Read Bafia 2 KƆ̀RƐ̀ŊTYƐŊ 4 Bible Online

2 KƆ̀RƐ̀ŊTYƐŊ 4 - Bafia bible

2 KƆ̀RƐ̀ŊTYƐŊ 4

¹Bɛ̀ll yɛɛ faghà ɓìsi kìsay ki ɓi kìpuɓì-nɗem wìì, fɔlɔɔ nnɛ mùm mis mɛ yin miì lɛ mɛ fɔy.

²Ɓìsiì ɓengà ɓìɓan ɓi ntoòrìɗ ɓi ɓyɛɛ̀ kìikilɛ̀n a rìnyam; cɛɓ ki ti ghɛghɛɓ ki yin ɗi mɛ̀ghèy, fɔɔnnɛ tì ki yin ɓiì lɔ̀ɔghlɔgtì jɛ̀ɛ̀ ì Bɛ̀ll. Wɔ̀lɛ rìrèsì ɗi ti rèresi saaɗ ɗyɛɛ̀ɗi ti kaakaa bee inɛ ɓum ɓɛ̀cèm ɓɛɛ tyweeyi ɓìsi ɓi mis mɛ Bɛ̀ll.

³I Syeesyee à Ɓɔlɛ ànɛ ti kakàlì a kaka ǹlɔghɛn, à rì ǹlɔghɛn ɓisuu ɓumɓɛ ɓɛ ghɛɛ̀sɛɛ kì ɗyaŋì.

⁴Ɓi san ànɛ a ɓumɓɛ ɓɛ ti ɓɛ ɓengì kìgherɛɛ, bɛ̀ll ì ziinɛ ì mɛ dùŋzag ɓɔ mɛ̀rem lɛ ɓɛ̀ kɛɛ̀ ghɛn yɛ̀ɛ Syeesyee à Ɓɔlɛ à rìkem ɗi Kiris a lònlòm; Kiris ànɛ à rì kìfèèghrɛnà ki Bɛ̀ll kɔmiɗ.

⁵Àa ɓìsiìɓɔmiɗ nnɛ ti làalamɓɛ̀n ɓi ɓìɓan ɓi Bɛ̀ll ɓi ti kpaakpàà, lɔŋ Kan Yeesus Kiris nnɛ ti làalamɓɛ̀n, tì ki kpaaghi lɛ tì rì ɓɛ̀kìì-ɓìsay ɓin ɓisuu Yeesus.

⁶Ɓisuulɛ Bɛ̀ll ànɛ à kpaaghà lɛ kìtɛɛtɛn kɛɛ lom ɓi birìm, nnyɛɛ lomgà kìtɛɛtɛn ɓi mɛ̀rem mis, lɛ a ki lɛ rìyi ɗi ɓum ɓɛ ri lɛ ɓɛ yi rìkem ɗi Bɛ̀ll ɗi ɗyɛɛ̀ lònlom ɓi-su wu Kiris ɗyɛɛ ghɛnɛ̀n.

⁷Ɓìsii tɛtɛɛgh ìkum wiǹ ɓi ɓìbɔkɔ̀ ɓi ɓi ri ɓì kìyɛn ɗi fyòò, lɛ di kɛɛ ghɛnɛn lɛ tɛntɛ̀ɛ̀n lɛ coo itèɗ wu kuukuùghràkɛ̀n wiǹ, wu yin itèɗ wis, wu ri ìtèɗ wu Bɛ̀ll.

⁸Mɛ̀tɔɓ mɛ ri ɓìsi mɛ̀ laatakɛn ɓɛ ɓɛg ɓɛ̀cèm wɔ̀lɛ mɛ̀ kɛɛ̀ ki turi ɓìsi; tì rì rì mɛ̀riighrikì kìɓan kifog mùm mis mɛ̀ kɛɛ̀ fɔy.

⁹Ɓɛɛ̀ yeeyeèsì ɓìsi, kìɓan kifog Bɛ̀ll à rinii ɓi ɓìsi; ɓɛ ɓokì ɓìsi ɓi zi, ɓɛ̀ kɛɛ̀ ki ràtag ɓisì.

¹⁰Tì tɛ̀tɛɛgh rìwu ɗi Yeesus ɓi nyoo yis cààmɛ̀n kìcèm, lɛ di cɛɓ kii kɛɛ ghɛnɛn ɓi nyoo yìs.

¹¹Lɛ ɓìsi ɓɛ ti ghɛghɛ̀ɓ, tì rì cààmɛ̀n kìcèm ɓi koŋnyòò à rìwu ɓisuu Yeesus lɛ di cɛɓ ki Yeesus kɛɛ ghɛnɛn girig ɓi nyoo yìs inɛ ì ti ì wulàg.

¹²Fɔlɔɔ nnɛ rìwu ɗyɛɛ̀ kìki kisay ɓi ɓìsi, cɛɓ kɔɔ kikì kìsay ɓi mìni.

¹³Nni yɛ̀ɛ ɓìsi girig tì rì Ǹghay à rìgherɛ̀n bog, fɛlɛ yɛ̀ɛ ki ri kìkànɛn lɛ: Ǹgherɛ̀ngà fɔlɔɔ nnɛ ǹtòòghrɛ̀ngà. Ɓìsi girig tì gherɛɛ kìɓan kiǹ kɛɛ̀ki ti tòtog girig,

¹⁴tì ki yi lɛ roànɛ à ghèmzìghà Kan Yeesus, à ghèmzii gɛ girig ɓìsi ǹɗaŋ ɗi Yeesus, à ki kì lɛ ti kpaŋ a lɔ̀ŋkii nɗaŋ ɗi mìni.

¹⁵Lɛ ɓìɓan ɓi ɓìcèm ɓyɛɛ̀ ghɛɛghɛnɛ̀n ɓisu win lɛ yɛ̀ɛ geesɛ̀n ì Bɛ̀ll yɛɛ̀ kɛ̀nkɛn asu ì tèèghtèghɛ̀n, yɛ̀ɛ ki lɛ, ɓum kìtuu ɓɛɛ ɓɔɔ̀ɓɔ̀ŋzì di ɓɛɛ̀ fafa ɓìtògsɛ̀n lɛɛ̀gwey, ɓi rìkem ɗi Bɛ̀ll.

¹⁶Kìɓan kiǹ kɛɛ̀ki tì càrɛɛ ɓi lɛ mɛ̀rem mis mɛɛ teɗ ìɓwɛɗ. Nsoò nyoo yìs i mɛ̀mùù yàa wààwààrɛ̀n lɔŋ lɛsàgsàg rìɓa ɗi nghay wis ɗyɔɔ suùsùgtì lɔŋ nyɔn ɓɛ̀ŋwos ɓɛ̀cèm.

¹⁷Ɓisuulɛ mɛ̀tɔɓ mɛ tì ti tì wokì ɓi maa cààmɛ̀n mɛ ri lɛ fɛnfɛn di ù fèegh mɔ rì mɛ̀nɔ̀ɓɔ̀ mɛ rikem ɗi fiɗyàɓ fikɔ̀ɔ̀ ɗi mɛ̀tɔɓ mɛ̀n mɛɛ̀ ɓùuɓuŋɛ̀n ɓisuu wis.

¹⁸Ɓìsii yin ɓiì nɔ̀ɔnɔɔ̀tì ɓìɓan ɓi ɓum ɓɛɛ̀ seesèè, lɔŋ ɓi ɓum ɓɛ ghɛɛ ɓi ɓyɛɛ̀ɓi ɓìsiì nɔ̀ɔnɔɔ̀tì ɓisuulɛ, ɓyom ɓi ɓum ɓɛɛ̀ seesèè ɓi ti ɓi finàg maa cààmɛ̀n, ɓi ɓum ɓɛ ghɛɛ ɓi, ɓi ri fìɗyàɓ fikɔ̀ɔ̀.