Read Bafia 2 KƆ̀RƐ̀ŊTYƐŊ 11 Bible Online

2 KƆ̀RƐ̀ŊTYƐŊ 11 - Bafia bible

2 KƆ̀RƐ̀ŊTYƐŊ 11

¹Eɗ, i ɓyàa rì lɛ ɓì cenɛ̀n lɛ nghas̀ kìyèg lɛsàg! kìɓan kifog, ɓì rì mɛ̀ ɓiì cenɛɛ!

²Ɓisuulɛ, ǹɗì rì yɔ̀ɔ̀tì ɓi san wìn, yɔ̀ɔ̀tì ànɛn à rìì yɛ̀ɛ Bɛ̀ll rì kìsyɔ̀ɔ̀ lɛ, ɓì rì fɛlɛ yɛ̀ɛ gɔ̀n ì giɓ ìnɛ ì ka yiɓi ɓɛbaŋì, ì ki ɓa ntɛnɛn, ìnɛ ì kàkà lɛ ì ɓiì wɔlì m̀bobog à yii lɛ Kiris.

³Nsoò fɔlɔɔ, ǹɗì rì mɛ̀riighrikì lɛ, fɛlɛ yɛ̀ɛ nyoo ì yègsìghà Ɛɛvɛ rì ɗyomzɛ̀n ɗi ì ɓaghày rì ɗyɔ, mɛ̀yitì min mɛ̀ kɛɛ̀ ɓa lɛ mɛ ɓuùsɛ̀n ɓi lèg ànɛ lɛ ɓi rini lɛ rì rìsɛɛ̀dì ɗi mìniìɓɔmiɗ ɓi zi, rì rìtɛn, lɛ ɓyɛɛ̀ɓi ɓì ghɛ̀ɛ̀sɛɛ kì ɓaà rì ɓyɔ, ɓi ɓɛg ànɛ yɛ̀ɛ Kiris.

⁴Ɓisuulɛ ki yeesii ɓi mini lɛ ŋwaàdɛŋ a yu mìni kì kalii kiɓan ki Yeesus àdɛŋ, ànɛ à yin anɛ ɓìsii kalìghà mìni, nsoò lɛ ɓi teɗ Ǹghay àdɛŋ ànɛ à yin Ǹghay ànɛ ɓì ɓaghà di ɓì mɛ teɗ, nsoò lɛ Syeesyee à Ɓɔlɛ àdɛŋ ànɛ à yin anɛ ɓì tekà.

⁵Mɛ̀ɛ nfèfeg lɛ ɓum ɓin ɓɛ ɓi seesee lɛ ɓɔ yɛɛ ri ɓyoo ɓɛkɛ̀nì-fìtom ɓɛ cee ɓi mɛ ɓi com kidɛŋ nsoò lɛsàg.

⁶Nsoò yɛ̀ɛ m̀ɓiisɛɛ ɓi ki yiì kìtòkì, ǹ-yin zɛ̀zɛɗ ɓi kìɓan ki ki seesee rìyi. Tì mɛ rèsi mini kìɓan kiǹ bee lɛ bee ɓyààmɛ̀n lɛɛ̀gwey.

⁷Gìn mɛ̀ yɛɛ sɛrìghà nya yɛ̀ɛ ǹsɛɛ̀dɛ̀ngà mɛ̀ɛmiɗ ɓi zi lɛ mɓɔgsi mìni, cààmɛ̀n ki ǹghagsìghà mìni Syeesyee à Ɓɔlɛ à Bɛ̀ll zɛy rì zɛy, kɛ̀ ɓi kòòsɛn?

⁸M̀pùmzìghà ɓìseŋi ɓi Kiris ɓidɛŋ, yɛ̀ɛ mɛ̀ɛ ntekii mɛ̀lèɓ a lɔ̀ŋkaa di nkìki kisay foo a lɔ̀ŋkin;

⁹nni nsoò yɛ̀ɛ kìsoghà ki ɓangà mɛ̀ cààmɛ̀n ki m̀ɓaghà foo a lɔ̀ŋkin, ǹtɛ̀g wɛm̀ wu syɔngà ɓi wààdɛŋ ɓi nto. Ɓisuulɛ ɓɔɔseŋi ɓis ɓɛ ɓi rìgherɛ̀n ɓɛ ɓɛ pɛsɛ̀ngày a Masedwan, ɓɛ faghà mɛ̀ com kìcèm ki ki kaarɛ̀ngà mɛ̀; ǹlɛkà bee bimiɗ lɛ kɛ̀ɛ mɓa ntɛ̀g wu wɛɛ yɔŋi mìni ɓi nyoo, fɔɔnnɛ ǹɗì ɓiì ki lɛlɛɛgh kiɓan kiǹ.

¹⁰Lɛ saaɗ à Kiris ànɛ à rì ɓi mɛ̀, ǹkalii jɛ̀ɛ̀ aɗyoo lɛ, ɓi ɓìlànà ɓi zi ɓi a Akayi, mum à yin lɛ à règ mɛ̀ rìsaàsànɛ̀n ɓi kìɓan kin.

¹¹Ɓisuucɛ nnɛ ǹkpaa fɔlɔɔ? Lɛ yɛ̀ɛ ǹkeesii ɓi mini? Bɛ̀ll yɛɛ yii!

¹²Ǹɗì ɓiì kɛ̀nkɛni asu ɗì rìkìkì ɗi nkìki ɗi, lɛ di m̀pisi ɓìɓan ɓìcèm ɓi ɓum ɓɛdɛŋ ɓɛ ri lɛ ɓɛ ɓanɛ̀n miì, lɛ ɓɛɛ̀ kaakalɛ̀n lɛ ɓɔɔ̀ kìki girig kìsay ki ɓìsiì kìkì. Ɓum ɓɛdɛŋ ɓɛɛ̀ kaakaa com ki ɓɛɛ ɓanɛn miì lɛ ɓɛɛ ki fɔlɔɔ.

¹³Ɓumɓɛ̀n ɓɛ ri ɓumɓɛ ɓɛɛ̀ pwààpwaa lɛ ɓɛ ri ɓɛ̀kɛ̀nì-fìtom ɓɛ Yeesus ɓɔ ɓɛ̀kìì-ɓìsay ɓɛ ɓɛɛ̀ yèeghyegsì ɓum, ɓɛ reèghrèŋɗɛ̀n lɛ ɓɛ̀kɛ̀nì-fìtom ɓɛ Kiris.

¹⁴Kìɓan kiǹ ki yin kiɓan ki kuurakɛn ɓisuulɛ Satàn nyimiɗ a rèsag fɛlɛ yɛ̀ɛ ŋwaà-fìtom a ǹlònlomɛn kitɛɛtɛn.

¹⁵Fɔɔnnɛ ki yeesɛɛ ɓi lɛ ɓɛ̀kìì-ɓìsay ɓii girig ɓɛɛ resɛn ɓi mis mɛ ɓum lɛ ɓɛ ri ɓɛ̀kìì-ɓìsay ɓɛ roànɛ à rì lɛ saaɗ. Rìsyɔn ɗyaa ɗi ɓaa gɛ lɔŋ yɛ̀ɛ mɛ̀kìkìì maa mɛ ri.

¹⁶M̀ɓììtii kì kpaà lɛ: mum kɛ̀ɛ teɗ mɛ yɛ̀ɛ kìyèg, nkòo lɛ, ɓì ghɛɛ lɛ ǹɗì kìyèg, ghàɓina mɛ̀ ɓi sìg à kìyèg, di fɔɔnnɛ mɛ̀ɛ nki girig maa kalɛn lɛsàg.

¹⁷Kìɓan ki nkpaakpaa ɓigomìnɛ, ki yin rikɔ̀n ɗi Kan, kìɓan kifog, ntòtog yɛ̀ɛ ŋwaànɛ à ɓùùsɛɛ, à ki yi syeesyee à rìyi lɛ, à rì rì kìɓan ki à rì lɛ à kaàkàlɛ̀n ɓi mis mɛ ɓum.

¹⁸Lɛ yɛ̀ɛ kìgwey ki ɓum kɛɛ̀ kaakalɛ̀n ɓìɓan ɓi ɓi mɛ̀mùù, mɛ̀ ǹɗì girig ɓiì kalɛɛ mɛkuu mɛ ɓiɓan mɛǹ.

¹⁹Mìni ɓɛ ɓì rì ɓum ɓɛ ɗyomzɛ̀n, ɓì ti ɓì cenàg lɛ ɓi kɔri rì ɓumɓɛ ɓɛ ri ɓìyèg, kɛ̀ kɛɛ̀ yeesi mini.

²⁰Ɓisuulɛ ɓì ti ɓì cenàg lɛ ɓɛɛ ghaàsi mìni ɓɛ̀kpàn, ɓɛ ɗiɗì mìni, ɓɛ puùpùmzì mìni, ɓɛ nyuùnyùŋzàg mìni, ɓɛ ki ŋɔ̀ɔŋɔgtàg mìni ɓi-su.

²¹Nkpaaghi lɛ, kìɓan kiǹ ki ri ɓìsi ǹtoòrìɗ; ki pisɛɛ yɛ̀ɛ tìi nɗèsii lɛ tì rì rì ìkɔ̀g, ɓi rìcàrɛ̀n ɗiǹ, nsoò fɔlɔɔ, kìɓan kicèm ki mum à rì lɛ à ghɛɛsì kì kpaà, mɛ̀ girig ǹɗì lɛ ǹghɛɛsì kì kpaà kɔ; ntòtog yɛ̀ɛ ŋwaànɛ à rì kìyèg.

²²Ɓaa soo rì ɓɛ̀-Ebìreegh, mɛ̀ ǹɗì girig muu Ebìreegh; ɓaa soo rì ɓumɓɛ a Isirayɛl, mɛ̀ ǹɗì girig kìbog ki miì; ɓaa soo rì dòò yi Abiraham, mɛ̀ ǹɗì girig dòò yìì.

²³I ɓɛ ri ɓɛ̀kìì-ɓìsay ɓɛ Kiris m̀ɓa kìyèg ki kɔɔ̀kɔɔ̀ lɛ mɛ̀ ǹɗì ǹkìì-kìsay a Kiris ǹcee ɓɔ, ɓi ɓìsay ɓi m̀mɛ kì, nni àa foo ri foo, ǹcee ɓɔ ɓi naà-zày yi m̀mɛ kɛ̀n, à kɛ̀n kì kpaŋì ɓi zàà yi ɓɛ mɛ kwiy mɛ, rì ɓi ɓɛ̀koŋnyoo ɓɛ riwù ɓɛ ǹti ǹghaaghràg miì ɓyààmɛ̀n lɛɛ̀gwey.

²⁴Gɛ̀n yitaǹ innɛ Ɓɛ̀yudɛ̀n ɓɛ mɛ ɓog mɛ zàà ìnɛ, ɓɛ ɓog mum mɛ̀kpas rìtin ɗì ǹtɛ̀ɗ rì taànìn,

²⁵ɓɛ ɓog mɛ̀ kìtòn gɛ̀n yiraa, ɓɛ rogì mɛ̀ gɔ̀g gɛ̀mbog, kìkɔm ki sigtɛ̀n mɛ̀ gɛ̀n yiraa; ǹghagsì bimiɗ à ŋwos rì bimiɗ à ìru ɓi mɛ̀nig;

²⁶Mɛ̀ɛ nkɛ̀ɛ̀kɛɛ cààmɛ̀n kìcèm, rì mɛ̀kòò ǹtutùlɛ̀n rì ɓɛ̀koŋnyoo ɓɛ ɓi don yi ɓɛ rìɓày, rì ɓɛ̀koŋnyoo ɓɛ ɓɛ̀fàràfara, rì ɓɛ̀koŋnyoo ɓɛ ɓɛ riì mɛ̀ a ɓɛ̀geni ɓɛ̀m ɓɛ Ɓɛ̀yudɛ̀n, rì ɓɛ ɓɛ riì mɛ̀ a ɓumɓɛ ɓɛ yin Ɓɛ̀yudɛ̀n, rì ɓɛ̀koŋnyoo ɓɛ ɓi bàn, rì ɓɛ ɓireɓ, rì ɓɛ ɓi rìɓày à kìkòn; ǹtulɛ̀n rì ɓɛ̀koŋnyoo ɓi nyìinyìm à ɓumɓɛ ɓɛɛ̀ ɓɔ̀ŋɓɔŋ lɛ ɓɛ ri ɓɔɔseŋi ɓis ɓɛ righerɛ̀n.

²⁷M̀mɛ kì ɓisay ɓi ɓi teèsɛɛ, ǹki tulɛn ɗi ɓìtèetèɗ ɓi mɛfèèghrɛn, m̀mɛ kì lɛ, ǹkɔ̀rì ɓɛ̀saalo, ǹwog com ki lɛ zày, rì ki lɛ kìnɔli, ɓyààmɛ̀n ɓidɛŋ mɓa ǹtiniyɛn lɛ ǹcèlì ɓìɗilàg, ǹki wog com ki lɛ kìfɛɓ, kìtòn zɛy à pyèn mɛ̀ mis.

²⁸Kɛ̀ɛ nki ɓày ɓiɓan ɓimbog, fɛlɛ yɛ̀ɛ ǹtɛ̀g wu wu ri mɛ̀ ɓi nɗem ɓɛ̀ŋwos ɓɛ̀cèm, wɛɛ ri lɛ ǹɗem wɛ̀m wɛɛ̀ cɛɛcɛɛ̀rɛ̀n rì ɓìseŋi ɓi Kiris ɓìcèm.

²⁹I ŋwaàdɛŋ à rì kɛ̀ɛ̀ ìtèɗ, ǹghɛnɛ̀n mɛ̀ɛmiɗ kɛ̀ɛ̀ ìtèɗ, i ŋwaàdɛŋ à kpìi ɓi kìɓe ɓiɗùm, kìɓan kiǹ ki fa mɛ̀ coo rikɛŋ lɛɛ̀gwey ɓi nɗem.

³⁰I ki ri lɛ mum a saàsànɛ̀n, lɔŋ rìɓa ɗyɛ̀m ɗi ǹɗì kɛ̀ɛ̀ ìtèɗ, ɗyɛɛ̀ɗi ǹsanɛ̀n.

³¹Bɛ̀ll ànɛ à rì Seŋi Kan Yeesus ànɛ à ki rì rì rìkem fiɗyàɓ fikɔ̀ɔ̀, à yii lɛ ǹ-yin ɓiì pwààpwaa.

³²Yɛ̀ɛ m̀ɓaghà a Damas, gɔmìnà ànɛ à sasàlà rìfòm ɗi lɛ Aretas, à rɛsàkà ɓɛ̀sujàà a mɛ̀suunaa mɛ gari i bàn lɛ ɓɛɛ ɓan mɛ̀.

³³Kìɓan kifog, ɓɛ rɔŋzìghà mɛ̀ ɓi wonɗò à gari, ɓɛ ki sɛɛ̀di mɛ ɓɛg àmbog, ǹkàŋɛn ɓi kìkpoŋ, fɔɔnnɛ ǹghɛɓkà ŋwaànɛ̀n.