Read Bafia 2 KƆ̀RƐ̀ŊTYƐŊ 10 Bible Online

2 KƆ̀RƐ̀ŊTYƐŊ 10 - Bafia bible

2 KƆ̀RƐ̀ŊTYƐŊ 10

¹Mɛ̀ Pol! ǹtɔɔgh mìni, ɓi tɛ̀tɛ̀rɛ̀ɛ̀ rì syeesyee à ǹɗem à Kiris, mɛ̀ ànɛ ǹti ǹsɛɛ̀dàg mɛ̀ɛmiɗ ɓi zi ɓi mis min, kìɓan kifog, cààmɛ̀n ki ǹɗì mìni fìràɓ, m̀ɓa rì kìghɛɛsii ɓi san wìn lɛɛ̀gwey.

²M̀ɓɔ̀ŋzaagh mìni lɛ, kɛ̀ ɓi kì com ki lɛ i ǹkpaŋi foo, mɓa ǹtiniyɛn lɛ nki rìbaŋì ɗi nɗem wɛ̀m wɛɛ̀ fèfeg lɛ ǹɗì ɓiì kìi ri kìghɛɛsii kicèm, rì ɓumɓɛ ɓɛɛ̀ fèki lɛ ɓìɓan ɓi ti kìkì ɓi ri lɛ ti kaakaa kirɔɔ ki ɓi mɛ̀mùù.

³Ki ri lɔŋ saaɗ lɛ tì rì ɓi nyoo ì mɛ̀mùù, kìɓan kifog tì yin ɓiì ɗùùɗuu ri mɛ̀ghèy mɛ ɓi mɛ̀mùù.

⁴Ɓisuulɛ ɓyom ɓi ribaŋì ɓi ti ɗùùɗuu wɛ̀y ri ɓyɔ, ɓi yin ɓyom ɓi mum à mɛ̀mùù yɛɛ syaagh; ìtèɗ wu ɓyom ɓìn wu riì yɛ̀ɛ Bɛ̀ll lɛ ti ɓɛki gari yi yi teèsɛɛ. Ɓìsii ti tì wààghì lɛ rì ɓìyèg ɓi momzɛ̀n,

⁵rì mɛ̀tèɗ mɛcèm mɛ mɛɛ̀ kaakaa lɛ mɛɛ ɗuu rì rìyi ɗi ɓum ɓɛ ri lɛ ɓɛ yi Bɛ̀ll; fɔɔnnɛ ti kìlag com ki lɛ fèg bimiɗ a ɓa ǹkpàn, à ki kì Kiris mɛ̀wog.

⁶Tì rì ɓɛ̀pègsɛn lɛ ti fa ǹtoòtèɗ wucèm wu wu ri lɛ wu ghɛnɛ̀n ǹtɔɓ à tumɛ̀n ɓi cààmɛ̀n ki ɓì rì ɓiì rèsii lɛ ɓì rì rì mɛ̀wog yɛ̀ɛ ki ghɛɛ̀sɛɛ.

⁷Ghɛngiina ɓìɓan lɔŋ yɛ̀ɛ ɓi ri; i ŋwaàdɛŋ à konaagh kì yii rì nɗem wii wucèm lɛ, à rì mum à Kiris, à ghɛ̀ɛ̀sɛɛ kì yitii ɓi nɗem wii lɛ, ɓìsi girig tì rì ɓum ɓɛ Kiris lɔŋ yɛ̀ɛ nyi.

⁸Nni nsoò màa cìɓtaagh rìsaàsànɛ̀n ɗi itèɗ wu rilàmì wu Kan à faghà ɓìsi lèg àdɛŋ, lɛ ti ki lɛ rìgherɛ̀n ɗin ɗyɛɛ tɔɔ̀, àa lɛ ti yogsi ɗyɔ, màa wog ɓi ntoòrìɗ.

⁹Lɛ di kɛ̀ kɛɛ̀ ɓa yɛ̀ɛ nkɔ̀nkɔn lɛ nniŋzi mìni nyoo rì ɓɛ̀kaàtà ɓɛm.

¹⁰Ɓisuulɛ ɓɛ ti ɓɛ kpaaghì lɛ: Ɓɛ̀kaàtà ɓɛ Pol ɓɛ kiì lɛ ɓɛ nyɛn ɓɛ ki tèèsɛn, kìɓan kifog, cààmɛ̀n ki nyimiɗ yɛɛ rɛrɛlii, à ɓa kɛ̀ɛ̀ ìtèɗ, ɓìtòkì ɓii ɓi ki ɓa ɓitòkì ɓi ɓum ɓɛ ri lɛ ɓɛ sɛɛtì.

¹¹Ŋwaànɛ a tòtog fɔlɔɔ a ghɛ̀ɛ̀sɛɛ kì yii lɛ, lèg ànɛ yɛ̀ɛ tì ti tì tòòghràg ɓi ɓɛ̀kaàtà ɓis di tì rì fìràɓ, innɛ tì rì ɓiì kìi di ɓìsiìɓɔmiɗ tì rɛrɛlii.

¹²Ɓìsii ghɛɛsii ɓi lɛ ti teɗ ǹɗɛli, nsoò lɛ ti feèghrɛn ɓìsiìɓɔmiɗ ri ɓum ɓɛdɛŋ, ɓɛ ɓɛ ti ɓɛ sɛɛghràg ɓɔmiɗ. Wɔ̀lɛ ɓɛ ri ɓìyèg yɛ̀ɛ ɓɛ ti ɓɛ feèghràg ɓi vèg ìnɛ ɓɔmiɗ ɓɔ yɛɛ rɛsii, ɓɛ ki teɗ ɓɔmiɗ ɓi sìg à vèg ìnɛ ɓum ɓɛ ghɛɛ̀sɛɛ kìfèèghrɛɛ ri yɔ̀.

¹³Ɓi ɓɛg ànɛ a lɔ̀ŋkis, tì kɔ̀ni ɓi lɛ ti sɛɛghrɛn tì ceesì ǹɗèè, wɔ̀lɛ ɓìsii ri lɔŋ ɓiì sugtɛɛ ɓi mɛ̀rèè mɛ Bɛ̀ll à rèsàkà ɓìsi, yɛ̀ɛ à faghà ɓìsi ìtèɗ wulɛ ti kpaŋ girig a lɔ̀ŋkin.

¹⁴Tì cee ɓi mɛrèè yɛ̀ɛ ɓɛɛ̀ kali lɛ, tì kpagà ɓi foo a lɔ̀ŋkin; ɓisuulɛ ki ri saaɗ lɛ tì kpagà a lɔ̀ŋkin ɗi Syeesyee à Ɓɔlɛ à Kiris.

¹⁵Ɓìsii yin ɓiì sɛɛghsɛɛ̀ghrɛ̀n tì ceesàg ǹɗèè ɓi kìsay ki ɓum ɓɛdɛŋ, kìɓan kifog tì rì rì ǹtyweeyi lɛ rìgherɛ̀n ɗin ɗi ri ɓiì tɔɔ̀, fɔlɔɔ nnɛ tì ɓiì kìi kisay ki ki ri ɓiì ghɛnɛɛ ɓi nyìinyìm wìn ki cee fɔlɔɔ, ɓi mɛ̀rèè mɛ Bɛ̀ll à faghà ɓìsi.

¹⁶Yɛ̀ɛ tì ɓiì ghagsii Syeesyee à Ɓɔlɛ ɓi ɓɛ̀kòdò ɓɛ ɓɛ ri di ù cee mìni, à cee lɛ ti saàsànɛ̀n kìsay ki ki mɛ kìlɛn ɓi jàŋ i ɓum ɓɛɗɛŋ.

¹⁷Fɔlɔɔ nnɛ mum ànɛ à kɔ̀ni lɛ a saàsànɛ̀n, à ghɛ̀ɛ̀sɛɛ kìsaasanɛ̀n ɓi Kan ɓiɗùm.

¹⁸Ɓisuulɛ, àa ŋwaànɛ a sɛɛghsɛɛ̀ghrɛ̀n nyimiɗ innɛ ɓɛ ri ɓiì kalii lɛ rìkì ɗii ɗi ri lɛ syeesyee, lɔŋ roànɛ Kan à sɛɛgh innɛ rìkì ɗii ɗi rɔɔtɛɛ.