Read Bafia 2 KƆ̀RƐ̀ŊTYƐŊ 8 Bible Online

2 KƆ̀RƐ̀ŊTYƐŊ 8 - Bafia bible

2 KƆ̀RƐ̀ŊTYƐŊ 8

¹Ɓɔɔsoŋ̀, ti kɔ̀nkɔn lɛ di ɓyàa yii lèg ànɛ yɛ̀ɛ geesɛ̀n ì Bɛ̀ll ì rèsɛ̀ngà ɓi ɓìseŋi ɓi a Masedwan.

²Nsoò yɛ̀ɛ ɓɛ ɓaghà rì mɛ̀tɔɓ lɛɛ̀gwey, coo kinyàà ki ɓɛ nɗì rì kɔ rì kìsoghà kaa kicèm, ɓi nkìi lɛ ɓɛɛ syɔɔ̀ ɓyom lɛɛ̀gwey ri kìnyàà.

³Ǹkalii mìni lɛ, ɓɛ nsyɔ̀ɔ gàɓ ì ɓyom ìnɛ ì ghɛ̀ɛ̀sɛɛ rì ìtèɗ waa, ɓaà yiɓi ɓɛ ceesàg gì kɔm̀, mum kɛ̀ɛ kàŋ ɓɔ.

⁴Ɓɛ ntɔɔgh ɓìsi ɓɛ siìrɛ̀n lɛ ɓɔɔ teɗ gàɓ ɓi syɔ̀ɔ̀ à ɓyom ànɛ a kìikilɛ̀n ɓisuu ɓɛgherɛ̀n ɓɛ a Yorisalɛm.

⁵Com ki ɓɛ nkìi ki ncee ki tìi mɓoŋɓoŋi lɛ ɓɛ ri lɛ ɓɛ ki, lɛ ɓɛ lokà kìfalɛɛ ɓɔmiɗ ɗi Kan, ɓɛ falɛ̀n min a lɔ̀ŋkis lɛ rìkɔ̀n ɗi Bɛ̀ll.

⁶Fɔlɔɔ nnɛ tìi ntɔɔgh Tit lɛ a ratɛn kìsay ki nkɔ̀nɛ̀n ki a lɔ̀ŋkin lɔŋ yɛ̀ɛ à tumɛ̀ngà.

⁷Lɛ yɛ̀ɛ ɓì rì rì ìtèɗ ɓi ɓìɓan ɓìcèm lɛ rì ɓi rìgherɛ̀n, rì ɓi ɓìtòkì, rì rìyi ɗi ɓiɓan, rì rìfalɛ̀n ɗi ɓì rì ɓɛ̀falɛn ri Bɛ̀ll kɛ̀ɛ̀ vèg, rì ǹkɔ̀nɛ̀n ànɛ ɓì rì rì nyi ɓi san wìs, fɔlɔɔ nnɛ ti kɔ̀nkɔn lɛ ɓi resi tì girig ìtèɗ win ɓi kìɓan ki geesɛ̀n ki ki ɓiì kìlɛɛ kiǹ.

⁸Ǹkpaa ɓi mini kìɓan kiǹ lɛ kɛɛ ɓa ǹkàŋɗɛ̀n, wɔ̀lɛ ǹɗèsii mìni rìfalɛ̀n ɗi ɓum ɓɛɗɛŋ, lɛ di ɓi yi yɛ̀ɛ ɓì rì lɛ ɓì rèsì lɛ nɗem wu geesɛ̀n wu ɓì rì rì wɔ, wu ri lɛ sɛɛghi sɛɛghi.

⁹Lɛ ɓì yii nɗem wu geesɛ̀n wu Kan wìs Yeesus Kiris; nyi ànɛ à ɓaghà rì ìkum, à ghaasìghà nyimiɗ soghàsogha lɛ di a kumzi mìni rì kìsoghà kii.

¹⁰Ɗyomzɛ̀n ɗyɛm̀ ɗi ɓi kìɓan kiǹ ɗyɛɛ̀ɗìn lɔɔ; wɔ̀lɛ ki ri kìrɔɔ lɛ ɓi kɛǹ asu rì kìɓan ki ɓì ghɛ̀lɛ̀ngà kì kìi ɓi bèg ìmbog; mìni yɛɛ ɓaghà ɓum ɓɛ beèbɛ̀y ɓɛ ɓɛ lokà kì ɓeègh lɛ ɓɛɛ ki com, ɓɛ ki kì kɔ.

¹¹Ɓigomìnɛ lègsiina min kiɓan ki ɓì ɓekà lɛ ɓi ki, lɛ di syeesyee à ǹɗɛli anɛ ɓì tekà ɓi rìɓeg ɗi ɓì ɓekà a ghɛɛ̀sɛn ɗì rìroòzì ɗi ɓì ɓiì roòzii gàɓ ìnɛ yɛ̀ɛ ìtèɗ win wu ri.

¹²Syeesyee à rìkɔ̀n ànɛ lɛ mum a fa ɓɔgsì à ti à rɔɔghì Bɛ̀ll, lɛ Bɛ̀ll à ti à tekì rìfa ɗìn à seesèè com ki mum à rì rì kɔ, àa ki à yin ɗi kɔ.

¹³Kìɓan ki ǹkpaa ki yin lɛ, ɓi ɓa lɛ i ɓì ghɛɓsii ɓum ɓɛɗɛŋ mìnii rɔɓ rì kìsoghà; ki ri lɔŋ kiɓan ki lɛ ɓi ghɛɛ̀sag;

¹⁴ɓi nɗɛli wu tì rì wu miì, rìɓa ɗi ɓì rì rì ɓyom lɛɛ̀gwey ɗi ri lɛ ɗi ghɛɓsì ɓɔ ɓi kìsoghà kaa. Fɔlɔɔ nnɛ ŋwos adɛŋ ànɛ mìnii ri ɓa ɓi kìsoghà, ɓɔɔ ghɛɓsì girig mìni di ɓɔɔ ri rì ɓyom lɛɛ̀gwey. Fɔlɔɔ yɛɛ ri ɓiì kìi lɛ ɓi ɓa nɗɛli wufog.

¹⁵Fɛlɛ yɛ̀ɛ ki ri kìkànɛn lɛ: Mum ànɛ à ɓadɛ̀ngà lɛɛ̀gwey à ɓaghà ɓi ri gàɓ ìnɛ ì cee ǹɗèè; fɔɔnnɛ roànɛ à ɓadɛ̀ngà lɛsàg à kaarɛ̀ngà ɓi com.

¹⁶Bɛ̀ll ànɛ àa nfaa Tit ǹɗem wulɛ a falɛn rì mìni, lɔŋ yɛ̀ɛ ɓìsi a teɗ rìkem.

¹⁷Tit à tekà kìɓan ki tì tɔkà nyi rì kìnyàà, àa nki rèsii coo rifalɛ̀n à cee fɔlɔɔ lɛ nyimiɗ yɛɛ mɓeegh lɛ a yu a lɔ̀ŋkin,

¹⁸Tì romiì Tit ǹɗaŋ ɗi maaseŋi wìs anɛ ɓi rìgherɛ̀n ànɛ rìkem ɗi ɓi kìsay kii (ki a kìki) ɓisuu Syeesyee à Ɓɔlɛ, ɗi ri ɗìsààyɛn ɓi ɓìseŋi ɓi Kiris ɓìcèm.

¹⁹À kɛ̀ɛ̀dì kìɓaà lɛ, à rì mum ànɛ ɓìseŋi ɓi Kiris ɓi ɓɔngà lɛ ti kɛɛ̀kɛɛ nɗaŋ ɗi nyi ɓi kìsay ki geesɛ̀n ki ti kìki ɓisuu rikem ɗi Kan nyimiɗ rì ɓi rìrèsì ɗi ti rèresi rikɔ̀n ɗi tì rì rì ɗyɔ lɛ ti ghɛɓsi ɓum ɓɛɗɛŋ.

²⁰Ɓìsiì ɓɔmɓɔm lɛ ɓum ɓɛ̀ kɛɛ̀ pɛs ɓisi ɓi rìkɛ̀ɛ̀kɛ̀ɛ̀sì ɗi ɓyoo mɔ̀ɔ̀ni ɓi ntɛ̀g wu miì wu seesee ɓìsi.

²¹Ɓisuulɛ ɓìsiì kaakaa lɛ ti ki ɓìɓan ɓi ɓi ri lɛ syeesyee, nni àa ɓi mis mɛ Kan mɔ rì mɔ nnɛ rìkì ɗis ɗi ghɛɛ̀sɛɛ kì rɔɔtɛɛ, ɗi ghɛɛ̀sɛɛ girig lɛ ɗi rɔɔtɛ̀n ɓi mis mɛ ɓum.

²²Ɓi ɓumɓɛ tì romiì, tì ɓɔ̀ɓtɛɛ yì geni wis adɛŋ ànɛ ɓi rìgherɛ̀n, à rì ŋwaànɛ tì mɛ fiɓi rifalɛ̀n ɗi ɗi cee ɗiǹ ɓi coo ntyweeyi wu à rì rì wɔ rì mìni.

²³Ɓi Tit, à rì mum ànɛ ti kɛ̀ɛ̀kɛɛ ri nyi, tì ki kìki kisay nɗaŋ ɓisu win; ɓɛ̀geni ɓis ɓɛ à rìì rì ɓɔ, ɓɔɔ ri ɓumɓɛ ɓìseŋi ɓi Kiris ɓyɛɛ romiì, ɓɛɛ̀ sasay ɓisuu rikem ɗi Kiris.

²⁴Rèsiina min ɓi mis mɛ ɓiseŋi ɓi Kiris ǹkɔ̀nɛ̀n ànɛ ɓì rì rì nyi ɓi ɓɛg wàà, ɓì kì girig lɛ rìsɛg ɗi tì ti tì sɛsɛ̀g mìni ɓi mis maa, ɗyɛɛ ghɛnɛn lɛ ɗi ri saaɗ.