Read Bafia 2 KƆ̀RƐ̀ŊTYƐŊ 9 Bible Online

2 KƆ̀RƐ̀ŊTYƐŊ 9 - Bafia bible

2 KƆ̀RƐ̀ŊTYƐŊ 9

¹Ki ghɛɓsii ɓi com lɛ nkaǹ yì mìni ɓi kìɓan ki ki seesee gɛɓsɛ̀n ìnɛ yɛɛ̀ kɔ̀ɔkɔnɛ̀n ɓisuu ɓɛgherɛ̀n.

²Ɓisuulɛ ǹ-yii syeesyee à rìkɔ̀n ànɛ ɓì rì rì nyi, innɛ mɛ̀ ǹti ǹsaàsànɛ̀n ɓumɓɛ a Masedwan ɓi san ànɛ a lɔ̀ŋkin, di nkpaakpaa ɓɔ lɛ: Ɓɛ̀gherɛ̀n ɓɛ a Akayi ɓɛ ri ɓɛ̀pègsɛn lɛ ɓɛɛ ghɛɓsi à tumɛ̀n ɓi bèg ìmbog. Fɔɔnnɛ rìfalɛ̀n ɗin ɗi nfatii ɓìseŋi lɛɛ̀gwey itèɗ ɓi nyòò.

³Ǹɗomiì ɓɔɔseŋi ɓis ɓɛ ɓi rìgherɛ̀n lɛ rìsɛg ɗi tìi nsɛɛgh mìni ɗyɛ̀ kɛɛ̀ ghɛnɛn lɛ ɗi ri zɛy ɓi ɓɛg ànɛ̀n, rì tì lɛ, ɓi ɓa lɔŋ ɓɛpègsɛn a tààkaà, fɛlɛ yɛ̀ɛ màa kpaà.

⁴Ki ghɛɛ̀sɛɛ ɓi lɛ, i ɓumɓɛ a Masedwan ɓɛ yuù mɛ̀ kìfoŋì, ɓɛɛ tanɛn lɛ ɓì yin ɓɛpègsɛn, fɔlɔɔ a rì ɓiì ɓaà ǹtoòrìɗ ɓi san ànɛ a ɓìsi ɓɛ tìi nɗì rì coo ntyweeyi ri mìni, kɛ̀ɛ nki ɓùŋdi ntoòrìɗ wu mìniìɓɔmiɗ ɓì rì ɓiì woògh.

⁵Fɔlɔɔ nnɛ mɛ̀ɛ nghɛɛ kìrɔɔ lɛ, ntɔg ɓɛ̀geni ɓis ɓɛ ɓi rìgherɛ̀n lɛ ɓɛɛ log kìyùu yi foo ri ɓìsi, lɛ ɓɛɛ pegsɛn mɛ̀fafàà min mɛ ɓì kàkà lɛ ɓì ɓiì faà rì syeesyee à ǹɗem; mɛ ghɛɛ̀sɛɛ kì ɓaà mɛ̀fafàà mɛ mɛ kilɛɛ rì syeesyee à ǹɗem àa mɛ mɛ kilɛɛ rì ìkako.

⁶Yiina lɛ ŋwaànɛ à ɓɛ̀li ɓyom lɛsàg, à ɓiì ɓùmii girig lɛsàg; roànɛ à ɓɛ̀li lɛɛ̀gwey, à ɓùmì girig lɛɛ̀gwey.

⁷Ki ghɛɛ̀sɛɛ lɛ mum ǹcèm a fa lèg ànɛ yɛ̀ɛ ǹɗem wii wu feègh, kɛ̀ɛ̀ bim, kɛ̀ɛ̀ ǹkàŋɗɛ̀n, ɓisuulɛ Bɛ̀ll à ti à keesàg roànɛ à ti à falàg rì kìnyàà.

⁸Bɛ̀ll à ki rì rì ìtèɗ wulɛ à roòzì mìni rì ɓɛ̀mààgh mɛ̀kuu mɛ̀cèm ɓi lèg ànɛ lɛ ɓi ɓa cààmɛ̀n kìcèm rì ɓyom ɓi ɓì ghɛ̀ɛ̀sɛɛ kì ɓaà rì ɓyɔ, ɓì ki rɔ̀ɓti ti ri ɓyom lɛɛ̀gwey ɓi ɓì rì lɛ ɓì ghɛɛ̀ghɛ̀ɓsì ɓum miì.

⁹Lɔŋ yɛ̀ɛ ki ri kìkànɛn lɛ: À kàɓsàkà ɓìrɔɔ ɓiì, à fa rì ɓɛ̀soghàsogha, kìrɔɔ-ǹɗem wìì a rì fìɗyàɓ fikɔ̀ɔ̀.

¹⁰Roànɛ à ti à falàg ǹsalì dɛm boo ì ɓyom, à ki falag ti ɓum ɓìɗilàg ɓi ɓɛɛ ɗi, à rì mìni ɓiì faà boo ì ɓyom à tègsì yɔ̀ à ki kì lɛ, ɓìɗùn ɓi ɓi rìɓòò ɗin ɓyɛɛ teghɛn.

¹¹À rì mìni ɓiì kumzii yɛ̀ɛ ki ghɛɛ̀sɛɛ ɓyààmɛ̀n ɓìcèm ɓi lèg ànɛ lɛ, ɓi ɓa ɓyɛ̀ ki fɔy riɓòò, rì tì lɛ, ɓum lɛɛ̀gwey ɓɛ ɓiì faà Bɛ̀ll ɓìtògsɛ̀n ɓisuu rifa ɗin ɗi tì ɓiì kɛ̀ɛ ɓɔ kìfaà.

¹²Ɓisuulɛ, kìsay ki rìfa ɗìn ɗi ri ɓiì kìi, kaa ɓa ɓi lɔŋ lɛ kɛɛ ghɛɓsi ɓɛ̀gherɛ̀n, wɔ̀lɛ rìfa ɗìn ɗi ɓiì tinii ɓum lɛɛ̀gwey lɛ ɓɛɛ fafa Bɛ̀ll ɓìtògsɛ̀n.

¹³Ɓisuulɛ gɛɓsɛ̀n ìnɛ kìsay kiǹ ki ri rì yɔ̀, ɓum lɛɛ̀gwey ɓɛ ri fa Bɛ̀ll rìkem, ɓi mɛ̀wog mɛ ɓì rì rì mɔ ɓi Syeesyee à Ɓɔlɛ à Kiris ànɛ ɓi làalamɓɛ̀n, rì ɓi rìɓòò ɗin ɗi ɗyɛɛ̀ kìki lɛ, ɓi ɓutɛn rì ɓɔ, ɓì ki ɓùtɛn ɗi ɓum ɓɛ̀cèm.

¹⁴Ɓɛ ri ɓɔ̀ŋzag Bɛ̀ll ɓisu win ri coo nkɔ̀nɛ̀n lɛɛ̀gwey ɓisuu geesɛ̀n ìnɛ Bɛ̀ll à kìghà mìni kɛ̀ɛ̀ vèg.

¹⁵Bɛ̀ll a teɗ rìkem ɓi rìfa ɗii ɗi ɗi ri kɛ̀ɛ̀ kìfèègh.