Read Bafia 2 KƆ̀RƐ̀ŊTYƐŊ 7 Bible Online

2 KƆ̀RƐ̀ŊTYƐŊ 7 - Bafia bible

2 KƆ̀RƐ̀ŊTYƐŊ 7

¹Nni yɛ̀ɛ tì rì rì mɛ̀kàg yɛ̀ɛ mɛǹ, ɓɛ̀geni ɓɛ̀m ɓɛ nɗem, tì ghɛ̀ɛ̀sɛɛ kì kìi lɛ tì ɓa ɓɛ̀tɛnɛn kɛ̀ɛ̀ tìfin ti ɓi nyoo, nsoò ti ɓi ǹghay. Ti tèèsiina nyoo lɛ ti konag kìɓaà ɓɛ̀tɛnɛn rì ìris wu Bɛ̀ll ɓi nɗem.

²Nɛmina ɓìsi ìkɔ̀ɔ̀ ɓi mɛ̀rem min, tì kìghà ɓi mum kìɓan, tyɛ̀ ki ki pùmzi mum, tyɛ̀ ki teɗ mum com ɓi ǹ-yègsɛ̀n.

³Ǹ-yin ɓiì kpaakpaa kiɓan kiǹ lɛ nfa mìni bɛ̀lɛn. Lɛ yɛ̀ɛ màa kpaa mini, ɓì rì lɔŋ ɓisi ɓi nɗem nsoò ɓi cɛɓ, nsoò ɓi rìwu.

⁴Lɛ ǹɗì rì ntyweeyi ri mìni lɛɛ̀gwey ǹki ɓa ri ɓɛ̀azi ɓɛ ǹɗì lɛ ǹsaàsànɛ̀n mìni miì rì ɓum; ɓi mɛ̀tɔɓ mɛ̀cèm mɛ ti wowòg, ǹɗem wɛ̀m wu ri lɛ fwɛɛy lɛɛ̀gwey, kìnyàà ki ceeghì mɛ̀.

⁵Lɛ à tumɛ̀n yɛ̀ɛ tì kpagà a Masedwan tì ghɛɛ ɓi rifɔɔsɛ̀n nsoò lɛsàg, tì tulɛ̀ngà rì mɛ̀tɔɓ zàɓ yi aɗyoo yìcèm, lɛ rì ɓìtùrì ɓi dan, ìris ɓi nɗem.

⁶Wɔ̀lɛ Bɛ̀ll ànɛ à ti à fɔɔsàg mɛ̀rem mɛ ɓumɓɛ mùm mɛ ri mɛ̀ fɔlɛn, àa ǹfɔɔsii ɓìsi mɛ̀rem rì rìyù ɗi Tit àa n-yùu,

⁷àa lɔŋ lɛ rìyù ɗii ɗyɔ rì ɗyɔ, kìɓan kifog rìfɔɔsì ɗi ɓìi nfɔɔsii nyi ǹɗem ɗi nfɔɔsii girig ɓìsi mɛ̀rem; àa nkalii ɓìsi coo zày ìnɛ ɓì rì rì yɔ̀ lɛ ɓi ghɛǹ mɛ̀, rì mɛ̀kɛɛgh min, rì rìfalɛ̀n ɗìcèm ɗi ɓì rì ɓɛ̀falɛn a lɔ̀ŋkɛm̀, ɓìɓan ɓiǹ ɓi nkìi lɛ mɓiìsɛn tì kìwoògh kìnyàà lɛɛ̀gwey.

⁸Kaa soo rì lɛ mɛ̀ɛ mɓeɓsii mìni mɛ̀rem ɓi kaàtà ànɛ mɛ̀ɛ nkàniì mìni, ǹ-yin lɛ ǹlemgì rìkì ɗiǹ; nni nsoò mɛ̀ɛ nlemgii, mɛ̀ɛ nghɛɛ lɛ kaàtà ànɛn àa mɓeɓsii mìni mɛ̀rem ɓi maa cààmɛ̀n.

⁹Ǹwoogh kìrɔɔ ɓigomìnɛ, àa lɛ yɛ̀ɛ ɓìi woogh bim, lɔŋ ɓisuulɛ bim yiǹ ìi nkìi lɛ ɓi lɔɔ̀ghrɛn mɛ̀rem. Lɛ ɓìi nwoogh bim yɛ̀ɛ kɛɛ̀ kɔ̀ngi Bɛ̀ll, ɓi lèg ànɛ tìi nkìi ɓi mini kìɓe nsoò lɛsàg.

¹⁰Lɛ bim inɛ mum à woogh yɛ̀ɛ kɛɛ̀ kɔ̀ngi Bɛ̀ll, ì ti ì kìlàg com ki lɛ mum a lɔɔ̀ghrɛn nɗem, kìɓan kiǹ ki ɓa ɓisuu gòri yìì; foo, mum à yin lɛ à lemgì; wɔ̀lɛ rìkuu ɗi bim ɗi ɗi ri ɓi ziinɛ ɗi ti ɗi syogìì rìwu.

¹¹Ghɛɛna kɔm̀ ɓìɓan ɓi bim inɛ ɓìi nwoogh yɛ̀ɛ kɛɛ̀ kɔ̀ngi Bɛ̀ll ìi nkìi mìni; ghɛɛna rìkuu ɗi ritɔ̀n ɗi ìi faa mìni, ɗì rìkuu ɗi ɓi kpaakpaàsɛ̀n, ɗì rìkuu ɗi ǹ-yeesɛ̀n ɗi ɓì rì rì ɗyɔ ɓi mɛ̀rem, rìkuu ɗi kiɗyɔn ɗi ɓì rèsii, rì coo zày ìnɛ lɛ di ɓyàa ghɛɛ̀dii mɛ̀, ghɛɛna ɓà coo rifalɛ̀n ɗi ɓì ti rì ɗyɔ, rì coo rikɔ̀n ɗi lɛ ɓi pɔnɔsi kìɓe. Ɓìi nɗèsii zàɓ yi aɗyoo yìcèm lɛ ɓìi n-yisɛɛ ɓi ri kìɓan kiǹ.

¹²I mɛ̀ɛ nkàniì kɔm̀ mìni, ki n-yin gi ɓisuu ŋwaànɛ àa kìi kìɓe nsoò lɛ ànɛ ɓɛ ǹkìi kìɓe, ki nɗì ɓisuulɛ rìtɔ̀n ɗi ɓì rì rì ɗyɔ ɓi san wìs ɗyɛɛ ghɛnɛn ɓi nyìinyìm wìn ɓi mis mɛ Bɛ̀ll.

¹³Kìɓan kiǹ kɛɛ̀ki mɛ̀rem mis mɛ nfɔli ɓi mùm. Wɔ̀lɛ i ù pisii rìɓa ɗi mɛ̀rem mis mɛ nfɔli, kìnyàà ki Tit kɛɛ mɓiisɛɛ tì ɓìsi kì faà kìnyàà ɓi nɗem, lɛ mìni ɓɛ̀sɛ̀ɛ̀ ɓɛ̀cèm ɓìi kìi lɛ nɗem wu Tit wɛɛ maàrɛn ɓi ɗùm.

¹⁴Lɛ i ǹsɛsɛ̀kà mìni rì Tit lèg àdɛŋ, ɓìi nfaa ɓi mɛ ǹtoòrìɗ, fɔlɔɔ nnɛ yɛ̀ɛ tìi nti tì kpaaghì mìni saaɗ cààmɛ̀n kìcèm, fɔɔnnɛ mɛ̀sɛɛ̀ghsɛɛgh mɛ tì sɛsɛ̀kà mìni rì Tit mɛ nghɛnɛɛ lɛ mɛ ri mɛ̀sɛɛ̀ghsɛɛgh mɛ saaɗ.

¹⁵Fɔlɔɔ nnɛ ǹkɔ̀nɛ̀n ànɛ à rì rì nyi ɓi san wiǹ, à rì tì ǹtèghɛn à cee, cààmɛ̀n ki à yitii mɛ̀wog mɛ ɓì rì rì mɔ rì ɓum ɓɛ̀cèm, à ràɗ rì coo bɔgsɛ̀n bimiɗ ìnɛ ɓì ghàɓkà nyi rì yɔ̀.

¹⁶Ǹɗì rì kìnyàà ɓisuulɛ ǹtyweeyii mìni ɓi ɓìɓan ɓìcèm.