherɛ̀n à kɔ̀ni lɛ a ghasɛn rì ŋwaànɛ ɓɛ ri ɓi rìwɛy ɗì nyi, ɓɛ caɗ nyi à ghasɛ̀n; i ki ghɛnɛɛ fɔlɔɔ, ǹgherɛ̀n à baŋì nsoò lɛ à giɓ, à yiìdi nkàŋɛn ɓi rìwɛy ɗìn; lɛ Bɛ̀ll à reŋìghà ɓìsi lɛ ti ghɛɓ ɓi fyòoog ɓi ɗùm.

¹⁶Wɔ̀ kìristɛ̀n a giɓ ù yii la nkòo wɔ̀ yɛɛ ghɛɓsii gɛ yii wɔɔ, nsoò lɛ wɔ̀ baŋì ìnɛ ì rì kìristɛ̀n, ù yii la nkòo wɔ̀ yɛɛ ghɛɓsii gɛ giɓ wɔɔ̀?

¹⁷Kìɓan kifog mum ǹcèm a ghɛɓ lɔŋ ɓi nɗɛli wu Bɛ̀ll à fogà nyi miì yɛ̀ɛ à reŋìghà nyi; ǹsiŋdɛn wu nfafa ɓi ɓìseŋi ɓi Kiris ɓìcèm wɛɛ ri lɔɔ.

¹⁸I mum à ɓaghà ǹkɛ̀rɛn yɛ̀ɛ Bɛ̀ll à reŋìghà nyi, à ghɛ̀ɛ̀sɛɛ lɔŋ ki rɔ̀ɓi ɓi kɛ̀rɛ̀n wìì; i ŋwaà ɓaghà kɛ̀ɛ̀ kì kɛ̀rɛɛ yɛ̀ɛ Bɛ̀ll à reŋìghà nyi, à ghɛ̀ɛ̀sɛɛ ɓi ki kɛ̀rɛɛ.

¹⁹Kìɓan ki lɛ ŋwaà rì ǹkɛ̀rɛn nsoò lɛ à yin ǹkɛ̀rɛn, ki ghɛɓsii ɓi com, lɔŋ rìɓèŋ ɗi ɓidɔ̀gsɛna ɓi Bɛ̀ll ɗyɛɛ ghɛɓsii.

²⁰Fɔɔnnɛ mum ǹcèm à ghɛ̀ɛ̀sɛɛ kì rɔ̀ɓi ɓi nɗɛli wu à ɓaghà miì ɓi cààmɛ̀n ki Bɛ̀ll à reŋìghà nyi.

²¹I Bɛ̀ll à reŋìghà wɔ̀ di ù rì ǹkpàn, ǹɗem wɛ̀ kɛɛ̀ cɛɛcɛɛ̀rɛ̀n wɔ̀ rì rìɓa ɗìn, wɔ̀lɛ i ù rì rì bee inɛ lɛ u pɛsɛn ɓi rìkpàn, ù pɛ̀sɛ̀n, kɔ̀ɔ kì wàŋ.

²²Ɓisuulɛ ǹkpàn anɛ Kan à mɛ reŋì à yiìdi ɓi rìkpàn, à ti ŋwaà zɛy ànɛ à wooghrɛɛ rì Kan, fɔlɔɔ nnɛ ŋwaànɛ Kan à reŋìghà di à yin ǹkpàn, à ti ǹkpàn a Kiris.

²³Dùne ì gòri yìn ì rì ǹkɛŋɛn fɔɔnnɛ ɓì ghɛ̀ɛ̀sɛɛ ɓi ki ɓaà ɓɛ̀kpàn ɓɛ ɓum.

²⁴Ɓɔɔsoŋ̀, ki ghɛɛ̀sɛɛ lɛ mum ǹcèm a ghɛɓ lɔŋ ɓi mis mɛ Bɛ̀ll ɓi nɗɛli wu à ɓaghà miì ɓi cààmɛ̀n ki yɛ̀ɛ Bɛ̀ll à reŋìghà nyi.

²⁵Ɓi san ànɛ a ɓɔɓti ɓɛ ɓɛ ka wɛɛyi ɓi, ǹ-yin ɗi bimiɗ à ǹsiŋdɛn ànɛ à rìì yɛ̀ɛ Kan, kìɓan kifog, ɓi rìɓa ɗi ǹɗì mum ànɛ kìrɔɔ̀-ǹɗem à Bɛ̀ll à kìghà lɛ mɓa mum ànɛ ɓɛ ghɛɛ̀sɛɛ kì tyweeyii, ǹkpaa lèg ànɛ yɛɛ rìghɛn ɗyɛ̀m ɗi ri.

²⁶Com ki ǹghɛɛ lɛ ki rɔɔtɛɛ ki ri lɛ: Yɛ̀ɛ mɛ̀tɔɓ mɛ ri lɛɛ̀gwey ɓigomìnɛ mɛ̀ ǹghɛɛ lɛ, ki ri kìrɔɔ lɛ ŋwaa rɔɓ lɔŋ ɓi nɗɛli wu à rì miì.

²⁷I ù rì rì giɓ kɔ̀ɔ kaa lɛ u ghasɛn ɗì nyi; i ù yin nwɔlɛn, kɔ̀ɔ kaa giɓ ànɛ u wɛy.

²⁸Kaa soo rì fɔlɔɔ, ù kìi ɓi kiɓe di ù wɔlɛɛ. I gɔ̀n ì giɓ inɛ ì yii ɓi baŋì ì kɛ̀ɛ rìwɛy, ì kìi ɓi kiɓe. Wɔ̀lɛ ɓumɓɛ ɓɛ ri ɓɛ̀wɔlɛn ɓɛ ri ɓiì ɓaà rì mɛ̀tɔɓ ɓi cɛɓ kaa, nni mɛ̀tɔɓ mɛ̀n mɛɛ̀mɛ nkɔ̀nkɔn lɛ ɓi lɛg.

²⁹Ɓɔɔsoŋ̀, com ki nkɔ̀nkɔn lɛ nkpaà ki ri lɛ, cààmɛ̀n ki ri kìden, à tumɛ̀n ɓigomìnɛ, ɓumɓɛ ɓɛ ri rì ɓɛ̀yiɓ, ɓɛ ghɛɛ̀sɛɛ kì ɓaà yɛ̀ɛ ɓɛ ri kɛ̀ɛ̀ ɓɛ̀yiɓ;

³⁰ɓɛ̀roɓɛ ɓɛɛ rènɗèn ɓɛ ɓa yɛ̀ɛ ɓɛ yin ɓiì rènɗeni, ɓɛ ɓɛɛ nyàànyàà ɓɛ ɓa yɛ̀ɛ ɓɛ yin ɓiì nyàànyaa; ɓɛ̀roɓɛ ɓɛɛ̀ làlag ɓyom ɓɛ ɓa yɛ̀ɛ ɓɛ yin ɗi ɓyɔ;

³¹ɓɛ̀roɓɛ ɓɛɛ̀ ghɛnghɛn kirɔɔ ɓi ziinɛ, ɓɛ ɓa yɛ̀ɛ ɓumɓɛ ɓɛ ghɛɛ ɓi kirɔɔ, ɓisuulɛ rìɓa ɗi ziinɛ yɛ̀ɛ seeseèrɛ̀n ɗi miì ɗyaa finɛn ti ɓì.

³²Mɛ̀ɛ nkɔ̀nkɔn kɔm̀ lɛ, ɓi ɓa kɛ̀ɛ̀ kìɓan ki kɛɛ̀ ɗiɗi mini mɛ̀rem; lɛ nɗem wu ŋwaànɛ à yin nwɔlɛn, wɛɛ̀ cɛɛrag ri ɓìɓan ɓi Kan; ŋwaàncèm ànɛn à ki kaakaa lɛ a ki ɓìɓan ɓi ɓi ri lɛ ɓi puɓsì Kan ǹɗem.

³³Wɔ̀lɛ nɗem wu ŋwaànɛ à rì ǹwɔlɛn wɛɛ̀ ɓɔmɓɔm ɓiɓan ɓi ɓi ziinɛ, à ki kaakaa lɛ a puùpùɓsì nɗem wu giy,

³⁴à rì yɛɛ lɔɔ lɛ nɗem fɛ, nɗem fɛnii; fɔlɔɔ yɛɛ ri girig lɛ giɓ anɛ à rì kɛ̀ɛ̀ yii, nsoò lɛ gɔ̀n ìnɛ ì ka yi ɓi ɓɛbaŋì, ɓɛ ri ɓiì foŋì nɗem rì ɓìɓan ɓi Kan, lɛ ɓɛɛ ɓa ɓɛ̀tenɛn lɛ rì ɓi nyoo yaa, rì ɓi mɛ̀ghay maa; wɔ̀lɛ roànɛ à rì ǹwɔlɛn à rì ɓiì fèfeegh ɓiɓan ɓi ɓi ziinɛ, ri bee yi à rì lɛ à puɓsì yii wiì ǹɗem miì.

³⁵Ǹkpaa fɔlɔɔ ɓisuu kirɔɔ kin, ki yin lɛ fìram fyɛɛ̀fi ǹɗami mìni, ki ri lɔŋ ɓisuulɛ di ɓi ki ɓìɓan ɓi ɓi ghɛɛ̀sɛɛ lɛ syeesyee, ɓì ki ɓa ɓɛràrɛn ɗi Kan kɛ̀ɛ̀ kìɓan ki ki ri lɛ ki yeèyèèsì mìni.

³⁶I mum à ghɛɛ lɛ ki ri ǹtoòrìɗ lɛ gɔ̀n yìì yɛɛ ghay ì cee gbàà ìnɛ giɓ a ghɛ̀ɛ̀sɛɛ miì kì wɔlɛɛ, nni à ghɛɛ lɛ à ghɛ̀ɛ̀sɛɛ yɔ̀ ki faà ɓi rìwɛy, à ghɛ̀ɛ̀sɛɛ kì kìi com ki à kɔ̀ni; fɔlɔɔ a yin kiɓe; ɓum ɓɛ ghɛɛ̀sɛɛ kìwɔlɛɛ.

³⁷Wɔ̀lɛ ŋwaànɛ à teri bimiɗ à nɗɛli kɛ̀ɛ̀ ǹkàŋɗɛ̀n, ki ɓa lɔŋ lɛ rìkɔ̀n ɗii ɗi nyimiɗ à ki ren ɓi nɗem wii lɛ a ɓeŋ gɔ̀n yìì nkwɛ̀y, di à kìi lɛ syeesyee.

³⁸Fɔlɔɔ nnɛ ŋwaànɛ à faa gɔ̀n yìì ɓi rìwɛy, à kìi syeesyee à kìɓan, wɔ̀lɛ ŋwaànɛ à faa ɓi gɔ̀n yìì ɓi rìwɛy yɛɛ raŋ̀zii kì kìi syeesyee à kìɓan.

³⁹I giɓ a rì ǹwɔlɛn, nsiŋdɛn wu riwɛy wu kàŋi nyi rì yii cààmɛ̀n kìcèm ki yii à kaka ǹto ɓi kìmììgh; wɔ̀lɛ i yii à wii, giɓ anɛ̀n à rì rì ìtèɗ wulɛ à kɛ̀n rìwɛy ɗi ŋwaànɛ à kɔ̀ni; kìɓan kifog, kìɓan kiǹ ki ghɛɛ̀sɛɛ kì kìlɛɛ ɓi rìgherɛ̀n ɓi ɗùm.

⁴⁰Nni wɔ̀lɛ ɓi rìghɛn ɗyɛ̀m, giɓ anɛ̀n à ɓiì ɓiisɛɛ ki ɓaà lɛ syeesyee, di à kɔ̀rii fɔ̀lɔ̀ɔ̀; nni mɛ̀ɛ nfèki lɛ ǹɗì girig rì Ǹghay à Bɛ̀ll.